དྲ་ཐོག་འཇུག་དུས། 2022 ལོའི་ཟླ་བ། Nov ཚེས། 13 རེས་གཟའ། Sun

མཁན་ཆེན་བཀྲ་ཤིས་ཚེ་ཐར།

ཚད་གཞི།
(1 འོས་འཕེན། )

སེར་བྱེས་མཁན་རབས་དོན་བརྒྱད་པ་བྲ་ཏི་དགེ་བཤེས་བཀྲ་ཤིས་ཚེ་ཐར་མཆོག་ནི། རྒྱ་གར་ཤར་ཕྱོགས་མོན་ཡུལ་དུ་སྐུ་འཁྲུངས། གུང་ལོ་བརྒྱད་ཀྱི་ཐོག་སེར་བྱེས་གྲྭ་ཚང་གི་ཆོས་སྒོར་ཞུགས་ཏེ་གཞུང་ཆེན་ཁག་ལ་ཐོས་བསམ་སློབ་གཉེར་མཐར་སོན་གནང་སྟེ། ཕྱི་ལོ་༡༩༩༥ ལོར་དགེ་བཤེས་ལྷ་རམས་པའི་གྲྭ་སྐོར་དམ་འཇོག་གནང་། ༡༩༩༦ ལོར་དཔལ་ལྡན་སྨད་རྒྱུད་གྲྭ་ཚང་དུ་སྔགས་ཀྱི་གསན་བསམ་མཛད། ༢༠༠༩ ལོར་སེར་བྱེས་མཁས་སྙན་གྲྭ་ཚང་གི་ཁྲིམས་བདག་དགེ་བསྐོས་གནང་། རྒྱུན་དུ་མིང་གྲགས་སོགས་ལ་མི་བལྟ་བར་གྲྭ་རྐྱང་དཀྱུས་མ་ཞིག་མཚམས་དང་བསྙེན་སྒྲུབ་ལ་ཡང་ཡང་བཞུགས་བཞིན་པའི་ཁར། སྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་ནས་ཐུགས་དམ་དབྱིངས་དཔྱད་ཀྱིས་སེར་བྱེས་མཁས་སྙན་གྲྭ་ཚང་གི་མཁན་རབས་༧༨ པའི་ཕྱག་རྟགས་ཪིན་པོ་ཆེ་ཕེབས་པ་བཞིན། ཕྱི་ལོ་༢༠༢༢ ལོའི་ཕྱི་ཟླ་༩ ཚེས་༡༠ ཉིན་གྲྭ་ཚང་གི་ཚོགས་སྡེ་ཁག་གི་འགན་འཛིན་རྣམས་དང་། ཁང་ཚན་རྒན་རྣམ་པ་བཅས་མཁན་རིན་པོ་ཆེའི་བླ་བྲང་ནས་སྤོས་སྣེ་དང་བཅས་གདན་འདྲེན་ཞུས་ནས་སེར་བྱེས་བྲ་ཏི་ཁང་ཚན་དུ་མཛད་སྒོ་སྟབས་བདེ་ཞིག་འཚོགས། དེ་ནས་སེར་བྱེས་མཁས་སྙན་གྲྭ་ཚང་གི་ཚོགས་མགོན་དུ་གདན་ཞུས་ཀྱིས་མཁན་ཁྲིར་མངའ་གསོལ་དང་བཅས་ཏེ། ཞིང་མཆོག་འདུས་པ་རྒྱ་མཚོར་བསྙེན་བཀུར་ཟབ་རྒྱས་དང་འབྲེལ་ཚོགས་མགོན་དུ་བསྔོ་བ་གསུངས་པ་སོགས་མཁན་པོའི་མཛད་ཁུར་དངོས་སུ་བཞེས། དེ་ནས་གྲྭ་ཚང་ཐོག་ཁར་སེ་ར་བླ་སྤྱི་དང་བྱེས་སྨད་གཉིས་ཀྱི་དབུ་ཆོས་རྣམས་དང་། དེ་བཞིན་ཚོགས་པ་སོ་སོའི་འགན་འཛིན། ཁང་ཚན་རྒན་རྣམ་པ་བཅས་མཛད་སྒོར་མཉམ་བཞུགས་གནང་། དེའི་སྐབས་སུ་སྐྱབས་རྗེ་མཁན་རིན་པོ་ཆེ་མཆོག་ནས་ཚོགས་པ་སྤྱི་སྒེར་སོ་སོའི་ལས་དོན་བྱེད་ཕྱོགས་ཐད། ྋསྤྱི་ནོར་ྋགོང་ས་ྋསྐྱབས་མགོན་ཆེན་པོའི་བཀའ་དགོངས་བཞིན་གནང་དགོས་པའི་བཀའ་སློབ་ལམ་སྟོན་ཕེབས། མཛད་སྒོ་གྲོལ་མཚམས་སུ་བྱེས་བླ་བྲང་དུ་གདན་ཞུས་མཛད། དེ་ནས་སྔ་དྲོར་གྲྭ་ཚང་གི་ཆོས་རར་གདན་འདྲེན་ཞུས་ཏེ། བྱང་ཆུབ་ལམ་རིམ་ཆེན་མོའི་གསུང་ཆོས་དབུ་འཛུགས་གནང་། ཉིན་གུང་སེར་བྱེས་གྲྭ་ཚང་དུ་གྲྭ་ཚང་གི་ཚོགས་སྡེ་ཁག་དང་། བླ་སྤྲུལ་དགེ་བཤེས་སོགས་དང་། དེ་བཞིན་གཞིས་གྲོང་གི་ཚོགས་སྡེ་ཁག་གི་འགན་འཛིན་སོགས་འབྲེལ་ཡོད་སྐུ་མགྲོན་རྣམ་པར་གསོལ་ཚིགས་དང་བཅས་མཁན་པོའི་ཁྲི་འདོན་གྱི་མཛད་སྒོ་ལེགས་པར་བསྐྱངས། ད་ལྟའི་ཆར་མཁན་པོའི་མཛད་ཁུར་བཞེས་བཞིན་པ་བཅས་མཛད་རྣམ་མདོར་བསྡུས་སུ།

༢༠༢༢.༡༡.༡༩ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་]ཞེས་རྩོམ་ཁུངས་ཁ་གསལ་འགོད་དགོས།

ཤོག་ངོས་འདི་ལ་ཐེངས་ 5213 གཟིགས་འདུག མཐའ་མའི་བསྐྱར་བཅོས། 2023 ལོའི་ཟླ་བ། Nov ཚེས། 16 རེས་གཟའ། Thu