དུས་རབས་ཉེར་གཅིག་པ་བརྡ་འཕྲིན་གྱི་དུས་རབས་འདིར་འོད་རླབས་ཀྱི་འགྲོས་དང་འགྲོགས་ཏེ། ཚན་རྩལ་གྱི་ཤེས་རིག་རབ་ཏུ་དར་བས། མི་རྣམས་ཀྱིས་རང་རིགས་ཀྱི་རིག་གཞུང་དང་ཤེས་རིག་དག་ཀྱང་བརྡ་འཕྲིན་གྱི་ལམ་དུ་སྐྱེལ་ཏེ་སྲུང་སྐྱོབ་དང་། འཕེལ་རྒྱས། དར་སྤེལ་ལ་རེམ་བཞིན་པའི་སྐབས་འདིར། རང་རེའི་གངས་ཅན་པའི་ཆོས་དང་རིག་གཞུང་དག །ཟླུམ་གཟུགས་ཀྱི་གོ་ལ་འདིར་ཡུན་རིང་གནས་པ་དང་། འཕྲིན་ལས་ཀྱི་འཇུག་པ་རླབས་རྡུལ་གྱི་འགྲོས་དང་མཉམ་པ་ཡོང་སླད། འདི་ག་སེར་བྱེས་མཁས་སྙན་གྲྭ་ཚང་ནས་ཀྱང་འཕྲུལ་དེབ་དང་། སློབ་ཁྲིད་སྐོར་གྱི་སྒྲ་མཛོད། བརྙན་མཛོད་བཅས་ལས་གྲུབ་པའི་རིག་མཛོད་ཀྱི་དྲ་ཚིགས་འདི་སྒོ་འབྱེད་བྱས་པ་ནས་བཟུང་། གངས་ཅན་པའི་ཆོས་དང་རིག་གཞུང་ལ་མོས་པའི་རིས་མེད་སྐྱེ་བོ་རྣམས་ཀྱིས་ཐུགས་འདོད་ལྟར་ལོངས་སྤྱོད་རྒྱུའི་ཆེད་གསུང་རབ་ཀྱི་གླེགས་བམ་དག་གཙོ་བྱས་པའི་འཕྲུལ་དེབ་གང་མང་རིན་མེད་དུ་འགྲེམས་སྤེལ་བྱེད་ཀྱིན་ཡོད་པ་ལ། ཉེ་ཆར་བྱ་ཉེས་སྤྱོད་ངན་ཅན་རེ་ཟུང་གིས་དྲ་གནས་http://m.academiclibrarytbt.com/pd.jsp?pid=393འདི་ནས་སེར་བྱེས་རིག་མཛོད་ཆེན་མོའི་འཕྲུལ་དེབ་ལྐོག་ཚོང་བྱེད་བཞིན་ཡོད་པར་ཤེས་རྟོགས་བྱུང་བས་དེ་དག་ལ་མཐའ་གཅིག་ཏུ་དགག་པ་ཞུ་བཞིན་ཡོད། ཉེས་སྤྱོད་འདིའི་རིགས་ལ་ཁྲིམས་མཐུན་གྱིས་དག་ཐེར་བྱེད་སྲིད་པས་དེ་དག་ལ་ཐུགས་གཟབ་གནང་རོགས། འདི་གའི་སེར་བྱེས་རིག་མཛོད་ཆེན་མོའི་ངོས་ནས་རིག་གཞུང་ལ་དུང་བ་ཟབ་པའི་རང་རིགས་སྐྱེ་བོ་ཡོངས་ལ་ཞུ་རྒྱུ་ནི། ང་ཚོའི་དྲ་གནས་འདི་ནས་འཕྲུལ་དེབ་སོགས་ཕབ་ལེན་གནང་ན་རིན་པ་སྤྲོད་དགོས་མེད་པ་སླར་ཡང་གསལ་བསྒྲགས་ཞུ་རྒྱུ་ཡིན། དེ་ཡང་སྟབས་བདེའི་རང་བཞིན་ཅན་གྱི་གློག་ཀླད་དང་ལག་ཐོག་ཁ་པར་ཆེ་ཆུང་གང་ཡིན་ཐོག་ཏུ་རང་རང་གི་ཐུགས་འདོད་ལྟར་ཕབ་ལེན་དང་གསན་གཟིགས་གནང་རོགས།

ཕྱི་ལོ་༢༠༢༥ཟླ་༢ཚེས་༢༠ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས།

བཙན་བྱོལ་བོད་མིའི་ཆབ་སྲིད་ཀྱི་དབུ་ཁྲིད་སྲིད་སྐྱོང་སྤེན་པ་ཚེ་རིང་མཆོག་གིས་སྲིད་སྐྱོང་གི་མཛད་ཁུར་བཞེས་ཏེ་ལོ་ངོ་ལྔ་ལ་ཉེ་བའི་སྐབས་འདིར། ཉིན་སྦེལ་ཀོབ་གཞིས་ཆགས་སུ་མཚམས་གཟིགས་སུ་ཕེབས། ཕྱི་ཟླ་ ༢ པའི་ཚེས་ ༡༢ སྔ་དྲོ་གདན་ས་ཆེན་པོ་བཀྲ་ཤིས་ལྷུན་པོར་ྋསྤྱི་ནོར་ྋགོང་ས་ྋསྐྱབས་མགོན་ཆེན་པོའི་བརྟན་བཞུགས་ཆེད་ཕེབས་དང་། ཕྱི་དྲོ་གདན་ས་ཆེན་པོ་སེ་ར་ཐེག་ཆེན་གླིང་གི་དུ་གནས་གཟིགས་བསྐྱངས་ཤིང་། སེར་སྨད་གྲྭ་ཚང་དང་། སེར་བྱེས་གྲྭ་ཚང་གཉིས་སུ་རིམ་གྱིས་གཟིགས་སྐོར་གནང་། དེའི་སྐབས་མཁན་པོ་རྣམ་པའི་དབུ་ཁྲིད་པའི་འཛིན་སྐྱོང་དང་། དགེ་འདུན་པ་རྣམས་ཀྱིས་ཕེབས་བསུ་དང་། དེ་ནས་དཔལ་ལྡན་སྲིད་སྐྱོང་མཆོག་གིས་དགེ་འདུན་པ་རྣམས་ལ་གསུང་བཤད་གནང་སྐབས་ཀྱི་སྙིང་དོན་གཙོ་ཁག་ནི། འདི་ལོར་ྋསྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་དགུང་གྲངས་༩༠ལ་ཕེབས་ཀྱི་ཡོད་སྟབས་བོད་མི་ཡོངས་ལ་གལ་གནད་ཆེ་བའི་ལོ་ཞིག་ཡིན་པ་དང་། ཕྱི་ལོ་༢༠༢༥ལོ་འདི་བྱམས་བརྩེའི་ལོ་ཞེས་སྲུང་བརྩི་ཞུ་རྒྱུའི་སྐོར་ཡོངས་ཁྱབ་བསྒྲགས་ཟིན་པ་དང་། དེ་ཡང་བོད་མི་ཡོངས་ལ་ལོ་རྒྱུས་རང་བཞིན་ལྡན་པའི་དུས་སྐབས་ཤིག་ཡིན་པས་འདི་སྲུང་བརྩི་ཞུ་དགོས་པའི་འབོད་སྐུལ་གནང་བ་དང་ཆབས་ཅིག་འདི་ལོར་ྋསྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་ཞི་བདེ་དང་། འཚེ་མེད་ཞི་བ། བོད་མིའི་ངོ་བོ་སྲུང་སྐྱོབ་བཅས་ཀྱི་ཆེད་སྐུ་ཚེ་ཧྲིལ་པོ་སྐུ་ངལ་བསྐྱོན་པར་བསྐྱར་དྲན་བྱེད་པའི་གོ་སྐབས་ཤིག་ཡིན་པར་གསུངས། བོད་མི་ཚོས་རྒྱ་གར་གཞུང་དང་ས་གནས་ཡུལ་མི་དང་མཉམ་དུ་འབྲེལ་ལམ་བཟང་པོ་འཛུགས་རྒྱུ་གལ་གནད་ཡིན་པ་དང་། གཞན་ཡང་བོད་མི་རྣམས་མཐུན་སྒྲིལ་རྡོག་རྩ་གཅིག་སྒྲིལ་གནང་དགོས་སྐོར་དང་། བོད་མིའི་ནང་ཁུལ་ཆབ་སྲིད་ཀྱི་ལངས་ཕྱོགས་མི་འདྲ་བ་ཡོད་ནའང་། མཐར་ཐུག་གི་དམིགས་ཡུལ་བོད་རང་དབང་འཐབ་རྩོད་ཀྱི་རྨང་གཞི་བརྟན་པོ་བཟོ་རྒྱུ་དེ་ཡིན་པས། བོད་སྤྱི་པའི་རྩ་དོན་ཆེད་དུ་ཞབས་འདེགས་བསྒྲུབ་དགོས་པའི་སྐུལ་མ་གནང་།
ཚེས་༡༣སཾ་བྷོ་ཊའི་སློབ་གྲྭ་དང་། ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་། ལྷོ་ཕྱོགས་ཁྲིམས་ཞིབ་ཁང་། འཚོ་བྱེད་ཁང་གསར་སྨན་ཁང་བཅས་སུ་འཚམས་གཟིགས་གནང་རྒྱུ་དང་། ཚེས་༡༤བདེ་སླར་སློབ་གྲྭ་དང་། ཀེ་ལ་ཤ་སྤུ་ར་སཾ་བྷོ་ཊ་སློབ་གྲྭ། བོད་ཁྱིམ་སློབ་གྲྭ་བཅས་སུ་འཚམས་གཟིགས་དང་།
ཚེས་༡༥ལྷོ་ཕྱོགས་ཡན་ལག་རྩིས་ཞིབ་ཁང་། སྦེལ་ཀོབ་སྨན་རྩིས་ཁང་། བཀའ་བརྒྱུད་ནཱ་ལེནྜ་ལུང་རྟོགས་བསྟན་རྒྱས་གླིང་དགོན་པ། བདེ་སླར་ས་གནས་འགོ་འཛིན་ལས་ཁུངས་བཅས་སུ་འཚམས་གཟིགས་དང་། ལུགས་བསམ་མཉམ་འབྲེལ་ཚོགས་ཁང་དུ་མི་དམངས་ལ་གཏམ་བཤད་གནང་རྒྱུ་དང་།
ཚེས་༡༦ཉིན་སྦེལ་ཀོབ་ནས་ཕེབས་ཐོན་གནང་རྒྱུ་ཡིན་པ་བཅས་གསར་གནས་སྙིང་བསྡུས་སུ།
སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས་བསྡུ་བསྒྲིགས་བྱས། ཕྱི་ལོ་༢༠༢༥ཟླ་ ༢ ཚེས་ ༡༢ ཉིན།