དབུ་མའི་བགྲོ་གླེང་གནང་།
དྲ་འཇུག་པ། རིག་མཛོད་རྩོམ་སྒྲིག་པ།
སེར་བྱེས་སློབ་གཉེར་ཁང་གི་གོ་སྒྲིག་འོག་དབུ་རྙིང་འཛིན་གྲྭའི་སློབ་གཉེར་བ་ཁ་ཤས་འདེམས་སྒྲུག་གིས་དགེ་འདུན་འདུས་པའི་དབུས་སུ་རྗེའི་དགོངས་པ་རབ་གསལ་ལས་དཀའ་གནད་སྐོར་ཞིག་ལ་བགྲོ་གླེང་གནང་སོང་།
དེ་ཡང་༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུར་ཕེབས་པའི་བཀའ་དྲིན་རྗེས་དྲན་གྱི་ཆེད་དུ། སེར་བྱེས་གྲྭ་ཚང་གི་ཆོས་རའི་ཐོག་ཁའི་ལྷུན་གྲུབ་ཁང་གསར་དུ། སེར་བྱེས་སློབ་གཉེར་ཁང་ངམ་སེར་བྱེས་རྒྱུགས་ཞིབ་ལྷན་ཚོགས་ཀྱིས་བཀོད་སྒྲིག་བྱས་ཏེ། དབུ་རྙིང་འཛིན་གྲྭའི་སློབ་གཉེར་བའི་གྲས་ནས་སློབ་གཉེར་བ་ཁ་ཤས་འདེམས་སྒྲུག་གིས། གྲྭ་ཚང་གི་དབུ་མ་འཛིན་གྲྭ་བཞི་གཙོ་བྱས་པའི་དགེ་འདུན་འདུས་པ་རྒྱ་མཚོའི་དབུས་སུ། ཕྱི་ལོ་ ༢༠༡༥ ལོའི་ཟླ་ ༩ པའི་ཚེས་ ༩ ཡི་སྔ་ཕྱིའི་དྲོ་གཉིས་དང་། ཚེས་ ༡༠ ཡི་ཉིན་རྒྱབ། དགོང་དྲོའི་ཆུ་ཚོད་ ༦ པ་ནས་དགུ་པའི་བར་བཅས་ཚོགས་ཐུན་བཞི་ཡི་ཚོགས་ཐེངས་རེའི་ཆུ་ཚོད་གསུམ་རེར། རྗེ་བླ་མའི་དགོངས་པ་རབ་གསལ་ལས་བརྗོད་གཞི་དྲུག་ལ་དགག་སྒྲུབ་ཕྱོགས་གཉིས་ཀྱི་འཆད་མཁན་རྣམ་པས་སོ་སོའི་རྩོམ་ཤོག་སྒྲོགས་སྦྱང་དང་། ཕན་ཚུན་དྲི་བ་དྲི་ལན། འདུས་དམངས་ཀྱི་ནང་ནས་དྲི་བ་བཏོན་པར་ལན་འདེབས་གནང་བ་སོགས་དུས་བསྟུན་གྱི་བགྲོ་གླེང་གི་རྣམ་པ་གསར་པ་ཞིག་གི་སྟེང་ནས་ཚོགས་སོང་།
ལས་རིམ་གསལ་བསྒྲགས་སུ་བཀོད་པ་ལྟར་ན། བརྗོད་གཞི་དྲུག་ནི།
བདག་མེད་རྫོགས་པར་སྟོན་མི་སྟོན་དང་སྒོམ་མི་སྒོམ་གྱི་ཁྱད་པར། ལྟ་བ་ངེས་པ་ལ་དགག་བྱ་ངོས་འཛིན་སྔོན་དུ་འགྲོ་དགོས་མིན་གྱི་ཁྱད་པར། ཞིག་པ་དངོས་པོ་ཡིན་མིན་དང་ཀུན་གཞི་བཞེད་མི་བཞེད་ཀྱི་ཁྱད་པར། ཐལ་རང་ལ་ལྟ་བ་མཐོ་དམན་དང་རང་བཞིན་ཡོད་མེད་ཀྱི་ཁྱད་པར། ཕུང་པོ་གང་ཟག་གི་བདག་གཞིར་དང་ཐ་སྙད་ཚད་གྲུབ་འཐད་མིན་གྱི་ཁྱད་པར། ཤེེས་པར་གྱུར་པའི་ཤེས་སྒྲིབ་ཡོད་མེད་དང་ཤེས་སྒྲིབ་སྐོར་དགུར་ཕྱེ་ནས་སྤོང་མིན་གྱི་ཁྱད་པར། བཅས་ཡིན་འདུག
འདུལ་བའི་བགྲོ་གླེང་ཚོགས།
དྲ་འཇུག་པ། རིག་མཛོད་རྩོམ་སྒྲིག་པ།
སེར་བྱེས་མཁས་སྙན་གྲྭ་ཚང་གིས་གོ་སྒྲིག་འོག་རྒྱལ་སྤྱིའི་འདུལ་བའི་བགྲོ་གླེང་ཐེངས་གཉིས་པ་ཚོགས་སོང་།
བོད་རྒྱལ་ལོ་ ༢༡༤༣ ལོའི་ཟླ་ ༡ ཚེས་ ༡༧ ནས་ ༡༩ དང་ཕྱི་ལོ་ ༢༠༡༦ ལོའི་ཟླ་ ༠༢ ཚེས་ ༢༤ ནས་ ༢༦ བར་ཏེ་ཉིན་གསུམ་ལ་འཕགས་ཡུལ་ལྷོ་ཕྱོགས་སེར་བྱེས་མཁས་སྙན་གྲྭ་ཚང་གི་གོ་སྒྲིག་འོག་ཐའི་ལེནྜི་དང་ཐེ་ཝན་སོགས་རྒྱལ་ཁབ་དྲུག་ནས་ནང་པའི་དགེ་སློང་འདུལ་བ་འཛིན་པ་དང་མཁས་དབང་དུ་མ་གདན་འདྲེན་དང་ལྷན་འཛོམས་ཐོག་རྒྱལ་སྤྱིའི་རང་བཞིན་ཅན་གྱི་དམ་ཆོས་འདུལ་བའི་སྐོར་གྱི་བགྲོ་གླེང་ཐེངས་གཉིས་པ་སེར་བྱེས་གྲྭ་ཚང་གི་ཆོས་རའི་ནང་དུ་ཚོགས། ཕྱི་ཚེས་ ༢༤ ཉིན་གྱི་སྔ་དྲོའི་ཆུ་ཚོད་ ༡༠:༤༠ སྟེང་སྐུ་མགྲོན་རྣམས་དང་ཟུར་ཉན་ཚོགས་གཅར་བ་རྣམས་སེར་བྱེས་གྲྭ་ཚང་གི་ཆོས་རའི་ནང་དུ་འཛོམས་ཏེ། མར་མེ་ཞལ་འབྱེད་སོགས་གྲུབ་རྗེས་གྲྭ་ཚང་གི་སྐྱབས་རྗེ་མཁན་རིན་པོ་ཆེ་བློ་བཟང་བདེ་ལེགས་མཆོག་གིས་བགྲོ་གླེང་གི་དགོས་པ་དང་འབྲེལ་བའི་གསུང་བཤད་གནང་སྟེ་བགྲོ་གླེང་དབུ་འཛུགས་ཞུ་ཡོད་ལ། སྐུ་མགྲོན་གྱི་གྲས་སུ། དབུས་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེ་མཆོག་དང་། སྐྱབས་རྗེ་ངོར་ཤར་ཆེན་ཀླུ་ལྡིང་མཁན་རིན་པོ་ཆེའི་སྐུ་ཚབ། ༼སྐུ་མགྲོན་གྱི་མཚན་སོགས་མཛད་རིམ་ངོ་སྤྲོད་ལས་གསལ་བ་ལྟར་ཇི་བཞིན་བཀོད་ཡོད། ༽གདན་ཞུའི་སྐུ་མགྲོན་གཙོ་བོའི་གྲས་ཐེ་ཝན་ཛེང་ཇུའི་ལྷ་ཁང་དང་ཡོན་ཏོང་དགོན་པའི་མཁན་པོ་ཤཱི་ཀའོ་ཆཱིང་མཆོག །སཱ་ར་ན་ཐའི་མཧཱ་བོ་དྷི་ཚོགས་པའི་དགེ་སློང་འདུལ་བ་འཛིན་པ་པཱི་ཤཱི་ཝ་ལཱི་ཐེ་རོ། ཐའི་ལན་ཌིའི་དགེ་སློང་འདུལ་བ་འཚིན་པ་ཕཱ་རཱ་མཧཱ། བྷཏྶཀྲོན། པིཡོ་བྷ་སོ། དགེ་སློང་འདུལ་བ་འཛིན་པ་བོ་དྷི་པཱ་ལཱ་ཐེ་རཱ། མ་དྷུ་རཡ། ཏཱ་མིལ་ན་ཌུ། ཅིཏྟཱ་གྷོང་མཐོ་སློབ་ཀྱི་པཱ་ལི་སྡེ་ཚན། སློབ་དཔོན་ཆེན་པོ་ཛྙ་ན་རཏ་ན། བེངྒ་ལ་རུ་མ་ཧཱ་བོ་དྷི་ཚོགས་པ། དགེ་སློང་འདུལ་བ་འཛིན་པ་ཨ་ནྣ་ད་བནྡེ། ཐེ་ཝན་ཡོན་ཏོང་དགོན་པའི་འགན་འཛིན་དགེ་སློང་འདུལ་བ་འཛིན་པ་ཡོ་ཡུན་ཤཱི། ཝཱ་ཎ་གཅུག་ལག་སློབ་གཉེར་ཁང་གི་ཉམས་ཞིབ་སྡེ་ཚན་གྱི་འབུམ་རམས་པ་བློ་བཟང་རྡོ་རྗེ་རབ་གླིང་། མཁས་དབང་བློ་བཟང་ནོར་བུ་ཤཱསྟྲི་སོགས་ཀྱིས་བརྗོད་གཞི། པཱ་ལིའི་གཞུང་ནང་གསལ་བའི་འདུལ་བའི་སྨན་གྱི་སྐོར། འཕགས་པ་གནས་བརྟན་སྡེ་པའི་ལུགས་ཀྱི་དགེ་འདུན་གྱི་ལས་དང་། སྲ་བརྐྱང་། མཚམས་པོ་ཆེ་ཆུང་བཅད་ཚུལ། འཕགས་པ་གནས་བརྟན་སྡེ་པའི་ལུགས་ཀྱི་གོས་ཀྱི་སྐོར། བྷང་གྷ་ལ་དེ་ཤའི་གནས་བརྟན་སྡེ་པའི་ལུགས་ཀྱི་འདུལ་བའི་གཞུང་དང་དེའི་ཕྱག་ལེན་སྐོར་གྱི་དཔྱད་ཞིབ། དགེ་བསྙེན་གྱི་སྡོམ་པའི་སྐོར། སྡོམ་པ་སྲུང་ཚུལ། རང་གི་ཕ་དང་མེས་པོ་སོགས་ལ་གུས་པ་བྱེད་པའི་ལུགས་ལྟར་གྱི་སྡོམ་པ་ཕར་ཕྱིན། བྱིན་ལེན་སྟོབ་པ་པོའི་ཁྱིམ་པ་མེད་དུས་བྱིན་ལེན་ཇི་ལྟར་བྱ་བའི་ཚུལ། གཞི་ཐམས་ཅད་ཡོད་སྨྲ་དང་ནང་པའི་སྡེ་པ་གཞན་གྱི་འདུལ་གཞུང་སྐོར། འདུལ་སྔགས་ཟུང་དུ་སྦྲེལ་བ་བཅས་ཀྱི་ཐོག་ལ་བགྲོ་གླེང་གཏམ་བཤད་དང་། དམངས་དང་དྲི་བ་དྲིས་ལན་གནང་ཞིང་། རྒྱལ་སྤྱིའི་འདུལ་བའི་བགྲོ་གླེང་ཐེངས་གསུམ་པའི་སྐོར་ལ་བགྲོ་གླེང་དང་གྲོས་བསྡུར་གནང་སྟེ་ཚེས་ ༢༦ ཉིན་བགྲོ་གླེང་གྲོལ།
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༦།༠༢།༢༧ ལ།
རྒྱལ་སྤྱིའི་འདུལ་བའི་བགྲོ་གླེང་ཚོགས།
དྲ་འཇུག་པ། རིག་མཛོད་རྩོམ་སྒྲིག་པ།
སེར་བྱེས་མཁས་སྙན་གྲྭ་ཚང་གི་ཤེས་ཡོན་ལྷན་ཚོགས་ཀྱིས་གོ་སྒྲིག་འོག་རྒྱལ་སྤྱིའི་འདུལ་བའི་བགྲོ་གླེང་ཐེངས་གསུམ་པ་ཚོགས་སོང་།
བོད་རྒྱལ་ལོ་ ༢༡༤༤ ལོའི་བོད་ཟླ་ ༡༠ ཚེས་ ༢༩ ནས་དང་ཕྱི་ལོ་ ༢༠༡༧ ལོའི་ཟླ་ ༡༢ ཚེས་ ༡༦ གི་སྔ་དྲོའི་ཆུ་ཚོད་༨:༣༠ནས་དབུ་འཛུགས་ཀྱི་ཉིན་གསུམ་རིང་ལ་འཕགས་ཡུལ་ལྷོ་ཕྱོགས་སེར་བྱེས་མཁས་སྙན་གྲྭ་ཚང་གི་ཤེས་ཡོན་ལྷན་ཚོགས་ཀྱིས་གོ་སྒྲིག་འོག་སེར་བྱེས་བཀྲ་ཤིས་ཆོས་གླིང་ཚོགས་ཁང་ནང་དུ་རྒྱལ་སྤྱིའི་དམ་ཆོས་འདུལ་བའི་བགྲོ་གླེང་ཐེངས་གསུམ་པ་ཚོགས་སོང་།
བགྲོ་གླེང་དེར་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་མཆོག་
དང་། ཕྱི་རྒྱལ་ཡུལ་གྲུ་ཁག་ནས་ཆེད་ཕེབས་གནང་བའི་སྐུ་མགྲོན་གང་མང་། རང་རེའི་ཆོས་བརྒྱུད་རིས་མེད་ཀྱི་མཁས་དབང་སོགས་མི་སྣ་བརྒྱ་ཕྲག་ཁ་ཤས་མཉམ་འཛོམས་བྱུང་འདུག་ལ། བགྲོ་གླེང་གི་གཏམ་བཤད་ཁག་གྲྭ་ཚང་རང་གི་སྐད་སྒྱུར་སྡེ་ཚན་གྱི་སྐད་སྒྱུར་བ་དག་གིས་བོད་རྒྱ་དབྱིན་གསུམ་གྱི་སྐད་དུ་བསྒྱུར་ཏེ་རླུང་འཕྲིན་བརྒྱུད་ཚོགས་བཅར་བ་དག་གིས་གསན་ཐུབ་ཀྱིན་ཡོད་འདུག །
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༧།༡༢།༡༦ལ།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།
བྱང་ཆུབ་ལམ་རིམ་ཆེན་མོའི་གསུང་ཆོས་ཀྱི་མཇུག་ལེགས་པར་གྲུབ།
དྲ་འཇུག་པ། རིག་མཛོད་རྩོམ་སྒྲིག་པ།
སེར་བྱེས་གྲྭ་ཚང་གི་ཆོས་རར་སློབ་གཉེར་བ་ཚོར་༧ སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བདེ་ལེགས་མཆོག་གིས་ལོ་མང་རིང་ལམ་རིམ་གྱི་གསུང་ཆོས་གནང་མུས་ཡིན་པ་དེ་དེ་རིང་མཇུག་ལེགས་པར་གྲུབ་སོང་།
བོད་དུ་སེར་བྱེས་གྲྭ་ཚང་གི་མཁན་རིན་པོ་ཆེས་སློབ་གཉེར་བ་རྣམས་ལ་གྲྭ་ཚང་གི་ཆོས་རའི་ནང་དུ་བྱང་ཆུབ་ལམ་རིམ་གྱི་བཀའ་ཁྲིད་གནང་སྲོལ་ཡོད་པ་དང་། ལྷག་པར་དུ་ ༧ གོང་ས་ ༧ སྐྱབས་མགོན་ཆེན་པོ་མཆོག་གིས་ཀྱང་ལམ་སྲོལ་དེ་ཉིད་ལེགས་པོ་ཡོད་པ་དང་གྲྭ་ཚང་གཞན་ལའང་དེ་ལྟར་གནང་ཐུབ་ན་ལེགས་པའི་བཀའ་གནང་བ་ལྟར། འཕགས་ཡུལ་དུའང་གྲྭ་ཚང་གི་མཁན་རིན་པོ་ཆེ་གོང་མ་དག་གི་སྐབས་ནས་སྲོལ་བཟང་དེ་བསྐྱར་གསོ་མཛད་ཡོད་པ་ལྟར། ༧སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བདེ་ལེགས་མཆོག་གིས་ཀྱང་ཕྱི་ལོ་༢༠༡༢ལོའི་ཟླ་༥པར་གྲྭ་ཚང་གི་མཁན་རིན་པོ་ཆེའི་མཛད་ཁུར་བསྐྱངས་པ་ནས་བཟུང་སྟེ། ཆོས་ཐོག་གི་སྐབས་རྣམས་སུ་གྲྭ་ཚང་གི་ཆོས་རའི་ནང་དུ་སྔ་དྲོའི་ཆོས་རར་སློབ་གཉེར་བ་རྣམས་ལ་རྗེ་ཙོང་ཁ་པའི་བྱང་ཆུབ་ལམ་རིམ་ཆེན་མོའི་བཀའ་ཁྲིད་གནང་མུས་སུ་ཡོད་པ་དེ་དེ་རིང་སྟེ་ཕྱི་ལོ་ ༢༠༡༦ ལོའི་ཕྱི་ཟླ་ ༥ ཚེས་ ༡༣ དང་བོད་ཟླ་བཞི་པ་ས་ག་ཟླ་བའི་ཚེས་ ༧ ཉིན་གྱི་སྔ་དྲོར་མཇུག་ལེགས་པར་གྲུབ་པ་དང་། གྲྭ་ཚང་རིན་པོ་ཆེ་ནས་བཀའ་དྲིན་གཏང་རག་གི་རྟེན་གསུམ་འདེགས་འབུལ་ཞུས་སོང་།
སེར་བྱེས་མཁན་རབས་དོན་ལྔ་པ་སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བདེ་ལེགས་མཆོག་ནི། 
༡༩༣༩ ལོའི་ཟླ་༡ཚེས་༥ཉིན་དཀར་མཛེས་མདའ་མདོ་གྲོང་དུ་སྐུ་འཁྲུངས། འཁྲུངས་གསར་རྡོ་རྗེ་འཆང་བློ་བཟང་དཔལ་ལྡན་གྱིས་བློ་བཟང་བདེ་ལེགས་ཞེས་པའི་མཚན་གནང་། དགུང་ལོ་བདུན་གྱི་སྐབས་དགེ་རྒན་བཀྲ་རྒྱམ་ཀློག་གི་སློབ་དཔོན་དུ་བསྟེན་ནས་གཞུང་ཆེན་ཐུགས་འཛིན་དང་། དེ་ནས་དཀར་དགོན་མཚན་ཉིད་གྲྭ་ཚང་གི་ཆོས་སྒོར་ཞུགས་སྐབས་མཚན་ཉིད་གྲྭ་ཚང་གི་སློབ་གྲྭ་འཛུགས་པ་དང་སྟབས་འགྲིག་པ་བྱུང་བས་སློབ་གྲྭར་ཞུགས། དགུང་ལོ་བཅུ་གཅིག་གི་སྐབས་འཁྲུངས་གསར་རྡོ་རྗེ་འཆང་ལས་དགེ་ཚུལ་གྱི་སྡོམ་པ་ཞུས་ཏེ་མཚན་ལ་ངག་དབང་བཟོད་པ་གསོལ། དགུང་ལོ་བཅུ་བདུན་གྱི་སྐབས་དབུས་སུ་ཕེབས་ཏེ་སེར་བྱེས་གྲྭ་ཚང་གི་མཁན་རིན་པོ་ཆེ་རྗེ་བཙུན་བློ་བཟང་དབང་ཕྱུག་མཆོག་ལ་གསར་མཇལ་ཞུས་ཏེ་གྲྭ་ཚང་དུ་ཆོས་ཞུགས་དང་། རྗེ་བཙུན་རྡོ་རྗེ་བཀྲ་ཤིས་མཆོག་དགེ་རྒན་དུ་བསྟེན་ཏེ་དཔེ་ཁྲིད་ཞུས་ཤིང་གཞུང་ཆེན་སློབ་གཉེར་གནང་། ༥༩ ལོར་སྨར་སྒོ་ལ་བརྒྱུད་མ་སུ་རིར་འབྱོར་ཤིང་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་དགོངས་ལྟར་སྦག་སར་ཕེབས་ཏེ། སེར་བྱེས་མཁན་ཟུར་རིན་པོ་ཆེ་བློ་བཟང་དབང་ཕྱུག་མཆོག་དང་། རྗེ་བཙུན་རྡོ་རྗེ་བཀྲ་ཤིས་མཆོག །རྗེ་བཙུན་སྐལ་བཟང་རྣམ་རྒྱལ་སོགས་བསྟེན་ཏེ་དབུ་ཕར་འདུལ་མཛོད་ཚད་མ་སོགས་རྩ་འགྲེལ་དང་སྤྱོད་འཇུག་ཆེན་མོ། དྲང་ངེས་ལེགས་བཤད་སྙིང་པོ་སོགས་ཐུགས་འཛིན་གནང་སྟེ། མུ་མཐུད་ནས་སློབ་གཉེར་གནང་། ༦༨ ལོར་དགུང་ལོ་ཉེར་བརྒྱད་ལ་ཕེབས་སྐབས་རྡ་སའི་གཙུག་ལག་ཁང་དུ་༧གོང་ས་མཆོག་གི་མདུན་ནས་བསྙེན་རྫོགས་ཀྱི་སྡོམ་པ་ཞུས། རྗེ་བཙུན་བློ་བཟང་དབང་ཕྱུག་སོགས་ལས་དབང་བཀའ་སོགས་གསུང་ཆོས་གང་མང་ཞུས། ༡༩༦༩ལོའི་ཟླ་༡༢ པར་འདུས་མང་ལྷན་དུ་རྒྱ་གར་ལྷོ་ཕྱོགས་སྦེལ་ཀོབ་ས་གནས་སུ་གནས་སྤོར་མཛད་དེ། དགོན་པའི་རྨང་འདིང་པ་སོགས་ཀྱི་ཆེད་དུ་ལོ་ཤས་རིང་༼ད་ལྟའི་དགོན་གྲོང་ཆགས་ས་འདིར་སྐབས་དེར་ཤིག་ནགས་ཀྱིས་ཁྱབ་ཡོད།༽ཤིང་ནགས་གཅོད་འབྲེག །ཞིང་ལས། གཙུག་ལག་ཁང་དང་བཞུགས་ཤག་གསར་སྐྲུན་སོགས་སྐབས་དེའི་སྦག་ས་ནས་ཕེབས་པའི་དགེ་འདུན་དམངས་དང་ལྷན་དུ་སྐུ་ངལ་ཚད་མེད་བསྐྱོན། དེ་ནས་སློབ་གཉེར་གསར་འཛུགས་ཀྱི་སྐབས་སུ། སློབ་གཉེར་བའི་གྲས་སུ་ཚུད་དེ་མུ་མཐུད་ནས་གཞུང་ཆེན་ལ་སློབ་གཉེར་གནང་། བར་སྐབས་ཤིག་གློ་གཅོང་གི་ན་ཚའི་རྐྱེན་གྱིས་བྷོམ་བྷེར་སྨན་ཁང་དུ་ལོ་གཅིག་ཙམ་ལ་བཞུགས་དགོས་བྱུང་བ་ན། མཁན་ཟུར་རིན་པོ་ཆེ་རྗེ་བཙུན་བློ་བཟང་དབང་ཕྱུག་མཆོག་གིས་སྨན་ཁང་ནས་གང་མགྱོགས་འོང་དགོས་པའི་བཀའ་གནང་པ་གསན་པས། སེ་རར་ཕེབས་པ་ན་མཁན་ཟུར་རིན་པོ་ཆེས་ད་སྨན་ཁང་དུ་བསྐྱར་དུ་འགྲོ་མི་དགོས། སྔོན་ཆད་ཆོས་ཀྱི་དོན་དུ་སྲོག་བཏང་མྱོང་མེད། ད་དཔེ་ཆ་ཁྲིད་དེ། ཆོས་ཀྱི་དོན་དུ་སྲོག་ཐེངས་གཅིག་གཏོང་ཐུབ་ན་སྐལ་བ་བཟང་པོ་རེད་ཅེས་བཀའ་ཕེབས་པ་བཞིན་དེ་ནས་བཟུང་སྟེ་སེ་རར་རྒྱུན་བཞུགས་གནང་ཞིང་། མཁན་ཟུར་རིན་པོ་ཆེའི་བཀའ་ལྟར་སློབ་གཉེར་བ་རྣམས་ལ་དཔེ་ཁྲིད་གནང་བ་དང་། སེ་ར་བྱེས་སྨད་གཉིས་དང་། སྨད་རྒྱུད་གྲྭ་ཚང་། རྫོང་དཀར་ཆོས་སྡེ་སོགས་ཀྱི་སློབ་གཉེར་བའི་ཁྲོད་ནས་སློབ་མ་ཡང་རིམ་གྱིས་འཕེལ། ༡༩༨༢ ལོར་ལོ་བདུན་རིང་གི་དགེ་ལུགས་རྒྱུགས་སྤྲོད་རྫོགས་ཏེ་ལྷ་རམས་ཨང་དང་པོའི་མཚན་གནས་བཞེས་ཤིང་། རྒན་དབུ་མ་འཇུག་པ་ཞེས་པའི་མཚན་གནས་གཞན་ཞིག་ཀྱང་གདན་སའི་མཁས་དབང་ཚོའི་ཁྲོད་ནས་རིམ་གྱིས་རྒྱས་ཏེ་གདན་སའི་མཁས་པ་དང་སློབ་གཉེར་བའི་ཁྲོད་ན་གྲགས་པ་ཆེ། ༡༩༨༥ ལོར་རྡོ་རྗེ་གདན་དུ་༧གོང་ས་མཆོག་གི་དཔལ་དུས་ཀྱི་འཁོར་ལོའི་དབང་ཆེན་གྱི་སྐབས། གདན་ས་གསུམ་གྱིས་བཀོད་སྒྲིག་གནང་བ་ལྟར་ལོ་དེའི་དགེ་བཤེས་རྣམས་དང་ལྷན་དུ་རིས་མེད་ཀྱི་དགེ་འདུན་འདུས་པ་རྒྱ་མཚོའི་སྤྱན་སྔར་དམ་འཇོག་གནང་། ༡༩༨༨ ལོའི་ཟླ་བཅུ་པར་གནས་མཆོག་ཝཱ་ར་ཎཱ་སར་ཡང་གདན་ས་གསུམ་སོགས་ཀྱི་དགེ་འདུན་འདུས་པ་རྒྱ་མཚོའི་དབུས་སུ་ཉིན་གཉིས་ལ་གཞུང་ཆེན་གྱི་དམ་འཇོག་གནང་། ༡༩༨༩ལོར་སྨད་རྒྱུད་གྲྭ་ཚང་དུ་སྒྲིག་ཞུགས་གནང་སྟེ་སྔགས་ལ་སློབ་གཉེར་གནང་། ༡༩༨༩ལོའི་ཟླ་༡༠ཚེས་༡༨ཉིན་སེ་ར་ཐེག་ཆེན་གླིང་དུ་༧གོང་ས་༧སྐྱབས་མགོན་ཆེན་པོ་དབུས་བཞུགས་ཀྱི་དགེ་འདུན་འདུས་པའི་སྤྱན་སྔར་སྔགས་ཀྱི་རྒྱུགས་སྤྲོད་ཕུལ། དེ་ནས་གྲྭ་ཚང་གི་སློབ་གཉེར་རྒན་ཐེངས་གཉིས་ལ་གནང་། ༡༩༩༥ལོར་རྒྱུད་སྨད་གྲྭ་ཚང་གི་དགེ་བསྐོས་དང་དེ་རྗེས་སེར་བྱེས་གྲྭ་ཚང་གི་དགེ་བསྐོས་གནང་། ༡༩༩༧ལོར་བོད་དུ་ཕེབས་ཏེ་སྐལ་ལྡན་དོན་གཉེར་ཅན་མང་པོར་དམ་པའི་ཆོས་ཀྱིས་ཚིམ་པར་མཛད། ༡༩༩༨ལོར་ཕྱིར་འཕགས་ཡུལ་དུ་ཕེབས་ཏེ་སེ་རར་སྔར་བཞིན་ཕྱི་ནང་གི་དོན་གཉེར་ཅན་མང་པོར་དཔེ་ཁྲིད་དང་ལུང་ཆོས་མན་ངག་གནང་སྟེ་བཞུགས་ཤིང་། ༢༠༠༢ལོར་༧གོང་ས་༧སྐྱབས་མགོན་ཆེན་པོ་མཆོག་གིས་རྒྱུད་སྨད་ཀྱི་བླ་མ་དབུ་མཛད་དུ་ཕྱག་རྟགས་ཕེབས་པ་ལྟར་ལོ་དེའི་བོད་ཟླ་༡༠ཚེས་༡༨ཉིན་དཔལ་ལྡན་སྨད་རྒྱུད་གྲྭ་ཚང་གི་བླ་མ་དབུ་མཛད་ཀྱི་མཛད་ཁུར་བཞེས། ༢༠༠༥ ལོའི་བོད་ཟླ་༩ཚེས་༦ཉིན་རྒྱུད་སྨད་ཀྱི་མཁན་ཁྲིར་ཕེབས། ༢༠༡༢ལོའི་ཟླ་༥ཕྱི་ཚེས༦སེར་བྱེས་གྲྭ་ཚང་གི་མཁན་ཁྲིར་ཕེབས་ཤིང་ཆོས་སྲིད་གཉིས་ཐད་ནས་མཛད་འཕྲིན་སྐྱོང་མུར་བཞུགས་པ་ལགས་སོ། །
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༦།༠༥།༡༣ ལ།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་དང་སྦྲེལ་སྣེ་མཉམ་སྦྱར་བྱེད་དགོས།
བྱང་རྩེ་ཆོས་རྗེ་རིན་པོ་ཆེ་ཁྲི་འདོན་བྱས།
དྲ་འཇུག་པ། རིག་མཛོད་རྩོམ་སྒྲིག་པ།
རྒྱུད་སྨད་མཁན་ཟུར་རྗེ་སྒོ་སོག་རིན་པོ་ཆེ་ངག་དབང་གསུང་རབ་བསྟན་འཛིན་དགེ་ལེགས་མཆོག་བྱང་རྩེ་ཆོས་རྗེར་ཁྲི་འདོན་དང་གྲྭ་ཚང་སོ་སོར་གདན་ཞུ་དང་མཛད་སྒོ་འཚོགས་སོང་།
འཕགས་ཡུལ་གྱི་གདན་ས་སེར་སྨད་ཐོས་བསམ་ནོར་གླིང་གྲྭ་ཚང་གི་སྐྱབས་རྗེ་སྒོ་སོག་རིན་པོ་ཆེ་རྒྱུད་སྨད་མཁན་ཟུར་ངག་དབང་གསུང་རབ་བསྟན་འཛིན་དགེ་ལེགས་མཆོག་ལ་འདི་ལོའི་ཕྱི་ཟླ་༨ཚེས་༡ཉིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བྱང་རྩེ་ཆོས་རྗེའི་མཚན་གནས་ཀྱི་ཕྱག་རྟགས་ཕེབས་པ་ལྟར་ཟླ་བ་འདིའི་ཚེས་ ༢༧ ཉིན་དགའ་ལྡན་རྣམ་པར་རྒྱལ་བའི་གླིང་གི་ཚོགས་ཆེན་དང་བྱང་རྩེ་གྲྭ་ཚང་གཉིས་སུ་ཁྲི་འདོན་མཛད་སྒོ་འཚོགས་ཡོད་པ་དང་། མཛད་སྒོའི་སྐུ་མགྲོན་དུ་གདན་ས་ཁག་གི་མཁན་ལས་ཟུར་དང་ལས་སྣེ། གཞན་སྐུ་མགྲོན་གང་མང་ཕེབས་ཡོད་འདུག །མཛད་སྒོའི་ཉིན་༧བྱང་རྩེ་ཆོས་རྗེ་རིན་པོ་ཆེ་མཆོག་གིས་རྟེན་འབྲེལ་མཚོན་ཕྱིར་དུ་བྱང་ཆུབ་ལམ་རིམ་གྱི་ཆོས་འབྲེལ་ཞིག་ཀྱང་གནང་ཡོད་འདུག་ཅིང་། ཁ་སང་སྟེ་ཕྱི་ལོ་༢༠༡༧ལོའི་ཟླ་༨ཚེས་༣༠ཉིན་མཁན་བླ་དགེ་འདུན་མང་གིས་ཕེབས་བསུའི་ཁྲོད་༧བྱང་རྩེ་ཆོས་རྗེ་རིན་པོ་ཆེ་མཆོག་འདི་ག་སེ་ར་ཆོས་སྒར་དུ་ཕེབས་ཡོད་པ་དང་། ཐོག་མར་སེ་ར་ཐེག་པ་ཆེན་པོའི་གླིང་བླ་སྤྱིར་རྟེན་འབྲེལ་མཛད་སྒོ་འཚོགས་རྗེས་གྲྭ་ཚང་གཉིས་ལ་དགེ་འདུན་མང་གིས་ཕེབས་བསུ་དང་མཛད་སྒོ་འཚོགས་སོང་།
༧བྱང་རྩེ་ཆོས་རྗེ་སྒོ་སོག་རིན་པོ་ཆེ་ངག་དབང་གསུང་རབ་བསྟན་འཛིན་དགེ་ལེགས་མཆོག་ནི་ཕྱི་ལོ་ ༡༩༤༨ ལོར་བོད་ཤར་ཕྱོགས་ལི་ཐང་མོ་ཧ་ཞེས་པར་སྐུ་འཁྲུངས་པ་དང་། ཡོངས་འཛིན་རྒྱལ་ཚབ་སྟག་བྲག་རིན་པོ་ཆེ་མཆོག་གིས་སྒོ་སོག་སྐུ་གོང་མའི་ཡང་སྲིད་དུ་ངོས་འཛིན་གནང་འདུག །༡༩༥༩ ལོར་བྱེས་སུ་ཕེབས་ཏེ་སྦག་ས་ཆོས་སྒར་དང་སེར་སྨད་ཐོས་བསམ་ནོར་གླིང་གྲྭ་ཚང་གཉིས་སུ་གཞུང་ཆེན་ཁག་ལ་སློབ་གཉེར་གནང་སྟེ། དགུང་གྲངས་ ༣༦ གི་སྐབས་ལྷ་རམས་པའི་མཚན་རྟགས་བཞེས་འདུག །དེ་རྗེས་རྒྱུད་སྨད་གྲྭ་ཚང་དུ་ཆོས་ཞུགས་གནང་སྟེ་སྔགས་ལ་ཐོས་བསམ་སློབ་གཉེར་གནང་ཞིང་སྔགས་རམས་པའི་མཚན་རྟགས་བཞེས་ཡོད་པ་དང་། རྒྱུད་སྨད་གྲྭ་ཚང་གི་མཁན་པོའི་མཛད་འཁུར་དང་། ཕྱི་ལོ་ ༡༩༩༢ ལོར་༧གོང་ས་༧སྐྱབས་མགོན་ཆེན་པོ་མཆོག་གིས་སེར་སྨད་ཐོས་བསམ་ནོར་གླིང་གྲྭ་ཚང་གི་མཁན་པོར་བསྐོ་གཞག་མཛད་པ་ལྟར་མཁན་པོའི་མཛད་འགན་བཞེས་ཡོད་འདུག །གཞན་ཨ་རི་དང་འཇར་མན་ནི་སོགས་ཕྱིའི་རྒྱལ་ཁབ་དུ་མར་གདན་ཞུས་ལྟར་ཕེབས་ཏེ་དད་ལྡན་རྣམས་ལ་ནང་ཆོས་ཀྱི་ཟབ་ཁྲིད་གནང་མུས་སུ་ཡོད་འདུག་ལ། འདི་ལོའི་ཕྱི་ཟླ་༨ཚེས་༡ཉིན་༧གོང་ས་༧སྐྱབས་མགོན་ཆེན་པོ་མཆོག་གིས་བྱང་རྩེ་ཆོས་རྗེར་བསྐོ་བཞག་གི་བཀའ་ཡིག་ཕྱག་རྟགས་སྩལ་ཡོད་འདུག །
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༧།༠༨།༣༡ལ།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།
༧ དགའ་ལྡན་ཁྲི་རིན་པོ་ཆེས་གསུང་ཆོས་གནང་།
དྲ་འཇུག་པ། རིག་མཛོད་རྩོམ་སྒྲིག་པ།
ཁ་སང་རེས་གཟའ་ཉི་མའི་ཉིན་སེ་ར་ཐེག་པ་ཆེན་པོའི་གླིང་དུ་༧དགའ་ལྡན་ཁྲི་རིན་པོ་ཆེས་ལམ་གཙོ་རྣམ་གསུམ་གྱི་བཤད་ལུང་དང་སྒྲོལ་དཀར་ཡིད་བཞིན་འཁོར་ལོའི་ཚེ་དབང་གནང་སོང་།
ཕྱི་ལོ་༢༠༡༧ལོའི་ཟླ་༡༡་ཚེས་༥ཉིན་༧དགའ་ལྡན་ཁྲི་རིན་པོ་ཆེ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གིས་སེ་ར་ཐེག་པ་ཆེན་པོའི་གླིང་གི་གཙུག་ལག་ཁང་དུ་སེ་རའི་དགེ་འདུན་པ་རྣམས་དང་སློབ་ཕྲུག །གཞན་སེར་སྐྱ་མི་མང་གང་མང་ལ་ལམ་གཙོ་རྣམ་གསུམ་གྱི་བཤད་ལུང་དང་སྒྲོལ་དཀར་ཡིད་བཞིན་འཁོར་ལོའི་ཚེ་དབང་། ལམ་སྟོན་བཀའ་སློབ་བཅས་གནང་སོང་། ༧སྐྱབས་རྗེ་ཁྲི་རིན་པོ་ཆེས་སེ་ར་ཐེག་པ་ཆེན་པོའི་གླིང་གི་སློབ་གཉེར་བ་ཡོངས་ལ། སློབ་གཉེར་དང་འཛིན་སྐྱོར་སྦྱང་ལ་ཤུགས་རྒྱག་དགོས་པ་དང་། ཚོགས་བསག་སྒྲིབ་སྦྱོང་ལ་འབད་དགོས་པ། ཚུལ་ཁྲིམས་རྣམ་པར་དག་པས་གཞི་བཟུང་། ཉེར་ལེན་དམིགས་རྣམ་སྐྱོང་བ་དང་། ལྷན་ཅིག་བྱེད་རྐྱེན་ཚོགས་བསག་སྒྲིབ་སྦྱོང་སུམ་སྒྲིལ་བྱས་ན་རྟོགས་པ་སྐྱེ་ཐུབ་པ་དང་། ལྷག་པར་དུ་སློབ་གཉེར་གྱི་སྐབས་སུ་ཚོགས་བསག་པ་གལ་ཆེ་ཚུལ། ཚོགས་བསགས་པ་ལ། གྲྭ་ཚང་གཉིས་ཀྱི་དགོང་མོའི་ཆོས་རའི་ཞལ་འདོན་རྣམས་གལ་ཆེ་བ་དང་། སྔོན་ཆད་རྩོད་པ་དང་ཆོས་རའི་ཞལ་འདོན་གཉིས་ལས་ཞལ་འདོན་མང་བ། བླ་བརྒྱུད་གསོལ་འདེབས་ཀྱིས་བླ་མ་རྣམས་ལ་གསོལ་འདེབས་ཞུ་བ་དང་། སྒྲོལ་མ་ལ་སོགས་པ་གསུངས་ནས་ཡི་དམ་ལ་གསོལ་འདེབས་ཞུ་བ་དེ་གལ་ཆེ་བ་དང་། ཞལ་འདོན་གྱིས་དུས་ཚོད་འཕྲོ་བརླག་གཏོང་བ་ལྟ་བུའི་བསམ་ཚུལ་སྐྱེ་མི་ཉན་ཚུལ་དང་། ༧གོང་ས་༧སྐྱབས་མགོན་ཆེན་པོ་མཆོག་གིས་སློབ་གཉེར་གྱི་སྐོར་ལ་ཐུགས་ཁྲལ་གནང་གིན་ཡོད་པས་སློབ་གཉེར་འཐུས་ཤོར་མ་སོང་བ་བྱེད་དགོས་ཚུལ། སྐྱ་བོ་རྣམས་ཀྱིས་ཀྱང་ཆོས་ཤེས་ནས་དད་པ་ཐོབ་པ་བྱེད་རྒྱུ་གལ་ཆེ་བ་སོགས་ཀྱི་བཀའ་སློབ་གནང་སོང་།
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༧།༡༡།༠༦ལ།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།
དེ་རིང་ས་ཟླའི་དུས་ཆེན་གསུམ་འཛོམས་ཀྱི་ཉིན་མོ།
དྲ་འཇུག་པ། རིག་མཛོད་རྩོམ་སྒྲིག་པ།
དེ་རིང་ས་ཟླའི་དུས་ཆེན་གསུམ་འཛོམས་ཀྱི་ཉིན་མོར་སེ་རར་ཡང་བོད་ཡུལ་བྱིངས་ལྟར་སྐྱ་སེར་དབྱེར་མེད་ཀྱིས་མཆོད་མཇལ་དང་མཆོད་འབུལ་སོགས་ཀྱིས་དགེ་བའི་ཕྱོགས་ལ་བྲེལ་ཟིང་ཧ་ཅང་ཆེ།
བོད་ཟླ་བཞི་པར་རགས་པར་ཉ་བའི་སྐར་མའི་ཆ་ནས་ས་ག་ཟླ་བ་ཞེས་བརྗོད། ཟླ་བ་འདི་ནི་བདག་ཅག་གི་སྟོན་པ་སྐུ་བལྟམས་པ་དང་། སངས་རྒྱས་པ། སྐུ་མྱ་ངན་ལས་འདས་པའི་དུས་ཆེན་ཏེ་དུས་ཆེན་གསུམ་འཛོམས་ཀྱི་ཉིན་མོར་ངོས་འཛིན་བྱེད་ཀྱིན་ཡོད།
དེ་ཡང་བདག་ཅག་གི་སྟོན་པ་ཤཱཀྱ་ཐུབ་པ་དགའ་ལྡན་གྱི་གནས་ནས་གཟིགས་པ་ལྔས་གླང་པོ་ཆེ་ཐལ་དཀར་མཆེ་བ་དྲུག་ལྡན་གྱི་རྣམ་པར་བརྫུས་ཏེ། ས་ལུག་ཆུ་སྟོད་ཟླ་བ་དྲུག་པའི་ཚེས་ ༡༥ ཉིན་ལྷ་མོ་སྒྱུ་འཕྲུལ་མའི་ལྷུམས་སུ་ཞུགས་ནས་ལྕགས་སྤྲེལ་ས་ག་ཟླ་བའི་ཚེས་བདུན་ཉིན་ལུམ་བིའི་ཚལ་དུ་སྐུ་བལྟམས་པ་དང་གཅིག །
ཤིང་རྟ་ས་ཟླའི་ཚེས་༡༥ཡི་མཚན་མོར་བྱང་ཆུབ་ཤིང་གི་དྲུང་དུ་མཉམ་པར་བཞག་སྟེ་སྲོད་ལ་བདུད་བཏུལ་བ་དང་ཐོ་རེངས་མངོན་པར་སངས་རྒྱས་པ་དང་གཉིས།
ལྕགས་འབྲུག་ས་ག་ཟླ་བའི་ཚེས་༡༥ ཉིན་རྩྭ་མཆོག་གྲོང་དུ་གཤེགས་ཏེ་སཱ་ལའི་ཚལ་གྱི་དབུས་ཐ་མལ་གྱི་གཟིམས་ཁྲིར་བཞུགས་ཤིང་ཉན་ཐོས་འོད་སྲུངས་ཆེན་པོ་ལ་བསྟན་པ་གཏད། འདུས་བྱས་ཐམས་ཅད་མི་རྟག་པ། ཟག་བཅས་ཐམས་ཅད་སྡུག་བསྔལ་བ། ཆོས་ཐམས་ཅད་སྟོང་ཞིང་བདག་མེད་པའོ།།ཞེས་གསུང་གི་ཐ་མ་སྩལ་ནས་ཆོས་ཀྱི་དབྱིངས་སུ་སྐུ་མྱ་ངན་ལས་འདས་པའི་མཛད་པ་བསྟན་པ་དང་གསུམ་བཅས་ཀྱི་དུས་ཆེན་ཁྱད་པར་ཅན་ལ་མཆོད་འབུལ་སོགས་བྱས་ན་དགེ་རྩ་འབུམ་འགྱུར་གྱི་འཕེལ་ཆེ་བར་བརྩིས་ཏེ་བོད་ས་ཡོངས་སུ། སྐྱ་སེར་དབྱེར་མེད་ཀྱིས་ཟླ་བ་དེར་ཤ་ཟ་བ་སྤངས་པ་དང་།
དབུས་སུ་གཞུང་གནས་དང་། རྩིས་ཁང་ལས་ཁུངས་ནས་ཤོད་སྐོར་གྱི་ས་ཟླའི་མཆོད་སྤྲིན་མ་དངུལ་སྐྱེད་འབབ་ཐོག་ཞལ་འདེབས་ཀྱིས་ཚེས་བརྒྱད་དང་། བཅོ་ལྔ། གནམ་གང་བཅས་ལ་གཙུག་ལག་ཁང་དང་། ར་མོ་ཆེ། རྩེ་འཕགས་པ་ལྷ་ཁང་བཅས་སོ་སོར་སྟོང་མཆོད་རེ་དང་། རྟེན་གཙོ་ཚང་མར་ཞལ་གསེར་སྒྲོན་འབུལ། ཕྱོགས་མཐའི་མཐའ་འདུལ་ཡང་འདུལ་སོགས་ཀྱི་རྟེན་ཁང་ལ་ཞལ་གསེར་སྒྲོན་འབུལ། སྙན་ཤལ་སོགས་ཀྱི་མཆོད་ཡོན་དོད་དངུལ་བཅས་བཀའ་ཤག་དམ་སྦྱར་བཀའ་རྒྱ་རེ་ཁུངས་སོ་སོར་གཏོང་སྲོལ་ཡོད།
ཚེས་༡༥ ཉིན་ཞོགས་པ་སྔ་ཆར་ཤོད་སྐོར་རྣམས་དམིགས་བསལ་གྱིས་ས་དབང་རྣམ་པ་ན་བཟའ་ཇུས་སེར། ཛ་ཐའི། རིམ་བཞི་བཅས་ན་བཟའ་མཛོད་སེར། རྩིས་དཔོན། བླ་ཕྱག །སྲས་རྣམ་པ། ལས་ཚན་པ། དྲུང་དཀྱུས། རྩིས་ཕྲུག་པ་བཅས་ཀྱི་ན་བཟའ་ཚོས་མན་ལི་སེར་དང་། དབུ་ཞྭ་ལྕང་མདའ་བཅས་གཟབ་བཞེས་དང་བཅས་ཞོགས་པ་གཙུག་ལག་ཁང་དུ་སྡེབ་འཛོམས་ཐོག་གནས་གཟིགས་ལ་གོ་རིམ་བཞིན་ཕེབས་ཏེ་ཇོ་བོ་རྣམ་གཉིས་དང་། ཐུགས་རྗེ་ཆེན་པོ་གསུམ་སོ་སོར་སྙན་ཤལ་ནང་མཛོད་སྣ་ལྔ་རེ་དང་། དེ་བྱིངས་ཚང་མར་ཨ་ཤེ། ཟུབ་ཕྱི། ཕྱི་མཛོད་བཅས་སྒྲོན་འབུལ། དཀྱིལ་འཁོར་མཐིལ་མཚོ་རྫས་རིན་ཆེན་སྣ་ལྔའི་འཐུམ། གནས་གཟིགས་གྲུབ་སྟེ་སྣང་ཤག་ལས་ཁུངས་ཀྱི་སྒོ་འགྲམ་ཕེབས་སྐབས་མི་དཔོན་གཉིས་དང་། གཉེར་དྲུང་། ཁང་གཉེར་བཅས་ཀྱིས་སྦྲང་བན་ཞུས་ཐོག །ས་དབང་རྣམ་པ་བཞིའི་སྐུ་ཐར་ཉེས་ཅན་བཙོན་པ་མི་བཞི་པུས་མོ་བཙུགས་ནས་གྲལ་བསྒྲིགས་ཏེ་བསྡད་ཡོད་པ་ལ་བཀའ་མགྲོན་དང་། རྩིས་པས་མི་རེར་ཁ་བཏགས་རེ་གཡོག་སྟེ་གློད་བཀྲོལ་གནང་སྲོལ་འདུག །དེ་ནས་ར་མོ་ཆེའི་གནས་གཟིགས་གནང་རྗེས་གླིང་བསྐོར་བརྒྱུད་ནོར་གླིང་ཕོ་བྲང་དུ་བཅར། རྟེན་གཙོར་སྙན་དར་སྒྲོན་འབུལ་མཛད། དྲུང་བཞེས་ཚུགས། ༧གོང་ས་མཆོག་ལ་མཇལ་ཁ་ཞུས། གསོལ་ཇ། བཞེས་འབྲས། དཀར་སྐྱོང་བཞེས་ཞོ། ཕེབས་སྒོ་བཞེས་ཟས་བཅས་ཕེབས། དེ་ནས་དྲུང་བཞེས་གྲོལ། བཀའ་བློན་ཚོ་བདེ་སྐྱིད་གླིང་ཁ་བར་ཡར་མར་ཆིབས་ཐོག་དང་། དེ་ནས་མུ་མཐུད་གླིང་བསྐོར་གྱི་གླང་ཁང་ཟུར་བརྒྱུད་རྩེར་གནས་གཟིགས་དང་། དེ་ནས་ཕྱིར་ཕེབས་ཀླུ་ཁང་ནང་དུ་ཕེབས་འབྱོར་མཚམས་ཀོ་དཔོན་གཉེར་པས་ཕེབས་ཀོ་ཉིས་སྦྲེལ་གཉིས་ཏེ་གཏོང་མི་ཀོ་པ་རྣམས་ཀྱང་རང་ལུགས་གྱོན་ཆས་གཟབ་མཆོར་གྱིས་ཕེབས་སྒུག་ཨང་གསར་ཐོག་ས་དབང་རྣམ་པ་འཁོར་བཅས་ཕེབས་ཀོར་བཞུགས། ཀླུ་ཁང་གི་རྡོ་སྐས་མཚམས་ཞོལ་གཉེར་སེར་སྐྱ་རྣམས་དང་གཉེར་དྲུང་བཅས་ནས་ཞབས་ཞུས་ཀྱི་ཀླུ་ཁང་གཟིམས་ཆུང་དུ་ས་དབང་རྣམ་པ་དང་། བྱིངས་བར་ཁྱམས་འཁོར་ཡུག་ཏུ་བཞུགས་སྒྲིག་སར་གོ་རིམ་བཞིན་འཁོད། ཞོལ་ལས་ཁུངས་ནས་གསོལ་ཇ། འབྲས་བསིལ། ལའི་ཞེས་སྦང་ལུམ་བཙིར་བའི་ཁུ་བ། དགུང་ཚིགས་དཀར་སྐྱོང་རིམ་འབུལ་ཞུས། ལྷ་སའི་ནང་མའི་སྐྱིད་སྡུག་པ་ཚོས་རོལ་ཆ་དང་། གཞས་ཞབས་བྲོ་རྣམ་ཐར་བཅས་གཏོང་མི་དང་། ཀོ་དཔོན་གཉེར་པ། ཞོལ་ནང་བཅས་པར་ལེགས་དར། དངུལ་གྱི་གནང་ཆ་སྩལ་ཏེ་ཕེབས་ཀོར་མཚོ་བསྐོར་གནང་སྒོ་ཟིན་མཚམས་གླིང་བསྐོར་འཕྲོ་སྐྱོང་དུ་ཕེབས། དེ་ཉིན་རྩེ་ཡིག་ཚང་ལས་ཁུངས་ནས་ཀྱང་སྔོན་ཚུད་རྟེན་གཙོ་ཁག་ལ་༧གོང་ས་མཆོག་གི་ཐུགས་སྨོན་སྙན་ཤལ་ཞུ་ལེན་དང་། བྱིན་རྟེན། མཛོད་ཆུང་ཁོངས་ནས་སྤྲང་འགྱེད་བསྡོགས་ལེན་མཁན་དྲུང་བཞི་དང་། ཡིག་ཚང་འཁོར་བཅས་ན་བཟའ་རྒྱུན་ཆས་ཁ་གསར་གཟབ་མཆོར་གྱིས་སྔ་ཆར་རྩེ་ཕོ་བྲང་དུ་ཚང་འཛོམས་ཐོག་འཕགས་མཆོག་ལོ་ཀེ་ཤྭ་རས་གཙོས་རྩེའི་ལྷ་ཁང་ཁག་དང་། གོང་བཞིན་གླིང་བསྐོར་དུ་ཕེབས་ཏེ་ཀླུ་ཁང་། ར་མོ་ཆེ་གཙུག་ལག་ཁང་སོགས་ལ་གནས་གཟིགས། ཡིག་ཚང་ལས་བྱས་གཟིམས་ཆུང་སྐུ་སྒེར་གྱི་སྤྲང་འགྱེད་དང་། བྱིན་རྟེན་བཅས་ངན་སློང་ལ་སྤྲོད་པ་དང་། སྒེར་སོ་སོས་མཆོད་འབུལ་གཟབ་རྒྱས་དང་སྦྱིན་གཏོང་སོགས་བྱེད་བཞིན་ཡོད།
མང་ཚོགས་སེར་སྐྱ་རྣམས་ནས་ཀྱང་སྔ་དྲོ་ཕྱག་མཆོད་སོགས་ཚར་རྗེས་ཇ་ཆང་དང་། ཟ་ཆས་འཁྱེར་ཏེ་ཀླུ་ཁང་དུ་ཀོ་གྲུར་བསྡད་ནས་མཚོ་བསྐོར་དང་། གཞས་རྣམ་ཐར་གཏོང་བས་མཚོན་སྤྲོ་སྐྱིད་གང་ལེགས་གཏོང་སྲོལ་ཡོད་པ་མ་ཟད། རང་རང་འཁོས་འབྱོར་ལ་དཔག་པའི་དཀོན་མཆོག་ལ་མཆོད་པ་དང་། སློང་མོ་བར་སྦྱིན་གཏོང་རྒྱ་གང་ཆེ་བྱེད་སྲོལ་ཡོད་ཅིང་། དགོན་པ་དང་མཆོད་རྟེན་སོགས་ལ་ཕྱག་དང་སྐོར་བ་བྱེད་པ། ཚེ་ཐར་གཏོང་བ། གྲོང་མི་ལྷན་འཛོམས་ཀྱིས་སྨྱུང་གནས་ལ་གནས་པ་དང་། བསྙེན་གནས་ཀྱི་སྡོམ་པ་ལེན་པ། ཆོས་སྐོར་བྱེད་པ། དགོན་པ་ཁག་ཏུ་སེམས་བསྐྱེད་མཆོད་པ་བཟུང་སྟེ་ཡོན་ཆབ་གང་མང་འབུལ་བ་སོགས་ཟླ་བ་འདི་ནི་བོད་མི་ཡོངས་ཀྱིས་དགེ་བ་ལ་བརྩོན་པའི་ཟླ་བ་ཁྱད་པར་ཅན་ཞིག་ཡིན་ནོ།།
བྱང་རྩེ་ཆོས་རྗེ་རིན་པོ་ཆེར་གྱ་སྟོན་བཤམས།
དྲ་འཇུག་པ། རིག་མཛོད་རྩོམ་སྒྲིག་པ།
སེར་བྱེས་གྲྭ་ཚང་གིས་བྱང་རྩེ་ཆོས་རྗེ་རིན་པོ་མཆོག་དགུང་གྲངས་བརྒྱད་ཅུར་ཕེབས་པར་བརྟན་བཞུགས་ཕུལ།
༢༠༡༥ ལོའི་ཕྱི་ཟླ་༥ཚེས་༡༣ སྐུའི་བླ་གཟའ་སྟེ་རེས་གཟའ་ལྷག་པ་འབྱུང་འཕྲོད་དགེ་བའི་ཉིན་དང་བསྟུན། སེར་བྱེས་གཙང་བྱང་རྩེ་ཆོས་རྗེ་རིན་པོ་ཆེ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དགུང་གྲངས་བརྒྱད་ཅུར་ཕེབས་པའི་དགའ་སྟོན་རྟེན་འབྲེལ་དང་། སྐྱབས་རྗེ་མཆོག་སྐུ་ཚེ་ཞབས་པད་ཡུན་དུ་བརྟན་པའི་སླད་དུ། སེར་བྱེས་གྲྭ་ཚང་དུ་བརྟན་བཞུགས་དང་མཆོད་འབུལ་བསྙེན་བཀུར་རྒྱ་ཆེར་ཞུས་སོང་།
དེ་ཡང་ཞོགས་ཀའི་ཆུ་ཚོད་༦:༣༠ སྟེང་གྲྭ་ཚང་གི་རྒྱལ་སྲས་བླ་སྤྲུལ་བཀའ་རབ་འབྱམས་དགེ་བཤེས་དགེ་འདུན་དམངས་དང་བཅས་པ་གྲྭ་ཚང་གི་གཙུག་ལག་ཁང་དུ་འཛོམས་ཏེ། ཐོག་མར་སྐྱབས་རྗེ་མཆོག་ལ་བརྟན་བཞུགས་དང་། དེ་རྗེས་བྱང་རྩེ་ཆོས་རྗེ་རིན་པོ་དབུ་བཞུགས་ཐོག་༧གོང་ས་༧སྐྱབས་མགོན་ཐམས་ཅད་མཁྱེན་པ་མཆོག་གི་སྐུ་ཚེ་ཞབས་པད་བསྐལ་བརྒྱར་བརྟན་པ་དང་། རླབས་ཆེན་གྱི་ཐུགས་ཀྱི་བཞེད་དགོངས་ལྷུན་གྱིས་འགྲུབ་པ་སོགས་ཀྱི་ཆེད་དུ་དམིགས། ཉིན་དེར་ཚོགས་ཐེངས་བཞི་བྱས་ཏེ་རྗེ་རིན་པོ་ཆེའི་གསུང་དྲང་ངེས་ལེགས་བཤད་སྙིང་པོ་དག་སྒྲོག་གསུངས་གནང་སོང་ལ། གོ་སྒྲིག་ཚོགས་ཆུང་ནས་དགེ་འདུན་དམངས་ལ་བསྙེན་བཀུར་གསོལ་ཇ། ཉིན་གུང་བཞེས་ལག །དགོངས་དྲོ་ཞལ་ལག་སོགས་གྲ་སྒྲིག་ཕུན་སུམ་ཚོགས་པ་གནང་འདུག
དགེ་ཚུལ་གྱི་སྡོམ་པ་དང་དབུ་མའི་སྤྱི་དོན་གྱི་བཤད་ལུང་གནང་།
དྲ་འཇུག་པ། རིག་མཛོད་རྩོམ་སྒྲིག་པ།
ཁ་སང་བྱང་རྩེ་ཆོས་རྗེ་རིན་པོ་ཆེས་མི་གྲངས་བརྒྱ་ལྷག་ལ་དགེ་ཚུལ་གྱི་སྡོམ་པ་དང་དེ་རིང་རྗེ་བཙུན་པའི་དབུ་མའི་སྤྱི་དོན་གྱི་བཤད་ལུང་སོགས་གནང་།
ཕྱི་ལོ་༢༠༡༦ལོའི་ཕྱི་ཟླ་༥ཚེས་༡༤དང་བོད་ཟླ་བཞི་པ་ས་ག་ཟླ་བའི་ཚེས་༨ཉིན་༧སྐྱབས་རྗེ་དམ་པ་བྱང་རྩེ་ཆོས་རྗེ་རིན་པོ་ཆེ་རྗེ་བཙུན་བློ་བཟང་བསྟན་འཛིན་མཆོག་གིས་སེར་བྱེས་གཙང་པ་ཁང་ཚན་གྱི་འདུ་ཁང་དུ་ཕུན་ཚོགས་རིན་པོ་ཆེ་གཙོ་བྱས་པའི་མི་གྲངས་བརྒྱ་ལྷག་ལ་དགེ་ཚུལ་གྱི་སྡོམ་པ་གནང་ཞིང་། དེ་རིང་བོད་ཚེས་༩ཉིན་གྱི་སྔ་དྲོར་དོན་གཉེར་ཅན་བརྒྱ་ཕྲག་འགའ་ལ་རྗེ་བཙུན་ཆོས་ཀྱི་རྒྱལ་མཚན་གྱི་དབུ་མའི་སྤྱི་དོན་གྱི་བཤད་ལུང་སོགས་དབུ་འཛུགས་གནང་སོང་།
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༦།༠༥།༡༥ ལ།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་དང་སྦྲེལ་སྣེ་མཉམ་སྦྱར་བྱེད་དགོས།
ཁྲིད་གཞུང་། སྒོམ་རིམ་བར་པ། ལག་ལེན་སོ་བདུན་མ།
དྲ་འཇུག་པ། རིག་མཛོད་རྩོམ་སྒྲིག་པ།སྒྲ་ཨང་། H-ADZZ2030121
སྟོན་པ་འཇིག་རྟེན་དབང་ཕྱུག [གཞུང་ཆེན།] སྤྱིའི་ཨང་། ༣༤༢
རྣམ་པ། MP3 རྣམ་གྲངས། 38 ཆེ་ཆུང་། 470.7 MB
ཁྲིད་གཞུང་། སྒོམ་རིམ་བར་པ་དང་ལག་ལེན་སོ་བདུན་མ།
མཛད་པ་པོ། སློབ་དཔོན་ཀ་མ་ལ་ཤཱི་ལ།
མཛད་པ་པོ། རྒྱལ་སྲས་ཐོགས་མེད་བཟང་པོ། [༡༢༩༥-༡༣༦༩]
འཁྲིད་མཁན། སྟོན་པ་འཇིག་རྟེན་དབང་ཕྱུག
སྒྲ་སྒྲིག་བཟོ་བ། ཐུབ་བསྟན་ཚེ་རིང་།
འགྲེམས་སྤེལ་སྒྲིག་སྦྱོར། སེར་བྱེས་རིག་མཛོད་ཆེན་མོ།
༢༠༡༦ ལོའི་ཟླ་ ༡༠།༠༣ ལ་གསར་སྒྲིག་བྱས།
༢༠༡༩ ལོའི་ཟླ་དགུ་པའི་ཚེས་ཉེར་ལྔ་ལ་བསྐྱར་སྒྲིག་བྱས།
| གདམས་པ་རིན་ཆེན་དང་པོ། ང་ཚོའི་སྤྱོད་པའི་འབྲས་བུ་ནི། ཐད་ཀར་རང་ཉིད་ཁོ་ནར་བརྟེན་ནས་བྱུང་བའི་གནས་སྟངས་ཧ་ཅང་དཀོན་ཏེ། གྲུ་དཔོན་ཞིག་གིས་གྲུ་གཟེངས་ཆར་རླུང་དྲག་པོའི་ཁྲོད་བདེ་འཇགས་ངང་མཚོ་མཐར་སྐྱེལ་ཐུབ་མིན་ཁོ་རང་གི་སྤྱོད་པ་གཅིག་པུར་བརྟེན་པ་ཞིག་མ་རེད། དེ་བས་ནས་ང་ཚོའི་སྤྱོད་པའི་མཇུག་འབྲས་ནི་བྱ་སྤྱོད་ཅིག་དགེ་བ་ཡིན་མིན་ཐག་གཅོད་བྱེད་གཙོ་བོ་མིན། བོད་སྐད་དུ་ཀུན་སློང་ཟེར་བ་དེ་ནི། སྤྱོད་པ་ངེས་ཅན་ཞིག་གི་དགེ་བའི་རིན་ཐང་ཐག་གཅོད་བྱེད་པར་ཤིན་ཏུ་གལ་ཆེན་ཡིན་ཞིང༌། ཐ་སྙད་འདིའི་ངོ་གདོང་གི་དོན་ནི། ཀུན་ཟེར་བ་ཡོངས་སམ་གཏིང་ནས་ཞེས་པའི་དོན་ལ་འཇུག་ཅིང༌། སློང་ཞེས་པ་ཅི་ཞིག་འབྱུང་བར་སྐུལ་བ་དང༌། ཡང་ན་གང་ཞིག་སྐྱེ་བའམ་ལང་དུ་འཇུག་པར་གོ་ཆོག །འོན་ཀྱང༌། སྐབས་བབ་ཀྱི་དོན་ནི་བསམ་བཞིན་དུ་བྱས་པའི་བྱ་སྤྱོད་དང༌། ཕྱོགས་ངེས་ཅན་ཞིག་ནས་བརྗོད་ན། བསམ་བཞིན་དུ་མ་ཡིན་པའི་བྱ་སྤྱོད་ཐམས་ཅད་སྐུལ་སློང་བྱེད་མཁན་ཞིག་ལ་འཇུག་ཕྱིར། ཐ་སྙད་འདིས་མི་ཞིག་གི་བློའི་ངང་ཚུལ་གྱི་སྤྱིའི་རྣམ་པ་ཞིག་མཚོན་ཐུབ་ཅིང༌། ཀུན་སློང་དགེ་བ་ཡིན་དུས་ང་ཚོའི་སྤྱོད་པའང་བླང་དོར་གྱི་རྣམ་གཞག་གི་ངོས་ནས་དགེ་བར་འགྱུར་གྱི་ཡོད། |
དེ་ལས་མང་བ།...
བརྟན་བཞུགས་ཕུལ་སོང་།
དྲ་འཇུག་པ། རིག་མཛོད་རྩོམ་སྒྲིག་པ།
ཁ་སང་སེར་བྱེས་གྲྭ་ཚང་གི་ཆོས་རའི་ནང་དུ་གྲྭ་ཚང་གི་མཁན་རིན་པོ་ཆེ་རྗེ་བཙུན་བློ་བཟང་བདེ་ལེགས་མཆོག་ལ་བརྟན་བཞུགས་ཕུལ་སོང་།
དེ་ཡང་སེར་བྱེས་གྲྭ་ཚང་གི་མཁན་རིན་པོ་ཆེས་སློབ་གཉེར་བ་རྣམས་ལ་གྲྭ་ཚང་གི་ཆོས་རའི་ནང་དུ་བྱང་ཆུབ་ལམ་རིམ་གྱི་བཀའ་ཁྲིད་གནང་སྲོལ་ཡོད་པ་ལྟར་གྲྭ་ཚང་གི་མཁན་རིན་པོ་ཆེ་གོང་མ་དག་གི་སྐབས་ནས་སྲོལ་བཟང་དེའི་རྒྱུན་བསྐྱངས་ཡོད་ལ། ༧སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བདེ་ལེགས་མཆོག་གིས་ཀྱང་ཕྱི་ལོ་༢༠༡༢ལོའི་ཟླ་༥པར་གྲྭ་ཚང་གི་མཁན་རིན་པོ་ཆེའི་མཛད་ཁུར་བསྐྱངས་པ་ནས་བཟུང་སྟེ། ཆོས་ཐོག་གི་སྐབས་རྣམས་སུ་གྲྭ་ཚང་གི་ཆོས་རའི་ནང་དུ་སློབ་གཉེར་བ་རྣམས་ལ་རྗེ་ཙོང་ཁ་པའི་བྱང་ཆུབ་ལམ་རིམ་ཆེན་མོའི་བཀའ་ཁྲིད་གནང་མུས་སུ་ཡོད་པ་དེ་ཕྱི་ལོ་ ༢༠༡༦ ལོའི་ཕྱི་ཟླ་ ༥ ཚེས་ ༡༣ དང་བོད་ཟླ་བཞི་པ་ས་ག་ཟླ་བའི་ཚེས་ ༧ ཉིན་གྱི་སྔ་དྲོར་མཇུག་ལེགས་པར་གྲུབ་པ་དང་། ༧སྐྱབས་རྗེ་མཁན་རིན་པོ་ཆེ་རྗེ་བཙུན་བློ་བཟང་བདེ་ལེགས་མཆོག་གི་མཁན་པོའི་མཛད་ཁུར་གྱི་ལོ་ལྔའི་མཛད་ཡུན་རྫོགས་ཤིང་། མཁན་པོའི་མཛད་ཁུར་གྱི་རིང་གྲྭ་ཚང་རིན་པོ་ཆེ་ཆོས་སྲིད་གཉིས་ཐད་ནས་ལེགས་པར་བསྐྱངས་པའི་བཀའ་དྲིན་གཏང་རག་གི་ཚུལ་དུ། གྲྭ་ཚང་ནས་གྲོས་ཚོགས་སུ་སྙན་སེང་ཞུས་པར་གོ་བསྡུར་གནང་སྟེ་གཏན་འབེབས་བྱུང་དོན་ལྟར། ཕྱི་ལོ་༢༠༡༦ལོའི་ཕྱི་ཟླ་༦ཚེས་༡༩་རེས་གཟའ་ཉི་མའི་སྔ་དྲོའི་ཆུ་ཚོད་༨:༣༠སྟེང་སེར་བྱེས་གྲྭ་ཚང་གི་ཆོས་རའི་ནང་དུ་གྲྭ་ཚང་གི་བླ་སྤྲུལ་དགེ་བཤེས་འདུས་མང་ཡོངས་གཙོ་བྱས་པའི་ཕྱོགས་མཐའ་ཁག་ནས་ཕེབས་པའི་སྐུ་མགྲོན་དང་དད་ལྡན་མང་ཚོགས་གང་མང་ལྷན་འཛོམས་ཀྱིས་གྲྭ་ཚང་གི་མཁན་རིན་པོ་ཆེ་རྗེ་བཙུན་བློ་བཟང་བདེ་ལེགས་མཆོག་ལ་བརྟན་བཞུགས་ཕུལ་སོང་། བརྟན་བཞུགས་ཀྱི་སྔོན་དུ་༧སྐྱབས་རྗེ་མཁན་རིན་པོ་ཆེས་རྟེན་འབྲེལ་ལ་དམིགས་ཏེ་བྱང་ཆུབ་ལམ་རིམ་ཆེན་མོའི་དབུ་ནས་ཆོས་ཐུན་ཞིག་གནང་རྗེས་བརྟན་བཞུགས་དང་ཚོགས་མཆོད་རྒྱས་པ་ཕུལ་བར་མཛད། ༧སྐྱབས་རྗེ་མཁན་རིན་པོ་མཆོག་གི་རྣམ་ཐར་མདོར་བསྡུས་ཤིག་གཤམ་གྱི་སྦྲེལ་སྣེ་བརྒྱུད་གཟིགས་ཐུབ།
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༦།༠༦།༢༠ ལ།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་དང་སྦྲེལ་སྣེ་མཉམ་སྦྱར་བྱེད་དགོས།
མཁན་རབས་དོན་ལྔ་པ་མཁན་ཁྲིར་འཁོད།
དྲ་འཇུག་པ། རིག་མཛོད་རྩོམ་སྒྲིག་པ།
དེ་རིང་སྔ་དྲོར་སེར་བྱེས་དགེ་བཤེས་དགེ་འདུན་ཆོས་འཕེལ་མཆོག་གྲྭ་ཚང་གི་མཁན་ཁྲིར་འཁོད་དེ་མཁན་པོའི་ལས་ཁུར་དངོས་སུ་བཞེས།
དེ་ཡང་སེར་བྱེས་གྲྭ་ཚང་གི་མཁན་རིན་པོ་ཆེ་སྐྱབས་རྗེ་བློ་བཟང་བདེ་ལེགས་མཆོག་གིས་མཁན་པོའི་མཛད་ཁུར་གྱི་ལོ་ལྔའི་མཛད་ཡུན་རྫོགས་ཏེ། དགོངས་པ་ཞུ་འཁྲོལ་བྱུང་བ་དང་། གྲྭ་ཚང་ནས་མཁན་པོའི་འོས་གཞི་རྣམས་དགའ་ལྡན་ཁྲི་རིན་པོ་ཆེ་ལ་ཐུགས་བརྟག་དང་དཔྱད་གཞིར་ཕུལ་བ་དང་། ཁྲི་རིན་པོ་ཆེས་ཕྱི་ལོ་ ༢༠༡༦ ལོའི་ཟླ་ ༥ པའི་ཚེས་ ༩ ཉིན་མཚན་འཁོད་སྙན་ཞུ་དང་མཁན་པོའི་འོས་གཞི་༧གོང་ས་༧སྐྱབས་མགོན་ཆེན་པོ་མཆོག་ལ་སྤྱན་འབུལ་ཞུས་དོན་ལྟར། ཕྱི་ལོ་༢༠༡༦ ལོའི་ཟླ་༥ ཚེས་༢༤ ཉིན་༧གོང་ས་༧སྐྱབས་མགོན་ཆེན་པོ་མཆོག་གིས་ཡེ་ཤེས་དབྱིངས་དཔྱད་ཀྱི་ཕྱག་རྟགས་རིན་པོ་ཆེ་སེར་བྱེས་དགེ་བཤེས་རྒན་དགེ་འདུན་ཆོས་འཕེལ་མཆོག་ལ་སྩལ་གནང་བྱུང་སྟེ། དེ་རིང་སྟེ་ཕྱི་ལོ་ ༢༠༡༦ ལོའི་ཟླ་ ༧ ཚེས་ ༡༨ རེས་གཟའ་ཟླ་བའི་འབྱུང་འཕྲོད་དགེ་བའི་ཉིན་གྱི་ཞོགས་ཀར་སེར་བྱེས་གྲྭ་ཚང་གི་མཁན་ཁྲིར་ཞབས་སོར་འཁོད་དེ་མཁན་པོའི་མཛད་ཁུར་དངོས་སུ་བཞེས། དེ་རྗེས་སྔ་དྲོའི་ཆུ་ཚོད་བརྒྱད་དང་ཕྱེད་ཡོལ་ཙམ་ལ་སྐྱབས་རྗེ་མཁན་རིན་པོ་ཆེ་གྲྭ་ཚང་གི་ཆོས་རར་ཕེབས་ཏེ་སློབ་གཉེར་བ་ཡོངས་ལ་རྗེ་བློ་བཟང་གྲགས་པའི་བྱང་ཆུབ་ལམ་རིམ་ཆེན་མོའི་དབུ་ནས་ཆོས་ཐུན་གཅིག་གསུངས་ཤིང་། ཉིན་གུང་མཁན་རིན་པོ་ཆེ་ཁྲི་འདོན་མངའ་གསོལ་གྱི་མཛད་སྒོ་ཞིག་ཀྱང་ཚོགས་སོང་།
སྐྱབས་རྗེ་མཁན་རིན་པོ་ཆེ་དགེ་འདུན་ཆོས་འཕེལ་མཆོག་ནི། ཕྱི་ལོ་༡༩༤༡ ལོར་བོད་དཀར་མཛེས་སུ་སྐུ་འཁྲུངས། ཕྱི་ལོ་༡༩༤༨ལོར་དཀར་མཛེས་དགོན་དུ་སྒྲིག་ཞུགས་གནང་། དགུང་གྲངས་དགུ་པར་འཁྲུངས་གསར་སྐུ་ཕྲེང་ལྔ་པ་བློ་བཟང་དཔལ་ལྡན་ངག་གི་དབང་ཕྱུག་ལས་དགེ་ཚུལ་གྱི་སྡོམ་པ་བླངས། ཕྱི་ལོ་༡༩༥༥ལོར་སེར་བྱེས་མཁས་སྙན་གྲྭ་ཚང་དུ་སྒྲིག་ཞུགས་ཀྱིས་སེར་བྱེས་མཁན་རབས་རེ་དྲུག་པ་རྗེ་བློ་བཟང་དབང་ཕྱུག་མཆོག་དང། རྗེ་བྱམས་པ་བསྟན་བཟང་གཉིས་དགེ་རྒན་དུ་བསྟེན་ཏེ་གཞུང་ཆེན་ལ་སློབ་གཉེར་གནང་། གཞུང་རྙིང་འཛིན་གྲྭའི་སྐབས་སྦྱོར་ལམ་སྔ་རྒོལ་གྱི་རིགས་ཆུང་ཚོགས་ལངས་གནང། ཕྱི་ལོ་༡༩༥༩དུས་འགྱུར་སྐབས་ཁག་ཐེག་རྒན་དགེ་བཤེས་བསྟན་པ་ཉི་མའི་དབུས་དགེ་སློབ་བཅུ་ཕྲག་གཉིས་ལྷག་དང་ལྷན་དུ་སེར་བྱེས་མཁན་ཟུར་རིན་པོ་ཆེ་རྗེ་བློ་བཟང་དབང་ཕྱུག་མཆོག་གི་ཞབས་ཕྱི་ལ་བཅར་ནས་རྒྱ་གར་འཕགས་པའི་ཡུལ་དུ་ཕེབས་ཏེ་སྦག་ས་ཆོས་སྒར་དུ་གཞུང་ཆེན་སློབ་གཉེར་གྱི་འཕྲོ་བསྐྱངས། ཕྱི་ལོ་༡༩༦༠ལོར་ཡོངས་འཛིན་ཁྲི་བྱང་རིན་པོ་ཆེ་ལས་བསྙེན་པར་རྫོགས། མཁན་ཟུར་རིན་པོ་ཆེ་རྗེ་བློ་བཟང་དབང་ཕྱུག་དཔལ་བཟང་པོ་མཆོག་གི་བཀའ་དགོངས་བཞིན་ཟླ་བ་གསུམ་གྱི་རིང་རྗེའི་དྲང་ངེས་ལེགས་བཤད་སྙིང་པོ་ཐུགས་འཛིན་གནང་སྟེ་ཚར་ཉིས་བརྒྱར་བརྒལ་བ་སྐྱོར་སྦྱང་གནང། རྒན་རྟ་དབྱངས་རྒྱལ་མཚན་ལས་ཀྱང་རྗེ་བཙུན་པའི་ཕར་ཕྱིན་སྤྱི་དོན་སོགས་ཀྱི་དཔེ་ཁྲིད་ཞུ་བ་དང་སེར་བྱེས་མཁན་ཟུར་རིན་པོ་ཆེ་རྗེ་བཙུན་བྱམས་པ་ཐེག་མཆོག་ལས་སུམ་རྟགས་ལ་སྦྱང་བརྩོན་གནང་། ཕྱི་ལོ་༡༩༦༩ལོར་སྐབས་དེའི་བྱེས་ཕེབས་ཀྱི་སེ་རའི་དགེ་འདུན་པ་རྣམས་དང་ལྷན་དུ་རྒྱ་གར་ལྷོ་ཕྱོགས་སྦེལ་ཀོབ་ས་གནས་སུ་གནས་སྤར་བ་དང་དེ་གར་མུ་མཐུད་དེ་སྔར་གྱི་གཞུང་ཆེན་སློབ་གཉེར་གྱི་འཕྲོ་བསྐྱངས་ཤིང་། མཁན་ཟུར་རིན་པོ་ཆེའི་རྗེ་བློ་བཟང་དབང་ཕྱུག་མཆོག་གི་མདུན་ནས་སྔགས་ཀྱི་ས་ལམ་དང། རིམ་ལྔ་གསལ་སྒྲོན། དྲང་ངེས་ལེགས་བཤད་སྙིང་པོ་སོགས་ཀྱི་བཀའ་ཁྲིད་དང། རྟ་མགྲིན་ཡང་གསང་གི་བཀའ་དབང་རྣམས་ཞུ། ཕྱི་ལོ་༡༩༧༨ནས་མཁན་ཟུར་རིན་པོ་ཆེ་རྗེ་བློ་བཟང་དབང་ཕྱུག་མཆོག་གི་བཀའ་དགོངས་བཞིན་གསར་བུ་རྣམས་ལ་བསྡུས་གྲྭ་ནས་བཟུང་སྟེ་རིམ་གྱིས་ཕར་ཚད་དང་དབུ་མ། འདུལ་མཛོད་བཅས་གཞུང་ཆེན་ཁག་གི་དཔེ་ཁྲིད་གནང། ཕྱི་ལོ་༡༩༨༢ལོ་ནས་དགེ་ལྡན་གཙུག་ལག་སློབ་གཉེར་ཁང་ཆེན་མོའི་རྒྱུགས་སྤྲོད་ལ་ལོ་ཤས་ཕེབས། བཀའ་རམས་དང་སློབ་དཔོན་གྱི་ཨང་རིམ་དང་པོ་བཞེས། ༡༩༩༠་ལོར་དགེ་བཤེས་ཀྱི་དམ་འཇོག་མཛད། སྐྱབས་རྗེ་ཆོས་ལྡན་རིན་པོ་ཆེ་ལས་སྔགས་རིམ་ཆེན་མོ་དང་རིམ་ལྔ་གསལ་སྒྲོན། སྙན་ངག་མེ་ལོང་མ་སོགས་ཀྱི་དཔེ་ཁྲིད་ཀྱང་ཞུས། ཕྱི་ལོ་༡༩༩༠ལོར་གྲྭ་ཚང་རིན་པོ་ཆེ་ནས་ཕྱག་རྟགས་སྩལ་བ་བཞིན་མཆོག་སྤྲུལ་བསྟན་འཛིན་འོད་གསལ་རིན་པོ་ཆེའི་ཡོངས་འཛིན་གནང་། ཕྱི་ལོ་༡༩༩༣ ལོར་སེར་བྱེས་གཙུག་ལག་སློབ་གཉེར་ཁང་ཆེན་མོའི་སློབ་གཉེར་དགེ་རྒན་གནང། ༡༠༡༦ ལོ་སྟེ་ད་ལོའི་ཕྱི་ཟླ་ ༧ ཚེས་ ༡༨ ཉིན་༧གོང་ས་༧སྐྱབས་མགོན་ཆེན་པོ་མཆོག་གིས་སེར་བྱེས་མཁན་རིན་པོ་ཆེའི་ཕྱག་རྟགས་སྩལ་བ་ལྟར། སེར་བྱེས་མཁས་སྙན་གྲྭ་ཚང་གི་མཁན་རབས་དོན་ལྔ་པ་རྗེ་བློ་བཟང་བདེ་ལེགས་མཆོག་གི་མཁན་པོའི་ལས་ཡུན་འཁྱོལ་བ་དང་། ཁོང་སེར་བྱེས་གྲྭ་ཚང་གི་མཁན་པོར་བསྐོ་བཞག་གནང་སྟེ་ཁྲི་འདོན་མཛད་ཡོད་པ་རེད། ཡིན་ན་ཡང་ཕྱི་ཟླ་བདུན་པའི་ཚེས་༣༡ཉིན་གྱི་ཞོགས་པའི་ཆུ་ཚོད་ ༩།༠༥ ཙམ་གྱི་སྟེང་རྒྱ་གར་ལྷོ་ཕྱོགས་མེ་སོར་གྲོང་ཁྱེར་ཝིག་རམ་སྨན་ཁང་(Vikram Hospital)དུ་སྐུ་གཤེགས་ཡོད་པ་རེད།
གཞན་ཉེ་སྔོན་གྱི་གནས་ཚུལ་ཞིག་ནི། ༧སྤྱི་ནོར༧གོང་ས་༧སྐྱབས་མགོན་ཆེན་པོ་མཆོག་གིས་དགོན་པའི་ཉེ་འདབས་ཀྱི་བོད་མི་ཉམ་ཐག་རྣམས་ལ་ལྟ་སྐྱོང་དགོས་པའི་བཀའ་སློབ་ལམ་སྟོན་ཕེབས་དོན་ལྟར། ཕྱི་ལོ་༢༠༡༥ ལོའི་ཕྱི་ཟླ་༨ཚེས་༡༩ཉིན་སློབ་ཡོན་གྱིས་དཀའ་ངལ་ཡོད་པའི་སྦེལ་ཀོབ་གཞིས་ཆགས་ཀྱི་ཁུངས། མཐོ་སློབ་འགྲིམ་བཞིན་པ་རྣམས་ལ་རོགས་སྐྱོར་གྱི་སློབ་ཡོན་ཕུལ་ཡོད་པ་དང་། ད་ལོ་ཡང་༧མགོན་པོ་མཆོག་དགུང་གྲངས་༨༡ བཞེས་པའི་སྐུའི་འཁྲུངས་སྐར་གྱི་ཉིན་མོར་སྦེལ་ཀོབ་ལུགས་བདེ་གཉིས་ཀྱི་ཉམ་ཐག་ཁོངས་སུ་ཡོད་པའི་མཐོ་སློབ་འགྲིམ་བཞིན་པའི་གཞོན་སྐྱེས་གྲངས་ ༡༣ དང་བོད་ནས་ཕེབས་པའི་གཞོན་སྐྱེས་ ༢ བཅས་གཞོན་སྐྱེས་ ༡༥ ལ་སློབ་ཡོན་ཕུལ་འདུག
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༦།༠༧།༡༨ ལ།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་དང་སྦྲེལ་སྣེ་མཉམ་སྦྱར་བྱེད་དགོས།
ཁྲིད་གཞུང་། ལམ་རིམ་ཁྲིད་ཆེན་བཅོ་བརྒྱད།[ཆ] དབྱིན་བསྒྱུར།
དྲ་འཇུག་པ། སེར་བྱེས་རིག་མཛོད་ཆེན་མོ། སྒྲ་ཨང་། H-ADLL2030108
སྟོན་པ་འཇིག་རྟེན་དབང་ཕྱུག [ལམ་རིམ།] སྤྱིའི་ཨང་། ༢༦༦
རྣམ་པ། MP3 རྣམ་གྲངས། 12 ཆེ་ཆུང་། 510.2 MB
ཁྲིད་གཞུང་། ཞྭ་དམར་ལམ་རིམ་སོགས།
མཛད་པ་པོ། ཞྭ་དམར་དགེ་འདུན་བསྟན་འཛིན་རྒྱ་མཚོ་སོགས།
འཁྲིད་མཁན། སྟོན་པ་འཇིག་རྟེན་དབང་ཕྱུག
གནས་དུས། ༢༠༡༤ དགའ་བྱང་འདུ་ཁང་། སྐད། དབྱིན་བསྒྱུར། En
སྒྲ་སྒྲིག་བཟོ་བ། ཐུབ་བསྟན་ཚེ་རིང་།
འགྲེམས་སྤེལ་སྒྲིག་སྦྱོར། སེར་བྱེས་རིག་མཛོད་ཆེན་མོ།
༢༠༡༥ ལོའི་ཟླ་ ༠༨།༠༦ ལ་གསར་སྒྲིག་བྱས།
༢༠༡༩ ལོའི་ཟླ་དགུ་པའི་ཚེས་ཉེར་ལྔ་ལ་བསྐྱར་སྒྲིག་བྱས།
| གདམས་པ་རིན་ཆེན་དང་པོ། ཕྱོགས་གཅིག་ནས་མའོ་ཙེ་ཏུང་དང་ཧེ་ཊི་ལིར་ལ་བསམ་བློ་ཐོངས། ཕྱོགས་གཞན་ཞིག་ནས་རྗེ་བཙུན་མི་ལ་རས་པ་དང་རྗེ་ཙོང་ཁ་པ་ལྟ་བུའི་འུ་ཅག་གི་དམ་པ་གོང་མ་རྣམས་ལ་བསམ་བློ་ཐོངས་དང་། ཁོ་ཚོ་ཚང་མ་ཚེ་སྲོག་དང་རྣམ་དཔྱོད་ལྡན་པའི་འགྲོ་བ་མི་ཡིན་པའི་ཆ་ནས་གཅིག་པ་རེད་དེ། མའོ་ཙེ་ཏུང་དང་ཧེ་ཊི་ལིར་ལྟ་བུའི་མི་ནི་དེང་སྐབས་མཐོང་ཆུང་གི་ཡུལ་དུ་གྱུར་ཡོད་ལ། ཁོ་ཚོའི་གཏོས་ཆེ་བའི་བྱ་སྤྱོད་ངན་པ་རྣམས་ཧ་ལས་པའི་ཡུལ་དུ་གྱུར་ཡོད། འོན་ཀྱང་། མི་ཚོས་བོད་ཀྱི་རྣལ་འབྱོར་པ་ཆེན་པོ་རྗེ་བཙུན་མི་ལ་རས་པ་དང་། རྗེ་ཙོང་ཁ་པའི་སྐོར་ལ་བསམ་བློ་གཏོང་སྐབས། རང་ལ་ཁོང་རྣམ་པས་སྐུལ་ལྕག་ཐེབས་པའི་རེ་བ་བྱེད་པ་དང་། དེ་དག་ལ་དད་མོས་ཀྱིས་སྐྱབས་སུ་འགྲོ། ཁོ་ཚོར་འགྲོ་བ་མིའི་ནུས་སྟོབས་གཅིག་མཚུངས་སུ་ཡོད་ཀྱང་། ཁོ་ཚོའི་བྱ་སྤྱོད་ལ་བརྟེན་ནས་ང་ཚོས་དེ་དག་ལ་ལྟ་སྟངས་མི་འདྲ་བ་འཛིན་གྱི་ཡོད། མའོ་ཙེ་ཏུང་དང་ཧེ་ཊི་ལིར་གཉིས་ཀྱི་གནས་སྟངས་ལ་མཚོན་ན། འགྲོ་བ་མིའི་རྣམ་དཔྱོད་དེ་གཏོར་བཤིག་གི་ཆེད་དུ་བཀོལ་ཞིང་། རྗེ་མི་ལ་རས་པ་དང་རྗེ་ཙོང་ཁ་པ་གཉིས་ཀྱི་གནས་སྟངས་ལ་མཚོན་ན། འགྲོ་བ་མིའི་རྣམ་དཔྱོད་དེ་ཕན་ནུས་ལྡན་པར་བཀོལ་སྤྱོད་གནང་ཡོད། |
| {ཁྲིད་གཞུང་། ཞྭ་དམར་ལམ་རིམ་དང་། ཞྭ་དམར་ལྷག་མཐོང་ཆེན་མོའི་དཀའ་འགྲེལ། མཛད་པ་པོ། ཞྭ་དམར་དགེ་འདུན་བསྟན་འཛིན་རྒྱ་མཚོ། [༡༨༥༢-༡༩༡༢] ཁྲིད་གཞུང་། ལམ་རིམ་རྣམ་གྲོལ་ལག་བཅིངས། མཛད་པ་པོ། ཡོངས་འཛིན་ཁྲི་བྱང་རིན་པོ་ཆེ་སྐུ་གོང་མ། [༡༩༠༡-༡༩༨༢] } |
རྒྱུད་སྨད་བླ་མ་དབུ་མཛད་ཁྲི་འདོན་གནང་།
དྲ་འཇུག་པ། རིག་མཛོད་རྩོམ་སྒྲིག་པ།
སེར་བྱེས་དགེ་བཤེས་བློ་བཟང་དབང་འདུས་རྒྱུད་སྨད་བླ་མ་དབུ་མཛད་དུ་ཁྲི་འདོན་གནང་།
ཁ་ཉིན་རེས་གཟའ་བཀྲ་ཤིས་ཏེ་ཕྱི་ལོ་ ༢༠༡༦ ལོའི་ཟླ་ ༩ ཚེས་ ༦ ཉིན་སེར་བྱེས་དགེ་བཤེས་བློ་བཟང་དབང་འདུས་མཆོག་དཔལ་ལྡན་སྨད་རྒྱུད་གྲྭ་ཚང་གི་བླ་མ་དབུ་མཛད་ཀྱི་བཞུགས་ཁྲིར་མངའ་གསོལ་དང་། ཉིན་དེར་ཕྱོགས་མཐའ་ཁག་ནས་ཕེབས་པའི་ཚོགས་སྡེ་ཁག་གི་སྐུ་ཚབ་དང་། ཁོང་གི་སློབ་བུ་རྣམས་ཀྱིས་གཙོ་བྱས་སྐྱ་སེར་གང་མང་ཕེབས་ཏེ་བཀྲ་ཤིས་རྟེན་འབྲེལ་གྱི་དཀར་གཙང་གི་ཁ་བཏགས་ཕུལ་བ་སོགས་ཀྱིས་ཁྲི་འདོན་གྱི་མཛད་སྒོ་ཚོགས་ཡོད་འདུག
སེར་བྱེས་དགེ་བཤེས་བློ་བཟང་དབང་འདུས་ནི། བོད་དུ་སྐུ་འཁྲུངས་ཤིང་། འཕགས་ཡུལ་དུ་ཕེབས་ཏེ། སེར་བྱེས་གྲྭ་ཚང་དུ་ཆོས་ཞུགས་ཀྱིས་གཞུང་ཆེན་སློབ་གཉེར་དང་། དགེ་བཤེས་ལྷ་རམས་པའི་དམ་འཇོག་གྲྭ་སྐོར་གནང་། གྲྭ་ཚང་གི་སློབ་གཉེར་དགེ་རྒན་དང་། གྲྭ་ཚང་གི་དགེ་བསྐོས་གནང་ཞིང་། རྒྱུན་དུ་སློབ་གཉེར་བ་རྣམས་གཙོ་བྱས་ཏེ་ཕྱི་ནང་གི་དོན་གཉེར་ཅན་གང་མང་ལ་དཔེ་ཁྲིད་སོགས་གནང་མུར་ཕྱི་ལོ་༢༠༡༦ ལོའི་ཟླ་༨ ཚེས་ ༡༧ དཔལ་ལྡན་སྨད་རྒྱུད་གྲྭ་ཚང་གི་བླ་མ་དབུ་མཛད་ཀྱི་ཕྱག་རྟགས་ཕེབས་འབྱོར་བྱུང་བ་ལྟར། ཕྱི་ཟླ་ ༩ ཚེས་ ༦ ཉིན་དཔལ་ལྡན་སྨད་རྒྱུད་གྲྭ་ཚང་དུ་བླ་མ་དབུ་མཛད་ཀྱི་མཛད་ཁུར་དངོས་སུ་བཞེས། [རྩོམ་སྒྲིག་པའི་ལག་ཏུ་རྣམ་ཐར་རྒྱས་པ་མ་བྱུང་བས་གང་ཤེས་འདི་ཙམ་ལས་འབྲི་ཐབས་མ་བྱུང་ཡང་རྗེས་སུ་ཁ་གསབ་བྱེད་ངེས།]
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༦།༠༩།༠༨ ལ།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་དང་སྦྲེལ་སྣེ་མཉམ་སྦྱར་བྱེད་དགོས།
