༄༅། །ལྷག་བསམ་རབ་ཏུ་ཡངས་པའི་མཁྱེན་ལྡན་གྱི་སྐྱེས་བུ་རྣམ་པའི་དྲུང་དུ།
ཆེད་ཞུ།
འདི་ག་སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་གི་ལས་གཞིའི་ཁུངས་སུ། དམ་པ་སྔ་མ་གཙོ་བྱས་པའི་དེང་གི་རྩོམ་པ་པོ་ཚད་ལྡན་དག་གིས་བརྩམས་ཆོས་ཀྱི་རིགས། ༼ རིག་མཛོད་དཔེ་ཚོགས། ༽ཀྱི་ངོ་བོར་པར་སྐྲུན་རྩོམ་སྒྲིག་གི་ལས་གཞི་ཞིག་ཡོད་པ་ལྟར། དམ་པ་སྔ་མ་དག་གི་གསུང་རབ་དེབ་གཟུགས་པར་སྐྲུན་དང་། དེང་གི་རྩོམ་པ་པོ་ཚད་ལྡན་༼རང་ཉིད་དམ།༽ དག་གི་བརྩམས་ཆོས་དག །
དེབ་གཟུགས་པར་སྐྲུན་བྱ་འདོད་ཡོད་མཁན་དག་གིས་པར་སྐྲུན་བྱ་རྒྱུའི་གཞུང་ཉིད་དེབ་གཟུགས་སུ་རྩོམ་སྒྲིག་བྱེད་དགོས་ཚེ། འོག་གི་ཆ་རྐྱེན་དག་ཚང་ན། འདི་ག་རྩོམ་སྒྲིག་ཁང་གིས་རིན་མེད་དུ་རྩོམ་སྒྲིག་གི་ཕྱག་རོགས་ཞུ་རྒྱུ་ཡིན།
ཚང་དགོས་པའི་ཆ་རྐྱེན།
དང་པོ། བཀའ་བསྟན་སོགས་སམ་རིས་སུ་མ་ཆད་པའི་དམ་པ་དག་གི་གསུང་རྩོམ་དང་། དེང་གི་རྩོམ་པ་པོ་ཚད་ལྡན་ནམ། མིག་སྔར་སྤྱི་ཚོགས་སྟེང་ཤུགས་རྐྱེན་ཅུང་ཡོད་པ་དག་གི་བརྩམས་ཆོས་ཡིན་དགོས།
གཉིས་པ། འདི་ག་རྩོམ་སྒྲིག་ཁང་དུ་ལས་བྱེད་ཉུང་ངུ་ལས་མེད་པས། ཞུས་དག་གཏོང་ཁོམ་མེད་ན། དོ་བདག་སོ་སོས་ཞུས་དག་གཏོང་དགོས།
གསུམ་པ། རྩོམ་སྒྲིག་བྱས་པའི་དེབ་ཀྱི་པར་རྩ་འདི་ག་རྩོམ་སྒྲིག་ཁང་གིས་འཕྲུལ་དེབ་བཟོས་ཏེ་དྲ་ཚིགས་སུ་འཇོག་རྒྱུར་ཐུགས་མོས་ཡོད་དགོས།
བཞི་པ། པར་རྩའི་བདག་དབང་དོ་བདག་དང་འདི་ག་རྩོམ་སྒྲིག་ཁང་གཉིས་ཀས་བྱེད་རྒྱུར་ཐུགས་མོས་ཡོད་དགོས།
ལྔ་པ། རྒྱབ་ཤ་སོགས་འདི་ག་རྩོམ་སྒྲིག་ཁང་གི་སྒྲིག་གཞི་ལྟར་འགྲོ་རྒྱུར་ཐུགས་མོས་ཡོད་དགོས།
དྲུག་པ། འདི་ག་རྩོམ་སྒྲིག་ཁང་གི་ལས་གཞིའི་ཁོངས་སུ་ཡོད་པའི་༼རིག་མཛོད་དཔེ་ཚོགས།༽ ཀྱི་ངོ་བོར་རྩོམ་སྒྲིག་བྱེད་རྒྱུར་ཐུགས་མོས་ཡོད་དགོས།
བདུན་པ། ཡིག་ནོར་སོགས་རྗེས་སུ་གླེང་གཞི་གང་བྱུང་ཡང་འགན་དོ་བདག་རང་ནས་འཁུར་ཐུབ་དགོས།
བརྒྱད་པ། དཔེ་ཆའི་ནང་དུ་པར་དང་གླེང་བརྗོད་སོགས་གང་འཇོག་དོ་བདག་སོ་སོའི་ཐུགས་འདོད་བཞིན་ཕྱག་རོགས་ཞུ་ངེས་ཡིན།
དགུ་པ། འདི་ག་རྩོམ་སྒྲིག་ཁང་གིས་དེབ་གཟུགས་སུ་རྩོམ་སྒྲིག་བྱེད་རྒྱུ་ལས། པར་སྐྲུན་སོགས་དོ་བདག་སོ་སོས་བྱེད་དགོས།
བཅུ་པ། གོང་གི་ཆ་རྐྱེན་འདི་དག་ཚང་ཚེ་རིན་མེད་དུ་རྩོམ་སྒྲིག་བྱ་ངེས་ཡིན།
ཞེས་སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་གིས་ཕྱི་ལོ་༢༠༡༥ལོའི་ཟླ་༦ཚེས་༢༥ཉིན་གུས་པས་ཕུལ།