སེར་བྱེས་མཁན་རབས་དོན་དྲུག་པ་ལོ་དགོན་སྤྲུལ་སྐུ་བསྟན་འཛིན་བྱམས་པ་ཆོས་བཟང་མཆོག་ནི། རབ་བྱུང་བཅུ་དྲུག་པའི་ཤིང་སྦྲུལ་ལོར་རྒྱ་གར་ཀ་སྦུག་ཏུ་ཡབ་མིག་དམར་དོན་གྲུབ་དང་། ཡུམ་པདྨ་ཚེ་དབང་གཉིས་ཀྱི་སྲས་སུ་སྐུ་འཁྲུངས། དགུང་ལོ་ ༡༣ ལ་ཕེབས་སྐབས་༧རྒྱལ་བའི་ཡོངས་འཛིན་ཁྲི་བྱང་རིན་པོ་ཆེས་དགེ་བཤེས་བྱམས་པ་ཆོས་འཕེལ་གྱི་ཡང་སྲིད་དུ་ངོས་འཛིན་མཛད། དེ་ནས་རིང་པོ་མ་འགོར་བར་སེར་བྱེས་མཁས་སྙན་གྲྭ་ཚང་གི་ཆོས་སྒོར་ཞུགས་ཏེ། སེར་བྱེས་མཁན་ཟུར་རིན་པོ་ཆེ་ངག་དབང་ལེགས་ལྡན་མཆོག་དང་། རྒྱུད་སྨད་མཁན་ཟུར་རིན་པོ་ཆེ་ཨོ་རྒྱན་ཚེ་བརྟན་མཆོག །སེར་བྱེས་མཁན་ཟུར་རིན་པོ་ཆེ་བློ་བཟང་དཔལ་ལྡན་མཆོག །ལྭ་བ་དགེ་བཤེས་བློ་བཟང་བཟོད་པ་བཅས་བསྟེན་ཏེ། མདོ་སྔགས་ཀྱི་གཞུང་ལ་གསན་བསམ་མཛད།
༧གོང་ས་༧སྐྱབས་མགོན་ཆེན་པོ་མཆོག་གི་དྲུང་ནས་ཚིགས་སྔ་མ་དགེ་ཚུལ་གྱི་སྡོམ་པ་དང་། དགེ་འདུན་གྲངས་ཚང་གི་དབུས་སུ་དགེ་སློང་གི་སྡོམ་པ་བཞེས་ཏེ། མཚན་ལ་བསྟན་འཛིན་ཆོས་བཟང་གསོལ།
ཕྱི་ལོ་ ༡༩༩༤ ལོར་དགེ་བཤེས་ལྷ་རམས་ཀྱི་མཚན་བཏགས་བཞེས་ནས་དཔལ་ལྡན་སྟོད་རྒྱུད་གྲྭ་ཚང་དུ་སྔགས་ཀྱི་ཆོས་ཐོག་ལ་ཕེབས། ཁམས་ཚན་གྱི་བརྩི་བཞག་མཁན་པོ་ལོ་མང་གནང་། སློབ་གཉེར་གྱི་སྐབས་ནས་ཀྱང་དོན་གཉེར་ཅན་རྣམས་ལ་དཔེ་ཁྲིད་གནང་། ཕྱི་ལོ་ ༢༠༠༣ ལོར་དཔལ་ལྡན་སྟོད་རྒྱུད་གྲྭ་ཚང་དུ་སྔགས་ཀྱི་དམ་བཅའ་བཞག །༢༠༠༥ ལོར་དཔལ་ལྡན་སྟོད་རྒྱུད་གྲྭ་ཚང་གི་དགེ་བསྐོས་ཀྱི་ཐུགས་འགན་བཞེས། ༢༠༠༨ ལོར་༧གོང་ས་༧སྐྱབས་མགོན་རྒྱལ་བའི་དབང་པོ་མཆོག་གིས་རྒྱུད་སྟོད་གྲྭ་ཚང་གི་བླ་མ་དབུ་མཛད་ཀྱི་ཕྱག་རྟགས་སྤྱི་ཕེབས་བྱུང་བ་ལྟར་རྒྱུད་སྟོད་གྲྭ་ཚང་གི་བླ་མ་དབུ་མཛད་དང་། ༢༠༡༡ ལོར་རྒྱུད་སྟོད་གྲྭ་ཚང་གི་མཁན་ཁྲིར་འཁོད། མཁན་པོ་རིམ་བརྒྱུད་ཀྱི་ཕྱག་སྲོལ་ལྟར་འགྲེལ་པ་བཞི་སྦྲགས་སོགས་ཀྱི་འཆད་ཉན་སོགས་ཆད་ལྷག་མེད་པར་གནང་། བསྐྱེད་རིམ་པ་དང་ཆོས་ཐོག་འགྲིམ་མཁན་གྱི་དགེ་བཤེས་སོགས་དོན་གཉེར་ཅན་མང་པོར་མདོ་སྔགས་ཀྱི་དཔེ་ཁྲིད་ཆག་མེད་གནང་། བླ་མ་དབུ་མཛད་ལོ་གསུམ་དང་། མཁན་པོ་ལོ་གསུམ་སྟེ་ལོ་དྲུག་གི་རིང་ལ་རྒྱུད་སྟོད་གྲྭ་ཚང་གི་ཆོས་སྲིད་གཉིས་ཀྱི་ཐུགས་འགན་བཞེས། ཕྱི་ལོ་༢༠༡༦ ལོར་༧གོང་ས་༧སྐྱབས་མགོན་ཆེན་པོ་མཆོག་གིས་སྲད་རྒྱུད་གྲྭ་ཚང་གི་མཁན་པོའི་ཕྱག་རྟགས་སྤྱི་ཕེབས་བྱུང་བ་ལྟར་སྲད་རྒྱུད་མཁན་པོ་གནང་།
ཕྱི་ལོ་ ༢༠༡༦ ལོའི་ཕྱི་ཟླ་ ༧ ཚེས་ ༣༡ ཉིན་གྲྭ་ཚང་གི་མཁན་རིན་པོ་ཆེ་སྐྱབས་རྗེ་དགེ་འདུན་ཆོས་འཕེལ་མཆོག་གློ་བུར་དུ་དགོངས་པ་གཞན་དུ་འཕོས་པར་བརྟེན། ༧གོང་ས་༧སྐྱབས་མགོན་ཆེན་པོ་མཆོག་གི་སེར་བྱེས་གྲྭ་ཚང་གི་མཁན་པོའི་ཕྱག་རྟགས་རིན་པོ་ཆེ་གསོལ་སྩལ་གནང་བ་ལོ་དེའི་བོད་ཟླ་༩ཚེས་༢༦དང་ཕྱི་ཟླ་ ༡༡ ཚེས་ ༢༤ ཉིན་འབྱོར་བ་དང་། ལོ་དེར་མཁན་པོའི་ལས་ཚབ་ཀྱི་ངོ་བོར་བཞུགས། ༢༠༡༧ ཕྱི་ཟླ་༣ ཚེས་༢༤ ཉིན་སེར་བྱེས་མཁས་སྙན་གྲྭ་ཚང་གི་མཁན་ཁྲིར་འཁོད་དེ་མཁན་པོའི་མཛད་ཁུར་དངོས་སུ་བཞེས་ཤིང་། རྒྱུན་དུ་ཕྱི་ནང་གི་དོན་གཉེར་ཅན་མང་པོར་ལུང་ཆོས་མན་ངག་དང་། གདན་སར་སློབ་གཉེར་པ་རྣམས་ལ་གཞུང་ཆེན་བཀའ་པོད་ལྔ་སྔགས་དང་བཅས་པའི་བཀའ་ཁྲིད་རྒྱུན་ཆད་མེད་པར་གནང་བཞིན་བཞུགས་པ་ལགས་སོ། །
༢༠༡༨.༠༣.༠༥ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་]ཞེས་རྩོམ་ཁུངས་ཁ་གསལ་འགོད་དགོས།
