ཤེས་རབ་ཀྱི་ཚོམས།

ཤེས་རབ་ཀྱི་ཚོམས། (1)

     ༡ གཞལ་བྱ་གཉིས་ཕྱིར་ཚད་མ་གཉིས། །ཞེས་པའི་དོན་དང༌། རྩ་བའི་རྟགས་དང་ཕྱོགས་ཆོས་སྒྲུབ་པའི་རྟགས་སོགས་ཀྱི་སྐོར་ལ། འགའ་ཞིག་གིས། ཤེས་བྱ་ཆོས་ཅན། ཚད་མ་ལ་མངོན་རྗེས་གཉིས་སུ་གྲངས་ངེས་ཏེ། གཞལ་བྱ་ལ་རང་མཚན་དང་སྤྱི་མཚན་གཉིས་སུ་ངེས་པའི་ཕྱིར། ཞེས་འགོད་པ་དང་རྣམ་འགྲེལ་ཐར་གསལ་ལྟར་ན་ཡང་དེ་འདྲ་བ་ཞིག་ཏུ་མངོན་ནོ། །དེ་ལ་རྟགས་དེའི་རྟགས་ཆོས་དོན་གསུམ་ཚད་མས་ངེས་པའི་ཚེ་ཚད་མ་ལ་མངོན་རྗེས་གཉིས་སུ་ངེས་པར་གྲུབ་ཟིན་པས་ཚད་མ-མངོན་རྗེས་གཉིས་སུ་སྒྲུབ་བྱེད་ཀྱི་རྟགས་མིན་པར་འདོད་དགོས་ལ། འདོད་ན། ཚད་མ་ལ་མངོན་རྗེས་གཉིས་སུ་སྒྲུབ་པའི་རྟགས་མེད་པར་འདོད་ན། ཕྱོགས་ཆོས་སྒྲུབ་པ་སོགས་ཀྱང་མི་འཐད་པའི་སྐྱོན་དུ་འགྱུར་བའི་ཕྱིར་རོ། །