དེ་རིང་སྟེ། ཕྱི་ལོ་༢༠༢༥ཟླ་༡ཚེས་༢ཀྱི་ཉིན་ྋའཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་ྋརྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་སེ་ར་ཐེག་ཆེན་གླིང་དུ་ཆིབས་བསྒྱུར་བསྐྱངས་ཤིང་། སེ་རའི་ཚོགས་ཆེན་དུ་བཞུགས་འཇགས་དང་། ཚེས་༣གྱི་སྔ་དྲོར་སེར་བྱེས་མཁས་སྙན་གྲྭ་ཚང་དུ་ཆིབས་བསྒྱུར་བསྐྱངས། དེ་དག་གི་སྐབས་རྣམས་སུ་བླ་སྤྲུལ་དགེ་བའི་བཤེས་གཉེན་འདུས་དམངས་དང་བཅས་པའི་ཕེབས་བསུའི་མཇལ་དར་དཀར་གཙང་དང་མཆོད་རྫས་ཚོགས་ཀྱིས་སྣེ་དྲངས་ཏེ་ཕེབས་བསུ་དང་ཕེབས་སྐྱེལ་གྲ་རྒྱས་བསྟར།
སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས། ༢༠༢༥ཟླ་༡ཚེས་༣ལ།

 

རྣམ་དག་ཚངས་སྤྱོད་གཙང་མའི་བཀའ་ཡིག་ལ། །
མཐའ་བྲལ་རྟེན་འབྱུང་ལྟ་བའི་རྒྱས་བཏབ་སྟེ། །
ཐུབ་བསྟན་གླིང་བཞིའི་ཁྱོན་ལ་དབང་བསྒྱུར་པའི། །
རྨད་བྱུང་རྣམ་ཐར་གཙང་མ་རྗེས་སུ་དྲན། །
ཞེས་རི་བོ་དགེ་ལྡན་པའི་ཤིང་རྟའི་སྲོལ་འབྱེད་འཇམ་མགོན་བླ་མ་ཙོང་ཁ་པ་ཆེན་པོ་མཆོག་གི་དགོངས་རྫོགས་མཆོད་འབུལ་ཡོངས་གྲགས་སུ་དགའ་ལྡན་ལྔ་མཆོད་ཆེན་མོ་ཞེས་པ་དེ་ཡིན། དེ་ཡང་བོད་རབ་བྱུང་བདུན་པའི་ས་མོ་ཕག་སྟེ་ཕྱི་ལོ་༡༤༡༩ལོའི་སྟོན་དུས། ཁམས་གསུམ་འགྲོ་བའི་བླ་མ་ཆོས་ཀྱི་རྒྱལ་པོ་ཙོང་ཁ་པ་ཆེན་པོས་སྟོད་ལུང་དང་འབྲས་སྤུངས། ལྷ་ས། སེ་ར་སོགས་སུ་ཕེབས་ནས་བཀའ་ཆོས་མང་དུ་གསུངས། དེ་ནས་སླར་དགའ་ལྡན་དུ་ཕྱིར་ཕེབས་ཏེ་ཐུབ་དབང་ཚུལ་ཁྲིམས་མའི་སྐུ་མདུན་དུ་མཆོད་འབུལ་དང་བསྔོ་སྨོན་རྒྱ་ཆེར་མཛད་རྗེས། སྐུ་བེར་དང་དབུ་ཞྭ་དག་སྲས་ཀྱི་ཐུ་བོ་དར་མ་རིན་ཆེན་ལ་གནང་སྟེ་རྒྱལ་ཚབ་ཏུ་བསྐོ་བཞག་མཛད་མཐར། བོད་ཟླ་༡༠པའི་ཚེས་༢༥ཉིན་འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་གི་གཟིམ་ཁང་འོད་གསལ་སྦུག་ཏུ་དགོངས་པ་ཆོས་དབྱིངས་སུ་ཐིམ་པའི་ཚུལ་མཛད། རྒྱས་པར་འབྲེལ་ཐག་འདི་ནས་གཟིགས་རོགས།
སེར་བྱེས་རིག་མཛོད་ཆེན་མོའི་རྩོམ་སྒྲིག་པས་ཕྱི་ལོ་༢༠༢༣ཟླ་༡༢ཚེས་༧ལ།