སེར་བྱེས་མཁས་སྙན་གྲྭ་ཚང་ནི། དུས་རབས་བཅོ་ལྔ་པའི་དུས་དཀྱིལ་དུ་རྗེ་རིན་པོ་ཆེ་དང་། རྒྱལ་བ་དགེ་འདུན་གྲུབ་པའི་དངོས་སློབ་རྣམ་དཔྱོད་ཕུལ་དུ་བྱུང་བ་ཀུན་མཁྱེན་མུས་སྲད་པ་བློ་གྲོས་རིན་ཆེན་སེང་གེ་དེ་ཉིད་འབྲས་སྤུངས་ཟུར་ཁང་དཔོན་སློབ་ཀྱི་ཁུར་བཞེས་ནས་བཞུགས་སྐབས། རྐྱེན་འགའ་ཞིག་གི་དབང་གིས་འབྲས་སྤུངས་ནས་ཞལ་སློབ་མཁས་པ་བརྒྱ་ཕྲག་ལྷག་ཙམ་དང་ལྷན་ཅིག་ཏུ་ཕེབས་པར་སེ་རའི་མཁན་སློབ་ཀུན་གྱིས་གུས་བཏུད་མཛད་ཅིང་། ཚོགས་སུ་གདན་དྲངས་པའི་ཚེ། གནས་བཅུའི་ལྷ་ཁང་གི་གནས་བརྟན་ཡན་ལག་འབྱུང་བཞུགས་ཁང་བྲག་རི་ནས་མདུན་དུ་སྐུ་སྟོད་བཏུད་ཅིང་ཕྱག་གཉིས་ཐལ་མོ་སྦྱར་ནས། བྱེས་པ་བྱེས་ནས་བྱོན་པ་ལེགས། །ཀུན་མཁྱེན་ཆེན་པོ་བྱོན་པ་ལེགས། །བསྟན་པའི་རྒྱལ་མཚན་འཛུགས་པ་ལེགས། །གྲལ་གཡས་གྲལ་གྱི་གྲལ་མགོར་བཞུགས། །ཞེས་གསུངས་པས་ཐམས་ཅད་ངོ་མཚར་སྐྱེས་ཏེ་གནས་བརྟན་གྱི་གསུང་བྱོན་པ་ལྟར་ཁོང་རྣམས་གཡས་གྲལ་དུ་བཞུགས་སུ་བཅུག །

དེ་ཡང་འབྲས་སྤུངས་ནས་བྱེས་སུ་གྱེས་ཏེ་གྲྭ་ཚང་ཆགས་པས་བྱེས་པ་གྲྭ་ཚང་དང་། ཐོག་མར་བཞུགས་ཡུལ་གཏན་འཇགས་མེད་པར་ཚལ་གུང་ཐང་དང་དབུས་སྟོད་སོགས་སུ་ཆོས་ཐོག་ལ་ཕེབས་པས་བྱེས་པ་གྲྭ་ཚང་ཡང་ཟེར། རྗེ་ཉིད་དང་ལྷན་དུ་ཕེབས་པའི་སློབ་མ་རྣམས་དང་། སེ་ར་ནས་རྒྱ་དང་། སྟོད་གྲྭ་ཚང་ནས་སྤོ་བོ་ཁང་ཚན་དང་གུང་རུ་ཁང་ཚན་གཉིས་མ་གཏོགས་ཡོངས་རྫོགས་དང་། འབྲོམ་སྟེང་གྲྭ་ཚང་གི་ཁག་གཅིག་བཅས་ཚང་མ་གྲྭ་ཚང་འདིར་འགྲིལ་ཞིང་། ཕྱོགས་སོ་སོ་ནས་ཀྱང་སློབ་གཉེར་པ་མང་དུ་འདུས་པ་བཅས་ཀྱིས་བྱེས་མཁས་མང་གྲྭ་ཚང་དུའང་གྲགས་སོ། །གྲྭ་ཚང་འདི་རེ་ཞིག་བར་དར་རྒྱས་ཆེ་ཙམ་བྱུང་ཡང་། ལྡན་མ་ངག་དབང་པ་ཆབ་མདོར་ཕེབས་པ་དང་། ཛྙ་ན་ཤྲཱི་སྐུ་གཤེགས་པ་བཅས་ཀྱི་རྐྱེན་ལས་འཆད་ཉན་བར་སྟོང་བྱུང་ཞིང་། དེའི་རྗེས་ཕྱི་ལོ ༡༤༦༦ ལོར་ཀུན་མཁྱེན་པའི་སློབ་མ་གཉལ་སྟོན་དཔལ་འབྱོར་ལྷུན་གྲུབ་སེ་རའི་ཁྲིར་ཕེབས་རྗེས་སྣེའུ་རྫོང་དཔོན་དཔལ་འབྱོར་རྒྱལ་པོ་དང་། དཔོན་མོ་བུ་ཁྲིད་དཔལ་འབྱོར་གཉིས་ཀྱིས་རེ་འདུན་ཞུས་ཤིང་སྦྱིན་བདག་བྱས་ཏེ་འདུ་ཁང་དང་མཆོད་ཁང་གསར་བཞེངས་ཀྱིས་གྲྭ་ཚང་འདི་བསྐྱར་དུ་བཙུགས་ཤིང་། དེ་ནས་མཁན་ཐོག་ཁ་ཤས་སོང་རྗེས་མཁན་རབས་བཅོ་ལྔ་པ་འཁོན་སྟོན་དཔལ་འབྱོར་ལྷུན་གྲུབ་ཕྱི་ལོ་༡༦༠༥ལོར་མཁན་ཁྲིར་ཕེབས་པ་ནས་བཟུང་སེ་རར་གཏན་ཆགས་སུ་བཞུགས་ཤིང་། གྲྭ་ཚང་འདི་སེ་རར་བཞུགས་སྐབས་ཀྱི་ཐོག་མའི་བཞུགས་ཡུལ་ནི་འདུ་ཁང་སྦུག་གི་དུས་གསུམ་སངས་རྒྱས་ལྷ་ཁང་དེ་ཡིན། རྗེས་སུ་ཕོ་ལྷ་བ་བསོད་ནམས་སྟོབས་རྒྱལ་གྱིས་བོད་ཀྱི་སྲིད་དབང་བཟུང་སྐབས་ཕྱི་ལོ་༡༧༤༣ལོར་ཕུར་ལྕོག་ངག་དབང་བྱམས་པ་དང་སྲིད་སྐྱོང་ཕོ་ལྷ་བ་བསོད་ནམས་སྟོབས་རྒྱལ་གཉིས་མཆོད་ཡོན་ཟུང་འབྲེལ་གྱིས་ད་ལྟའི་འདུ་ཁང་འདི་གསར་བཞེངས་བྱས་པ་ཡིན་ནོ། །ཕྱོགས་སོ་སོ་ནས་ཕེབས་པའི་སློབ་གཉེར་པ་རྣམས་ལ་ལྟ་སྐྱོང་སོགས་ཀྱི་ཆེད་དུ་གྲྭ་ཚང་འདི་ལ་ཁམས་ཚན་ཉེར་གཅིག་བྱུང་སྟེ། ༡ བསམ་བློ་ཁམས་ཚན་དང་། ༢ ཧར་གདོང་། ༣ བྱ་བྲལ། ༤ ཏྲེ་ཧོར། ༥ པྲ་སྟི། ༦ ཚྭ་བ། ༧ ལྷོ་པ། ༨ སྒོམ་སྡེ། ༩ ལྭ་བ། ༡༠ ལྡན་མ། ༡༡ མངའ་རིས། ༡༢ སྟག་མོ། ༡༣ གཙང་པ། ༡༤ རྒྱལ་བྱེད། ༡༥ ཨེ་པ། ༡༦ གཉལ་པ། ༡༧ དྭགས་པོ། ༡༨ རྩེད་ཐང་། ༡༩ གུ་གེ ། ༢༠ སྤེ་ཐུབ། ༢༡ ཟངས་དཀར། ཁམས་ཚན་འདི་དག་ཏུ་ཕྱི་ལོ་༡༩༥༩ལོའི་བར་དུ་བོད་རྒྱ་ཧོར་སོགས་ནས་མི་རིགས་དང་ལུང་ཚན་དབྱེར་མེད་ཀྱི་སློབ་གཉེར་པ་གང་མང་ཞིག་རྒྱུན་མ་ཆད་པར་ཕེབས་མྱོང་ཡོད་ཅིང་། བོད་དུ་དུས་འགྱུར་མ་བྱུང་གོང་གྲྭ་ཚང་འདིར་གྲྭ་གྲངས་ལྔ་སྟོང་དྲུག་བརྒྱ་ལྷག་ཡོད་པར་བཤད། སློབ་གཉེར་པ་འདི་དག་གིས་རྒྱལ་བའི་བཀའི་དགོངས་པ་འཚོལ་བ་ལ། དཔལ་ནཱ་ལེནྡྲའི་པཎ་གྲུབ་དག་གི་དགོངས་འགྲེལ་གྱི་བསྟན་བཅོས་སྤྱི་དང་བཀའ་པོད་ལྔའི་རྩ་འགྲེལ། འགྲེལ་བཤད་རྣམས་གཞི་ལ་བཞག་སྟེ། རྗེ་ཡབ་སྲས་ཀྱི་ལེགས་བཤད་རྣམས་དང་། ཁྱད་པར་དུ་རྗེ་བཙུན་ཆོས་ཀྱི་རྒྱལ་མཚན་གྱི་བརྩམས་ཆོས་རྣམས་ཡིག་ཆར་བཟུང་ཞིང་། ཡིག་ཆ་གཞན་དང་མཁས་པ་གཞན་གྱི་གསུང་ལ་ལྟ་ཀློག་དང་དཔེ་ཁྲིད་སོགས་ཞུས་ཏེ། འཛིན་གྲྭ་རིམ་བགྲོད་ཀྱིས་འཛིན་གྲྭ་སོ་སོའི་ལོ་རེའི་རྩོད་གཞུང་སོ་སོར་བགྲོ་གླེང་དང་། བརྒལ་བརྟག་ཀྱི་ལམ་ནས་དཔྱད་ཞིབ་བགྱིས་ཏེ་གཏན་འབེབས་དང་སློབ་གཉེར་བྱེད་དགོས་ལ། འཛིན་གྲྭའི་དབང་དུ་བྱས་ན། བསྡུས་སྦྱོར་འཛིན་གྲྭ། གཞུང་གསར་འཛིན་གྲྭ ། གཞུང་རྙིང་། ཟུར་བཀོལ་གསར་བ། ཟུར་བཀོལ་རྙིང་པ། འཛིན་གྲྭ་བུ་ཚང་། ཕར་ཕྱིན་འཛིན་གྲྭ ། དབུ་མ་གསར་བ། དབུ་མ་རྙིང་པ། འདུལ་གསར། འདུལ་རྙིང་། མཛོད་འཛིན་གྲྭ ། བཀའ་རམས། ལྷ་རམས་འཛིན་གྲྭ་བཅས་ཡོད། ལོ་རྒྱུས་ཐོག་ཡོངས་གྲགས་ལྟར་ན་གྲྭ་ཚང་འདི་ནས་རྗེ་རིན་པོ་ཆེའི་རྒྱལ་ཚབ་བམ་དགའ་ལྡན་ཁྲི་ལ་ཕེབས་པ་བཅུ་བཞི་དང་། བོད་དུ་གྲྭ་ཚང་རང་གི་མཁན་རབས་རེ་དྲུག་གི་བར་དུ་ཕེབས་ཤིང་། རྒྱུད་སྟོད་སྨད་དང་ཤར་བྱང་གི་ཆོས་རྗེར་ཕེབས་མཁན་མང་དུ་བྱུང་བ་དང་། བོད་ཀྱི་སྲིད་སྐྱོང་གི་འགན་བཞེས་མཁན་དང་། ལོ་རྒྱུས་ཐོག་ཡོངས་གྲགས་ཀྱི་མཁས་དབང་དང་སྐྱེས་བུ་དམ་པ་བསམ་གྱིས་མི་ཁྱབ་པ་གང་མང་། གྲྭ་ཚང་རང་གི་མཁས་པ་དང་དམ་པ་འདི་དག་ཕྱོགས་མཐའ་སོ་སོར་ཕེབས་ཏེ་བསྟན་འགྲོའི་དོན་མཛད་པས། འདི་དག་གི་སློབ་མ་སློབ་བརྒྱུད་ཀྱིས་བོད་རྒྱ་ཧོར་སོགས་ཡུལ་གྲུ་ཀུན་ལ་ཁྱབ་པ་དང་། བོད་སོག་ཡུལ་གྲུ་སོ་སོར་བསྟན་འགྲོའི་ཆེད་དུ་ཕེབས་པའི་གྲྭ་ཚང་འདིའི་མཁས་པ་དང་དམ་པ་དག་གིས་ཕྱག་བཏབ་པའི་དགོན་པ་དང་། སྒྲིག་ལམ་དང་འཛིན་གྲྭ་སློབ་གཉེར་བྱེད་སྟངས་སོགས་གྲྭ་ཚང་འདིའི་རྗེས་སུ་འབྲངས་པའི་དགོན་སྡེའང་གང་མང་ཞིག་བྱུང་ཡོད་པ་སོགས། མདོར་ན་གྲྭ་ཚང་འདི་ཕྱག་བཏབ་ནས་ད་ལྟའི་བར་བགྲང་བྱ་དྲུག་བརྒྱ་མ་ཟིན་ཙམ་གྱི་རིང་གྲྭ་ཚང་འདིར་མཁས་པ་དང་དམ་པ་བསམ་གྱིས་མི་ཁྱབ་པ་མང་དུ་བྱུང་མྱོང་བ་དང་། དེ་དག་གི་སློབ་མ་སློབ་བརྒྱུད་ཀྱི་ཁྲོད་དུ་བོད་དབུས་སྟོད་སྨད་བར་གསུམ་དང་། རྒྱ་ཧོར་སོགས་ཀྱི་ཡུལ་དུ་བསྟན་འགྲོའི་དོན་མཛད་པའི་མཁས་གྲུབ་གནམ་གྱིས་ས་བཀབ་པ་ལྟ་བུ་གཅིག་ལས་གཅིག་ཆེ་བ་ཉི་ཟེར་ལ་རྡུལ་འཁྲིགས་པ་བཞིན་བྱུང་བ་ནི་སྨོས་མི་དགོས་སོ། །

ཕྱི་ལོ་༡༩༥༩ ལོའི་དུས་འགྱུར་སྐབས་སེ་ར་ཐེག་ཆེན་གླིང་དུ་གྲྭ་གྲངས་༩༩༠༠ཡོད་ན་ཡང་༧གོང་ས་མཆོག་བྱེས་སུ་ཕེབས་པའི་སྔ་རྗེས་སུ་འཕགས་ཡུལ་དུ་ཕེབས་པ་ཉུང་ཤས་ཤིག་ལས། ཤུལ་ལུས་མང་ཆེ་བ་ཞིག་མནར་གཅོད་མི་འདྲ་བའི་ཁྲོད་དུ་གསོན་ཐུབ་མེད། ཕྱི་ལོ་༡༩༦༩ལོའི་ཟླ་བ་༡༡པའི་ནང་སེ་རའི་མཁན་བླ་དགེ་འདུན་རྣམས་སྦག་ས་ནས་རྒྱ་གར་ལྷོ་ཕྱོགས་ཀར་རྣ་ཊ་ཀའི་ཁུངས་བྷེ་ཀོལ་གྱི་ད་ལྟའི་གནས་འདིར་གཞིས་སྤོར་སྐབས། གནས་འདིར་ཤིང་ནགས་ཀྱིས་ཁེངས་ཡོད་པ་དང་། ཤིང་ནགས་རྩ་ཆེན་རྣམས་རྒྱ་གར་བས་གཙང་བཟོ་བྱས་འདུག་ནའང་ལྷག་མ་རྣམས་གྲྭ་བ་ཚོས་བཀོག་སྟེ། ཕྱི་ལོ་༡༩༧༠ལོར་ཤིང་ནགས་ཀྱི་ས་ཡོངས་རྫོགས་ཞིང་སར་བསྒྱུར་ཅིང་ཞིང་ལས་བྱས། དེའི་སྐབས་གྲྭ་ཚང་འདིར་མཁན་བླ་དགེ་འདུན་ཞལ་གྲངས་༡༩༣དང་། སེར་སྨད་ཐོས་བསམ་ནོར་གླིང་གྲྭ་ཚང་དུ་མཁན་བླ་དགེ་འདུན་ཞལ་གྲངས་༡༠༧བཅས་ཁྱོན་བསྡོམས་ཞལ་གྲངས་༣༠༠ཙམ་ཡོད། དགེ་འདུན་ཞལ་གྲངས་༤རེར་གུར་རེ་རྩིས་སྤྲོད་གནང་བ་བཞིན་ལོ་གསུམ་ཙམ་རིང་དབུ་གུར་ནང་བཞུགས་རིང་རྒྱ་གར་གཞུང་ནས་གཞིས་མི་སྔོན་འབྱོར་རྣམས་ལྟར་མཉམ་ལས་གནང་བཅུག་སྟེ་ཉིན་གླ་སྒོར་༢རེ་གནང་། དགེ་འདུན་པ་རྣམས་ཀྱིས་འཁོར་ལམ་གསར་བཟོ་དང་། ཤིང་ནགས་གཅོད་འབྲེག །ཞིང་ས་གསར་སྦོལ་སོགས་དུས་བསྟུན་སྐབས་བབ་གཞིས་ཆགས་ཀྱི་ཕྱག་ལས་ཁག་ཆ་ཚང་གནང་། ལོ་དེར་ཆོ་འཕྲུལ་སྨོན་ལམ་དང་པོ་དེ་གྲྭ་ཚང་འདི་གཞིས་གྲོང་༥།༦ པའི་ལྷ་ཁང་དང་། སེར་སྨད་གཞིས་དགོན་ཐེག་ཆེན་གླིང་དུ་འཚོགས། རིམ་བཞིན་སྨྱུག་མའི་ཚོགས་ཁང་གསར་བཞེངས་གནང་། ཕྱི་ལོ་༡༩༧༠ལོ་ནས་བཟུང་སྟོན་འབྲས་འདེབས་འགོ་ཚུགས། ཉིན་མོ་ས་ཞིང་འདེབས་ལས་དང་། མཚན་མོ་གླང་ཆེན་དང་རི་ཕག་འགོག་སྲུང་སོགས་གནང་དགོས། ཐོག་མར་གྲྭ་གྲངས་ཉུང་ངུ་ལས་མེད་སྟབས་གྲྭ་ཚང་གཉིས་ཀའི་ཐུན་མོང་གི་ཆོས་སྤྱོད་གནང་སྒོ་གྲྭ་ཚང་གཉིས་མཉམ་འཚོགས་དང་། ཐུན་མོང་མ་ཡིན་པའི་ཆོས་སྤྱོད་སྒྲུབ་མཆོད་ཁག་གྲྭ་ཚང་རེ་མོས་ཀྱིས་ཚུགས། གཞིས་ཆགས་ཁག་ནས་བུ་ཕྲུག་ཆོས་སྒོར་ཞུགས་མཁན་ལོ་རེར་ཇེ་མང་དུ་འགྲོ་མུས་ལ་བརྟེན། རིམ་གྱིས་བྱེས་སྨད་གཉིས་སོ་སོར་རྐང་ཚུགས་ཐུབ་པ་བྱུང་། སྐབས་དེར་རྒན་པ་ཚོས་གྲྭ་རྒྱུན་མ་ཆད་པའི་ཆེད་དུ་རང་ཉིད་ཤི་ནའང་དེའི་ཚབ་ལྟ་བུར་རེ་བ་བརྒྱབ་སྟེ། དགེ་ཕྲུག་རེ་ཉར་ཏེ་གྲྭ་ཚང་ནས་རང་ལ་ལྟོ་ཆས་ཉུང་ངུ་ལས་ཐོབ་ཀྱི་མེད་ནའང་དེའི་ཕྱེད་ཀ་དགེ་ཕྲུག་ལ་སྤྲད་དེ་གསོ་སྐྱོང་བྱས། ཕྱི་ལོ་༡༩༧༡ལོའི་ཕྱི་ཟླ་༥པའི་ནང་༧ལྷར་བཅས་སྲིད་ཞིའི་གཙུག་རྒྱན་༧གོང་ས་ལྷ་མིའི་རྣམ་འདྲེན་ཞལ་སྔ་ནས། ད་ལྟའི་གཞིས་ཆགས་ཕོ་བྲང་ཞེས་འབོད་པ་དེར་དུས་དབང་ཐེངས་བཞི་པ་བཀའ་དྲིན་བསྐྱངས་ཤིང་། སེ་རར་ཞག་གཅིག་བཞུགས་ཏེ་གནས་འདིར་ཞབས་ཀྱིས་བཅགས་ཤིང་བྱིན་གྱིས་བརླབས། དེ་ནས་རིམ་གྱིས་སྐྱབས་རྗེ་མཁན་རིན་པོ་ཆེ་དོན་གྲུབ་སྟོབས་རྒྱལ་མཆོག་གིས་ཐུགས་འགན་བཞེས་ཏེ་ད་ལྟའི་གྲྭ་ཚང་གི་འཕྲོད་བསྟེན་གྱི་ཚོང་ཁང་ཡོད་ས་དེར་གཡས་སུ་༧གོང་ས་མཆོག་གི་གཟིམ་ཆུང་དང་གཡོན་དུ་ཕྱག་མཛོད་ཁང་། དཀྱིལ་དུ་གྲྭ་ཚང་གི་འདུ་ཁང་ཞིག་བཅས་གསར་བཞེངས་ཞུས། མཁན་པོ་དང་ཚོགས་ཆེན། གྲྭ་ཚང་གི་ཕྱག་མཛོད་ཕུད། དེ་མིན་ཚང་མ་ལས་ཀར་འགྲོ་དགོས་པ་སོགས་དེ་ལྟར་ལོ་གསུམ་ལ་སློབ་གཉེར་བྱེད་སྐལ་མ་བྱུང་ཞིང་། དེ་ནས་སློབ་གཉེར་རྩེ་ཕུད་རྣམས་ཀྱི་ཚབ་ཏུ་ལས་མི་གླ་རྒྱུའི་སྦྱིན་བདག་བྱུང་སྟེ། སློབ་གཉེར་བྱེད་འགོ་ཚུགས་ཤིང་། བྱེས་སྨད་གཉིས་ཀ་ཚོགས་ཆེན་འདུ་ཁང་དུ་ཆོས་ར་མཉམ་དུ་འཚོགས། དེ་ནས་གྲྭ་བ་བྱེད་མཁན་མང་དུ་ཕྱིན་པ་དང་། ལྷག་པར་དུ་བོད་ནས་གསར་འབྱོར་སླེབས་པ་ལས་གྲྭ་ཚོགས་ཀྱང་རིམ་གྱིས་རྒྱས་ཤིང་། སློབ་གཉེར་བའི་གྲངས་འབོར་ཇེ་མང་དུ་སོང་བ་དང་བསྟུན་ཏེ་འདུ་ཁང་དང་ཆོས་ར་སོགས་བརྗེ་སྤོར་གསར་བཞེངས་ཁ་ཤས་བྱེད་དགོས་པ་བྱུང་།
ལོ་རབས་བརྒྱད་ཅུ་བའི་ལོ་མགོ་ནས་བཟུང་བོད་ནས་གསར་འབྱོར་བ་དང་། ཧི་མ་ལ་ཡའི་རི་རྒྱུད། རུ་སོག་གི་ཡུལ། ཐེ་ཝན། ཀོ་རུ་ཡ། ནུབ་ཕྱོགས་རྒྱལ་ཁབ་སོགས་ནས་ཕེབས་པའི་གྲྭ་བ་སློབ་གཉེར་བའི་གྲངས་འབོར་མང་དུ་ཕྱིན་ཏེ་ད་ལྟའི་(༢༠༠༦)ཆར་ཁམས་ཚན་བཅུ་གསུམ་ནང་བཞུགས་དགེ་འདུན་ཞལ་གྲངས་༣༧༡༤ཙམ་ཡོད་ཅིང་། ཞལ་གྲངས་འདི་ལས་མཁན་ལས་ཟུར་དགེ་བཤེས་དང་། གནས་བརྟན་བགྲེས་སོང་རྣམས་དང་། གྲྭ་ཚང་གི་ཕྱག་སྦུག་སོགས་ཀྱི་ལས་བྱེད་རྣམས་ཕུད། ཆོས་རར་རྟག་ཏུ་ཕེབས་བཞིན་པའི་སློབ་གཉེར་བའི་གྲངས། ༢༧༧༠ སེར་བྱེས་འབྲིང་རིམ་སློབ་གྲྭར་སློབ་ཕྲུག་གྲངས་༥༦༧ ཡོད་དོ།། སློབ་གཉེར་བ་དེ་དག་གིས་བཀའ་པོད་ལྔ་ལ་སྦྱངས་ཏེ་འཛིན་གྲྭ་ཐོན་པ་ལ། བསྡུས་ཆུང་སྔོན་འགྲོའི་འཛིན་གྲྭ་ནས་དགེ་བཤེས་ལྷ་རམས་པ་ཐོན་པའི་བར་ལོ་གྲངས་ཉེར་བཞི་ཙམ་༼འཛིན་གྲྭ་གཅིག་ཏུའང་དགེ་ལུགས་རྒྱུགས་སྤྲོད་ལ་ཞུགས་པ་སྔ་ཕྱིའི་དབང་གིས་ཁ་ཤས་ལོ་གྲངས་དེ་ལས་མང་བ་འགོར་བའང་ཡོད།༽ བརྒྱུད་དགོས། གཞུང་ཆེན་མོའི་སློབ་ཚན་ཁག་ནི་སྔོན་ཆད་ལྟར་ཡིན། དེ་ཡང་ཆོས་ཐོག་སྐབས་རྩོད་པ་གཙོ་བོ་དང་། དཔེ་ཁྲིད་དང་དཔེ་ཀློག །ཆོས་མཚམས་སུ་གཞུང་ཆེན་བློ་འཛིན་གཙོ་བོར་མཛད་ཅིང་། སློབ་གཉེར་དང་བསམ་སྤྱོད་ཡར་རྒྱས་ཀྱི་ཐབས་སུ་སྐབས་སོ་སོའི་སློབ་གཉེར་ལྟ་ཞིབ་ཁང་ནས་སྟངས་འཛིན་གཟབ་ནན་དང་། ཞིབ་ཚགས་ཀྱིས་དོ་དམ་མཛད་དེ་ལོ་འཁོར་བློ་རྒྱུགས་དང་། རྩོད་རྒྱུགས། བྲིས་རྒྱུགས། ཟུར་སྦྱོང་ཡིག་གཟུགས་དང་། བརྡ་དག ། སུམ་རྟགས་དང་། ཆོས་འབྱུང་སོགས་ཀྱིས་རྒྱུགས་འབྲས་ལ་དཔྱད་ཞིབ་ཀྱིས་རྩེ་ཕུད་དག་ལ་གཟེངས་བསྟོད་དང་། རྒྱུགས་ཚད་མ་ལོན་པ་དག་གྲྭ་ཚང་གི་ལས་ཀར་གཏོང་བཞིན་ཡོད། སློབ་གཉེར་བ་འདི་དག་གི་ཉིན་ཞག་ཕྲུགས་གཅིག་གི་ལས་རིམ་ནི། ཞོགས་པར་དུས་ཚོད་བཞི་ལྔ་ནས་བཞེངས་ཏེ། ༼གྲྭ་ཇ་མང་ཇ་གང་རུང་ཡོད་ཚེ་དེར་ཕེབས་ཏེ་གྲོལ་མཚམས། ༽ རྩ་འགྲེལ་ཁག་དང་སྐབས་སུ་གང་བབ་ཀྱི་གཞུང་བློ་འཛིན། དུས་ཚོད་ ༦.༣༠ སྟེང་གྲྭ་ཚང་དུ་ཞོགས་ཇ། ཞོགས་ཇ་ཚར་བ་དང་དུས་ཚོད་ ༧.པ་ནས་སྔར་ལྟར་བློ་འཛིན་དང་། དཔེ་ཁྲིད་ཡོད་ན་དཔེ་ཁྲིད་ལ་ཕེབས་པ། དུས་ཚོད་ ༩-༡༡ བར་ཆོས་ཐོག་གི་སྐབས་ཞོགས་ཆོས་རྩོད་པ། ཆོས་མཚམས་ལ་དཔེ་ཁྲིད་ཡོད་ན་དཔེ་ཁྲིད་ཞུ་བ་དང་མེད་ན་དཔེ་ཀློག་དང་བློ་འཛིན་གང་རུང་། དེ་ནས་ཉིན་གུང་བཞེས་ལག །བཞེས་ལག་གྲུབ་པ་དང་དུས་ཚོད་གཅིག་ལྷག་ལ། འཛིན་གྲྭ་སོ་སོར་ཚན་རིག་གི་འཛིན་གྲྭ་ཡོད་ན་དེར་ཕེབས་པ་དང་། རིག་གནས་དང་། དབྱིན་ཡིག །རྒྱ་ཡིག་སོགས་ཀྱི་འཛིན་གྲྭར་སྐྱོད་པ། ཡང་ན་ངལ་གསོ། དེ་ནས་གཞུང་ཆེན་དཔེ་ཀློག་དང་། དཔེ་ཁྲིད་ཞུ་བ། ཕྱི་དྲོའི་དུས་ཚོད་ ༤.༣༠ ལ་དགོང་མོའི་བཞེས་ལག །དེ་གྲུབ་པ་དང་དཔེ་ཀློག་དང་། དུས་ཚོད་ ༦-༩.༣༠ བར་དང་ཆོས་ཐོག་སྐབས་༡༠.༣༠ བར་རྩོད་པ་དང་། དུས་ཚོད་ཕྱེད་ཀའམ་ཆོས་ཐོག་སྐབས་དུས་ཚོད་གཅིག་ལ་སློབ་གཉེར་ལམ་ལྷོངས་ཡོང་བ་སོགས་ཀྱི་ཆེད་དུ་སྒྲོལ་མ་དང་ཤེར་སྙིང་སོགས་ཆོས་རའི་ཞལ་འདོན། ཆོར་རར་ཐོག་མར་རྩོད་ཟླ་དང་། དེ་ནས་དམ་བཅའ། དེ་རྗེས་ཞལ་འདོན། དེ་གྲུབ་པ་དང་། རྩོད་ཟླ་བསྒྲིགས་པ་དང་། གཞུང་དོན་ལ་དོགས་པ་ཆོད་མ་ཆོད་སོགས་ཀྱིས་རྩོད་པ་བྱས་ཏེ་མཚན་གྱི་དུས་དང་པོ་བརྒལ་བའང་ཡོད། ཆོས་ར་གྲོལ་བ་དང་གཞུང་ཆེན་བློ་འཛིན་བྱས་ཡོད་པ་དག་བློ་ནས་སྐྱོར་དགོས། མཚན་གྱི་དུས་ཚོད་བཅུ་གཉིས་༼དང་པོ་དང་གཉིས་པ་བར་དུ་དཔེ་ཀློག་དང་སྐྱོར་སྦྱང་བྱེད་པའང་ཡོད།༽ནས་ངལ་གསོ་བྱེད། གཞུང་གསར་དང་དབུ་གསར་གཉིས་ཆོས་ཐོག་གི་སྐབས་སུ་རེས་བསྐོར་ཏེ་མཚན་འཁྱོངས་དམ་བཅའ་ཆག་མེད་ཕེབས་དགོས། འདི་ལྟར་འཛིན་གྲྭ་རིམ་བགྲོད་མཐར་ཕྱིན་པ་ན་དགེ་བཤེས་ཀྱི་མཚན་རྟགས། ཤེས་ཚད་དང་མཚན་ཐོ། བབ་བསྟུན་གྱིས་སྐྱབས་རྗེ་མཁན་རིན་པོ་ཆེའི་བཀའ་ཁྲོལ་ལྟར་བཞེས་ཏེ། རྒྱུད་གྲྭ་རྣམ་གཉིས་གང་རུང་དུ་ཞུགས་པ་དང་། རྒྱུད་གྲྭ་རྣམ་གཉིས་གང་རུང་གི་དགེ་བསྐོས་དང་། བླ་མ་དབུ་མཛད། མཁན་པོ། ཤར་བྱང་གི་ཆོས་རྗེ་གང་རུང་བརྒྱུད་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ལ་ཕེབས་ལམ་ཡོད་པ་དང་། འགའ་ཞིག་ནི་གྲྭ་ཚང་འདི་ཉིད་ཀྱིས་གཙོས་གཞིས་དགོན་སོགས་དགོན་ཁག་གི་མཁན་པོ་དང་། དཔེ་ཁྲིད་དགེ་རྒན་དུ་ཕེབས་པ་དང་། དུ་མ་ཞིག་ནི་ཕྱི་རྒྱལ་ཡུལ་གྲུ་ཁག་གི་ཆོས་ཚོགས་དང། སྤྱི་ཚོགས་ཀྱི་ལས་རིགས་འདྲ་མིན་ནང་ཞུགས་ཏེ་ནང་བསྟན་ངོ་སྤྲོད་དང་འཆད་སྤེལ་བྱེད་བཞིན་ཡོད། ཚེ་བློས་བཏང་གིས་བྱ་བྲལ་དུ་ཕེབས་པའང་གང་འཚམ་འབྱུང་བཞིན་ཡོད། ཡང་དུ་མ་ཞིག་ནི་འདུས་སྡེར་ཕན་པའི་དཔལ་འབྱོར་འདུ་འགོད་ཀྱིས་མཚོན་པའི་གཞན་ཕན་ལས་རིགས་ལ་ཞུགས་ཏེ་ཕྱག་མཛོད་སོགས་སྡེ་ཚན་ནམ་ཚོགས་པ་ཁག་གི་རྒྱུན་ལས་གནང་སྟེ་གྲྭ་ཚང་ལ་སྲིད་ཞུར་བརྩོན་བཞིན་ཡོད། ད་ལྟའི་དགེ་བཤེས་མཚན་གནས་ཀྱི་རིམ་པ་ནི། གླིང་བསྲེས་དགེ་བཤེས། རིགས་རམས་དགེ་བཤེས། ཚོགས་རམས་དགེ་བཤེས། ལྷ་རམས་དགེ་བཤེས་བཅས་ཡོད།
སེར་བྱེས་འབྲིང་རིམ་སློབ་གྲྭ་ནི། རྒྱ་གར་གཞུང་གིས་འབྲིང་རིམ་སློབ་གྲྭར་ངོས་ལེན་ཡོད་ཅིང་། སློབ་གྲྭ་འདིར་ད་ལྟའི་(༢༠༠༦)ཆར་བོད་དང་གཞིས་ཆགས་ཁག །ཧི་མ་ལ་ཡའི་རི་རྒྱུད་སོགས་ནས་འབྱོར་བའི་སློབ་ཕྲུག་གྲངས་༥༦༧ཡོད་པ་དག་གིས། རྒྱ་གར་དབུས་གཞུང་འབྲིང་རིམ་སློབ་གྲྭའི་ལམ་སྲོལ་གཞིར་བཟུང་བོད་ཡིག་སློབ་ཚན་ཆ་ཚང་དང། སྤྱི་ཚོགས་ཚན་རིག་སོགས་དེང་དུས་ཀྱི་ཤེས་ཡོན་དང་། བོད་ཀྱི་རིག་གནས་དང་། མཚན་ཉིད། རི་མོ། རྩིས་འཁོར། ཡིག་གཟུགས། དབྱིན་ཡིག་དང་། ཧིན་དྷིའི་ཡི་གེ།རྒྱ་ཡིག་སོགས་སློབ་དགོས་ལ། འཛིན་གྲྭ་བཅུ་པ་ནས་རྒྱ་གར་རྒྱལ་ཡོངས་ཀྱི་རྒྱུགས་སྤྲོད་ལ་ཞུགས་དགོས་ཤིང་། འཛིན་གྲྭ་བཅུ་པ་ཐོན་པ་དང་ཆོས་རར་ཞུགས་ཏེ་གཞུང་ཆེན་ཁག་ལ་སློབ་གཉེར་བྱེད་དགོས་ལ། འགའ་ཞིག་ཝཱ་ར་ཎཱ་སིའི་མཐོ་སློབ་སོགས་སུ་འཛུལ་ཞུགས་དང་། གྲྭ་ཚང་དང་སྤྱི་ཚོགས་ཀྱི་ལས་རིགས་འདྲ་མིན་གྱི་ནང་དུ་ཞུགས་ཏེ་སྤྱི་ལ་ཕན་ནུས་ཐོན་པའང་གང་མང་བྱུང་ཡོད།
འཕགས་ཡུལ་དུ་ད་ལྟའི་མཁན་པོ་ལས་ཐོག་སྐྱབས་རྗེ་བློ་བཟང་བདེ་ལེགས་མཆོག་མཁན་རབས་བདུན་པ་དང་། གྲྭ་ཚང་གི་མཁན་རབས་རིམ་བྱོན་གྱི་བཞུགས་གནས་བླ་བྲང་ལ་བྱེས་བླ་བྲང་དང་། གྲྭ་ཚང་འདིའི་གྲུབ་ཆའི་སྡེ་ཚན་ཁག་ནི། བྱེས་བླ་བྲང་དང་། གྲྭ་ཚང་གི་སྒྲིག་ཡིག་གཞིར་བཟུང་། སྒྲིག་ཡིག་གི་འབྲུ་དོན་ཁག་ཆེ་ཕྲ་ཉམས་ཀྱི་ཡོད་མེད་དང་། ཡོད་ན་འབྲེལ་ཡོད་ཁུངས་སོ་སོར་སྐུལ་འདེད་དང་། གྲྭ་ཚང་གི་བསྟན་སྲིད་གྱི་ལས་དོན་ཆེ་རིགས་ཐག་གཅོད་དང་། གྲྭ་ཚང་གི་ཚོགས་སྡེ་སོ་སོའི་འཛིན་སྐྱོང་ལ་ལྟ་རྟོག་སོགས་ཀྱི་ཆེད་དུ་ཁམས་ཚན་སོ་སོ་ནས་ཤེས་འཇོན་ལྷག་བསམ་ཅན་གྱི་འཐུས་མི་གཉིས་རེ་དྲག་འདེམ་བྱས་པའི་གྲྭ་ཚང་གི་དགེ་འདུན་པ་ཡོངས་ཀྱི་སྐུ་ཚབ་བམ་འཐུས་མིས་གྲུབ་པའི་སྣ་ཆེན་ཚོགས་འདུ། རྒྱུན་ལས། མཁས་པའི་ལྷན་ཚོགས། ཕྱག་མཛོད་ཁང་། སློབ་གཉེར་འཛིན་སྐྱོང་ལྟ་ཞིབ་ཀྱི་སློབ་གཉེར་ཁང་། ཤེས་ཡོན་སྡེ་ཚན། ཚན་རིག་སྡེ་ཚན། སེར་བྱེས་རིག་མཛོད། རྒྱ་གར་གྱི་མཐོ་སློབ་གཅིག་དང་ལས་གཞི་མཉམ་ལས་ཀྱི་ཉམས་ཞིབ་ཁང་། རྟ་མགྲིན་ཁང་། སེར་བྱེས་འབྲིང་རིམ་སློབ་གྲྭ། དཔེ་མཛོད་ཁང་། ཤིང་དཔར་སྡེ་ཚན། པར་ལས་སྡེ་ཚན། སྤྱི་ཐབ་ཁང་། ནད་འཕྲོད་ལྟ་སྐྱོང་ཚོགས་པ། ཡིད་དགའ་ཆོས་གླིང་། སེར་བྱེས་ཚོང་ཁང་དང་ཟ་ཁང་། སེར་བྱེས་ཤ་མེད་དཀར་སྐྱོང་བཟོ་གྲྭ། སེར་བྱེས་མཚམས་ཁང་། སེར་བྱེས་བགྲེས་སོང་ལྟ་སྐྱོང་ཁང་། ནང་ཆོས་དོན་གཉེར་བ་དང་ནང་བའི་དད་ལྡན་པ་རྣམས་ལ་ནང་ཆོས་ཀྱི་གོ་རྟོགས་སད་ཐབས་དང་། གོང་སྤེལ་དུ་གཏོང་བའི་ཆེད་དུ་ཆོས་ཚོགས་ཁག་ནི། ཐེ་ཝན་དུ་ཆོས་ཚོགས་གཉིས་དང་། ཨ་རིར་གཅིག །སིང་ག་པུར་ལ་གཅིག །མ་ལེ་ཤེ་ཡ་ལ་གཅིག །ཨིན་ཌོ་ནི་ཤ་ཡ་ལ་གཅིག །རྒྱ་གར་བྷེང་ལོར་ལ་གཅིག་བཅས་དང་། དགོན་པ་ནི། སྒང་ཏོག་འགྲོ་ཕན་གླིང་། མོན་རྟ་དབང་འཇམ་དབྱངས་ཆོས་འཁོར་གླིང་། ལ་དྭགས་རི་ཐོག་ལྷུན་གྲུབ་ཆོས་སྡིངས་དགོན་བཅས་ཡོད་ཅིང་།
མདོར་ན། ཕྱི་ལོ་༡༩༥༩ལོར་འཕགས་པའི་ཡུལ་འདིར་འབྱོར་བ་ནས་རང་རེའི་གྲྭ་ཚང་འདི་ཡང་། ༧གོང་ས་༧སྐྱབས་མགོན་རྒྱལ་བའི་དབང་པོ་༧འཕགས་མཆོག་ཕྱག་ན་པདྨོའི་ཐུགས་རྗེ་བྱིན་རླབས་དང་། རང་རེའི་གཞུང་ས་མཆོག་དང་། རྒྱ་གར་དབུས་གཞུང་། མངའ་སྡེ། ས་གནས་རྫོང་། བྱེས་འབྱོར་རྒན་རབས་བཅས་ཀྱི་གཟིགས་སྐྱོང་འོག་ཏུ། མེད་པ་ནས་ཡོད་པ་དང་། ཡོད་པ་ནས་འཕེལ་རྒྱས་ཀྱི་ཕྱོགས་སུ་གནམ་སའི་འཕོ་འགྱུར་ལྟ་བུ་འདི་བྱུང་བ་ཡིན་ནོ།།