དགའ་ལྡན་ཁྲི་རིན་པོ་ཆེ་ཁྲི་ཐོག་བརྒྱ་དང་བཞི་པ་༧རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་འདི་ག་སེ་ར་ཆོས་སྒར་དུ་ཆིབས་བསྒྱུར་བསྐྱངས།
   དེ་ཡང་ཕྱི་ལོ་༢༠༡༧ལོའི་ཟླ་༦ཚེས་༢༤ཉིན་༧སྐྱབས་རྗེ་བྱང་རྩེ་ཆོས་རྗེ་རིན་པོ་ཆེ་༧རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་ལ་སྤྱི་ནོར་༧གོང་ས་༧སྐྱབས་མགོན་རིན་པོ་ཆེ་མཆོག་གིས་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་ཁྲི་ཐོག་བརྒྱ་དང་བཞི་པར་བསྐོ་བཞག་གི་བཀའ་ཡིག་རིན་པོ་ཆེ་སྩལ་གནང་མཛད་ཡོད་པ་དང་། ཕྱི་ཟླ་༨ཚེས་༤ཉིན་འཕགས་ཡུལ་ལྷོ་ཕྱོགས་མོན་གྷོ་འདོད་རྒུ་གླིང་དུ་རྟེན་གཞི་བྱས་པའི་དགའ་ལྡན་བླ་སྤྱི་དང་། དགའ་ལྡན་ཁྲི་ཐོག་ཁང་གཉིས་སུ་ཁྲི་འདོན་གྱི་མཛད་སྒོ་འཚོགས་འདུག །ཉིན་དེར་སྔ་དྲོའི་ཆུ་ཚོད་ ༥།༣༠ ལ་བོད་མིའི་སྒྲིག་འཛུགས་ཀྱི་སྐུ་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་། ཤར་པ་ཆོས་རྗེ་རིན་པོ་ཆེ་མཆོག །འབྲས་སྤུངས་ཁྲི་པ་རིན་པོ་ཆེ་མཆོག །གདན་ས་གསུམ་གྱི་མཁན་པོ་དང་མཁན་ཟུར། ཕྱག་མཛོད་དང་སྐུ་ཚབ་རྣམ་པ། དགེ་ལུགས་སྤྱི་འཐུས། གཞན་ཡང་ལྷོ་སྤྱི་དབུས་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་རྣམས་ཀྱིས་སྤྱན་རྒྱ་སྤོས་སྣེ་དང་བཅས་ཕེབས་བསུ་གཟབ་རྒྱས་དང་བཅས་ཏེ་དགའ་ལྡན་བླ་སྤྱིར་འཇམ་མགོན་རྒྱལ་བའི་གསེར་ཁྲི་མཐོན་པོར་མངའ་གསོལ་གྱི་མཎྜལ་རྟེན་གསུམ་འདེགས་འབུལ་དང་སྐུ་མགྲོན་རྣམས་ལ་མཇལ་ཁ་གནང་ཡོད་པ་དང་། ཁྲི་སྟོན་གྱི་མཛད་སྒོ་ཁག་ལེགས་པར་གྲུབ་རྗེས་དགའ་ལྡན་ཁྲི་ཐོག་ ༡༠༤ པ་༧རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གིས་འདུས་མང་ཡོངས་ལ་བཀའ་སློབ་གནང་ཡོད་འདུག །དགའ་ལྡན་བླ་སྤྱིའི་མཛད་སྒོ་གྲུབ་རྗེས་སྔ་དྲོའི་ཆུ་ཚོད་ ༨།༣༠ ཡོལ་ཙམ་ལ་དགའ་ལྡན་བླ་སྤྱི་ནས་དགའ་ལྡན་ཁྲི་ཐོག་ཁང་དུ་རྟེན་འབྲེལ་མཛད་སྒོ་ཚོགས་ཡོད་པ་དང་། ཕྱི་ཚེས་ ༣ ཉིན་དགའ་ལྡན་བྱང་རྩེ་ཧར་གདོང་ཁམས་ཚན་དུ་སྔོན་འགྲོའི་ཁྲི་འདོན་མཛད་སྒོ་ཞིག་ཀྱང་ཚོགས་ཡོད་འདུག །ཕྱི་ཚེས་ ༥ ཉིན་དགའ་ལྡན་ཁྲི་ཐོག་ཁང་དུ་དགེ་ལུགས་སྤྱི་ཡིས་དགའ་ལྡན་ཁྲི་པ་མཆོག་ལ་བརྟན་བཞུགས་བསྟར་འབུལ་གནང་འདུག །

  ཕྱི་ཚེས་༩ཉིན་སྔ་དྲོའི་ཆུ་ཚོད་བདུན་པར་གྲྭ་ཚང་གཉིས་ཀྱི་མཁན་བླ་དགེ་བཤེས་དགེ་འདུན་མང་གིས་ཕེབས་བསུའི་ཁྲོད་༧དགའ་ལྡན་ཁྲི་རིན་པོ་ཆེ་སེ་ར་ཐེག་ཆེན་གླིང་དུ་ཆིབས་བསྒྱུར་བསྐྱངས་ཏེ་སེ་ར་བླ་སྤྱིར་མཛད་སྒོ་དང་བླང་དོར་བཀའ་སློབ་གནང་ཡོད་པ་དང་། དེ་རྗེས་སེར་སྨད་ཐོས་བསམ་ནོར་གླིང་གྲྭ་ཚང་དུ་ཆིབས་བསྒྱུར་བསྐྱངས་ཏེ་མཛད་སྒོ་དང་བཀའ་སློབ་གནང་ཡོད་འདུག །དེ་ནས་སེར་བྱེས་མཁས་སྙན་གྲྭ་ཚང་དུ་ཆིབས་བསྒྱུར་བསྐྱངས་ཏེ་མཁན་བླ་དགེ་འདུན་མང་དང་ཕྱོགས་མཐའ་ཁག་ནས་ཕེབས་པའི་སྐུ་མགྲོན་ལྷན་མཛོམས་ཀྱིས་༧དགའ་ལྡན་ཁྲི་རིན་པོ་ཆེར་བརྟན་བཞུགས་ཕུལ་བ་དང་། ཕྱི་ཚེས་༡༠ཉིན་སེར་བྱེས་གྲྭ་ཚང་གི་ཆོས་རར་གདན་ཞུས་ཀྱིས་སྐྱ་སེར་མང་པོར་རྟེན་འབྲེལ་ལ་དམིགས་ཏེ་ཆོས་འབྲེལ་དུ་༧དགའ་ལྡན་ཁྲི་རིན་པོ་ཆེས་བྱང་ཆུབ་ལམ་རིམ་ཆེན་མོའི་དབུ་ནས་ཅུང་ཟད་ཅིག་གནང་རྗེས་ལམ་རིམ་གྱི་ས་བཅད་དང་ལམ་རིམ་བསྡུས་དོན་སྦྲགས་ཏེ་ཁྲིད་གནང་ཡོད་པ་དང་། དེ་རིང་སྟེ་ཕྱི་ཚེས་༡༡ཉིན་སེར་བྱེས་གཙང་པ་ཁམས་ཚན་དུ་དགའ་ལྡན་ཁྲི་རིན་པོ་ཆེར་བརྟན་བཞུགས་དང་ཆོས་འབྲེལ་དུ་རྟེན་འབྲེལ་བསྟོད་པའི་ལུང་གནང་ཡོད་འདུག

སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༧།༠༨།༡༡ལ།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།

 

དེ་རིང་སེར་བྱེས་གྲྭ་ཚང་གི་མཁན་རབས་དོན་དྲུག་པ་ཁྲི་འདོན་མཛད་སྒོ་འཚོགས་ཏེ་མཁན་པོའི་མཛད་ཁུར་དངོས་སུ་བཞེས།              དེ་ཡང་གྲྭ་ཚང་གི་མཁན་རབས་དོན་ལྔ་པ་སྐྱབས་རྗེ་དགེ་འདུན་ཆོས་འཕེལ་མཆོག་གློ་བུར་དུ་དགོངས་པ་གཞན་དུ་འཕོས་པར་བརྟེན། མཁན་པོ་གསར་པའི་འོས་མི་གྲྭ་ཚང་གི་གྲོས་ཚོགས་དང་ཤར་བྱང་གི་ཆོས་རྗེ། དགའ་ལྡན་ཁྲི་རིན་པོ་རྣམས་བརྒྱུད་༧གོང་ས་༧སྐྱབས་མགོན་ཆེན་པོ་མཆོག་ལ་སྤྱན་འབུལ་ཞུས་ཤིང་། ༧གོང་ས་༧སྐྱབས་མགོན་ཆེན་པོ་ཞལ་སྔ་ནས་ཀྱིས་ཡེ་ཤེས་དབྱིངས་གཟིགས་ཀྱིས་ལོ་དགོན་སྤྲུལ་སྐུ་བསྟན་འཛིན་བྱམས་པ་ཆོས་བཟང་རིན་པོ་ཆེ་ལ་ཕྱག་དམ་སྦྲགས་མའི་བཀའ་ཡིག་རིན་པོ་ཆེ་སྟེ་མཁན་པོའི་ཕྱག་རྟགས་རིན་པོ་ཆེ་གསོལ་སྩལ་གནང་བ་དགའ་ལྡན་ཁྲི་ཐོག་ཁང་བརྒྱུད་ལོ་སྔོན་མའི་ཕྱི་ཟླ་ ༡༡ ཚེས་ ༢༤ ཉིན་འབྱོར་བར་ཉིན་དེར་གྲྭ་ཚང་གི་མཁན་ཚབ་དང་། ཁྲིམས་བདག་དགེ་བསྐོས། དབུ་མཛད་ཆེན་མོ། སེ་ར་བླ་སྤྱི་དང་བྱེས་སྨད་གཉིས་ཀྱི་ཕྱག་མཛོད་གཙོས་ལས་ཀྱི་སྣེ་མོ་བ་རྣམས་འཛོམས་ཏེ་བླ་བྲང་དུ་ཕྱག་དམ་རིན་པོ་ཆེ་འབུལ་བའི་མཛད་སྒོ་མདོར་བསྡུས་ཤིག་འཚོགས་ཤིང་། ད་ལྟའི་བར་དུ་མཁན་པོའི་ལས་ཚབ་ཀྱི་ངོ་བོར་བཞུགས་པ་དང་། དེ་རིང་སྟེ་བོད་རྒྱལ་ལོ་༢༡༤༤ བོད་ཟླ་༡ཚེས་༢༦ ཕྱི་ལོ་༢༠༡༧ ཟླ་བ་༣ ཚེས་༢༤ རེས་གཟའ་པ་སངས་གཟའ་སྐར་དགེ་བའི་ཉིན་སྐྱབས་རྗེ་ལོ་དགོན་སྤྲུལ་སྐུ་བསྟན་འཛིན་བྱམས་པ་ཆོས་བཟང་རིན་པོ་ཆེ་མཆོག་སེར་བྱེས་མཁས་སྙན་གྲྭ་ཚང་གི་མཁན་ཁྲིར་འཁོད་དེ་མཁན་པོའི་མཛད་ཁུར་དངོས་སུ་བཞེས།
           ཉིན་དེའི་ཞོགས་ཀར་གྲྭ་ཚང་གཉིས་ཀྱི་བླ་སྤྲུལ་དགེ་འདུན་ཡོངས་སེར་བྱེས་གྲྭ་ཚང་གི་གཙུག་ལག་ཁང་དུ་མང་ཇ་འཚོགས་ཏེ་རྟེན་འབྲེལ་གྱི་མཛད་སྒོ་དང་། སྔ་དྲོའི་ཆོས་རའི་སྐབས་མཁན་རིན་པོ་ཆེ་གྲྭ་ཚང་གི་ཆོས་རར་གདན་འདྲེན་ཞུས་ཏེ་བྱང་ཆུབ་ལམ་རིམ་ཆེན་མོའི་གསུང་ཆོས་དབུ་འཛུགས་གནང་ཞིང་། ཉིན་གུང་ཆུ་ཚོད་༡༡ཐོག་མཁན་ཁྲིར་མངའ་གསོལ་མཛད་སྒོ་དང་འབྲེལ། ཞིང་མཆོག་འདུས་པ་རྒྱ་མཚོར་བསྙེན་བཀུར་ཟབ་རྒྱས་ཞུས་སོང་།
   དམ་པ་ཁོང་ནི་སྐུ་ན་ཆུང་ངུ་ནས་སེར་བྱེས་གྲྭ་ཚང་དུ་ཆོས་ཞུགས་གནང་སྟེ་དགེ་བཤེས་ལྷ་རམས་པའི་མཚན་རྟགས་བཞེས་པ་དང་། རྒྱུད་སྟོད་གྲྭ་ཚང་གི་དགེ་བསྐོས་དང་བླ་མ་དབུ་མཛད། མཁན་པོ་བཅས་གནང་མྱོང་ཞིང་། སྲད་རྒྱུད་གྲྭ་ཚང་གི་མཁན་པོའི་མཛད་ཁུར་བཞེས་སྐབས་སེར་བྱེས་གྲྭ་ཚང་གི་མཁན་པོའི་ཕྱག་རྟགས་ཕེབས་འདུག་ལ། དུས་རྒྱུན་གྲྭ་སར་བཞུགས་ཏེ་སློབ་གཉེར་བ་རྣམས་ལ་དཔེ་ཁྲིད་གནང་མཁན་ཞིག་ཡིན། ༼རྣམ་ཐར་རྒྱས་པའམ་ཁ་གསལ་ཞིག་རྩོམ་སྒྲིག་པས་མཐོང་ཐོས་མ་བྱུང་བས་འདི་ཙམ་ལས་འགོད་ཐབས་མ་བྱུང་ལ། ཞིབ་རྒྱས་རྗེས་སུ་འཚོལ་བསྡུ་བྱས་ཏེ་དགོད་ངེས་ཡིན།༽

སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༧།༠༣།༢༤ ལ།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་དང་སྦྲེལ་སྣེ་མཉམ་སྦྱར་བྱེད་དགོས།