ཐོག་མའི་བཟོ་དུས། Sat 27 Jun 2015 | 15:06

སེར་བྱེས་ཕུར་མཇལ་ངོ་སྤྲོད།

དྲ་འཇུག་པ།
ཚད་གཞི།
(0 འོས་འཕེན།)

ལོ་ལྟར་བོད་ཟླ་བཅུ་གཉིས་པའི་ཚེས་ཉེར་བདུན་ནི། སེར་བྱེས་དཔལ་ཆེན་རྡོ་རྗེ་གཞོན་ནུའི་ཕུར་པ་མཇལ་བའི་དུས་ཆེན་དེར་ཡོངས་གྲགས་སུ་སེ་ར་ཕུར་མཇལ་ཞེས་ཟེར།

སེར་བྱེས་གྲྭ་ཚང་གི་རྟེན་གཙོ་རྟ་མགྲིན་ཡང་གསང་ཡབ་ཡུམ་དང་། དཔལ་ཆེན་རྡོ་རྗེ་གཞོན་ནུའི་ཕུར་པ་འདི་གཉིས་ནི་ཀུན་མཁྱེན་བློ་གྲོས་རིན་ཆེན་སེང་གེ་གཞིས་ཀ་དཔལ་འབྱོར་ལྷུན་པོར་བཞུགས་སྐབས། ཡབ་རྟོགས་ལྡན་ཡོན་ཏན་མགོན་པོས་ཁྱེད་ཡི་དམ་འདི་དང་ཕུར་པ་འདིར་མ་བྲལ་བ་གྱིས་ཞེས་ཕུལ་བར་གྲགས། དེ་ཡང་དང་ཐོག་ཕུར་པ་འདི་སློབ་དཔོན་པདྨ་འབྱུང་གནས་ཀྱིས་རྒྱ་གར་བསིལ་བའི་ཚལ་གྱི་མཆོད་རྟེན་གྱི་དྲུང་ནས་གཏེར་དུ་བཞེས་པ་ཡི་དམ་གྱི་གཙོ་བོར་མཛད་ཅིང་། དུས་ཕྱིས་བོད་ཀྱི་ཆོས་རྒྱལ་ལ་དབང་རྒྱུད་གདམས་པ་དང་བཅས་པ་གནང་ནས་ལྷོ་ནུབ་སྲིན་པོའི་གླིང་དུ་ཕེབས་སྐབས་རྟ་མགྲིན་ཡང་གསང་གི་ཆོས་སྐོར་དང་ལྷན་ཅིག་ཡེར་བ་སེ་བ་ལུང་གི་བྲག་ལ་གཏེར་དུ་སྦས།

དེའི་རྗེས་སློབ་དཔོན་ཆེན་པོས་རྗེས་སུ་བཟུང་ཞིང་། ས་དང་པོ་ཐོབ་པ་གྲུབ་ཐོབ་མདའ་འཕྱར་པ་ཆེན་པོས་གཏེར་ནས་བཞེས་ཤིང་། གཙང་དུ་བྱོན། ས་སྐྱ་པཎ་ཆེན་སྐྱིད་གྲོང་དུ་ཕེབས་པ་དང་མཇལ། མདའ་འཕྱར་བས་ཞལ་འཆོལ་ནས་ཨོཾ་བཛྲ་ཀྱི་ལི་ཀྱི་ལ་ཡ་ཞེས་གསུངས་པ་ས་སྐྱ་པཎ་ཆེན་གྱིས་དེ་མ་དག །བཛྲ་ཀི་ལི་ཀི་ལ་ཡ་ཟེར་བ་ཡིན་གསུངས་པར་མདའ་འཕྱར་བས། སྔར་ཡང་བཛྲ་ཀྱི་ལི་ཡ། ད་ཡང་བཛྲ་ཀྱི་ལི་ཡ་སྔགས་མ་དག་ཀྱང་འདི་བཞིན་བྱེད་པ་ཡིན་གསུངས་ནས། བྲག་ལ་ཕུར་པ་བཏབ་པས་འདམ་ལ་ཟུག་པ་དང་ཁྱད་མེད་པ་བྱུང་བས། ས་སྐྱ་པཎ་ཆེན་གྱིས་ཁོང་གྲུབ་ཐོབ་ཏུ་མཁྱེན་ནས་མུ་སྟེགས་པ་དང་རྩོད་དུ་འགྲོ་བ་ཡིན་པས་དེའི་གྲོགས་སུ་ཁྱེད་འབྱོན་དགོས་གསུངས་ནས་མཉམ་དུ་ཕེབས། ས་སྐྱ་པཎ་ཆེན་དང་མུ་སྟེགས་པ་འཕྲོག་བྱེད་དགའ་བོ་གཉིས་བལ་བོད་ས་མཚམས་སུ་ཉིན་བཅུ་གསུམ་ལ་བརྩད་ནས། མཐར་ས་སྐྱ་པཎ་ཆེན་རྩོད་པ་ལས་རྒྱལ་ན་ཡང་གྲུབ་རྟགས་འགྲན་ཟེར་ནས་ནམ་མཁའ་ལ་འཕུར་བས། ས་སྐྱ་པཎ་ཆེན་གྱིས་མདའ་འཕྱར་བ་བོས་པས་ཁོང་གིས་ཕུར་པ་བཏབ་པས་མུ་སྟེགས་པ་བྱ་ལ་རྡོ་ཕོག་པ་བཞིན་ས་ལ་ལྷུང་ཞིང་མུ་སྟེགས་པའི་རལ་པ་བྲེགས་ནས་དྲན་རྟེན་དུ་ཉར་བ་ས་སྐྱའི་གཙུག་ལག་ཁང་དུ་ཡོད། རྗེས་སུ་མུས་སྲད་དུ་བྱོན་ནས་གཙུག་ལག་ཁང་གི་རྟེན་གཙོར་ཕུར་པ་འདི་བཞག་པ་རིམ་གྱིས་བརྒྱུད་དེ། རྟོགས་ལྡན་ཡོན་ཏན་མགོན་པོའི་ཕྱག་ཏུ་བྱུང་བ་རང་གི་སྲས་ཀུན་མཁྱེན་བློ་གྲོས་རིན་ཆེན་སེང་གེར་སྩལ། ཀུན་མཁྱེན་བློ་གྲོས་སེང་གེ་ནི་རྗེ་ཙོང་ཁ་པའི་དངོས་སློབ་རྣམ་དཔྱོད་ཕུལ་དུ་བྱུང་བའི་་མཁས་པ་གཉིས་ཀྱི་ཡ་གྱལ་ཡིན་པ་དེས་སེ་ར་ཐེག་ཆེན་གླིང་གི་མཁས་མང་བྱེས་པ་གྲྭ་ཚང་བཏབ་ཅིང་། ཕུར་པ་དེ་ནང་རྟེན་དུ་བཞུགས། རྗེས་སུ་༧གོང་ས་༧སྐྱབས་མགོན་༧རྒྱལ་དབང་ལྔ་བ་ཆེན་པོས་ཕུར་པ་དེ་འབྲས་སྤུངས་སུ་གདན་དྲངས་ཏེ། མི་མང་ལ་མཇལ་ཁ་བཏང་བ་དེ་ནས་ཕུར་མཇལ་གནང་བའི་སྲོལ་དར། དེའི་རྗེས་རྩེ་ཕོ་བྲང་ནས་མཇལ་ཁ་གནང་གི་ཡོད་འདུག་ཀྱང་། རྗེས་སུ་ལོ་ལྟར་བོད་ཟླ་༡༢པའི་ཚེས་༢༧ཉིན་དུས་ཚོད་གཏན་འཁེལ་གྱིས་སེར་བྱེས་མཁན་པོར་ཕུར་མཇལ་གཏོང་དུ་བཅུག་པ་ཡིན་འདུག །དེ་ཉིན་སེར་བྱེས་གྲྭ་ཚང་གི་འདུ་ཁང་ནང་རྟ་མགྲིན་ཡང་གསང་གཙོར་བཞུགས་ཀྱིས་གོས་ཐང་ཆེན་པོ་ཞིག་བཤམས། སྒོ་འཕྱོར་ལ་མཆོད་རྫས་གཟབ་རྒྱས་སྤྲས། སྒོ་འཕྱོར་འོག་ནུབ་ངོས་རྩིག་འགྲམ་དུ་བཞུགས་ཁྲི་རྒྱབ་ཡོལ་བླ་བྲེ་སོགས་ཕུན་སུམ་ཚོགས་པ་བཤམས། ཞོགས་པ་སྔ་པོ་ནས་སེར་བྱེས་དབུ་མཛད་སོགས་ལས་སྣེ་རྣམས་གཟབ་མཆོར་སྤྲས་ཤིང་། རྟ་ཧྲག་བསྒྲིགས་ཏེ་ཕུར་པ་དེ་༧གོང་ས་མཆོག་དང་བླ་དཔོན་ཆེ་ཁག་གི་སར་མཇལ་ཁ་ཕུལ་གྲུབ་རྗེས་སེ་རར་ལོག །སེར་བྱེས་མཁན་པོ་སྒོ་འཕྱོར་འོག་གི་ཁྲི་དེའི་སྟེང་དུ་གོས་བེར་དང་པཎ་ཞྭ་སེར་པོ་མནབས་ཏེ་བཞུགས་ཤིང་། ཕུར་པ་ཕྱག་ཏུ་ཐོགས་ནས་ཡི་དམ་གྱི་གཟུངས་སྔགས་བགྲང་བཞིན་མཇལ་ཞུ་བ་རེ་རེའི་མགོ་བོར་བྱིན་རླབས་གནང་བ་ཡིན། ཕུར་པ་འདི་ཤིན་ཏུ་བྱིན་ཅན་ཞིག་ཏུ་བརྩིས་ནས་ལོ་ལྟར་གོང་ཚེས་ཉིན་མཇལ་ཁ་གཏོང་སྐབས་ཉེ་འདབས་གྲོང་གསེབ་པ་དང་། ལྷ་ས་པ་མང་པོ་མཆོད་མཇལ་དུ་བསྐྱོད་སྲོལ་ཡོད། ཕུར་པ་འདིའི་སྐོར་རྙིང་མ་རྒྱུད་འབུམ་གྱི་དཀར་ཆག་ཏུ་ཞིབ་ཕྲ་དང་གསལ་པར་བཞུགས། འཕགས་ཡུལ་གྲྭ་ཚང་འདིར་ཡང་ལོ་ལྟར་བོད་ཟླ་༡༢པའི་ཚེས་༢༧ཉིན་སྔར་སྲོལ་རྒྱུན་འཛིན་བྱས་ཏེ། བོད་ནས་གདན་དྲངས་པའི་རག་ལས་གྲུབ་པའི་ཕུར་པ་ཁྲོ་ཞལ་གསུམ་པ་རྟ་མགོ་ཅན་བྱིན་རླབས་ཀྱི་ཚན་ཁ་གཞན་དང་མི་འདྲ་བ་དེ་ཉིད་ལ་ཕུར་མཇལ་བྱེད་པའི་ཕྱག་སྲོལ་བཟང་པོ་མ་ཉམས་པར་ཡོད་དོ། །

ཤོག་ངོས་འདི་ཐེངས་ 211 བཀླགས་འདུག མཐའ་མའི་བསྐྱར་བཅོས། Mon 20 Aug 2018 | 08:48
སེར་བྱེས་རིག་མཛོད་ཆེན་མོ།

དུས་རབས་ཉེར་གཅིག་པ་བརྡ་འཕྲིན་གྱི་དུས་རབས་འདིར་འོད་རླབས་ཀྱི་འགྲོས་དང་འགྲོགས་ཏེ། ཚན་རྩལ་གྱི་ཤེས་རིག་རབ་ཏུ་དར་བས། མི་རྣམས་ཀྱིས་རང་རིགས་ཀྱི་རིག་གཞུང་དང་ཤེས་རིག་དག་ཀྱང་བརྡ་འཕྲིན་གྱི་ལམ་དུ་སྐྱེལ་ཏེ་སྲུང་སྐྱོབ་དང་། འཕེལ་རྒྱས། དར་སྤེལ་ལ་རེམ་བཞིན་པའི་སྐབས་འདིར། རང་རེའི་གངས་ཅན་པའི་ཆོས་དང་རིག་གཞུང་དག །ཟླུམ་གཟུགས་ཀྱི་གོ་ལ་འདིར་ཡུན་རིང་གནས་པ་དང་། འཕྲིན་ལས་ཀྱི་འཇུག་པ་རླབས་རྡུལ་གྱི་འགྲོས་དང་མཉམ་པ་ཡོང་སླད། འདི་ག་སེར་བྱེས་གྲྭ་ཚང་ནས་ཀྱང་འཕྲུལ་དེབ་དང་། སློབ་ཁྲིད་སྐོར་གྱི་སྒྲ་མཛོད། བརྙན་མཛོད་བཅས་ལས་གྲུབ་པའི་རིག་མཛོད་ཀྱི་དྲ་ཚིགས་འདི་སྒོ་འབྱེད་བྱས་པ་ལགས་ན། གངས་ཅན་པའི་ཆོས་དང་རིག་གཞུང་ལ་མོས་པའི་རིས་མེད་སྐྱེ་བོ་རྣམས་ཀྱིས་ཐུགས་འདོད་ལྟར་ལོངས་སྤྱོད་རྒྱུ་དང་། བསམ་ཚུལ་སོགས་གང་ཡོད་འཛེམ་མེད་དུ་གནང་བ་དང་། གསུང་རབ་ཀྱི་གླེགས་བམ་དག་གཙོ་བྱས་པའི་འཕྲུལ་དེབ་གང་མང་རིན་མེད་དུ་འགྲེམས་སྤེལ་བྱེད་ཀྱིན་ཡོད་པ་དག།  iPad,iPhone & iPod Touch སོགས་ཀྱི་ནང་དུ་ཐུགས་འདོད་ལྟར་ཕབ་ལེན་དང་གཟིགས་ཀློག་གནང་རོགས། 

དྲ་ཚིགས།: www.serajeyrigzodchenmo.org གློག་འཕྲིན་ཁ་བྱང་། serajeyrigzodchenmo@gmail.com

སྡེ་ཚན་འདིའི་ནང་དུ་མང་། ལྷ་བབས་དུས་ཆེན་ངོ་སྤྲོད་མདོར་བསྡུས། »