གསང་ཆེན་བསྟན་པའི་མཛོད་འཛིན་དཔལ་ལྡན་སྟོད་རྒྱུད་གྲྭ་ཚང་དང་། སྐུ་བཅར་རྩེ་རྣམ་རྒྱལ་གྲྭ་ཚང་ཕན་བདེ་ལེགས་བཤད་གླིང་གཉིས་ཀྱི་མཁན་ཟུར། བསྟན་པའི་གསལ་བྱེད་༸སྐྱབས་རྗེ་བྱ་དོ་རིན་པོ་ཆེ་རྗེ་བཙུན་བསྟན་འཛིན་འབྱུང་གནས་དཔལ་བཟང་པོ་མཆོག་ལ་སེར་བྱེས་གྲྭ་ཚང་ནས་ཇི་ལྟར་གསོལ་བ་བཏབ་དོན་བཞིན། བོད་རྒྱལ་ལོ་༢༡༥༣ཕྱི་ལོ་༢༠༢༦ཟླ་༦ཚེས་༡༧ནས་ཚེས་༣༠བར། སེར་བྱེས་མཁན་སྙན་གྲྭ་ཚང་གི་གཙུག་ལག་ཁང་དུ། གྲྭ་ཚང་འདི་ཉིད་ཀྱི་ཐུན་མོང་མ་ཡིན་པའི་ལྷག་པའི་ལྷ་མཆོག་བཅོམ་ལྡན་འདས་པདྨ་ཡང་གསང་ཁྲོས་པའི་ཆོས་སྐོར་རྟ་པོད་དུ་གྲགས་པ་དང་སོག་པོ་ཁལ་ཁ་དམ་ཚིག་རྡོ་རྗེའི་གསུང་རྟ་མགྲིན་གྱི་ཆོས་སྐོར་བཅས་ལས་ལུང་སྣ་ཚོགས་དང་། སྔོན་འགྲོའི་ཁྲིད་ཡིག །དམིགས་རིམ། བསྐྱེད་རིམ་དང་རྫོགས་རིམ་ཀྱི་ཁྲིད་བཅས་གནང་བ་དང་། ཕྱི་ཚེས་༢༤བོད་ཟླ་ལྔ་པའི་ཚེས་བཅུ་དང་སློབ་དཔོན་གྱི་དུས་ཆེན་ཁྱད་པར་ཅན་དང་གཟའ་ལྷག་པ་བཅས་མ་བསྒྲིགས་ལྷུན་གྲུབ་ཏུ་བྱུང་བའི་དུས་ཚེས་བཟང་པོར་བཅོམ་ལྡན་འདས་དཔལ་རྟ་མགྲིན་ཡང་གསང་ཁྲོས་པའི་དབང་གི་སྟ་གོན་དང་འབྲེལ་རྟ་མགྲིན་གཏོར་དབང་། ཚེས་༢༥ཉིན། རྟ་མགྲིན་ཡང་གསང་གི་དབང་ཆེན་དང་གིང་ལྔའི་རྗེས་གནང་། ཚེས་༢༦ཉིན། ༸གོང་ས་ལྔ་པ་ཆེན་པོ་ལ་མགོན་པོ་ཀླུ་སྒྲུབ་ཀྱི་ཞལ་གཟིགས་ནས་དབང་བསྐུར་བར་མཛད་པ་ལས་བརྒྱུད་པ་རྟ་མགྲིན་ཡང་གསང་གི་ཉེ་བརྒྱུད་ཐུན་མོང་མ་ཡིན་པའི་དབང་དང་གཟའ་གདོང་རྗེས་གནང་། ཚེས་༢༧ཉིན། ༸གོང་ས་ལྔ་པ་ཆེན་པོ་ལ་སློབ་དཔོན་པདྨ་འབྱུང་གནས་ཀྱི་ཞལ་གཟིགས་ཤིང་དབང་བསྐུར་བར་མཛད་པ་ལས་བརྒྱུད་པ་རྟ་མགྲིན་ཁམས་གསུམ་ཟིལ་གནོན་གྱི་དབང་དང་ལྕམ་སྲིང་གཙོ་འཁོར་གྱི་རྗེས་གནང་། ཚེས་༢༨ཉིན། ༸གོང་ས་ལྔ་པ་ཆེན་པོ་ལ་རྩ་གསུམ་ལྷ་ཡིས་ཞལ་གཟིགས་ནས་གནང་བའི་རྟ་མགྲིན་དམ་སྲི་ཟིལ་གནོན་གྱི་དབང་དང་རྫོང་ཆུང་ཚེ་དབང་ངམ་ཚེ་རྟ་ཟུང་འབྲེལ་གྱི་དབང་གནང་། ཚེས་ཉེར་༢༩ཉིན་ཁྲིད་རྣམས་ཡོངས་སུ་གྲུབ་ཅིང་ལྕམ་སྲིང་གི་བེའུ་བུམ་གྱི་ལུང་ཡང་གནང་། ཚེས་༣༠ ཉིན། ལྕམ་སྲིང་གི་བེའུ་བུམ་གྱི་ལུང་གི་འཕྲོ་ནས་ཁོང་ཉིད་ལ་ལུང་རྒྱུན་གང་ཡོད་ཆ་ཚང་བ་གནང་གྲུབ་སྟེ་བསྟན་འགྲོར་ཕན་པའི་བཀའ་སློབ་ལམ་སྟོན་དང་བཅས་ཐེངས་འདིའི་ཉིན་གྲངས་བཅུ་བཞིའི་རིང་གི་ཆོས་འབྲེལ་ལེགས་པར་གྲུབ་བོ།།

༸སྤྱི་ནོར་༸གོང་ས་སྐྱབས་༸མགོན་ཆེན་པོ་མཆོག་གི་བཀའ་དགོངས་གཙུག་ཏུ་བཀུར་ཏེ། མཁས་བཙུན་བཟང་གསུམ་གྱི་ཡོན་ཏན་དུ་མས་རབ་ཏུ་བརྒྱན་པའི་བསྟན་པའི་གསལ་བྱེད་སེར་བྱེས་ཧར་གདོང་ཚོགས་ཆེན་སྤྲུལ་སྐུ་ཁང་སེར་རིན་པོ་ཆེ་༸རྗེ་བཙུན་བསྟན་འཛིན་ཚུལ་ཁྲིམས་དཔལ་ལྡན་དཔལ་བཟང་པོ་མཆོག་ནས། གསང་ཆེན་རིག་པ་འཛིན་པའི་སྡེ་ཆེན་པོ་དཔལ་ལྡན་རྒྱུད་སྟོད་གྲྭ་ཚང་གི་བླ་མ་དབུ་མཛད་ཀྱི་མཛད་ཁུར་ལེགས་པར་གྲུབ་སྟེ། ཕྱི་ལོ་ ༢༠༢༦ ཟླ་ ༣ ཚེས་ ༢ ཉིན། གསང་ཆེན་ར་མོ་ཆེ་གཉིས་པ་དཔལ་ལྡན་རྒྱུད་སྟོད་གྲྭ་ཚང་གི་མཁན་རབས་བརྒྱ་དང་ཉེར་དགུ་པར་ཁྲིར་བཞུགས་མངའ་གསོལ་མཛད་པར་སྒོ་གསུམ་གུས་པས་འཚམ་འདྲི་བཀྲ་ཤིས་བདེ་ལེགས་གྲངས་མེད་ཞུ་བ་དང་། སླད་མར་ཡང་། བསྟན་འགྲོའི་དོན་དུ་སྐུ་ཚེ་མི་ཤིགས་རྡོ་རྗེའི་ཁྲི་འཕང་མཐོན་པོར་རྟག་ཏུ་བརྟན་ཅིང་། མཛད་འཕྲིན་ནམ་མཁའི་མཐའ་དང་མཉམ་པར་འཇུག་པའི་གསོལ་བ་སྨོན་ལམ་ལན་བརྒྱར་འདེབས་པ་ལགས་སོ། །

སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས།
༢༠༢༦ ལོའི་ཟླ་༣ ཚེས་ ༢ ལ།