སེར་བྱེས་མཁས་སྙན་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོ་བཞི་ལས་རྩོད་རྒྱུགས་ལེན་འགོ་ཚུགས།

དེ་རིང་ཕྱི་ལོ་ ༢༠༡༥ལོའི་ཟླ་ ༡༠ ཚེས་ ༡༩ ཉིན་ནས་སེར་བྱེས་སློབ་གཉེར་ཁང་ངམ་རྒྱུགས་ཞིབ་ལྷན་ཚོགས་ཀྱི་བཀོད་སྒྲིག་དང་སྟངས་འཛིན་གྱི་འོག་ཏུ། སེར་བྱེས་མཁས་སྙན་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོ་བཞིའི་ནང་ཚན་རྩོད་རྒྱུགས་ལེན་འགོ་ཚུགས། དེ་ཡང་སེར་བྱེས་གྲྭ་ཚང་གི་སློབ་གཉེར་བ་རྣམས་ལ་ལོ་གཅིག་ལ་རྒྱུགས་སྤྲོད་ཆེན་མོ་བཞི་དང་། དམིགས་བསལ་བློ་རྒྱུགས། བློ་རྒྱུགས་ཆེན་མོ་སོགས་ཡོད་ཅིང་། དེ་དག་སེར་བྱེས་སློབ་གཉེར་ཁང་ངམ་རྒྱུགས་ཞིབ་ལྷན་ཚོགས་ཀྱི་སྟངས་འཛིན་འོག་ཏུ། རྒྱུགས་སྤྲོད་སོ་སོར་ལོ་རེར་དུས་ཚེས་གཅིག་དུ་གཏན་འབེབས་བྱས་ཡོད་པ་ལྟར་འགྲོ་བཞིན་ཡོད། རྒྱུགས་སྤྲོད་ཀྱི་དུས་ཚེས་དང་སློབ་ཚན་སོགས་འཕྲིན་གསར་སྔོན་མའི་ནང་དུ་བཀོད་པ་ལྟར་ཡིན་ཞིང་། རྩོད་རྒྱུགས་ཆེན་མོའི་སྐབས་སུ་ཕྱོགས་སོ་སོ་ནས་སྡེ་ཚན་དགུ་དང་། འཛིན་གྲྭ་གཉིས་གསུམ་རེ་མཉམ་དུ་བསྡོམས་ཏེ་སྡེ་ཚན་རེ་རེར་སློབ་གཉེར་བ་བརྒྱ་ཕྲག་ཁ་ཤས་ལ་རྒྱུགས་ཞིབ་པ་དགེ་བཤེས་དང་། ལྷ་རམས་པ་ལྔ་རེའི་ལྟ་རྟོགས་དང་སྟངས་འཛིན་གྱི་འོག་ཏུ་རྩོད་རྒྱུགས་ལེན་བཞིན་ཡོད། མཁན་རིན་པོ་ཆེ་དང་དབུ་ཆོས་རྣམ་གཉིས། སློབ་གཉེར་རྒན་རྣམ་པ་བཅས་ཀྱིས་སྤྱི་ཡོངས་ལ་ལྟ་རྟོགས་དང་སྟངས་འཛིན་བྱེད་ཀྱིན་ཡོད་ལ། སློབ་གཉེར་བ་རེ་རེས་རྟགས་གསལ་དང་། ལན་འདེབས་གཉིས་ཀའི་སྟེང་ནས་རྒྱུགས་འབུལ་ཞུ་དགོས་པ་ཡིན། དྲི་བ་རེ་རེ་ཡིག་སྐོགས་རེ་ནང་དུ་བཅུག་ཡོད་པས་གསང་བ་ཡིན་ཞིང་། སོ་སོས་གང་བླངས་པའི་ཡིག་ཤུབས་ཀྱི་ནང་དུ་ཡོད་པའི་དྲི་བའི་སྟེང་ནས་རྟགས་གསལ་གཏོང་དགོས་པ་ལས་འབྲེལ་མེད་ཀྱི་གཞུང་གཞན་བཏང་མི་ཆོག་པ་ཡིན། རྩོད་རྒྱུགས་དང་ལན་འདེབས་རེ་རེར་རྩ་བའི་བརྒྱ་ཆ་ལྔ་བཅུ་རེ་ཡོད། རྩོད་རྒྱུགས་ནི་སློབ་གཉེར་བ་རྣམས་ལ་མཚོན་ན་རྒྱུགས་སྤྲོད་ཀྱི་ཁོངས་ནས་གཟབ་དགོས་ས་དང་ཞེད་ས་དེ་ཡིན། རྒྱུ་མཚན་ནི་རྒྱུགས་ཞིབ་པའི་ཁོངས་སུ་སོ་སོའི་དཔེ་ཁྲིད་ཀྱི་དགེ་རྒན་ཡོད་ལ། མི་བརྒྱ་ཕྲག་མང་པོའི་གྲས་ནས་གཅིག་པུ་ཡར་ལངས་ཏེ་རྟགས་གསལ་དང་ལེན་འདེབས་བྱེད་དགོས་པའི་སྤོབས་པ་ཆུང་བའི་ཁྲོད་ནས་འདར་སིག་བྱེད་མཁན་ཡང་འོང་གི་ཡོད།

 

སེར་བྱེས་སློབ་གཉེར་ཁང་གི་གོ་སྒྲིག་འོག་དབུ་རྙིང་འཛིན་གྲྭའི་སློབ་གཉེར་བ་ཁ་ཤས་འདེམས་སྒྲུག་གིས་དགེ་འདུན་འདུས་པའི་དབུས་སུ་རྗེའི་དགོངས་པ་རབ་གསལ་ལས་དཀའ་གནད་སྐོར་ཞིག་ལ་བགྲོ་གླེང་གནང་སོང་།
དེ་ཡང་༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུར་ཕེབས་པའི་བཀའ་དྲིན་རྗེས་དྲན་གྱི་ཆེད་དུ། སེར་བྱེས་གྲྭ་ཚང་གི་ཆོས་རའི་ཐོག་ཁའི་ལྷུན་གྲུབ་ཁང་གསར་དུ། སེར་བྱེས་སློབ་གཉེར་ཁང་ངམ་སེར་བྱེས་རྒྱུགས་ཞིབ་ལྷན་ཚོགས་ཀྱིས་བཀོད་སྒྲིག་བྱས་ཏེ། དབུ་རྙིང་འཛིན་གྲྭའི་སློབ་གཉེར་བའི་གྲས་ནས་སློབ་གཉེར་བ་ཁ་ཤས་འདེམས་སྒྲུག་གིས། གྲྭ་ཚང་གི་དབུ་མ་འཛིན་གྲྭ་བཞི་གཙོ་བྱས་པའི་དགེ་འདུན་འདུས་པ་རྒྱ་མཚོའི་དབུས་སུ། ཕྱི་ལོ་ ༢༠༡༥ ལོའི་ཟླ་ ༩ པའི་ཚེས་ ༩ ཡི་སྔ་ཕྱིའི་དྲོ་གཉིས་དང་། ཚེས་ ༡༠ ཡི་ཉིན་རྒྱབ། དགོང་དྲོའི་ཆུ་ཚོད་ ༦ པ་ནས་དགུ་པའི་བར་བཅས་ཚོགས་ཐུན་བཞི་ཡི་ཚོགས་ཐེངས་རེའི་ཆུ་ཚོད་གསུམ་རེར། རྗེ་བླ་མའི་དགོངས་པ་རབ་གསལ་ལས་བརྗོད་གཞི་དྲུག་ལ་དགག་སྒྲུབ་ཕྱོགས་གཉིས་ཀྱི་འཆད་མཁན་རྣམ་པས་སོ་སོའི་རྩོམ་ཤོག་སྒྲོགས་སྦྱང་དང་། ཕན་ཚུན་དྲི་བ་དྲི་ལན། འདུས་དམངས་ཀྱི་ནང་ནས་དྲི་བ་བཏོན་པར་ལན་འདེབས་གནང་བ་སོགས་དུས་བསྟུན་གྱི་བགྲོ་གླེང་གི་རྣམ་པ་གསར་པ་ཞིག་གི་སྟེང་ནས་ཚོགས་སོང་།
ལས་རིམ་གསལ་བསྒྲགས་སུ་བཀོད་པ་ལྟར་ན། བརྗོད་གཞི་དྲུག་ནི།
བདག་མེད་རྫོགས་པར་སྟོན་མི་སྟོན་དང་སྒོམ་མི་སྒོམ་གྱི་ཁྱད་པར།  ལྟ་བ་ངེས་པ་ལ་དགག་བྱ་ངོས་འཛིན་སྔོན་དུ་འགྲོ་དགོས་མིན་གྱི་ཁྱད་པར།  ཞིག་པ་དངོས་པོ་ཡིན་མིན་དང་ཀུན་གཞི་བཞེད་མི་བཞེད་ཀྱི་ཁྱད་པར།  ཐལ་རང་ལ་ལྟ་བ་མཐོ་དམན་དང་རང་བཞིན་ཡོད་མེད་ཀྱི་ཁྱད་པར།  ཕུང་པོ་གང་ཟག་གི་བདག་གཞིར་དང་ཐ་སྙད་ཚད་གྲུབ་འཐད་མིན་གྱི་ཁྱད་པར།  ཤེེས་པར་གྱུར་པའི་ཤེས་སྒྲིབ་ཡོད་མེད་དང་ཤེས་སྒྲིབ་སྐོར་དགུར་ཕྱེ་ནས་སྤོང་མིན་གྱི་ཁྱད་པར།  བཅས་ཡིན་འདུག