ཕྱི་ལོ་ ༢༠༢༥ ཟླ་ ༡༢ ཚེས་ ༡༢ ལ། ༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་རྡི་ལི་ནས་མཁའ་ལམ་བརྒྱུད་ལྷོ་ཕྱོགས་ཀར་ན་ཊ་ཀ་མངའ་སྡེའི་ཧོབ་ལི་གནམ་ཐང་དུ་ཆིབས་བསྒྱུར་བསྐྱངས་པ་དང་། དེ་ནས་ལྷོ་ཕྱོགས་དགོན་སྡེ་ཁག་གི་ཆོས་ཀྱི་དབུ་ཁྲིད་དང་བོད་མིའི་སྒྲིག་འཛུགས་ཀྱི་དབུ་ཁྲིད་ཁག་ཅིག །མོན་གྷོ་ཌི་ས་གནས་གཞིར་བཞག་ཐོག་སྦེལ་ཀོབ་ལུགས་བསམ་དང་བདེ་སླར་གཞིས་ཆགས་གཉིས་དང་། ཧོན་སུར་རབ་རྒྱས་གླིང་། ཀོ་ལི་གྷལ་དོན་ལྡན་གླིང་སོགས་ཀྱི་ས་གནས་ཁག་ནས་ཕེབས་བསུར་བཅར་བའི་རིས་སུ་མ་ཆད་པའི་དགོན་སྡེ་ཁག་གི་གྲྭ་བཙུན་དང་མི་མང་སྟོང་ཕྲག་མང་པོའི་ཕེབས་བསུ་རྒྱ་ཆེ་བ་བཅས་བྱེས་ཀྱི་གདན་ས་ཆེན་པོ་འབྲས་སྤུངས་སྒོ་མང་གྲྭ་ཚང་དུ་ཞབས་སོར་བདེ་བར་འཁོད།
   སྐབས་དེར་མི་མང་ལ་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་སློབ་སྩལ་དོན། གནས་འདི་ནི་བོད་ཀྱི་ནུབ་རྒྱུད་དུ་ཆགས་ཡོད། དེ་ཡང་ང་ཚོའི་བོད་མིའི་གཞིས་ཆགས་ཁག་དང་། དགེ་འདུན་འདུས་པའི་ཚོགས་བཅས་དེ་རིང་དགའ་རབ་ཅིག་འཛོམས་འདུག །འདིས་རྟགས་ཅི་ཞིག་སྟོན་གྱི་ཡོད་པ་རེད་ཅེ་ན། མདོ་སྔགས་ཟུང་འབྲེལ་གྱི་སངས་རྒྱས་པའི་ཆོས་རྒྱ་ཆེ་ལ་གཏིང་ཟབ་པ། ཀླུ་སྒྲུབ་ཡབ་སྲས་སོགས་པཎ་གྲུབ་རྣམས་ཀྱི་བཞེད་གཞུང་དྲི་མ་མེད་པ་ལ་ང་ཚོ་བོད་པས་བདག་པོ་བརྒྱབ་ནས་བསྡད་པ་རེད། བར་སྐབས་བོད་ལ་ཧ་ཅང་དཀའ་ངལ་ཆེན་པོ་ཞིག་འཕྲད་ཀྱང་། སོ་སོའི་ཆོས་དང་རིག་གཞུང་ལ་སེམས་གཏིང་ནས་དགའ་མོས་ཀྱིས་ལྷག་བསམ་རྩེ་གཅིག་དང་། སྐབས་དུས་འཚམ་པའི་ཐོག་འདོན་པ་འདོན་པ་སོགས་ཀྱིས་མཚོན་གལ་ཆེ་ཤོས་ནི། བསམ་བློའི་ནང་དུ་བོད་གངས་ཅན་ལྗོངས་ཀྱི་རྒྱ་ཆེ་ལ་གཏིང་ཟབ་པའི་སངས་རྒྱས་པའི་ཆོས་ལ་ཧ་ལས་པའི་བདག་པོ་བརྒྱབ་ཡོད། བདག་པོ་བརྒྱབ་པ་ཙམ་དུ་མ་ཟད། དེང་སང་རྒྱ་ནག་ལ་ཆ་བཞག་ནའང་བོད་ཀྱི་སངས་རྒྱས་པའི་ཆོས་ལ་གུས་བརྩི་བྱེད་པའི་གནས་ཚུལ་ཞིག་སླེབས་ཡོང་གི་ཡོད། དེ་བཞིན་འཛམ་གླིང་གང་ས་གང་དུ་བོད་ཀྱི་ཆོས་དང་རིག་གཞུང་ལ་ཆོས་དད་མེད་ནའང་དོ་སྣང་བྱེད་མཁན་དང་དགའ་མོས་བྱེད་མཁན་ཇེ་མང་ཇེ་མང་དུ་འགྲོ་བཞིན་འདུག །
   ང་ཚོས་སངས་རྒྱས་ཀྱི་བསྟན་པ་རྒྱས་པར་ཤོག་ཅེས་སྨོན་ལམ་བརྒྱབ་པ་གཅིག་པུ་མ་ཡིན་པར་ཁ་ཡོད་ལག་ཡོད་ཀྱི་ཐོག་ནས་ལུང་རྟོགས་ཀྱི་རྒྱལ་བའི་བསྟན་པ་འདི་མི་ཉམས་གོང་འཕེལ་དང་། ཉམས་པ་སོར་ཆུད་ཡོང་ཐུབ་པར་སེམས་ཤུགས་བསྐྱེད་ནས་སྨོན་ལམ་རྒྱག་པ་སོགས་བྱེད་བཞིན་ཡོད། འཛམ་གླིང་འདིར་སངས་རྒྱས་པའི་ཆོས་ལ་དགའ་མོས་བྱེད་མཁན་ཧ་ཅང་མང་པོ་དང་། དེང་སང་དོ་སྣང་བྱེད་མཁན་གྱི་མི་རབས་གསར་པའང་མང་པོ་སླེབས་བཞིན་འདུག །གང་ལྟར་སངས་རྒྱས་པའི་ཆོས་ལ་དད་མོས་བྱེད་མཁན་ཇེ་མང་དུ་འགྲོ་བཞིན་པ་དང་། རྒྱ་ནག་ལ་མཚོན་ནའང་ཇེ་མང་དུ་འགྲོ་བཞིན་འདུག །དེ་བཞིན་འཛམ་གླིང་ས་ཁུལ་གཞན་དུའང་སྤྱིར་སངས་རྒྱས་པའི་ཆོས་ལ་དད་མོས་མེད་ཀྱང་། སངས་རྒྱས་པའི་ལུང་རྟོགས་ཀྱི་ཆོས་ཀྱི་འགྲོ་སྟངས་ལ་དོ་སྣང་བྱས་ཏེ་དགའ་མོས་བྱེད་མཁན་ཇེ་མང་དུ་འགྲོ་བཞིན་འདུག །དེར་བརྟེན། སངས་རྒྱས་ཀྱི་བསྟན་པ་རྒྱས་པར་ཤོག་ཅེས་པའི་ཁ་ཙམ་ཚིག་ཙམ་མ་ཡིན་པར་བོད་ཀྱི་སངས་རྒྱས་པའི་ཐེག་པ་གསུམ་གྱི་ཆོས་ཚུལ་ལ་དོན་དག་དངོས་མའི་ཐོག་ནས་དོ་སྣང་གསར་པ་སླེབས་མཁན་མང་པོ་བྱུང་ཡོད། རྒྱ་ནག་དང་བོད། ཧི་མ་ལ་ཡའི་རི་རྒྱུད་བཅས་སུ་སངས་རྒྱས་པའི་ཆོས་ལ་སྔ་མོ་ནས་དོ་སྣང་ཡོད་པ་རེད་ལ། ད་དུང་སངས་རྒྱས་པའི་ཆོས་ལ་དོ་སྣང་ཇེ་ཟབ་ཇེ་ཟབ་ཏུ་འགྲོ་བཞིན་འདུག །ངོས་རང་ལ་ཆ་བཞག་ན་༸རྒྱལ་དབང་གི་མིང་ཡོད་པས་སངས་རྒྱས་པའི་ཆོས་ཀྱི་སྐོར་བཤད་སྐབས་དོ་སྣང་བྱེད་མཁན་རྒྱ་ཆེན་པོར་ཁྱབ་འགྲོ་བ་ཞིག་རེད། ཅེས་དང་།
ཧི་མ་ལ་ཡའི་རི་རྒྱུད་ཀྱི་ནང་པའི་ཆོས་ལ་བདག་པོ་རྒྱག་མཁན་གྱི་མི་མང་ཚོ་དད་མོས་ཆེན་པོ་ཡོད། ཡིན་ནའང་། སློབ་སྦྱོང་དང་འབྲེལ་བའི་ཐོག་ནས་བདག་པོ་ཡག་པོ་རྒྱག་མཁན་ནི་བོད་པ་ཤུགས་ཆེན་པོ་རེད། དེར་བརྟེན། ང་ཚོས་སངས་རྒྱས་ཀྱི་བསྟན་པ་རྒྱས་པར་ཤོག་ཅེས་སྨོན་ལམ་བརྒྱབ་པ་བཞིན་ལུང་དང་རྟོགས་པའི་བདག་ཉིད་ཀྱི་སངས་རྒྱས་ཀྱི་བསྟན་པ་འདི་མུ་མཐུད་ནས་ཀུན་ལ་ཁྱབ་པ་ཞིག་དང་། རྒྱ་ཆེའི་སེམས་ཅན་མང་པོར་ཕན་ཐོགས་ཡོང་བར་སྨོན་ལམ་བརྒྱབ་པ་བཞིན་དོན་དངོས་མའི་ཆ་ནས་ཀྱང་འཛམ་བུ་གླིང་ལ་དོ་སྣང་ཤུགས་ཆེ་རུ་འགྲོ་བཞིན་པ་ཧ་ཅང་གསལ་པོ་རེད། ཅེས་དང་།
   ངོས་དང་ཚན་རིག་པ་མང་པོར་འབྲེལ་བ་ཡོང་གི་ཡོད། དེ་ཚོའི་གྲས་ཀྱིས་སངས་རྒྱས་པའི་ཆོས་ཀྱི་འགྲོ་སྟངས་ལ་ཧ་ཅང་དགའ་མོས་ཆེན་པོ་བྱེད་ཀྱི་འདུག །སྐྱེ་བ་སྔ་ཕྱི་དང་འཇིག་རྟེན་བཀོད་པ་པོ་སོགས་ཀྱི་རྙོག་དྲ་དེ་བཤད་མི་དགོས་པར་ཁ་ཡོད་ལག་ཡོད་ཀྱིས་སྒོ་གསུམ་ཞི་ཞིང་དུལ་བ་ཞིག་གི་ཐོག་ནས་རང་སྐྱིད་པ་དང་། རོགས་སྐྱིད་པ་ཡོང་བར་རིས་མེད་ཀྱི་ས་ཁུལ་མང་པོ་ནས་དོ་སྣང་གསར་པ་ཡོང་གི་ཡོད། ཡེ་ཤུ་ཆོས་ལུགས་དར་སའི་ལུང་པ་ཚོའི་ནང་ནས་འདི་ལྟར་དོ་སྣང་བྱེད་མཁན་ཤུགས་ཆེ་རུ་འགྲོ་བཞིན་འདུག །ངོས་རང་ལ་མཚོན་ན་ནུབ་ཕྱོགས་སོགས་རྒྱལ་ཁབ་ཁག་གི་ལུང་པར་འགྲོ་བར་མིས་དགའ་བསུ་ཤུགས་ཆེན་པོ་བྱས་ཏེ་ཕྱིན་པའི་སྐབས་སུ་ངོས་ཀྱིས་བཤད་པ་ལ་དོ་སྣང་བྱས་ནས་སངས་རྒྱས་པའི་ཆོས་ཚུལ་ལ་དམིགས་བསལ་དོ་སྣང་གསར་པ་ཞིག་དང་། ལུས་ཕྱི་རྒྱལ་གྱི་མི་ཆགས་ཡོད་ཀྱང་བསམ་བློ་སངས་རྒྱས་པའི་ཆོས་ལ་དད་པ་བྱེད་མཁན་ཇེ་མང་དུ་འགྲོ་བཞིན་ཡོད།
   བོད་གངས་ཅན་ལྗོངས་ཀྱི་སངས་རྒྱས་པའི་ཆོས་བར་སྐབས་ཉམས་ཆག་ཕྱིན་ཏེ་ནུབ་པ་ལྟ་བུ་ཆགས་ཡོད་ཀྱང་། ང་ཚོ་ཉུང་ཤས་ཤིག་འདིར་ཡོད་པ་ཚོས་བདག་པོ་བརྒྱབ་སྟེ་ཧུར་ཐག་བྱས་པ་རེད། ཚན་རིག་པའི་ནང་ནས་སངས་རྒྱས་པའི་ལྟ་སྒོམ་སྤྱོད་གསུམ་ལ་དམིགས་བསལ་དོ་སྣང་གིས་ངོས་ལ་ཐུག་འཕྲད་དུ་ཡོང་གི་འདུག་པ་དང་། ང་ཚོས་གོ་བསྡུར་བྱེད་སྐབས་སྒོ་གསུམ་མ་དུལ་བ་བཏུལ་བ་དང་། མ་ཞི་བ་ཞི་བ་བཟོ་བར་སངས་རྒྱས་པའི་ཆོས་ལ་ནུས་པ་གཞན་དང་མ་འདྲ་བ་ཞིག་ཡོད་པ་ལ་དོ་སྣང་དང་དགའ་མོས་བྱེད་མཁན་ཇེ་མང་དུ་འགྲོ་བཞིན་འདུག །ཐེག་པ་གསུམ་གྱི་ཆོས་ཆ་ཚང་བ་ནི་ང་ཚོ་བོད་ལ་ཡོད་པ་འདི་ཆགས་ཡོད། ཧི་མ་ལ་ཡའི་རི་རྒྱུད་དུ་ཆོས་སྲིད་འགྲོ་སྟངས་གཅིག་པ་རེད། ཅེས་དང་།
ཧི་མ་ལ་ཡའི་རི་རྒྱུད་ཀྱི་མི་མང་ནི་ང་ཚོས་མཐོང་བཞིན་པ་ལྟར་ནང་པའི་ཆོས་ལ་དགའ་མོས་དང་དོ་སྣང་དམིགས་བསལ་ཆེན་པོ་རེད། ལས་འབྲས་དང་རྒྱུ་འབྲས་ཀྱི་རྟེན་འབྲེལ་སྐོར་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་ཡོད། ངོས་རང་ལ་མཚོན་ན་༸རྒྱལ་དབང་གི་མིང་འཁྱེར་ནས་ཆོས་ཕྱོགས་ནས་འབྲེལ་བ་ཡོད་པས་ངོས་ལ་འབྲེལ་བ་བྱེད་མཁན་ཇེ་མང་དུ་འགྲོ་བཞིན་འདུག །གང་ལྟར་ཡང་ང་ཚོ་བོད་ལ་ཡོད་པའི་སངས་རྒྱས་པའི་ཆོས་འདི་རྒྱ་མི་གུང་ཁྲན་གྱིས་རྩ་མེད་གཏོང་བའི་ཐབས་ཤེས་རིམ་པར་བྱས་ཀྱང་། ལག་ལེན་དངོས་མའི་ཐོག་ནས་བོད་ཀྱི་ཟབ་རྒྱས་ཀྱི་གནད་འགག་རྒྱ་ཆེན་པོ་ཡོད་པའི་ནང་པའི་ཆོས་ལ་འཛམ་གླིང་འདིར་དོ་སྣང་བྱེད་མཁན་ཇེ་མང་དུ་འགྲོ་བཞིན་འདུག །འདིར་དེ་ལྟ་བུའི་ཆོས་ཚུལ་ཉམས་ལེན་བྱེད་མཁན་ཉུང་ཤས་ཤིག་ཡོད་པ་རེད། ད་ལྟའི་བར་དུ་ང་ཚོས་སྲོལ་བཟུང་ནས་བསྡད་པ་རེད། ད་ལྟ་ཚན་རིག་པ་སོགས་ཁག་ཅིག་གིས་ཧ་ཅང་དགའ་བོ་བྱེད་ཀྱི་ཡོད། དེར་བརྟེན། སངས་རྒྱས་པའི་ཆོས་འདི་བསླབ་པ་གསུམ་གྱིས་རྒྱུད་འདུལ་ཐབས་དང་། ཁ་ཡོད་ལག་ཡོད་ཀྱིས་སེམས་ལ་ཞི་བདེ་བཟོ་བར་ཕན་ཐོགས་ཡོད་པ་འདི་ལ་འཛམ་གླིང་འདིར་ཆོས་དད་མེད་མཁན་གྲས་ནས་ཀྱང་དོ་སྣང་བྱེད་མཁན་ཇེ་མང་ལ་འགྲོ་བཞིན་འདུག །ཅེས་སོགས་མགོན་པོ་གང་ཉིད་མཆོག་དགུང་ལོ་བརྒྱ་དང་སུམ་ཅུ་སོ་གྲངས་བཞུགས་རྒྱུའི་ལུང་བསྟན་དང་རྨི་ལྟས་སོགས་ཡོད་པ་དང་། སངས་རྒྱས་པའི་ཆོས་ཉམས་པ་སོར་ཆུད་དང་མི་ཉམས་གོང་འཕེལ་ཐོག་འཛམ་གླིང་མི་མང་ལ་ཕན་ཐོགས་ཡོང་ཐུབ་པ་ཞིག་བྱ་རྒྱུར་ཚང་མས་ཧུར་ཐག་བྱེད་དགོས་པ་བཅས་ཀྱི་བཀའ་སློབ་བཀའ་དྲིན་སྩལ།

དྲ་ཚིགས་སུ་བཀོད་པ་ཁག་ཅིག་ལས་བཏུས་ཏེ་བཀོད། 

 

ཕྱི་ལོ་༢༠༢༥ཕྱི་ཟླ་༩ཚེས་༦ནས་༡༡བར་སེ་ར་ཐེག་ཆེན་གླིང་གོ་སྟོན་གོ་སྒྲིག་ཚོགས་ཆུང་གིས་གོ་སྒྲིག་ཞུས་ཏེ་ཉིན་གྲངས་ལྔའི་རིང་སེ་ར་ཐེག་ཆེན་གླིང་བླ་སྤྱི་རུ་༧སྐུའི་གོ་སྟོན་གཟབ་རྒྱས་ངང་ཞུས་ཤིང་། དེ་ཡང་རྒྱལ་བ་དགྱེས་པའི་མཆོད་སྤྲིན་དུ་དམིགས་ཏེ་ཕྱི་ཟླ་༩ཚེས་༦ཉིན་ཕར་ཕྱིན་དང་། ཚེས་༧ཉིན་དབུ་མ་བཅས་ཉིན་གཉིས་རིང་སེ་ར་བྱེས་སྨད་གྲྭ་ཚང་གཉིས་མཉམ་འཚོགས་ཀྱིས་དབུ་ཕར་གྱི་གཞུང་ལ་དམ་བཅའ་ཆེན་པོ་འཚོགས་ཏེ་དྲྭ་ལམ་ཐད་གཏོང་བརྒྱུད་ནས་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཐུགས་དགྱེས་པའི་མཆོད་སྤྲིན་དུ་གཟིགས་འབུལ་ཞུས། ཕྱི་ཚེས་༨ཉིན་སྐུ་ཚེའི་ཚེ་སྒྲུབ་གྱི་སྔོན་འགྲོར་ཞྭ་སེར་བསྟན་པའི་མཛེས་རྒྱན་ཤར་པ་ཆོས་རྗེ་རྗེ་བཙུན་ངག་དབང་འབྱོར་ལྡན་དཔལ་བཟང་པོ་མཆོག་ནས་སེར་སྐྱ་མི་མང་ཡོངས་ལ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་གནང་བ་དང་འབྲེལ་ཕྱི་ཚེས་༡༠ཉིན་སེར་སྐྱ་མི་མང་ཡོངས་ནས་སྒྲོལ་དཀར་ཚེ་སྒྲུབ་གནད་སྨིན་གསོག་སྒྲུབ་གནང་།