བཙན་བྱོལ་བོད་མིའི་ཆབ་སྲིད་ཀྱི་དབུ་ཁྲིད་སྲིད་སྐྱོང་སྤེན་པ་ཚེ་རིང་མཆོག་གིས་སྲིད་སྐྱོང་གི་མཛད་ཁུར་བཞེས་ཏེ་ལོ་ངོ་གཅིག་འཁོར་མཚམས་ཕྱི་ཟླ་ ༥ པའི་ཚེས་ ༢༨ ནས་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་ཁུལ་གྱི་བོད་མིའི་གཞིས་ཆགས་ཁག་ལ་འཚམས་གཟིགས་སུ་ཕེབས་ཡོད་ཅིང་། ཐོག་མའི་ཉིན་གསུམ་རིང་རྒྱ་གར་ཀར་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་མཆོག་དང་། སྤྱི་ཁྱབ་དྲུང་ཆེ་རྣམ་གཉིས་དང་མཇལ་འཕྲད་གནང་བ་སོགས་མཛད་རིམ་གལ་ཆེན་ཁག་ཅིག་བསྐྱངས་གྲུབ་རྗེས་ཕྱི་ཚེས་ ༣༡ ཉིན་སྦེལ་ཀོབ་གཞིས་ཆགས་སུ་ཕེབས་འབྱོར་གྱིས་སྦེལ་ཀོབ་བོད་མིའི་གཞིས་ཆགས་ཀྱི་གཞུང་སྒོ་གསར་པ་དབུ་འབྱེད་མཛད་པ་དང་། སྦེལ་ཀོབ་བོད་ཁྱིམ་སློབ་གྲྭ་སོགས་སློབ་གྲྭ་ཁག་དང་། སེ་ར་བྱེས་སྨད་གཉིས་དང་། ཐེག་མཆོག་རྣམ་གྲོལ་གླིང་། བཀྲ་ཤིས་ལྷུན་པོ་སོགས་དགོན་སྡེ་གྲྭ་ཚང་ཁག་དང་། དེ་བཞིན་བོད་མིའི་སྒྲིག་འཛུགས་ཀྱི་ལས་ཁུངས་ཁག་དང་སྨན་ཁང་། གྲོང་སྡེ་ཁག་དང་རྒས་གསོ་ཁང་སོགས་སུ་ཉིན་ ༤ རིང་འཚམས་གཟིགས་གནང་།
ད་ལན་གྱི་འཚམས་གཟིགས་སྐབས་སློབ་གྲྭ་ཁག་དང་། དགོན་སྡེ། མི་མང་བཅས་ལ་གསུང་བཤད་གནང་བ་རྣམས་དང་། དྲི་བར་ལན་འདེབས་གནང་བ་བཅས་ཀྱི་ནང་དོན་སྙིང་བསྡུས་བྱས་ན། ད་ལན་ལྷོ་ཕྱོགས་ཁུལ་ལ་འཚམས་གཟིགས་གནང་བའི་དགོས་དོན་ནི། ཕྱོགས་གཅིག་ནས་ཁོང་གིས་སྲིད་སྐྱོང་གི་འགན་ཁུར་གྱི་སྟེང་དུ་སྒྲིག་འཛུགས་ཀྱི་ལྷན་ཁང་བཞིའི་བཀའ་བློན་གྱི་འགན་ཡང་འཁུར་དགོས་ཀྱི་ཡོད་སྟབས་མང་ཚོགས་ཀྱི་དངོས་ཡོད་གནས་སྟངས་གང་འདྲ་ཡིན་མིན་མཁྱེན་རྟོགས་གསལ་བོ་ཡོང་སླད་ཕེབས་པ་ཡིན་སྐོར་དང་། ཕྱོགས་གཞན་ནས། བཙན་བྱོལ་བོད་མི་སྤྱི་ཡོངས་དང་ལྷག་པར་དུ་གཞོན་སྐྱེས་རྣམས་ནས་གལ་གནད་ཆེ་ཤོས་སུ་བརྩིས་ཏེ་ ༧གོང་ས་མཆོག་གི་དགོངས་གཞི་དང་། བཙན་བྱོལ་བོད་མིའི་སྒྲིག་འཛུགས་དང་སྐབས་ ༡༦ པའི་བཀའ་ཤག་གི་སྲིད་བྱུས་བཞེངས་ཕྱོགས་དང་ལས་དོན་བྱེད་ཕྱོགས། བོད་ནང་གི་ཛ་དྲག་གནས་སྟངས་བཅས་ཀྱི་ཐད་ལ་གོ་རྟོགས་སྤེལ་བའི་ཆེད་དང་། བཙན་བྱོལ་བོད་མི་རྣམས་ཀྱིས་བོད་མིའི་ཆོས་དང་རིག་གཞུང་འཛིན་སྐྱོང་སྤེལ་གསུམ་བྱེད་ཕྱོགས། བོད་མིའི་རྩ་དོན་འཐབ་རྩོད་བཅས་ཀྱི་ཐོག་ནུས་པ་མཉམ་སྤུངས་གནང་དགོས་པའི་གལ་གནད་སྐོར་སོགས་གསུངས་ཡོད་པ་བཅས་གསར་གནས་སྙིང་བསྡུས་སུ།
སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས། ཟླ་ ༦ ཚེས་ ༥ ཉིན།