འཕྲིན་གསར།

འཕྲིན་གསར། (58)

སེར་བྱེས་གྲྭ་ཚང་གི་སློབ་གཉེར་བའི་ལོ་འཁོར་རྒྱུགས་སྤྲོད་རྣམས་ཀྱི་ཡ་གྱལ་བློ་རྒྱུགས་དང་ཟུར་སྦྱོང་གི་རྒྱུགས་སྤྲོད་དབུ་འཛུགས་བྱས་སོང་།
           ཕྱི་ལོ་༢༠༡༨ལོའི་ཟླ་༨ཚེས་༢༨ནས་སེར་བྱེས་མཁས་སྙན་གྲྭ་ཚང་གི་ལོ་འཁོར་རྒྱུགས་སྤྲོད་དག་དབུ་འཛུགས་བྱས་ཏེ་བློ་རྒྱུགས་ཆེན་མོ་དང་རྩོད་གཞུང་བློ་རྒྱུགས་གཉིས་ཚར་བ་དང་། རིག་གནས་རྒྱུགས་སྤྲོད་ཁ་སང་༨ཚེས་༣༠ ནས་དབུ་འཛུགས་བྱས། བློ་རྒྱུགས་ཆེན་མོ་ནི་གནའ་ནས་གྲྭ་ཚང་གི་རྒྱུགས་སྤྲོད་ཀྱི་ཕྱག་བཞེས་སུ་ཡོད་པ་དེ་མི་ཉམས་བརྒྱུད་འཛིན་བྱས་པ་ཞིག་ཡིན་ལ། རྒྱུགས་སྤྲོད་ལ་སློབ་གཉེར་བ་ཚང་མ་ཕེབས་དགོས་པ་དང་། རྒྱུགས་སྤྲད་རྗེས་འཛིན་གྲྭ་རེ་རེ་བྱས་ཏེ་མཁན་རིན་པོ་ཆེར་མཇལ་ཁ་ཞུ་སྲོལ་ཡོད་ཅིང་། སློབ་གཉེར་བ་རེ་རེ་རྒྱུགས་ཞིབ་པའི་དྲུང་དུ་བསྡད་དེ་རྒྱུགས་ཞིབ་པས་རྒྱུགས་འབུལ་གྱི་གཞུང་ཚན་དེ་ལས་ཚིག་སྣེ་གང་ཞིག་བཟུང་ཚེ་དེ་ནས་བློ་འདོན་བྱེད་དགོས་པ་ཡིན། གཞན་རྩོད་གཞུང་བློ་རྒྱུགས་དང་རིག་གནས་རྒྱུགས་སྤྲོད་ནི་བྲིས་རྒྱུགས་ཡིན་པ་དང་། ཉིན་རེར་ཚོགས་ཐུན་སྔ་དགོང་གཉིས་དང་ཚོགས་ཐུན་རེར་ཆུ་ཚོད་གསུམ་རེ་བྱས་ཏེ་སེར་བྱེས་སློབ་གཉེར་དོ་དམ་ཁང་ངམ་རྒྱུགས་ཞིབ་ལྷན་ཚོགས་ཀྱི་བཀོད་སྒྲིག་དང་སྟངས་འཛིན་གྱི་འོག་ཏུ་རྒྱུགས་འབུལ་ཞུ་དགོས་པ་ཡིན།

         དེ་ཡང་རྒྱུགས་སྤྲོད་དུ་ཕེབས་མི་དགོས་པའི་དམིགས་བསལ་ཅན་གྲྭ་ཚང་གི་ལས་བྱེད་ཀྱི་གྲས་སུ་ཡོད་པ་རྣམས་ཕུད་སློབ་གཉེར་བ་ཚང་མ་སྡེ་ཚན་དུ་མར་བགོས་ཏེ་སྡེ་ཚན་སོ་སོར་རྒྱུགས་ཞིབ་པ་དགེ་བཤེས་ཁ་ཤས་རེ་ཆ་བགོས་ཀྱིས་རྒྱུགས་ཞིབ་བྱེད་ཀྱིན་ཡོད་ལ། ལོ་གཅིག་ལ་རྒྱུགས་སྤྲོད་ཁ་ཤས་ཡོད་པ་ལས་བློ་རྒྱུགས་ཆེན་མོ་དང་རྩོད་གཞུང་བློ་རྒྱུགས་བླངས་ཚར་བ་དང་། ད་ཡོད་ཟུར་སྦྱོང་གི་རྒྱུགས་སྤྲོད། དམིགས་བསལ་བློ་རྒྱུགས། ཚན་རིག་གི་རྒྱུགས་སྤྲོད། རྩོད་རྒྱུགས། བྲིས་རྒྱུགས་བཅས་ལས་ཟླ་འདིར་བློ་རྒྱུགས་དང་ཟུར་སྦྱོང་། དམིགས་བསལ་བློ་རྒྱུགས་བཅས་ལེན་དགོས་ཤིང་། ཚན་རིག་འཛིན་གྲྭར་ཞུགས་པའི་སློབ་གཉེར་བ་རྣམས་ལ་ཚན་རིག་གི་རྒྱུགས་སྤྲོད་དང་། དབྱིན་སྐད་དང་། རྒྱ་སྐད་སྐད་སྒྱུར་གྱི་སློབ་གཉེར་བ་རྣམས་ལ་སོ་སོའི་ཆེད་སྦྱོང་གི་སློབ་ཚན་གྱི་རྒྱུགས་སྤྲོད་དང་། གཞན་འཛིན་གྲྭ་བཅུ་པ་ཐོན་པའམ་དེ་དང་ཤེས་ཚད་མཉམ་པའི་སློབ་གཉེར་བ་རྣམས་ལ་གྲྭ་ཚང་ནས་སྡེ་ཚན་གསར་འཛུགས་ཀྱིས་མཐུན་རྐྱེན་སྦྱར་ཏེ་རྒྱ་གར་གྱི་སློབ་གྲྭར་འཛིན་གྲྭ་བཅུ་གཅིག་སོགས་ཀྱི་ཡིག་རྒྱུགས་སྤྲོད་དུ་འཇུག་པ་སོགས་རྒྱུགས་སྤྲོད་དུ་མ་ཞིག་ཡོད།

སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༨།༠༨།༣༡ལ།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།

ངོ་ཤོག 4 ནས་ 20