ཨ་ཀྱཱ་ཡོངས་འཛིན་བློ་བཟང་དོན་གྲུབ་བམ་དབྱངས་ཅན་དགའ་བའི་བློ་གྲོས་ནི། ཕྱི་ལོ་ ༡༧༤༠ ལོར་མདོ་ཁམས་སྨད་ཀྱི་ཕྱག་རྡོ་ཐང་གི་ཨ་ཀྱཱ་སྡེ་པར་སྐུ་འཁྲུངས། དགུང་ལོ་བདུན་པར་རབ་ཏུ་བྱུང་སྟེ་མཚན་ལ་བློ་བཟང་དོན་གྲུབ་གསོལ།
དགུང་ལོ་བཅོ་ལྔའི་སྐབས་བྱ་ཁྱུང་དགོན་དུ་ཆོས་ཞུགས་མཛད་ཅིང་། ཤིང་བཟའ་བློ་བཟང་དར་རྒྱས་རྒྱ་མཚོ་སློབ་དཔོན་དུ་བསྟེན་ནས་མདོ་སྔགས་ཀྱི་བཀའ་ཆོས་མང་དུ་གསན། དགུང་ལོ་ཉེར་བདུན་སྐབས་དབུས་སུ་ཕེབས་ཏེ་གཞུང་ཆེན་ལ་སློབ་གཉེར་གནང་།
དགུང་ལོ་ཉེར་བརྒྱད་སྐབས་པཎ་ཆེན་དཔལ་ལྡན་ཡེ་ཤེས་ཀྱི་དྲུང་དུ་བསྙེན་པར་རྫོགས། དགུང་ལོ་སོ་གཉིས་པར་གྲྭ་སྐོར་མཛད། སྒྲ་རིག་པ་ལེགས་པར་སྦྱངས་པས་ཀུན་བཤད་ཀྱི་མིང་ལ་དབྱངས་ཅན་དགའ་བའི་བློ་གྲོས་སུ་འབོད། འབྲུ་གཅིག་ལ་དེ་བཞིན་གཤེགས་པའི་སྐུའི་སྐྱེ་མཆེད་ལེགས་པ་དོད་པ་བཞེངས་པ་སོགས་བཟོའི་གནས་ཀྱང་མཁས་པར་མཁྱེན། ཀུན་མཁྱེན་འཇིགས་མེད་དབང་པོ་དང་ཐུའུ་བཀྭན་ཆོས་ཀྱི་ཉི་མ་སོགས་ལས་ཀྱང་མདོ་སྔགས་ཀྱི་ཟབ་ཆོས་མང་པོ་གསན།
དགུང་ལོ་བཞི་བཅུ་པར་མགུར་རྣམ་རྒྱལ་གླིང་གི་ཁྲིར་ཕེབས། རྫོང་ནང་དགོན་པ་དང་། སྨན་པ་གྲྭ་ཚང་། དུས་འཁོར་གྲྭ་ཚང་སོགས་ཕྱག་བཏབ། དགུང་ལོ་དྲུག་ཅུ་རེ་བཞི་པར་བྱ་ཁྱུང་དགོན་གྱི་ཁྲིར་ཕེབས།
རྗེ་ཡབ་སྲས་གསུམ་གྱི་གསུང་འབུམ་ཤིང་པར་དུ་འགོད་སྐབས་མཁས་དབང་འདིས་ཞུས་དག་ལེགས་པར་མཛད་པ་དང་། སྐུ་འབུམ་གསོ་རིག་དར་རྒྱས་གླིང་གི་གདན་ཁྲིར་ཡང་ཕེབས། ཨ་ཀྱཱ་ཞབས་དྲུང་བློ་བཟང་ངག་དབང་བསྟན་འཛིན་ལ་རབ་བྱུང་དགེ་ཚུལ་གྱི་སྡོམ་པ་སྩལ།
སྐུ་འབུམ་བླ་མ་ཨ་ཀྱཱ་ཡེ་ཤེས་བསྐལ་བཟང་མཁས་གྲུབ་རྒྱ་མཚོའི་ཡོངས་འཛིན་མཛད་པས་ཡོངས་གྲགས་སུ་ཨ་ཀྱཱ་ཡོངས་འཛིན་ཞེས་གསོལ། སྐུ་ཚེ་གང་བོར་དམ་ཆོས་འཆད་ཉན་མཛད་ནས་དུས་མདའ་བར་གནང་། ཕྱི་ལོ་ ༡༨༢༧ ལོར་སྐུ་གཤེགས། ཁོང་གི་གསུང་རྩོམ་ལ་ཆོས་ཚན་ལྔ་བཅུ་ཐམ་པ་དང་པོད་འབྲིང་གཉིས་ཙམ་བཞུགས།

༢༠༡༧.༡༠.༢༢སེར་བྱེས་རིག་མཛོད་ཆེན་མོའི་རྩོམ་སྒྲིག་པས་ཕྱོགས་བཏུས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།

ཐུའུ་བཀྭན་བློ་བཟང་ཆོས་ཀྱི་ཉི་མ་ནི། ཕྱི་ལོ་ ༡༧༣༧ ལོར་མདོ་སྨད་ཕོ་རོད་ལང་གྲུའི་ཕུན་ཚོགས་ལུང་པར་པྲ་སྟིའི་རིགས་སུ་ཡབ་དབང་སྐྱབས་རྒྱལ་དང་། ཡུམ་བ་རི་བཟའ་ཆོས་མཚོ་སྐྱིད་གཉིས་ཀྱི་སྲས་སུ་སྐུ་འཁྲུངས། དེ་ནས་ལྕང་སྐྱ་རིན་པོ་ཆེ་སོགས་ནས་ཐུགས་དམ་བརྟགས་པ་གནང་བ་དང་། རྒྱལ་བ་བསྐལ་བཟང་རྒྱ་མཚོར་གསུང་བརྟགས་ཀྱི་ཡི་གེ་འབུལ་བ་གནང་བར་རྒྱལ་དབང་མཆོག་གིས་ཐུའུ་བཀྭན་ངག་དབང་ཆོས་ཀྱི་རྒྱ་མཚོའི་ཡང་སྲིད་དུ་ངོས་འཛིན་མཛད་དེ་དགུང་ལོ་དྲུག་གི་སྐབས་དགོན་ལུང་དུ་གདན་འདྲེན་ཞུས། [མིང་མཛོད་སོགས་སུ་ཀུན་མཁྱེན་གཉིས་པས་ངོས་འཛིན་གནང་བར་བཤད་པ་ནི་ནོར་བ་སྟེ། གུང་ཐང་བསྟན་པའི་སྒྲོན་མེས་མཛད་པའི་འདི་པའི་རྟོགས་བརྗོད་པདྨ་དཀར་པོ་ལས། རྗེ་བླ་མ་རྣམ་གཉིས་ཀྱིས་བོད་དུ་རྒྱལ་དབང་ཐམས་ཅད་མཁྱེན་པ་བསྐལ་བཟང་རྒྱ་མཚོར་གསུང་བརྟགས་ཀྱི་ཡི་གེ་འབུལ་བ་གནང་བའི་ཕྱིར་ཕེབས་ལ། བླ་མ་དཀོན་མཆོག་ལ་གསོལ་བ་བཏབ་ནས་བརྟགས་པ་ཞིབ་ཏུ་བགྱིས་པར་བློ་བཟང་བསྟན་འཛིན་ཉི་མ་འདི་ཉིད་སྐུ་སྐྱེ་ཡིན་པ་བབས་ཞེས་ཕེབས། ཞེས་འབྱུང་།] བདེ་རྒུ་ངག་དབང་དགེ་ལེགས་རྒྱ་མཚོའི་དྲུང་ནས་དགེ་བསྙེན་གྱི་སྡོམ་པ་བཞེས། [དམར་གཙང་དང་དམར་ཚང་ཡང་སྣང་།] མར་ཚང་དབོན་ཆུང་བློ་བཟང་ཆོས་འཛིན་ཀློག་གི་སློབ་དཔོན་དུ་བསྟེན་ནས་ཡི་གེ་འབྲི་ཀློག་སོགས་སྦྱངས། དགུང་ལོ་བཅུ་གཅིག་པར་སུམ་པ་ཡེ་ཤེས་དཔལ་འབྱོར་ལས་རབ་ཏུ་བྱུང་། དགོན་ལུང་བྱམས་པ་གླིང་གི་ཆོས་གྲྭར་ཞུགས་ཏེ་ཐོག་མར་བསྡུས་གྲྭ་ནས་དབུ་བཙུགས་ཏེ་གཞུང་ཆེན་ལ་ཐུགས་གཉེར་གནང་། དགུང་ལོ་བཅུ་གསུམ་པར་ལྕང་སྐྱ་རོལ་པའི་རྡོ་རྗེ་སློབ་དཔོན་དང་། བདེ་རྒུ་ཞབས་དྲུང་ངག་དབང་བློ་གསལ་རྒྱ་མཚོས་དུས་གོ་བ། སུམ་པ་མཁན་རིན་པོ་ཆེ་སོགས་ཀྱིས་ཁ་སྐོང་མཛད་དེ། ཚིགས་སྔ་མ་དགེ་ཚུལ་གྱི་སྡོམ་པ་བཞེས། དགུང་ལོ་བཅུ་བཞི་པར་ཆོ་འཕྲུལ་སྨོན་ལམ་གྱི་སྐབས་དགོན་པའི་ཁྲི་པའི་ཚབ་ཏུ་ཞག་བཅུ་གསུམ་གྱི་རིང་ལ་སྨོན་ལམ་གྱི་ཚོགས་དབུ་མཛད། གཞུང་ཆེན་ཐུགས་གཉེར་གྱི་ཞར་ལ་སྙན་ངག །སྡེབ་སྦྱོར། སྐར་རྩིས་སོགས་ཐ་སྙད་རིག་གནས་ཀྱི་སྐོར་ལའང་གསན་སྦྱོང་མཛད། དགུང་ལོ་བཅོ་བརྒྱད་པར་སུམ་པ་མཁན་རིན་པོ་ཆེས་མཁན་སློབ་སྦྲགས་མ་དང་། དགེ་སློང་རི་ཁྲོད་པ་གསུམ་དང་བཅས་པས་བསྙེན་རྫོགས་ཀྱི་སྡོམ་པ་སྩལ། དགུང་ལོ་བཅུ་དགུའི་སྐབས་དབུས་སུ་ཕེབས་ནས་འབྲས་སྤུངས་སྒོ་མང་གྲྭ་ཚང་དུ་ཆོས་ཞུགས་དང་། ས་དཀར་ཆོས་ཐོག་གི་ཡར་འཚོགས་ལ་ཆོས་གྲྭར་གཞུང་གསར་པའི་འཛིན་གྲྭ་ནས་ཞུགས་ཏེ་གཞུང་ཆེན་ཁག་ལ་གསན་སྦྱོང་མཛད་པ་དང་། ཞར་ལ་བླ་མ་མང་པོའི་མདུན་ནས་དབང་ལུང་ཁྲིད་མན་ངག་སོགས་ཞུས་ཤིང་། གསང་སྔགས་ཀྱི་གཞུང་ལའང་ཐུགས་གཉེར་གནང་། སྔ་སོར་བསྙེན་རྫོགས་གནང་ཡང་དེ་སྐབས་དགུང་ལོ་བཅོ་བརྒྱད་ལས་མ་ལོན་པས། དགུང་ལོ་ཉེར་གཅིག་པར་ས་ག་ཟླ་བའི་ཚེས་བཅོ་ལྔའི་ཉིན་ཕུར་བུ་ལྕོག་ཏུ་ཕུར་ལྕོག་བྱམས་པ་རིན་པོ་ཆེས་མཁན་སློབ་སྦྲགས་མ་མཛད་ནས་དད་པའི་དགེ་འདུན་གྲངས་ཚང་བའི་དབུས་སུ་བསྙེན་རྫོགས་ཀྱི་སྡོམ་པ་བཞེས། དགུང་ལོ་ཉེར་ལྔའི་སྐབས་མདོ་སྨད་ནས་བསུ་བ་འབྱོར་བ་དང་། སུམ་པ་མཁན་རིན་པོ་ཆེས་གཙོས་བླ་མ་དགེ་འདུན་རྣམས་ཀྱིས་ཅིས་ཀྱང་རང་ཡུལ་དུ་འབྱོན་དགོས་པའི་ཞུ་བ་ནན་ཆེར་གནང་བ་དང་། ཕུར་ལྕོག་རིན་པོ་ཆེས་ཀྱང་རང་ཡུལ་དུ་བྱོན་ན་ལེགས་པའི་བཀའ་བབས་པར་བརྟེན། རང་ཡུལ་དུ་འབྱོན་པར་ཉེ་བ་ན། གཞུང་ས་རིན་པོ་ཆེར་ཐོན་ཕྱག་ཞུས་པའི་ཚེ། བསྟན་པའི་གསལ་བྱེད་ཨེར་ཏི་ནི་ནོ་མོན་ཧན་ཞེས་པའི་ཆོ་ལོ་དང་། ཐམ་ག་ཆེ་ཆུང་སོགས་ཆེན་པོར་འོས་པའི་གཟེངས་བསྟོད་གནང་སྦྱིན་སྩལ། ༧གོང་ས་རྒྱལ་བའི་དབང་པོ་མཆོག་གི་སྤྲུལ་བའི་སྐུ་ངེས་འདྲོངས་ཐག་ཆོད་ཟིན་ཀྱང་པོ་ཏ་ལར་མ་ཕེབས་པར་སྙེ་ཐང་དུ་བཞུགས་པ་ལ་མཇལ་ཁ་ཞུས། དེ་ནས་དབུས་ནས་མདོ་ཁམས་སྨད་དུ་ཕེབས་ཏེ་སུམ་པ་མཁན་ཆེན་སོགས་ཀྱི་ཐུགས་བཞེད་ལྟར་དགོན་ལུང་དགོན་པའི་མཁན་པོ་མཛད་དེ་[མཁན་རབས་སོ་དྲུག་པ་ཡིན། མིང་མཛོད་སོགས་སུ་མཁན་རབས་སོ་བཞི་པ་ཡིན་པར་གསུངས་པ་ནི་ནོར་བ་སྟེ་འདི་ཉིད་ཀྱིས་མཛད་པའི་དགོན་ལུང་དཀར་ཆག་ལས། མཁན་པོ་སོ་དྲུག་པར་བདག་བློ་བཟང་ཆོས་ཀྱི་ཉི་མ་འཁོད་ལ། ཞེས་འབྱུང་བས་ཤེས་སོ། །]དགོན་པའི་འཆད་ཉན་དང་འགྲིག་ལམ་སོགས་གང་ལེགས་ཡོང་ཐབས་ཐུགས་བརྩོན་ཆེར་གནང་ཞིང་། རིས་སུ་མ་ཆད་པའི་སྐལ་ལྡན་མང་པོ་དམ་ཆོས་ཀྱིས་ཚིམ་པར་བསྐྱངས། དགུང་ལོ་ཉེར་བདུན་པར་རྒྱ་ནག་གོང་མའི་རེ་སྐུལ་ལྟར་པེ་ཅིན་དུ་ཕེབས་ཏེ་དེར་རྒྱལ་བློན་སོགས་ཆེན་པོ་རྣམས་ཀྱིས་གཙུག་ཏུ་བཀུར་ཞིང་འགྲོ་དོན་བསྐྱངས་པ་དང་། བསྒྲུབ་བྱ་མང་པོར་དགེ་བསྙེན་དང་རབ་བྱུང་དགེ་ཚུལ་བསྙེན་རྫོགས་སོགས་ཀྱི་སྡོམ་པ་གནང་། རྒྱའི་རྒྱལ་པོ་ཆན་ཞིས་མཚན་གནས་དང་ཐམ་ཀ་སོགས་འབུལ་བ་གནང་། དགུང་ལོ་སོ་གཉིས་པར་རང་དགོན་དུ་ཕེབས། དགུང་ལོ་སོ་བདུན་པར་ཡང་བསྐྱར་རྒྱ་ནག་རྒྱལ་པོའི་རེ་སྐུལ་ལྟར་པེ་ཅིན་དུ་ཕེབས། རྒྱལ་བློན་རྣམས་ལ་ཆོས་མང་དུ་གསུངས། སྐུ་ཚེ་སྨད་དགོན་ལུང་དུ་ཕེབས་ཏེ་བཞུགས། དགུང་ལོ་ང་གཅིག་གི་སྐབས་དགེ་ལྡན་བསྟན་པའི་ཆུ་འགོ་བྲག་བྱ་ཁྱུང་གི་མཁན་རབས་ཞེ་གཉིས་པའི་ཁྲི་ལ་ཕེབས་ཏེ་ལོ་ངོ་གསུམ་བསྐྱངས། དགུང་ལོ་ང་གསུམ་པར་སྐུ་འབུམ་དགོན་པའི་ཁྲི་པ་མཛད་ནས་འཆད་ཉན་གྱིས་དུས་འདའ་བར་མཛད། རྗེ་འདིས་དགོན་གནས་མང་དུ་བཏབ། ཕྱི་ལོ་ ༡༨༠༢ ལོར་སྐུ་གཤེགས། རྗེ་འདིས་རྒྱལ་བ་བསྐལ་བཟང་རྒྱ་མཚོ་དང་། པཎ་ཆེན་དཔལ་ལྡན་ཡེ་ཤེས། ཀུན་མཁྱེན་སྐུ་ཕྲེང་གཉིས་པ་འཇིགས་མེད་དབང་པོ། ཕུར་ལྕོག་བྱམས་པ་རིན་པོ་ཆེ། ལྕང་སྐྱ་རོལ་པའི་རྡོ་རྗེ། སྟག་ཕུ་རིན་པོ་ཆེ། ས་སྐྱ་བདག་ཆེན་ངག་དབང་ཀུན་དགའ་བློ་གྲོས་སོགས་བླ་མ་མང་དུ་བསྟེན། ཁོང་གི་གསུང་རྩོམ་ལ་རྣམ་ཐར་དང་། རྟོགས་བརྗོད་སྣ་ཚོགས། རྩིས་དང་། སྙན་ངག །གྲུབ་མཐའ། གསང་སྔགས་སོགས་ཀྱི་སྐོར་བཅས་པོ་ཏི་བཅོ་ལྔར་བསྡུས་ཏེ་དགོན་ལུང་དུ་ཤིར་པར་བརྐོས་ཡོད།

༢༠༡༧།༡༠།༠༨ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་ཕྱོགས་བཏུས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།

བྲག་དཀར་བློ་བཟང་དཔལ་ལྡན་བསྟན་འཛིན་སྙན་གྲགས། བྲག་དཀར་སྐུ་ཕྲེང་གསུམ་པ། ཕྱི་ལོ་༡༨༦༦ལོའི་ཟླ་དང་པོའི་ཚེས་གཅིག་ཉིན་དཀར་མཛེས་འཁྲིགས་ལུང་རི་ཁྲོད་དམ་འབྲུག་ལང་དགོན་དུ་གྲགས་པ་སྔར་གྱི་དགོན་ཤུལ་དུ་གྲོང་ཆགས་པ་ཞིག་ཏུ་ཡབ་བསམ་གཏན་ཚེ་རིང་དང༌། ཡུམ་ཚེ་རིང་མ་གཉིས་ཀྱི་སྲས་སུ་སྐུ་འཁྲུངས། དགུང་ལོ་བཞིའི་སྐབས་པཎ་ཆེན་བསྟན་པའི་དབང་ཕྱུག་གིས་བྲག་དཀར་བྱང་ཆུབ་རྒྱལ་མཚན་གྱི་ཡང་སྲིད་དུ་ངོས་འཛིན་མཛད། མཚན་ལ་བློ་བཟང་དཔལ་ལྡན་བསྟན་འཛིན་སྙན་གྲགས་ཞེས་གསོལ། དགུང་ལོ་ལྔའི་སྐབས་དགེ་རྒན་རྡོ་རྗེ་འབུམ་ལས་ཡི་གེ་འབྲི་ཀློག་གསན་སྦྱོང་མཛད། འབའ་ཕུག་ཡོངས་འཛིན་བློ་ལྡན་ཆོས་འཕེལ་ལས་དག་ཡིག་དང་། སུམ་རྟགས་སོགས་ཐུན་མོང་གི་རིག་གནས་དང་། རྒྱལ་བའི་བཀའ་འགྱུར་རིན་པོ་ཆེའི་ལུང་ཡོངས་རྫོགས། མདོ་སྔགས་ཀྱི་གཞུང་ཆེན་དང་གསར་རྙིང་གི་ཆོས་སྐོར་གྱི་བཤད་ཁྲིད་དང་དབང་ལུང་སོགས་གསན། དགུང་ལོ་བཅུ་གཅིག་གི་སྐབས་དྲུང་སར་བླ་མ་བློ་བཟང་དཔལ་ལྡན་བསྟན་འཛིན་ཚུལ་ཁྲིམས་ལས་རབ་བྱུང་དང་དགེ་ཚུལ་གྱི་སྡོམ་པ་བཞེས། རྒྱལ་རོང་བླ་མ་དཀོན་མཆོག་བཟང་པོ་ལས་སྒྲ་ཀ་ལཱ་པའི་རི་མོ་ཡོངས་རྫོགས་དང་སྡེབ་སྦྱོར་སོགས་གསན། ཁང་གསར་རྡོ་རྗེ་འཆང་བློ་བཟང་མཐུ་སྟོབས་རྒྱ་མཚོའི་མདུན་ནས་འཇིགས་བྱེད་བཅུ་གསུམ་གྱི་དབང་སོགས་གསན། དགུང་ལོ་བཅུ་བདུན་སྐབས་ལྷ་ལྡན་དུ་ཕེབས། འབྲས་སྤུངས་བློ་གླིང་གྲྭ་ཚང་དུ་ཆོས་ཞུགས་མཛད། བློ་གླིང་མཁན་ཆེན་བློ་བཟང་དབང་ཕྱུག་ཡོངས་འཛིན་དུ་བསྟེན་ཏེ་གཞུང་ཆེན་བཀའ་པོད་ལྔ་ལ་གསན་སྦྱོང་གནང་། གྲུབ་དབང་དྷརྨ་སེང་གེ་ལས་གསོ་བ་རིག་པ་དང་། གཅོད་ཀྱི་དབང་ཁྲིད་སོགས་གསན། ཞྭ་ལུ་ཁྲི་ཟུར་བློ་བཟང་མཁྱེན་རབ་ལས་ས་སྐྱའི་གསེར་ཆོས་བཅུ་གསུམ་དང་། ལམ་འབྲས་སོགས་གསན། དགུང་ལོ་ཉི་ཤུའི་སྐབས་དགའ་ལྡན་ཁྲི་ཆེན་གྱ་གཉིས་པ་རྒྱལ་རོང་ཡེ་ཤེས་ཆོས་འཕེལ་གྱིས་མཁན་པོ་མཛད་དེ་བསྙེན་པར་རྫོགས། འཇམ་དབྱངས་མི་ཕམ་རྣམ་རྒྱལ་གྱི་མདུན་དུ་རྩོད་ལན་ཕུལ་བས་མཁས་པའི་གྲགས་པ་རྒྱས། དགུང་ལོ་ཉེར་གསུམ་གྱི་སྐབས་རང་ཡུལ་དུ་ཕེབས་ཏེ་བྲག་དཀར་བྱང་ཆུབ་གླིང་དུ་བཞུགས། གླིང་ཡོངས་འཛིན་མཆོག་སྤྲུལ་ལས་བསྟན་འགྱུར་གྱི་ལུང་དང་། ཉ་རྒྱས་མཆོག་སྤྲུལ་ལས་རྗེ་ཙོང་ཁ་པ་ཡབ་སྲས་ཀྱི་གསུང་འབུམ་སོགས་ཀྱི་ལུང་སོགས་རིས་མེད་ཀྱི་མཁས་གྲུབ་དུ་མ་བསྟེན་ཏེ་མདོ་སྔགས་གསར་རྙིང་རིག་གནས་དང་བཅས་པའི་ལུང་ཁྲིད་མན་ངག་དབང་སོགས་མནོས། གུང་ལོ་ཉེར་བདུན་ནས་བཟུང་བྲག་དཀར་རི་ཁྲོད་མཱ་ལ་ནང་དང༌། ཆོས་དབྱིངས་དགོན། བྲག་མགོ་དགེ་ཐར་ལུང་། དཔལ་སྒང་སོགས་གདན་སར་མཛད་དེ། བྱམས་ཆོས་སྡེ་ལྔ་དང༌། དབུ་མ་རྩ་འཇུག་བཞི་གསུམ། རིགས་ཚོགས། བསྟོད་ཚོགས་སོགས་ཀྱི་འཆད་འཁྲིད་མཛད། གཞན་ཡང༌། དཀར་མཛེས་དང་བྲག་མགོ །མི་ཉག །གསེར་ཐར་སོགས་གནས་ཕྱོགས་མེད་དུ་ཕེབས་ཏེ་རྒྱལ་བའི་བཀའ་འགྱུར་རིན་པོ་ཆེ་དང༌། རྗེ་ཡབ་སྲས་ཀྱི་གསུང་འབུམ་གྱིས་མཚོན་བླ་མ་སོ་སོའི་གསུང་འབུམ་སྣ་ཚོགས་ཀྱི་ལྗགས་ལུང༌། བདེ་གསང་འཇིགས་གསུམ་དང༌། སྙིང་ཐིག །ཞི་གཅོད་སོགས་ཀྱི་དབང་ལུང་ཁྲིད་གསུམ། བྱང་ཆུབ་ལམ་རིམ་ཆེ་ཆུང་བཅས་ཀྱི་བཀའ་ཆོས་རྒྱ་ཆེར་གསུངས་ནས་རིས་སུ་མ་ཆད་པའི་གདུལ་བྱ་མང་པོ་བསྐྱངས། སློབ་མའི་གཙོ་བོ། དགེ་བཤེས་འཇམ་དཔལ་རོལ་བའི་བློ་གྲོས་དང་། དགེ་ཐོག་མཆོག་སྤྲུལ་བློ་གྲོས་འགྱུར་མེད་ཆོས་ཀྱི་དབང་ཕྱུག་སོགས་བྱུང་། དགུང་ལོ་རེ་བཞི་པ་༡༩༢༩ལོར་སྐུ་གཤེགས། གསུང་རྩོམ་ལ། བསྟོད་ཚོགས། གཞུང་ཆེན་པོད་ལྔ། སྔགས་རྫོགས་སྐོར་གྱི་འགྲེལ་བཤད་སོགས་རྩོམ་སྒྲིག་པར་ལག་སོན་བྱུང་བ་པོ་ཏི་བཅུ་དགུ་བཞུགས་ཤིང་དེའི་ནང་དུ་འཇམ་དཔལ་བདེ་བའི་ཉི་མས་མཛད་པའི་རྗེ་འདིའི་རྣམ་ཐར་ཁ་སྐོང་ཡང་བསྡུས་འདུག །རྗེ་འདིའི་རྣམ་ཐར་ལ། རྭ་ཧོར་སྤྲུལ་སྐུ་འཇམ་དབྱངས་གྲུབ་པའི་དབང་པོས་བརྩམས་པ་དང་། འཇམ་དཔལ་བདེ་བའི་ཉི་མས་མཛད་པའི་རྣམ་ཐར་ཁ་སྐོང་བཅས་འདུག །གཞན་དུང་དཀར་ཚིག་མཛོད་དང་། གངས་ཅན་མཁས་གྲུབ་རིམ་བྱོན་གྱི་མིང་མཛོད་སོགས་སུ་རྗེ་འདིར་མི་སྣ་མི་འདྲ་བ་གཉིས་ཀྱི་རྣམ་ཐར་འབྱུང་ངོ་། །

༢༠༡༥.༠༧.༡༦.ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།

   རྗེ་ཙོང་ཁ་པ་བློ་བཟང་གྲགས་པ། རི་བོ་དགེ་ལྡན་པའི་ཆོས་བརྒྱུད་སྲོལ་གཏོད་མཁན་དང་། དགའ་ལྡན་ཁྲི་རབས་དང་པོ་ཡིན། བོད་མདོ་ཁམས་སྨད་ཀྱི་ཙོང་ཁའི་ཡུལ་དུ་ཡབ་ཀླུ་འབུམ་དགེ་དང༌། ཡུམ་ཤིང་བཟའ་ཨ་ཆོས་གཉིས་ཀྱི་སྲས་སུ་རབ་བྱུང་དྲུག་པའི་མེ་བྱ་༡༣༥༧ལོར་སྐུ་འཁྲུངས།
   དགུང་ལོ་གསུམ་པར་རྗེ་ཀརྨ་རོལ་པའི་རྡོ་རྗེའི་དྲུང་ནས་དགེ་བསྙེན་གྱི་སྡོམ་པ་བཞེས་ཏེ་མཚན་ཀུན་དགའ་སྙིང་པོ་ཞེས་གསོལ། དགུང་ལོ་ཆུང་ངུའི་སྐབས་ནས་ཆོས་རྗེ་དོན་གྲུབ་རིན་ཆེན་གྱིས་བདག་སྐྱོང་གནང་སྟེ་གསང་སྔགས་རྡོ་རྗེ་ཐེག་པའི་དབང་བསྐུར་བར་མཛད། གསང་མཚན་དོན་ཡོད་རྡོ་རྗེ་ཞེས་བཏགས། དགུང་ལོ་བདུན་གྱི་སྐབས་ཆོས་རྗེ་དོན་གྲུབ་རིན་ཆེན་གྱིས་མཁན་པོ་དང་། གཞོན་ནུ་བྱང་ཆུབ་པས་སློབ་དཔོན་མཛད་དེ་དགེ་ཚུལ་གྱི་སྡོམ་པ་བཞེས་ཏེ་མཚན་བློ་བཟང་གྲགས་པར་གསོལ། དགུང་གྲངས་བཅུ་བདུན་ཆུ་གླང་༡༣༧༣ལོར་མདོ་སྨད་ནས་དབུས་སུ་བྱོན་ཏེ་འབྲི་གུང་མཐིལ་དུ་ཕེབས། སྤྱན་སྔ་བ་ཆོས་ཀྱི་གྲགས་པ་དང་མཇལ་ཏེ་ཐེག་ཆེན་སེམས་བསྐྱེད་ཀྱི་ཆོ་ག་དང་། ཕྱག་ཆེན་ལྔ་ལྡན་ལ་སོགས་པ་གསན། ཚལ་གྱི་སྨན་པ་དཀོན་མཆོག་སྐྱབས་ཀྱི་དྲུང་ནས་སྨན་དཔྱད་ཡན་ལག་བརྒྱད་པའི་གཞུང་ལ་སྦྱངས་པ་མཛད།
   དེ་ནས་ཆོས་གྲྭ་ཆེན་པོ་བདེ་བ་ཅན་[རྭ་སྟོད་དགོན་པ།]དུ་བྱོན་ནས་སྙེ་ཐང་པ་བཀྲ་ཤིས་སེང་གེ་དང་གདན་ས་པ་དགེ་བསྐོངས་པ་གཉི་ག་ལ་ཆོས་འབྲེལ་གསན། དགུང་ལོ་ཉི་ཤུ་རྩ་གཅིག་གི་སྐབས་གཙང་ཕྱོགས་སུ་ཕེབས་ནས་ཉ་དབོན་ཀུན་དགའ་དཔལ་དང་རྗེ་བཙུན་རེད་མདའ་བ་གཞོན་ནུ་བློ་གྲོས་སོགས་ལས་དབུ་ཕར་འདུལ་མངོན་ཚད་མ་སོགས་ཀྱི་གཞུང་ལ་གསན་སྦྱོང་མཛད། བོ་དོང་སོགས་སུ་གྲྭ་སྐོར་མཛད། དགུང་ལོ་ཉེར་བཞིའི་སྐབས་རྩེད་ཐང་གི་གྲྭ་སྐོར་ཚར་ནས། ཡར་ལུང་རྣམ་རྒྱལ་དུ། ཁ་ཆེའི་པཎྜི་ཏ་ཤཱཀྱ་ཤྲཱི་བྷ་དྲའི་མཁན་བརྒྱུད། ཚོགས་ཆེན་པོའི་མཁན་པོ། དཀའ་བཞི་པ་ཚུལ་རིན་པས་མཁན་པོ་མཛད། ཚོགས་པ་བྱི་རྫིང་པའི་མཁན་པོ་གནས་བརྟན་འདུལ་བ་འཛིན་པ་ཤེར་མགོན་པས་ལས་ཀྱི་སློབ་དཔོན་མཛད། བྱི་རྫིང་པའི་དབུ་མཛད་སྡོམ་བརྩོན་བསོད་ནམས་རྡོ་རྗེས་གསང་སྟེ་སྟོན་པ་མཛད་ཅིང༌། ཚོགས་པ་གཉིས་ཀྱི་དགེ་སློང་ཁ་སྐོང་དུ་འོས་པ་གྲངས་ཚང་བས་དད་པའི་དགེ་འདུན་མཛད་ནས་བསྙེན་པར་རྫོགས་པའི་སྡོམ་པ་ཡང་དག་པར་བཞེས། དགུང་ལོ་ཉེར་ལྔའི་སྐབས་བླ་མ་དབུ་མ་པ་དང་ལྷན་དུ་དབུས་སུ་ཕེབས་ནས་དགའ་གདོང་དང་སྐྱོར་མོ་ལུང་སོགས་སུ་འཆད་ཉན་སྒོམ་སྒྲུབ་མཛད།
   དགུང་ལོ་ཉེར་བདུན་སྐབས་ལྷོ་ཁ་ཡར་ལུང་དུ་ཕེབས། རྩེད་ཐང་གི་ཆོས་གྲྭར་བཞུགས་ཏེ་དཀའ་ཆེན་བཞིའི་གྲྭ་སྐོར་མཛད། སྤྱན་སྔ་གྲགས་པ་བྱང་ཆུབ་ཀྱི་དྲུང་དུ་ཆོས་བཀའ་གསན་ནས་ལྷོ་བྲག་ཏུ་བཞུགས།
   དགུང་ལོ་ཉེར་དགུའི་སྐབས་ལྷ་སར་ཕེབས། ཚལ་གུང་ཐང་དུ་བཀའ་འགྱུར་ཞིབ་གཟིགས་མཛད། དེ་ནས་སྐྱོར་མོ་ལུང་དང༌། སྟོད་ལུང་མཚོ་སྨད། ངང་དཀར་སོགས་སུ་དུས་འཁོར་ཐུགས་སྦྱོང་མཛད་ཅིང་བློ་གསལ་མང་པོར་སྡེ་སྣོད་མང་དུ་གསུངས། དགུང་ལོ་སོ་གཉིས་པ་ལ་བསྟན་བཅོས་མངོན་རྟོགས་རྒྱན་གྱི་འགྲེལ་པ་ལེགས་བཤད་གསེར་ཕྲེང་བཀའ་རྩོམ་མཛད། དགུང་གྲངས་སོ་དྲུག་པའི་ཟླ་བ་བཅུ་པར་དངོས་སློབ་འཁོར་དག་པ་རྣམ་བརྒྱད་ཕྱག་ཕྱིར་ཁྲིད་དེ་སྐྱོར་མོ་ལུང་ནས་ལྷོ་ཁ་འོལ་ཁར་བྱ་བྲལ་དུ་ཕེབས་ནས་སྒྲུབ་པ་ཉམས་ལེན་གཙོ་བོར་གནང་།
ཆུ་བྱ་༡༣༩༣ལོར་འོལ་ཁ་རྫིང་ཕྱིའི་གཙུག་ལག་ཁང་དུ་རྒྱལ་བ་བྱམས་པའི་སྐུ་ཞིག་གསོ་མཛད། དེ་ནི་རྗེ་ཙོང་ཁ་པའི་མཛད་ཆེན་བཞིའི་ཡ་གྱལ་ཞིག་ཡིན། དགུང་ལོ་སུམ་ཅུ་སོ་དགུ་ལ་ལྷོ་བྲག་ཏུ་ཕེབས་ཏེ་མཁན་ཆེན་ཕྱག་རྡོར་བ་ནམ་མཁའ་རྒྱལ་མཚན་གྱི་དྲུང་ནས་ལམ་རིམ་ཟབ་ཁྲིད་སོགས་གསན། དེའི་ལོར་གཉལ་སྨད་གསལ་རྗེ་དང༌། གཉལ་སྟོད་རབ་གྲོང་དུ་དཀའ་བཅུའི་གྲྭ་སྐོར་མཛད། སྐྱེ་བོའི་ཚོགས་རྣམས་བསྙེན་གནས་དང་སྐྱབས་འགྲོའི་སྡོམ་པ་ལ་སྦྱར་ཞིང་། རྗེ་ཉིད་ཀྱིས་ཕྱག་བསྟར་ནས་སེར་སྐྱའི་ཚོགས་རྣམས་བསྐུལ་ནས་ཚ་ཚ་འབུམ་ཐེར་མང་པོ་བཏབ་ཅིང་། ཕྱིས་ཀྱང་ཚུལ་དེ་ཉིད་སྒྲུབ་པ་ལ་སྦྱོར་བར་མཛད། དེ་ནི་རྗེ་ཙོང་ཁ་ཆེན་པོའི་མཛད་ཆེན་བཞིའི་ཡ་གྱལ་ཞིག་ཏུ་བརྩི་བ་ཡིན། དེ་ནས་གཉལ་སྟོད་སྨད་དུ་བསྟན་འགྲོའི་དོན་མཛད་པའི་སྐབས་དཀའ་བཅུ་པ་དར་མ་རིན་ཆེན་རྗེའི་དྲུང་དུ་ཕེབས། དུས་དེ་ནས་བཟུང་ཆོས་རྗེ་དར་མ་རིན་ཆེན་རྗེའི་སྲས་ཀྱི་ཐུ་བོར་གྱུར།
   དགུང་ལོ་ཞེ་ལྔ་པའི་སྐབས་རྗེ་རེད་མདའ་བ་ཆེན་པོ་དང་ལྷན་དུ་འབྲི་གུང་ནས་རྭ་སྒྲེང་དུ་བྱོན། དེ་ནས་རྗེ་བཙུན་ཡབ་སྲས་གཉིས་དང་། ལོ་ཙྭ་བ་སྐྱབས་མཆོག་དཔལ་གསུམ་གནམ་རྩེད་ལྡེང་དུ་ཨར་ཆེན་པོ་བྱང་ཆུབ་ཡེ་ཤེས་ཀྱི་གཙུག་ལག་ཁང་དུ་ཞལ་མངོན་པར་འཛོམས་ཤིང་། དབྱར་གནས་པར་ཞལ་གྱིས་བཞེས་ཏེ་འདུལ་བའི་ཕྱག་ལེན་རྣམ་པར་དག་པའི་སྲོལ་ལེགས་པར་བཙུགས། དགུང་ལོ་ཞེ་དྲུག་གི་སྐབས་རྭ་སྒྲེང་དུ་ཕེབས། ལོ་ཆེན་སྐྱབས་མཆོག་དཔལ་བཟང་སོགས་ཆེ་རྒུ་དུ་མས་ནན་ཆེར་བསྐུལ་བར་བརྟེན་བྱང་ཆུབ་ལམ་རིམ་ཆེན་མོ་བཀའ་རྩོམ་མཛད།
   དགུང་ལོ་ཞེ་དགུའི་སྐབས་བདེ་ཆེན་གསང་སྔགས་མཁར་དུ་ཟླ་ཤས་བཞུགས་ནས་འོལ་དགའ་བྱམས་གླིང་དུ་ཕེབས་ཏེ་དོན་གཉེར་ཅན་མང་པོར་ལམ་རིམ་གྱི་ཆོས་གསུངས། སློབ་དཔོན་ཀླུ་བྱང་གི་རྣམ་གཞག་རིམ་པའི་ཊཱིཀྐ་དང༌། སྔགས་རིམ་ཆེན་མོ་བརྩམས། དགུང་གྲངས་ང་གཅིག་གི་སྐབས་མཁས་གྲུབ་དགེ་ལེགས་དཔལ་བཟང་ལ་རྗེ་བཙུན་རེད་མདའ་བ་ཆེན་པོས་བསྐུལ་བ་དང་། རང་ཉིད་ཀྱང་རྗེའི་སྙན་པ་གསན་པས་དབུས་སུ་བྱོན་ནས་སེ་ར་ཆོས་སྡིངས་སུ་རྗེ་རིན་པོ་ཆེར་ཐོག་མར་མཇལ། གཞུང་དོན་གྱི་དཀའ་གནད་དག་ལ་དོགས་འདྲི་སོགས་ཞུས་པས། རྗེ་ཉིད་ཐུགས་ཤིན་ཏུ་དགྱེས་པས་རྡོ་རྗེ་འཇིགས་བྱེད་ལྷ་བཅུ་གསུམ་མའི་དབང་དང་རྒྱུད་རྟོགས་བདུན་སོགས་མདོ་སྔགས་ཀྱི་དབང་ལུང་ཁྲིད་ཡོངས་སུ་རྫོགས་པ་གནང་། རྗེའི་ཐུགས་སྲས་ཀྱི་གཙོ་བོར་གྱུར།
   ལོ་དེར་སེ་ར་ཆོས་སྡིངས་སུ་བཞུགས་ན་བར་ཆད་ཀྱི་རྣམ་པ་ཅུང་ཟད་ཅིག་སྣང་བས་དངོས་སློབ་གུང་རུ་རྒྱལ་མཚན་བཟང་པོ་སོགས་བགྲེས་པ་འགའ་ཞིག་ལ་ཞལ་ཏ་གནང་ནས། མཚན་མོ་ཞིག་གཞན་གྱིས་མ་ཚོར་བར་ར་ཁ་བྲག་ཏུ་བྱོན་ནས་སྐུ་མཚམས་མཛད། རྗེ་བཙུན་འཇམ་དཔལ་དབྱངས་ཀྱིས་དབུ་སེམས་ཀྱི་ལྟ་བའི་གནད་རྣམས་གསུངས་ནས། ད་འདི་རྣམས་ཀྱི་དོན་བསྡུས་པ་ཞིག་ཡི་གེར་གྱིས་ཞེས་གསུངས་པ་ལ་བརྟེན་ནས་དྲང་བ་དང་ངེས་པའི་དོན་རྣམ་པར་འབྱེད་པའི་བསྟན་བཅོས་ལེགས་བཤད་སྙིང་པོ་བཀའ་རྩོམ་མཛད། སེ་ར་ཆོས་སྡིངས་སུ་རྩ་ཤེའི་རྣམ་བཤད་ཆེན་མོ་མཛད།
   ས་བྱི་ལོ་བོད་ཟླ་བཅུ་གཉིས་པའི་སྨད་ལ་ལྷ་སར་ཕྱག་ཕེབས། གནམ་གང་གི་ཉིན་སྙན་གསན་འབེབས་པའི་མཆོད་པ་མཛད། དགེ་འདུན་སྟོང་ཕྲག་བརྒྱད་ཙམ་བྱུང་ཞིང་། དགུང་ལོ་ང་གསུམ་པ་ས་གླང་༡༤༠༩ལོའི་བོད་ཟླ་དང་པོའི་ཚེས་གཅིག་ནས་བཅོ་ལྔའི་བར་དུ་ཆོ་འཕྲུལ་སྨོན་ལམ་ཆེན་མོའི་དུས་ཀྱི་མཆོད་པ་དངོས་གཞི་མཛད། དུས་དེ་ནས་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་སྲོལ་ཆགས། དེ་ནི་རྗེ་རིན་པོ་ཆེའི་མཛད་ཆེན་བཞིའི་ཡ་གྱལ་ཞིག་ཡིན། ཇོ་བོ་མི་བསྐྱོད་པ་དང་བཅུ་གཅིག་ཞལ་ལ་དངུལ་བཟང་པོ་ལས་བྱས་པའི་དབུ་རྒྱན་ཕུན་སུམ་ཚོགས་པ་ཕུལ། ལོ་དེར་འབྲོག་རི་བོ་དགེ་ལྡན་རྣམ་པར་རྒྱལ་བའི་གླིང་ཕྱག་བཏབ།
   ལྕགས་ཡོས་༡༤༡༡ལོར་རིམ་ལྔ་གསལ་སྒྲོན་མཛད། དགུང་ལོ་ང་བདུན་༡༤༡༣ལོར་སྐུ་ཁམས་བསྙུན་ཚུལ་གྱིས་སྒྲུབ་གྲོགས་དང་མཉམ་དུ་སྐུ་མཚམས་སུ་བཞུགས། དགུང་ལོ་ང་བརྒྱད་ཤིང་རྟ་༡༤༡༤མི་དབང་གྲགས་པ་རྒྱལ་མཚན་གྱིས་འོན་བཀྲ་ཤིས་དོ་ཁར་གདན་དྲངས། སྡེ་སྣོད་འཛིན་པ་མང་པོར་ལམ་རིམ་དང་དབུ་ཚད་སོགས་ཟབ་རྒྱས་ཀྱི་འཁོར་ལོ་རྒྱ་ཆེར་བསྐོར། སྐབས་དེར་རྒྱལ་མཆོག་དགེ་འདུན་གྲུབ་པ་དང་མཇལ་ཞིང་རྗེས་སུ་བཟུང་། དེ་ནས་སླར་ཡང་གདན་ས་ཆེན་པོ་དགའ་ལྡན་དུ་ཕེབས་ནས་གསང་འདུས་རྩ་རྒྱུད་ཀྱི་འགྲེལ་པ་བཞི་སྦྲགས་སུ་གྲགས་པ་དེ་དང་འཁོར་ལོ་བདེ་མཆོག་ལཱུ་ཨི་པའི་ཊཱིཀྐ་ཆེན་མོ་སོགས་མཛད།
   དགུང་ལོ་ང་དགུ་ཤིང་ལུག་༡༤༡༥ལོར་དགའ་ལྡན་ཡངས་པ་ཅན་གཙུག་ཁང་རྟེན་དང་བརྟེན་པ་བཅས་གསར་བཞེངས་ཀྱིས་དགའ་ལྡན་དཀྱིལ་འཁོར་སྒྲུབ་མཆོད་གསར་འཛུགས་མཛད། དེ་ནི་རྗེ་རིན་པོ་ཆེའི་མཛད་ཆེན་བཞིའི་ཡ་གྱལ་ཞིག་ཡིན། དགུང་ལོ་རེ་གཅིག་༡༤༡༧ལོར་དགའ་ལྡན་ཡངས་པ་ཅན་རྟེན་དང་བརྟེན་པར་བཅས་པ་གྲུབ་པའི་རབ་གནས་མཛད། དགུང་ལོ་རེ་གཉིས་༡༤༡༨ལོར་དབུ་མ་ལ་འཇུག་པའི་རྒྱ་ཆེར་བཤད་པ་དགོངས་པ་རབ་གསལ་བརྩམས།
   དགུང་གྲངས་དྲུག་ཅུ་རེ་གསུམ་པ། རབ་བྱུང་བདུན་པའི་ས་ཕག་༡༤༡༩ལོའི་སྟོན་ཁ་རི་བོ་དགེ་ལྡན་ནས་ཕྱག་བཏེགས་ཏེ་ལྷ་སར་ཇོ་བོ་རིན་པོ་ཆེའི་སྐུ་དྲུང་དུ་སྐུ་ཕྱག་དང་། མཆོད་འབུལ། སྨོན་ལམ་རྣམ་དག་མཛད་ནས་སྟོད་ལུང་ཆབ་ཚན་ཁར་བྱོན། སྟོད་ལུང་ཕུ་མདའི་སྐྱེ་བོའི་ཚོགས་དང་། འབྲས་སྤུངས། ལྷ་ས། སེ་ར། གསང་སྔགས་མཁར། གྲུ་བཞི་རྣམས་སུ་ཕེབས་ནས་བཀའ་ཆོས་མང་དུ་སྩལ། སླར་དགའ་ལྡན་དུ་ཕེབས་པ་ན་ཐོག་མར་ཡངས་པ་ཅན་གྱི་གཙུག་ལག་ཁང་ཆེན་པོར་ཕེབས་ཏེ་འདིར་ད་ཡང་འོང་བ་མི་ཡོང་བས་མཆོད་གཏོར་རྒྱ་ཆེར་ཤོམས་གསུངས། དེ་ནས་འདུ་ཁང་དུ་དགེ་འདུན་གྱི་ཚོགས་དབུར་ཕེབས་ཏེ་བདེ་བ་ཅན་གྱི་སྨོན་ལམ་རྒྱས་པ་དང་། དགེ་འདུན་གྱི་ཚོགས་པ་རྒྱ་མཚོའི་དབུས་སུ་ཤིས་བརྗོད་མཛད། དེ་ནས་གཟིམ་ཁང་དུ་ཕེབས་ཏེ་བཞུགས་གདན་ལ་བཞུགས་པ་ན། ད་ནི་རང་རེའི་དགོན་པ་རང་དབང་ཐོབ་པ་འདིར་སླེབ་བྱུང་བས་བློ་བདེའོ་ཞེས་གསུངས། མཐར་རྒྱལ་ཚབ་དར་མ་རིན་ཆེན་ལ་སོགས་པར་བསྟན་པའི་བྱ་བ་མཛད་ཚུལ་གྱི་ཞལ་ཏ་སྔ་མོ་ནས་ཞིབ་ཆ་གནང་ཟིན་པས་དེའི་ཚེ་རྒྱས་པར་མ་གསུངས་ཀྱང་སྐབས་དེར་དབུ་ཞྭ་དང་། ན་བཟའ་བེར་ཐུལ་ཞིག་གནང་སྟེ་རྒྱལ་ཚབ་དར་མ་རིན་ཆེན་ལ་རྒྱལ་ཚབ་ཏུ་དོན་གྱིས་གོ་བར་མཛད་དེ་ལོ་དེའི་ཟླ་བ་བཅུ་པའི་ཚེས་ཉི་ཤུ་རྩ་ལྔའི་ཉིན་གྱི་སྔ་དྲོར་སྐུ་གཤེགས། །
   སློབ་མ་གྲགས་ཆེ་བ། རྒྱལ་ཚབ་དར་མ་རིན་ཆེན། མཁས་གྲུབ་དགེ་ལེགས་དཔལ་བཟང་སོགས་མང་དུ་བྱུང་། གསུང་རྩོམ་ལ། བྱང་ཆུབ་ལམ་རིམ་སོགས་པོ་ཏི་བཅུ་དགུ་བཞུགས། རྗེ་བློ་བཟང་གྲགས་པའི་མཛད་ཆེན་བཞི་ནི། དགུང་ལོ་སོ་བདུན་པར་རྫིང་ཕྱིའི་བྱམས་པ་ཞིག་གསོ་མཛད། དགུང་ལོ་སོ་དགུ་པར་གཉལ་གྱི་ལུང་རར་ཆོས་འཁོར་བསྐོར། དགུང་ལོ་ང་གཉིས་ཀྱི་སྐབས་ཆོ་འཕྲུལ་སྨོན་ལམ་ཆེན་མོ་བཙུགས། དགུང་ལོ་ང་དགུའི་སྐབས་དགའ་ལྡན་དུ་སྟག་རྩེའི་སྒྲུབ་མཆོད་སྤེལ་བ་བཅས་སོ། །

༢༠༡༦.༡༡.༠༥ སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།

ཀུན་མཁྱེན་མཚོ་སྣ་བའམ་མཚོ་སྣ་བ་ཤེས་རབ་བཟང་པོ་ནི། དུས་རབས་བཅུ་གསུམ་པའི་དུས་འགོ་ཙམ་ལ་མོན་མཚོ་སྣ་སྟོད་དུ་སྐུ་འཁྲུངས། [དུང་དཀར་ཚིག་མཛོད་དུ། རབ་བྱུང་ལྔ་པའི་ལྕགས་ཁྱི་༡༣༡༠ལོའི་ཡས་མས་ཞེས་འབྱུང་།] ཆུང་དུས་སྣར་ཐང་གྲོང་ལྡིང་དཔོན་གྱི་སར་བ་རྫིར་བཞུགས། དགུང་ལོ་བརྒྱད་པར་ཟངས་ཆེན་དགོན་དུ་བྲོས་ཏེ་ཟངས་ཆེན་དར་མ་བསོད་ནམས་ལས་རབ་ཏུ་བྱུང་བ་དང་ཚིགས་སྔ་མ་དགེ་ཚུལ་གྱི་སྡོམ་པ་མནོས་ཏེ་མཚན་ལ་ཤེས་རབ་བཟང་པོ་ཞེས་བཏགས། ལྡིང་དཔོན་གྱིས་ཆོས་རྒྱགས་འབུལ་རྒྱུའི་ཞལ་བཞེས་གནང་སྟེ་རྗེ་ཉིད་གཉལ་བྲག་གོ་དགོན་པར་ཆོས་ཞུགས་བྱས། དེ་ནས་ཡི་གེ་འབྲི་ཀློག་ལ་སྦྱངས། ཟངས་ཆེན་པ་བསྟེན་ཏེ་བཀའ་གདམས་གཞུང་དྲུག་དང་། འདུལ་བ་ལུང་སྡེ་བཞི་བཅས་སྦྱངས་པ་མཛད་ཅིང་། ཟངས་ཆེན་པ་ལ་མཁན་པོ་ཞུས་ཏེ་དགེ་འདུན་གྲངས་ཚང་བའི་དབུས་སུ་བསྙེན་པར་རྫོགས། ཟངས་ཆེན་པ་ལས་བྱང་ཆུབ་ལམ་རིམ་གསན་ནས་ཉམས་སུ་བླངས། ཟངས་ཆེན་དགོན་གྱི་གདན་སའི་ཁྲི་ལ་བཞུགས་ནས་གཙོ་བོར་འདུལ་བའི་འཆད་ཉན་ལེགས་པར་བསྐྱངས། བྲག་གོར་འདུ་ཁང་ཀ་བ་བརྒྱད་ཙམ་གྱི་རྟེན་དང་བརྟེན་པ་བཅས་དང་དགེ་འདུན་གྱི་སྡེ་དགོན་གསར་འཛུགས་གནང་། དགུང་ལོ་ཉེར་གཅིག་ནས་དབུ་བརྩམས་ཏེ་འདུལ་བ་མདོ་རྩ་བའི་འགྲེལ་པ་ལེགས་བཤད་ཉི་མའི་འོད་ཟེར་པོད་ཆེ་བ་སྟོད་སྨད་གཉིས་དང་། མདོ་རྩ་བའི་མཆན་འགྲེལ་པོད་གཅིག་བརྩམས། ཕྱིས་རྒྱལ་དབང་སྐུ་ཕྲེང་བཅུ་གསུམ་པ་ཆེན་པོས་རྗེ་ཤེས་རབ་བཟང་པོའི་འདུལ་བ་མཚོ་ཊཱིཀ་དང་། མདོ་རྩ་མཆན་འགྲེལ་ཤིང་པར་ལ་བརྐོས་གནང་མཛད་པ་དང་། གདན་ས་སེར་འབྲས་དགའ་གསུམ་གྱི་གཞུང་ཆེན་པོད་ལྔར་སློབ་གཉེར་བྱེད་མཁན་ཚོར་འགྲེལ་པ་འདི་ཉིད་རྩ་འཛིན་དགོས་པའི་བཀའ་བཞིན་ཉམས་ལེན་རྒྱུན་འཇགས་སུ་བྱུང་། འདུལ་བ་མཚོ་ཊཱིཀ་དེ་ཆོས་བརྒྱུད་རིས་མེད་ཀྱི་སློབ་གཉེར་བས་འདུལ་བའི་སློབ་དེབ་ཏུ་ཆ་འཇོག་དང་ཚད་འཛིན་བྱེད། དགུང་ལོ་དོན་གཉིས་པར་སྐུ་གཤེགས། ༼དུང་དཀར་ཚིག་མཛོད་དུ། དགུང་ལོ་བཞི་བཅུའི་ནང་དུ་སྐུ་གཤེགས་པར་བཤད།༽ཁོང་གི་སློབ་མའི་གཙོ་བོ། མོན་གྲ་པ་ཚུལ་ཁྲིམས་བཀྲ་ཤིས་ཡིན། གསུང་རྩོམ་ལ། འདུལ་བ་མདོ་རྩའི་འགྲེལ་པ་ལེགས་བཤད་ཉི་མའི་འོད་ཟེར། མདོ་རྩའི་མཆན་འགྲེལ། ལམ་རིམ་བསྡུས་དོན་བཅས་བཞུགས། རྗེ་འདི་ཉིད་ལམ་རིམ་བླ་བརྒྱུད་ཀྱི་བླ་རབས་ཉི་ཤུ་པ་ཡིན།

༢༠༡༦.༡༢.༡༥.ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།