ཟག་མེད་བདེ་ཆེན་ཆོས་ཀྱི་དབྱིངས་སུ་ལྡང་བ་མེད་པར་མཉམ་བཞག་ཀྱང་། །
ཚད་མེད་ཐུགས་རྗེས་དྲག་ཏུ་བསྐུལ་བས་རྒྱུན་ཆད་མེད་པའི་འཕྲིན་ལས་གྱི། །
ངེས་མེད་རོལ་གར་ཅི་ཡང་སྒྱུར་ལ་ངལ་བ་མེད་པའི་ཐུགས་སྟོབས་ཅན། །
འཇིག་རྟེན་མགོན་པོ་འཛུམ་པའི་ཞལ་གྱིས་ས་གསུམ་དགེ་ལེགས་ཉིད་གྱུར་ཅིག །
ལྷར་བཅས་སྲིད་ཞིའི་གཙུག་རྒྱན་ཁམས་གསུམ་ཆོས་ཀྱི་རྒྱལ་པོ་ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག་ཁ་བ་རི་པ་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ། ྋསྐྱབས་མགོན་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་ྋརྗེ་བཙུན་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་བསྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་ཕྱི་ལུགས་ལྟར་དགུང་གྲངས་༩༠ ལ་ཕེབས་པའི་སྐུ་ཡི་འཁྲུངས་སྐར་གྱི་དུས་ཚེས་བཟང་པོའི་ཉིན། དགའ་དད་སྤྲོ་གསུམ་གྱི་སྒོ་ནས་འཚམས་འདྲིའི་བཀྲ་ཤིས་བདེ་ལེགས་གྲངས་མེད་ཞུ་བ་དང་ཆབས་ཅིག །ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་རྒྱུན་མི་འཆད་དུ་སྐོར་བཞིན་པར་འགྲོ་བ་མིའི་རིགས་སྤྱི་དང་ཁྱད་པར་དུ་མགོན་པོ་གང་ཉིད་ལ་མི་ཕྱེད་པའི་དད་པ་དང་ལྡན་པའི་གུས་འབངས་ཡོངས་ཀྱི་ལམ་སྟོན་གྱི་སྒྲོན་མེ་དང་བསོད་ནམས་ཀྱི་ཞིང་དམ་པར་ཞབས་ཟུང་མི་ཤིགས་རྡོ་རྗེའི་ཁྲི་འཕང་མཐོན་པོར་བསྐལ་བརྒྱར་གཡོ་བ་མེད་པར་བརྟན་པར་བཞུགས་པའི་གསོལ་འདེབས་གྲངས་མེད་ཞུ།།

སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས།
༢༠༢༥ལོའི་ཟླ་༧ཚེས་༦ལ།

གྲྭ་ཚང་རིན་པོ་ཆེ་ནས་འཁྲུངས་སྐར་སྲུང་བརྩི་ཞུས་པ།

༄༅། །ལྷར་བཅས་སྲིད་ཞིའི་གཙུག་རྒྱན་༸གོང་ས་ལྷ་མིའི་རྣམ་འདྲེན་སྐུ་ཕྲེང་བཅུ་བཞི་པ་ཆེན་པོ། ངེས་པ་དོན་གྱི་སླད་དུ་མཚན་ནས་སྨོས་ན་རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་བསྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག །བོད་ཤིང་ཕག་ཟླ་བ་༥ ཚེས་༥ དང་། ཕྱི་ལོ་༡༩༣༥ ཟླ་བ་༧ ཚེས་༦ ཉིན་བོད་བྱང་ཤར་མདོ་སྨད་སྟག་ཚེར་ཡུལ་དུ་གཟིགས་པ་ལྔ་ལས་མ་འདས་པར་ངོ་མཚར་བའི་ལྟས་དུ་མ་དང་བཅས་སྐུ་བལྟམས་ནས། ད་ཆ་ཕྱི་ལུགས་ལྟར་དགུང་གྲངས་༩༠ ལ་ཕེབས་པའི་སྐུའི་འཁྲུངས་སྐར་དུས་ཆེན་ཁྱད་པར་ཅན་བཀྲིས་དགའ་བ་འབུམ་ལྡན་གྱི་ཉིན་མོར། འཕགས་ཡུལ་སེར་བྱེས་མཁས་སྙན་གྲྭ་ཚང་གི་མཁན་བླ་འདུས་མང་ཡོངས་ནས་སྒོ་གསུམ་གུས་ཕྱག་དང་བཅས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་གང་གི་སྐུ་ཚེ་ཞབས་པད་ཁྲི་ལོར་བརྟན་ཅིང་། མཛད་འཕྲིན་མཐའ་དབུས་ཡུལ་གྲུ་ཀུན་ཏུ་ཁྱབ་པ་དང་། ཐུགས་ཀྱི་བཞེད་དགོངས་ཐ་དག་ལྷུན་གྱི་གྲུབ་པའི་སྨོན་འདུན་ཤུགས་དྲག་ཞུ་བཞིན་པ་བཅས། དེ་རིང་འདི་ག་གྲྭ་ཚང་དུ་སྐུའི་འཁྲུངས་སྐར་མཛད་རིམ་བཞིན་སྲུང་བརྩི་ཞུས་པའི་རྣམ་པ་གཤམ་གསལ། སྔ་དྲོ་ཆུ་ཚོད་༧།༡༥ ཐོག་འདུས་མང་ཡོངས་གྲྭ་ཚང་གི་གཙུག་ལག་ཁང་དུ་འདུ་འཛོམས་གནང་སྟེ། ༸རྒྱལ་བའི་སྐུ་པར་མཐོང་གྲོལ་རིན་པོ་ཆེ་སྤོས་སྣ་དང་བཅས་གདན་ཞུས་ཀྱིས་མི་འཇིགས་སེང་གེའི་ཁྲིར་བཞུགས་སུ་གསོལ་ཅིང་། བཞུགས་ཁྲིར་འཁོད་མ་ཐག་སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་ཅིང་། དབུ་མཛད་ཆེན་མོ་མཆོག་ནས་ཞལ་འདོན་དབུ་སྐུལ་གྱིས་༸རྒྱལ་བའི་ཞབས་བརྟན་སོགས་གསུང་འདོན་གནང་། དེ་རྗེས་འདུས་ཚོགས་སུ་གསོལ་ཇ་འབྲས་སིལ་དང་བཞེས་བག་བཅས་འདེགས་འབུལ་ཞུས། དེ་ནས་ཁྲིམས་བདག་དགེ་བསྐོས་མཆོག་ནས་༸རྒྱལ་བའི་མཛད་རྣམ་ངོ་སྤྲོད་གནང་ཞིང་། མཛད་རྣམ་ངོ་སྤྲོད་གྲུབ་མཚམས་སྣང་གསལ་ཞལ་ཕྱེ་གནང་བ་དང་སྐུ་ཡི་འཁྲུངས་སྐར་རྟེན་འབྲེལ་གྱི་མཆོད་པ་སྤྲི་གོར་ (CAKE) བཏུབས་གནང་ཡོད། དུས་མཚུངས་དགེ་འདུན་འདུས་མང་ཡོངས་ལ་སྤྲི་གོར་ཕུལ་བ་དང་། གྲྭ་ཚང་ཕྱག་སྦུག་ཁང་ནས་དགེ་འདུན་མང་ལ་སྐུ་འགྱེད་བཅས་ཕུལ་ཡོད། མཇུག་ཏུ་དབུ་མཛད་ཆེན་མོ་ནས་ཞལ་འདོན་དབུ་སྐུལ་ཐོག་བཀྲིས་ཚིག་བཅད་སོགས་གསུངས་ནས་འཁྲུངས་སྐར་དགའ་སྟོན་གྱི་མཛད་སྒོ་ལེགས་པར་གྲུབ།