དྲ་ཐོག་འཇུག་དུས། 2015 ལོའི་ཟླ་བ། Sep ཚེས། 03 རེས་གཟའ། Thu

སློབ་གཉེར་བའི་རྒྱུགས་སྤྲོད་དབུ་བཙུགས།

དྲ་འཇུག་པ།
ཚད་གཞི།
(0 འོས་འཕེན།)

སེར་བྱེས་མཁས་སྙན་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོ་བཞི་ལས་བློ་རྒྱུགས་དང་ཟུར་སྦྱོང་གི་རྒྱུགས་སྤྲོད་ལེན་འགོ་ཚུགས།
དེ་རིང་ཕྱི་ལོ་ ༢༠༡༥ལོའི་ཟླ་ ༩ ཚེས་ ༣ ཉིན་ནས་སེར་བྱེས་སློབ་གཉེར་ཁང་ངམ་རྒྱུགས་ཞིབ་ལྷན་ཚོགས་ཀྱི་བཀོད་སྒྲིག་དང་སྟངས་འཛིན་གྱི་འོག་ཏུ། སེར་བྱེས་མཁས་སྙན་གྲྭ་ཚང་གི་ལོ་འཁོར་རྒྱུགས་སྤྲོད་ཆེན་མོ་བཞིའི་ནང་ཚན་བློ་རྒྱུགས་དང་ཟུར་སྦྱོང་སྟེ་རིག་གནས་དང་ཆོས་འབྱུང་སོགས་ཀྱི་རྒྱུགས་སྤྲོད་ལེན་འགོ་ཚུགས། དེ་ཡང་སེར་བྱེས་གྲྭ་ཚང་གི་སློབ་གཉེར་བ་རྣམས་ལ་ལོ་གཅིག་ལ་རྒྱུགས་སྤྲོད་ཆེན་མོ་བཞི་དང་། དམིགས་བསལ་བློ་རྒྱུགས། བློ་རྒྱུགས་ཆེན་མོ་སོགས་ཡོད་ཅིང་། དེ་དག་སེར་བྱེས་སློབ་གཉེར་ཁང་ངམ་རྒྱུགས་ཞིབ་ལྷན་ཚོགས་ཀྱི་སྟངས་འཛིན་འོག་ཏུ། རྒྱུགས་སྤྲོད་སོ་སོར་ལོ་རེར་དུས་ཚེས་གཅིག་དུ་གཏན་འབེབས་བྱས་ཡོད་པ་ལྟར་འགྲོ་བཞིན་ཡོད། བློ་རྒྱུགས་ཆེན་མོ། བོད་ཟླ་ ༧ ཚེས ༡༧ ། ཟུར་སྦྱོང་སློབ་ཚན། བོད་ཟླ་ ༧ ཚེས ༢༡ ། དེ་དང་ལྷན་དུ་རང་ཁོངས་སོ་སོའི་སློབ་ཚན་ཐེ་བའི་བློ་རྒྱུགས་དང་། དམིགས་བསལ་བློ་རྒྱུགས་ཀྱང་ལེན། རྩོད་རྒྱུགས། བོད་ཟླ་ ༩ ཚེས ༥། བྲིས་རྒྱུགས། བོད་ཟླ་ ༡༢ ཚེས ༥།

སེར་བྱེས་མཁས་སྙན་གྲྭ་ཚང་གི་འཛིན་གྲྭ་སོ་སོའི་སློབ་གཉེར་བའི་གྲངས་དང་། འཛིན་གྲྭ་སོ་སོའི་ལོ་གཅིག་གི་རྩོད་གཞུང་དང་སློབ་ཚན། ལོ་འཁོར་རྒྱུགས་སྤྲོད་ཁག་གི་སློབ་ཚན་བཅས་ཀྱི་རེའུ་མིག

subjects serajeymonastery 00 th  subjects serajeymonastery 01 th

ལོ་རེའི་འཇང་དགུན་ཆོས་ཟླ་གཅིག་ལ་གདན་ས་གསུམ་དང་བཀྲ་ཤིས་ལྷུན་པོ་སོགས་མཉམ་དུ་ཚད་མ་རྣམ་འགྲེལ་ལ་བགྲོ་གླེང་དང་། དེའི་སྔོན་དུ་གྲྭ་ཚང་རང་དུ་ཟླ་གཅིག་ལ་རྣམ་འགྲེལ་ཆོས་ཐོག །ད་དུང་ཚན་རིག་གི་རྒྱུགས་སྤྲོད་ཀྱང་ཡོད།
ཆོས་ཐོག་གི་སྐབས་སུ་རྩོད་པ་གཙོ་བོ་དང་། ཆོས་མཚམས་སུ་བློ་འཛིན་དང་དཔེ་ཁྲིད། དཔེ་གཟིགས་གཙོ་བོར་གནང་བ་དང་། ཆོས་རར་ཕེབས་པའི་ཉིན་གྲངས་བརྒྱ་ཆར་བཀུག་སྟེ། ཐོ་གྲངས་བརྒྱ་ཆ་མ་ལོན་ཚེ་རྒྱུགས་སྤྲོད་ལ་ཕེབས་མི་ཆོག་པ་དང་། རྒྱུགས་སྤྲོད་ཀྱི་རིམ་པ་གང་རུང་ཞིག་ལ་ཕེབས་མ་ཐུབ་ན་འཛིན་གྲྭ་རང་འཇགས་སྡོད་པ་ལས་འཕར་ཐུབ་ཀྱི་མེད། ལོ་རེར་སྐབས་སུ་གང་བབ་ཀྱི་གཞུང་ལས་དཔེ་རིང་ལྡེབས་༢༥ ངེས་པར་དུ་བློ་རྒྱུགས་སྤྲོད་དགོས། དམིགས་བསལ་བློ་རྒྱུགས་ནི། སློབ་གཉེར་བའི་གྲས་ནས་བཀའ་པོད་ལྔའི་རྩ་བ་སོགས་གཞུང་ཆེན་རིལ་པོ་བློ་འཛིན་བྱས་ཏེ་རྒྱུགས་འབུལ་ཞུ་བ་ལ་ཟེར།
སེར་བྱེས་སློབ་གཉེར་ཁང་ནི། ༡༩༧༣ ལོར་གསར་དུ་དབུ་བརྙེས་པ་ཞིག་ཡིན། གྲྭ་ཚང་འདིའི་སྔོན་འགྲོའི་བསྡུས་ཆུང་འཛིན་གྲྭ་ནས་བཟུང་སྟེ། ཆོས་རར་འགྲིམ་བཞིན་པའི་སློབ་གཉེར་བ་རྣམས་ཆོས་རར་ཕེབས་རིམ་བཞིན་ཐོ་བཤེར་གཏོང་བ་དང་། ཆད་ཐོ་ལྟར་ཉེས་ཆད་ལྷོད་ཡངས་སུ་མ་ཤོར་བར་བྱེད་པ་དང་། ལོ་འཁོར་རྒྱུགས་སྤྲོད་ཁག་གི་སྔ་ཕྱི་བར་གསུམ་གྱི་ལས་རིམ་ལ་རྐང་འགན་བཞེས་ཏེ། སློབ་ཚན་ཚང་མའི་བརྒྱ་ཆའི་ཨང་ཐོ་ཕྱོགས་བསྡོམས་གཞིར་བཟུང་གཟེངས་རྟགས་དང་། བཀའ་པོད་ལྔ་སོ་སོའི་འཛིན་གྲྭ་ཐོན་རིམ་བཞིན་ཕྱག་འཁྱེར་འབུལ་སྤྲོད་སོགས་ཀྱིས་མཚོན། སློབ་གཉེར་ཚགས་ཚུད་ཡར་རྒྱས་གཏོང་ཐབས་སུ་ཤེས་ཡོན་དང་སྤྱོད་པ་གཉིས་ཀར་ལྟ་རྟོག་དོ་དམ་བྱས་ཏེ། སློབ་གཉེར་བའི་སྤུས་ཚད་ཇེ་ལེགས་སུ་གཏོང་ཐབས། སློབ་གཉེར་བའི་རྒྱུགས་སྤྲོད་ཀྱི་ཨང་དང་ལོ་རྒྱུས་རགས་བསྡུས་ཉར་ཚགས་དང་། བཟང་ངན་ཤན་འབྱེད་ཀྱིས་བཟང་པོར་རྟིང་སྐུལ་དང་། སློབ་གཉེར་བ་བཟང་གྲས་རྣམས་འཇང་དགུན་ཆོས་སོགས་དང་། དགེ་ལུགས་རྒྱུགས་སྤྲོད་དུ་གཏོང་བ་སོགས་ཀྱི་སྡེ་ཚན་གལ་ཆེན་ཞིག་ཡིན་ཞིང་། ལས་བྱེད་རྣམས་ནི་ལྷ་རམས་དགེ་བཤེས་ཐོན་པ་ཤ་སྟག་དང་། སྐབས་སོ་སོར་གྲྭ་ཚང་ཚོགས་མང་ནས་འོས་ཤོག་བླུགས་ཏེ་རྩེ་བཏོག་གིས་བསྐོ་འཇོག་བྱེད་བཞིན་ཡོད། སྐབས་དང་པོར། ཏྲེ་དགེ་བཤེས་བློ་བཟང་ཐུབ་བསྟན། ༼མཁན་ཟུར་བཀའ་འགྱུར་བ།༽ བྱ་དགེ་བཤེས་བཀྲ་ཤིས་འབུམ་གཉིས་ནས་འགན་རྐང་བཞེས་ཤིང་། སྐབས་བརྒྱད་པའི་སློབ་གཉེར་རྒན་བྲ་དགེ་བཤེས་བློ་བཟང་ཆོས་དར་དང་། ལྭ་དགེ་བཤེས་ཚུལ་ཁྲིམས་ཆོས་འཕེལ་གཉིས་ཀྱི་སྐབས་སུ་གྲྭ་ཚང་གི་གཙུག་ལག་ཁང་གི་འོག་ད་ལྟའི་ལས་ཁུངས་ཡོད་ས་དེར་ལས་ཁུངས་གསར་འཛུགས་བྱས་ཏེ། ཡར་རྒྱས་དང་ཚགས་ཚུད་བྱུང་བ་ཡིན་ལ། གྲྭ་ཚང་གི་ཆོས་རའི་ནང་གི་ཤིང་སྡོང་ཚང་མ་ཡང་སྐབས་དེར་རྒན་རྣམ་པ་གཉིས་རང་ཉིད་ཀྱིས་ལག་དངོས་སུ་འགུལ་ཏེ། ཚ་གདུང་ལ་མ་འཛེམས་པར་གསར་དུ་བཙུགས་པ་ཡིན།

ཤོག་ངོས་འདི་ལ་ཐེངས་ 1716 གཟིགས་འདུག མཐའ་མའི་བསྐྱར་བཅོས། 2018 ལོའི་ཟླ་བ། Aug ཚེས། 19 རེས་གཟའ། Sun
རིག་མཛོད་རྩོམ་སྒྲིག་པ།

དུས་རབས་ཉེར་གཅིག་པ་བརྡ་འཕྲིན་གྱི་དུས་རབས་འདིར་འོད་རླབས་ཀྱི་འགྲོས་དང་འགྲོགས་ཏེ། ཚན་རྩལ་གྱི་ཤེས་རིག་རབ་ཏུ་དར་བས། མི་རྣམས་ཀྱིས་རང་རིགས་ཀྱི་རིག་གཞུང་དང་ཤེས་རིག་དག་ཀྱང་བརྡ་འཕྲིན་གྱི་ལམ་དུ་སྐྱེལ་ཏེ་སྲུང་སྐྱོབ་དང་། འཕེལ་རྒྱས། དར་སྤེལ་ལ་རེམ་བཞིན་པའི་སྐབས་འདིར། རང་རེའི་གངས་ཅན་པའི་ཆོས་དང་རིག་གཞུང་དག །ཟླུམ་གཟུགས་ཀྱི་གོ་ལ་འདིར་ཡུན་རིང་གནས་པ་དང་། འཕྲིན་ལས་ཀྱི་འཇུག་པ་རླབས་རྡུལ་གྱི་འགྲོས་དང་མཉམ་པ་ཡོང་སླད། འདི་ག་སེར་བྱེས་གྲྭ་ཚང་ནས་ཀྱང་འཕྲུལ་དེབ་དང་། སློབ་ཁྲིད་སྐོར་གྱི་སྒྲ་མཛོད། བརྙན་མཛོད་བཅས་ལས་གྲུབ་པའི་རིག་མཛོད་ཀྱི་དྲ་ཚིགས་འདི་སྒོ་འབྱེད་བྱས་པ་ལགས་ན། གངས་ཅན་པའི་ཆོས་དང་རིག་གཞུང་ལ་མོས་པའི་རིས་མེད་སྐྱེ་བོ་རྣམས་ཀྱིས་ཐུགས་འདོད་ལྟར་ལོངས་སྤྱོད་རྒྱུ་དང་། བསམ་ཚུལ་སོགས་གང་ཡོད་འཛེམ་མེད་དུ་གནང་བ་དང་། གསུང་རབ་ཀྱི་གླེགས་བམ་དག་གཙོ་བྱས་པའི་འཕྲུལ་དེབ་གང་མང་རིན་མེད་དུ་འགྲེམས་སྤེལ་བྱེད་ཀྱིན་ཡོད་པ་དག་སྟབས་བདེའི་རང་བཞིན་ཅན་གྱི་གློག་ཀླད་དང་ལག་ཐོག་ཁ་པར་ཆེ་ཆུང་(Laptop, iPad, iPod iPhone & Android) གང་ཡིན་ཐོག་ཏུ་རང་རང་གི་ཐུགས་འདོད་ལྟར་ཕབ་ལེན་དང་གསན་གཟིགས་གནང་རོགས། 

དྲ་ཚིགས།: www.serajeyrigzodchenmo.org  ཡིག་འབྲེལ་དྲ་བྱང་། serajeyrigzodchenmo@gmail.com