-
མདུན་ངོས།
- འཕྲིན་གསར།
འཕྲིན་གསར། (133)
འཇང་དགུན་ཆོས་འཚོགས།
དྲ་འཇུག་པ། རིག་མཛོད་རྩོམ་སྒྲིག་པ།
སེ་ར་ཐེག་པ་ཆེན་པོའི་གླིང་དུ་དགེ་ལྡན་པའི་འཇང་དགུན་ཆོས་ཐེངས་ཉེར་དགུ་པ་དབུ་འཛུགས་གནང་སོང་།
དེ་རིང་སྟེ་བོད་རྒྱལ་ལོ་༢༡༤༥ལོའི་བོད་ཟླ་༡༠པའི་ཚེས་༡༦དང་ཕྱི་ལོ་༢༠༡༨ལོའི་ཟླ་༡༡པའི་ཚེས་༢༤རེས་གཟའ་སྤེན་པའི་ཉིན་སྔ་དྲོའི་ཆུ་ཚོད་བརྒྱད་པར། ཕྱོགས་མཐའ་ཁག་ནས་འཇང་དགུན་ཆོས་ཀྱི་ཆེད་སེ་ར་ཆོས་སྒར་དུ་ཕེབས་པའི་སློབ་གཉེར་བ་རྣམས་སེ་ར་ཐེག་པ་ཆེན་པོའི་གླིང་གི་གཙུག་ལག་ཁང་དུ་འཛོམས་ཏེ། གྲྭ་ཚང་གཉིས་ཀྱི་༧སྐྱབས་རྗེ་མཁན་རིན་པོ་ཆེ་རྣམ་པ་གཉིས་སོགས་ཀྱིས་ལམ་སྟོན་བཀའ་སློབ་སོགས་གནང་སྟེ་འཇང་དགུན་ཆོས་ཀྱི་དབུ་འཛུགས་མཛད་སྒོ་འཚོགས་ཤིང་། དེ་རྗེས་སྔ་དྲོའི་ཆོས་ར་ཚོགས་སོང་། ཐེངས་འདིའི་འཇང་དགུན་ཆོས་ལ་གདན་ས་གསུམ་གྱི་གྲྭ་ཚང་དྲུག་དང་། སྐུ་བཅར་རྣམ་རྒྱལ་གྲྭ་ཚང་། རྒྱུད་གྲྭ་སྟོད་སྨད། བཀྲ་ཤིས་ལྷུན་པོ། ར་སྟོད་བདེ་བ་ཅན་གྲྭ་ཚང་། རྫོང་ཆོས་དགའ་ལྡན་འཕེལ་རྒྱས་གླིང་། བཞུགས་སྒར་རིགས་ལམ་སློབ་གཉེར་ཁང་སོགས་དགོན་སྡེ་ཁག་བཅུ་དྲུག་ནས་སློབ་གཉེར་བ་ཞལ་གྲངས་ ༢༩༥༥ ཙམ་ལྷན་དུ་འཛོམས་ཡོད་པ་དང་། ཉིན་གྲངས་ ༢༢ རིང་ལ་འཚོག་རྒྱུ་ཡིན་འདུག །
| ༈ བོད་རྒྱལ་ལོ་ ༢༡༤༥ དང་ཕྱི་ལོ་ ༢༠༡༨ ལོར་འཇང་དགུན་ཆོས་ལ་ཕེབས་པའི་གྲྭ་ཚང་སོ་སོའི་སློབ་གཉེར་བའི་གྲངས་འབོར་གྱི་རེའུ་མིག | |||||||||||||||
|---|---|---|---|---|---|---|---|---|---|---|---|---|---|---|---|
| ཨང་། | གྲྭ་ཚང་། | གྲངས་འབོར། | ཨང་། | གྲྭ་ཚང་། | གྲངས་འབོར། | ཨང་། | གྲྭ་ཚང་། | གྲངས་འབོར། | ཨང་། | གྲྭ་ཚང་། | གྲངས་འབོར། | ||||
| ༡ | སེར་སྨད། | ༣༢༠ | ༥ | བྱང་རྩེ། | ༣༣༩ | ༩ | སྲད་རྒྱུད། | ༢༡ | ༡༣ | རྣམ་རྒྱལ་གྲྭ་ཚང་། | ༢༤ | ||||
| ༢ | སེར་བྱེས། | ༦༥༠ | ༦ | ཤར་རྩེ། | ༢༤༨ | ༡༠ | བཀྲས་ལྷུན། | ༡༢༥ | ༡༤ | ཀོ་པན། | ༢༡ | ||||
| ༣ | བློ་གླིང་། | ༦༠༤ | ༧ | རྒྱུད་སྨད། | ༡༥ | ༡༡ | རྭ་སྟོད། | ༢༦ | ༡༥ | དྭགས་པོ་གྲྭ་ཚང་། | ༡༨ | ||||
| ༤ | སྒོ་མང་། | ༤༥༦ | ༨ | རྒྱུད་སྟོད། | ༢༨ | ༡༢ | རྫོང་ཆོས། | ༤༤ | ༡༦ | དཀྱིལ་དགོན། | ༡༦ | ||||
| ཁྱོན་བསྡོམས། | ༢༩༥༥ | ||||||||||||||
འཇང་དགུན་ཆོས་ཀྱི་སྔོན་འགྲོ་ལྟ་བུར་གྲྭ་ཚང་སོ་སོ་ནས་འཇང་དགུན་ཆོས་མ་ཚོགས་སྔོན་དུ་ཚད་མའི་ཆོས་ཐོག་དུས་ཡུན་ངེས་ཅན་རེ་ལ་ཚོགས་སྲོལ་ཡོད་པ་དང་། འཇང་དགུན་ཆོས་རིང་གི་རྩོད་གཞུང་གཙོ་བོ་ནི་དཔལ་ཆོས་ཀྱི་གྲགས་པའི་ཚད་མ་རྣམ་འགྲེལ་ཡིན་ཞིང་། དེའི་ཟུར་རྒྱན་དུ་རྣམ་ངེས་དང་ཚད་མ་ཀུན་བཏུས་སོགས་རྒྱ་གཞུང་ཁག་དང་བོད་འགྲེལ་གྱི་ཚད་མའི་ཡིག་ཆ་ཁག་བཟུང་སྟེ་འཛིན་གྲྭ་སོ་སོར་རྩོད་མཚམས་ཆ་བགོས་བྱས་ཡོད་པ་ལྟར། སློབ་གཉེར་བ་རྣམས་ཀྱིས་སོ་སོའི་རྩོད་གཞུང་གཙོ་བྱས་པའི་འབྲེལ་ཡོད་གཞུང་ཆེན་ཁག་ལ་དཔེ་གཟིགས་དང་རྩ་འགྲེལ་བློ་འཛིན། དཔེ་ཁྲིད་དང་བསྐྱར་སྦྱོང་སོགས་བྱེད་དགོས་པ་དང་། སྔ་དྲོའི་ཆོས་རར་རྩོད་ཟླ་དང་འཛིན་གྲྭའི་དམ་བཅའི་སྐབས་དོགས་གནད་ལ་རྩོད་པའི་སྒོ་ནས་དཔྱད་པ་གཏོང་དགོས། དགུང་དུས་ཆུ་ཚོད་དྲུག་པའི་ཐོར་ཆོས་[འདིའི་ཡིག་ཐོབ་གསལ་པོ་མ་ངེས།]དམ་བཅར་རྒྱན་ཐོབ་པའི་གྲྭ་ཚང་གཉིས་ཀྱི་གཅིག་གི་སློབ་གཉེར་བ་གཉིས་དམ་བཅའ་དང་གྲྭ་ཚང་གཞན་དེའི་དམ་བཅའི་རྩོད་གཞུང་གཅིག་པའི་སློབ་གཉེར་བ་རྣམས་ཀྱིས་རྟགས་གསལ་གཏོང་དགོས། དམ་བཅའ་གྲོལ་རྗེས་རྩོད་ཟླ་ཅུང་གནང་དགོས་པ་དང་། དེ་ནས་སྐར་མ་བཅུ་བཅོ་ལྔ་ཙམ་ལ་ངལ་གསོས་རྗེས་ཆུ་ཚོད་དགུ་པ་ནས་ཆོས་ར་འཚོགས་དགོས། ཆོས་རའི་སྐབས་ཐོག་མར་རྩོད་ཟླ་དང་དེ་ནས་དམ་བཅའ་ཚོགས་ཏེ་ཆུ་ཚོད་བཅུ་གཅིག་བཅུ་གཉིས་བར་དུ་དཀའ་གནད་ཁག་ལ་བརྒལ་བརྟག་གནང་སྲོལ་ཡོད་པ་དང་། ཆུ་ཚོད་དང་པོ་གཉིས་པའི་བར་དུ་རྩོད་པ་གནང་སྟེ་བཞུགས་པའང་ཡོད། འཇང་དགུན་ཆོས་ཀྱི་ཆོས་ཐོག་གི་དཀྱིལ་དང་མཇུག་ཏུ་མཚན་ཕུད་དམ་བཅའ་གནང་དགོས་པ་དང་། མཚན་ཕུད་དམ་བཅའི་སྐབས་གྲྭ་ཚང་གསུམ་རེའི་སློབ་གཉེར་བ་རྩེ་གྲས་རེ་སྟེ་སློབ་གཉེར་བ་གསུམ་རེ་དམ་བཅའ་དང་གྲྭ་ཚང་གཞན་གྱིས་རྟགས་གསལ་གཏོང་དགོས། འཇང་དགུན་ཆོས་སྐབས་སུ་ནམ་རྒྱུན་དང་མི་འདྲ་བར་སྒྲིག་ཁྲིམས་ཅུང་དམ་དུ་གཏོང་བཞིན་ཡོད།
| ༈ བོད་རྒྱལ་ལོ་ ༢༡༤༥ དང་ཕྱི་ལོ་ ༢༠༡༨ ལོའི་ཕྱི་ཟླ་ ༡༡ པའི་ཚེས་ ༢༤ ནས་ཕྱི་ཟླ་ ༡༢ པའི་ཚེས་ ༡༥ བར་གྱི་འཇང་དགུན་ཆོས་སྐབས་ཉིན་རེའི་ཆོས་ར་ཚོགས་དུས་ཀྱི་རེའུ་མིག | |||||||||
|---|---|---|---|---|---|---|---|---|---|
| སྔ་དྲོ། | |||||||||
| ཆུ་ཚོད། | འགྲེལ་བརྗོད། | ཆུ་ཚོད། | འགྲེལ་བརྗོད། | ||||||
| 9:00 | སྐུ་རིམ་ཉུང་ཙམ་གསུངས་རྗེས་རྩོད་ཟླ། | 10:00 - 11:00 | འཛིན་གྲྭ་སོ་སོའི་དམ་བཅའ། | ||||||
| ཕྱི་དྲོ། | |||||||||
| ཆུ་ཚོད། | འགྲེལ་བརྗོད། | ཆུ་ཚོད། | འགྲེལ་བརྗོད། | ཆུ་ཚོད། | འགྲེལ་བརྗོད། | ||||
| 6:00 | ཐོར་ཆོས་དམ་བཅའ། | 7:30 - 8:30 | རྩོད་ཟླ། | 9:00 - 11:00 | གྲྭ་ཚང་གཉིས་ལོག་ནང་ཁུལ་གྱི་ཆོས་ར། | ||||
| ༈ བོད་རྒྱལ་ལོ་ ༢༡༤༥ དང་ཕྱི་ལོ་ ༢༠༡༨ ལོའི་ཕྱི་ཟླ་ ༡༡ པའི་ཚེས་ ༢༤ ནས་ཕྱི་ཟླ་ ༡༢ པའི་ཚེས་ ༡༥ བར་གྱི་འཇང་དགུན་ཆོས་སྐབས་ཀྱི་དམ་བཅའ་སོགས་ཀྱི་རེའུ་མིག | |||||||||
|---|---|---|---|---|---|---|---|---|---|
| [ སྡེ་ཚན་དང་པོ། ] | |||||||||
| ཨང་། | རེས་གཟའ། | ཕྱི་ཚེས། | གྲྭ་ཚང་། | གཞུང་ཚན། | ཤོག་གྲངས། [ཝཱ་ཎའི་པར་རྙིང་།] | ||||
| ༡ | སྤེན་པ། | 24 | བློ་གླིང་། | དབུ་ནས་ཕྱོགས་སྒྲའི་བར། | ༡ ནས་ ༡༦ བར། | ||||
| ༢ | ཉི་མ། | 25 | སེར་སྨད། | འབྲས་རང་གི་རྟགས། | ༡༦ ནས་ ༡༩ བར། | ||||
| ༣ | ཟླ་བ། | 26 | བྱང་རྩེ། | མི་སྣང་བ་མ་དམིགས་པ། | ༡༩ ནས་༢༣ བར། | ||||
| ༤ | མིག་དམར། | 27 | སེར་བྱེས། | སྣང་རུང་མ་དམིགས་པ། | ༢༣ ནས་ ༢༨ བར། | ||||
| ༥ | ལྷག་པ། | 28 | ཤར་རྩེ། | རྟགས་གཞན་བཞི་པ། | ༢༨ ནས་ ༣༦ བར། | ||||
| ༦ | ཕུར་བུ། | 29 | སྒོ་མང་། | འབྲེལ་པ་སྟོད། | ༣༦ ནས་ ༤༣ བར། | ||||
| ༧ | པ་སངས། | 30 | རྭ་སྟོད། | གཞན་སེལ་སྟོད། | ༧༣ ནས་ ༨༦ བར། | ||||
| ༨ | སྤེན་པ། | 1 | བཀྲ་ཤིས་ལྷུན་པོ། | གཞན་སེལ་སྟོད། | ༨༦ ནས་ ༩༦ བར། | ||||
| [ སྡེ་ཚན་གཉིས་པ། ] | |||||||||
|---|---|---|---|---|---|---|---|---|---|
| ཨང་། | རེས་གཟའ། | ཕྱི་ཚེས། | གྲྭ་ཚང་། | གཞུང་ཚན། | ཤོག་གྲངས། [ཝཱ་ཎའི་པར་རྙིང་།] | ||||
| ༡ | ཉི་མ། | 2 | སེར་སྨད། | འབྲེལ་པ་སྨད། | ༤༣ ནས་ ༤༨ བར། | ||||
| ༢ | ཟླ་བ། | 3 | བློ་གླིང་། | ལུང་འགལ། | ༤༨ ནས་ ༦༧ བར། | ||||
| ༣ | མིག་དམར། | 4 | གུང་སེང་། | ||||||
| ༤ | ལྷག་པ། | 5 | སྒོ་མང་། | ཚད་མ་ཕྲུགས་གསུམ། | ༦༧ ནས་ ༧༣ བར། | ||||
| ༥ | ཕུར་བུ། | 6 | བྱང་རྩེ། | གཞན་སེལ་སྟོད། | ༧༣ ནས་ ༨༦ བར། | ||||
| ༦ | པ་སངས། | 7 | སེར་བྱེས། | གཞན་སེལ་སྨད། | ༨༦ ནས་ ༩༩ བར། | ||||
| ༧ | སྤེན་པ། | 8 | ཤར་རྩེ། | ཤིང་འཛིན་རྟོག་པ། | ༩༩ ནས་ ༡༡༣ བར། | ||||
| [ སྡེ་ཚན་གསུམ་པ། ] | |||||||||
|---|---|---|---|---|---|---|---|---|---|
| ཨང་། | རེས་གཟའ། | ཕྱི་ཚེས། | གྲྭ་ཚང་། | གཞུང་ཚན། | ཤོག་གྲངས། [ཝཱ་ཎའི་པར་རྙིང་།] | ||||
| ༡ | ཉི་མ། | 9 | སེར་བྱེས | སྟོན་པ་ཚད་མ་སོགས། | ༢༢༥ ནས་ ༢༣༩ བར། | ||||
| ཕྱི་ཚེས་ ༩ ཉིན་སེར་སྨད་གྲྭ་ཚང་དུ་མཚན་ཕུད་དམ་བཅའ་དང་པོ། | |||||||||
| ༢ | ཟླ་བ། | 10 | ༧ གོང་ས་༧ སྐྱབས་མགོན་ཆེན་པོ་མཆོག་གི་ཞི་བདེའི་གཟེངས་རྟགས་དུས་དྲན། | ||||||
| ༣ | མིག་དམར། | 11 | སྒོ་མང་། | དབང་ཕྱུག་རྟག་པ། | ༢༣༩ ནས་ ༢༥༡ བར། | ||||
| ༤ | ལྷག་པ། | 12 | བློ་གླིང་། | སྐྱེ་བ་སྔ་ཕྱི། | ༢༥༡ ནས་ ༢༨༨ བར། | ||||
| ༥ | ཕུར་བུ། | 13 | སེར་སྨད། | རྣལ་འབྱོར་མངོན་སུམ། | ༢༨༨ ནས་ ༣༠༢ བར། | ||||
| ༦ | པ་སངས། | 14 | ཤར་རྩེ། | སྡུག་ཀུན་གཉིས། | ༣༠༢ ནས་ ༣༢༡ བར། | ||||
| ཕྱི་ཚེས་ ༡༤ ཉིན་སེར་བྱེས་གྲྭ་ཚང་དུ་མཚན་ཕུད་དམ་བཅའ་གཉིས་པ། | |||||||||
| ༧ | སྤེན་པ། | 15 | བྱང་རྩེ། | འགོག་ལམ་གཉིས། | ༣༢༡ ནས་ ༣༦༦ བར། | ||||
འཇང་དགུན་ཆོས་དང་དུས་མཉམ་དུ་ལོ་ཤས་གོང་ནས་གདན་ས་ཁག་གི་སློབ་གཉེར་བ་རྒན་གྲས་ཏེ་དགེ་ལུགས་རྒྱུགས་སྤྲོད་དུ་ཕེབས་མཁན་རྣམས་ཕར་ཕྱིན་དང་དབུ་མའི་ཆོས་ཐོག་ཅེས་པ་འཚོགས་ཀྱིན་ཡོད་པ་དང་། ད་ལོ་འབྲས་སྤུངས་སུ་འཚོགས་ཡོད་འདུག །[འཇང་དགུན་ཆོས་ཀྱི་སྐོར་ཚོམས་ཀྱི་ངོ་སྤྲོད་དུ་འབྲི་རྩིས་ཀྱིས་འདིར་དེ་ཙམ་གྱིས་འཐུས་པར་བྱས་སོ། །]
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༨།༡༡།༢༤ལ།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་]ཞེས་རྩོམ་ཁུངས་ཁ་གསལ་འགོད་དགོས།
དེ་ལས་མང་བ།...
གྲྭ་ཚང་གི་རྩོད་རྒྱུགས་དབུ་འཛུགས་བྱས་སོང་།
དྲ་འཇུག་པ། རིག་མཛོད་རྩོམ་སྒྲིག་པ།སེར་བྱེས་གྲྭ་ཚང་གི་སློབ་གཉེར་བའི་ལོ་འཁོར་རྒྱུགས་སྤྲོད་རྣམས་ཀྱི་ཡ་གྱལ་རྩོད་རྒྱུགས་དབུ་འཛུགས་བྱས་སོང་།
ཁ་སང་སྟེ་ཕྱི་ལོ་༢༠༡༨ལོའི་ཟླ་༡༠ཚེས་༡༣ནས་སེར་བྱེས་མཁས་སྙན་གྲྭ་ཚང་གི་ལོ་འཁོར་རྒྱུགས་སྤྲོད་དག་ལས་བློ་རྒྱུགས་ཆེན་མོ་དང་རྩོད་གཞུང་བློ་རྒྱུགས། རིག་གནས་རྒྱུགས་སྤྲོད་སོགས་ཕྱི་ཟླ་བརྒྱད་པར་བླངས་ཚར་བ་དང་། སློབ་གཉེར་བའི་རྩོད་རྒྱུགས་དབུ་འཛུགས་གནང་སོང་། དེ་ཡང་སྔ་དྲོ་དང་མཚན་དུས་ཏེ་ཚོགས་ཐུན་གཉིས་བྱས་ཏེེ་རྒྱུགས་སྤྲོད་དུ་ཕེབས་མི་དགོས་པའི་དམིགས་བསལ་ཅན་གྲྭ་ཚང་གི་ལས་བྱེད་ཀྱི་གྲས་སུ་ཡོད་པ་རྣམས་ཕུད་སློབ་གཉེར་བ་ཚང་མ་སྡེ་ཚན་དགུ་རུ་བགོས་ཏེ་སྡེ་ཚན་སོ་སོར་རྒྱུགས་ཞིབ་པ་ལྷ་རམས་པ་ལྔ་རེས་རྒྱུགས་བཞེས་གནང་བཞིན་ཡོད་པ་དང་། གྲྭ་ཚང་གི་སྐྱབས་རྗེ་མཁན་རིན་པོ་ཆེས་ཀྱང་གཟིགས་ཞིབ་དང་། ཁྲིམས་བདག་དགེ་བསྐོས་མཆོག་དང་དབུ་མཛད་ཆེན་མོ། སློབ་གཉེར་དོ་དམ་ཁང་གི་ལྷ་རམས་དགེ་བཤེས་ལྔ་བཅས་ཀྱིས་གཟིགས་རྟོག་གི་འོག་ཏུ་རྒྱུགས་བཞེས་གནང་བཞིན་ཡོད། གཞུང་གསར་འཛིན་གྲྭ་ནས་བཟུང་སྟེ་རྩོད་རྒྱུགས་ཀྱི་བརྗོད་གཞི་གསང་བའི་ཤོག་དྲིལ་ལས་བླངས་ཏེ་གང་ཁེལ་བ་དེ་ནས་རྟགས་གསལ་གཏོང་དགོས་ལ། གྲྭ་ཚང་གི་སློབ་གྲྭའི་འཛིན་གྲྭ་དྲུག་པ་ཡན་གྱི་སློབ་ཕྲུག་རྣམས་ཀྱང་བསྡུས་གྲྭ་འཛིན་གྲྭའི་སློབ་གཉེར་བ་མཉམ་དུ་རྩོད་རྒྱུགས་ལེན་གྱིན་ཡོད།
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༨།༡༠།༡༤ལ།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།
དགེ་ལུགས་རྒྱུགས་སྤྲོད་ལེགས་པར་གྲུབ།
དྲ་འཇུག་པ། རིག་མཛོད་རྩོམ་སྒྲིག་པ།སེ་ར་ཐེག་ཆེན་གླིང་དུ་ཉིན་གྲངས་ཉི་ཤུ་ལྷག་ལ་བླངས་ཏེ་དགེ་ལུགས་རྒྱུགས་སྤྲོད་ལེགས་པར་གྲུབ་སོང་།
དེ་ཡང་བོད་རྒྱལ་ལོ་ ༢༡༤༥ དང་བོད་ཟླ་ ༧ པའི་ཚེས་ ༡ དང་ཕྱི་ལོ་ ༢༠༡༨ ཟླ་བ་ ༨ ཚེས་ ༡༢ ཉིན་གདན་ས་གསུམ་གཙོ་བྱས་པའི་དགེ་ལུགས་རྒྱུགས་སྤྲོད་ལ་ཕེབས་དགོས་པའི་སློབ་གཉེར་བ་རྣམས་སེ་ར་ཐེག་ཆེན་གླིང་དུ་འདུ་འཛོམས་བྱུང་སྟེ་སེར་བྱེས་མཁན་རིན་པོ་ཆེ་དང་མཁན་ཚབ་རྣམ་པ། དགེ་ལུགས་དྲུང་ཡིག་སོགས་ཀྱིས་སྣེ་ཁྲིད་འོག་རྒྱུགས་སྤྲོད་དབུ་འབྱེད་ཀྱི་ཚོགས་འདུ་བསྐོངས་ཏེ་ལམ་སྟོན་བཀའ་སློབ་སོགས་གནང་ཡོད་པ་དང་། ཕྱི་ཚེས་ ༡༣ ནས་རྒྱུགས་སྤྲོད་དངོས་སུ་འགོ་ཚུགས་ནས་ཕྱི་ཟླ་ ༩ ཚེས་ ༧ ཉིན་ལེགས་པར་གྲུབ་སྟེ་ཁ་སང་ཕྱི་ཚེས་ ༨ ཉིན་གྱི་སྔ་དྲོར་མཇུག་སྡོམ་ཚོགས་འདུ་དང་། སློབ་དཔོན་མང་དུ་ཐོས་པ་དང་བཀའ་རམས་གཞུང་ལུགས་འཛིན་པའི་ཕྱག་འཁྱེར་འབུལ་བཞེས་ཀྱི་མཛད་སྒོ་ཚོགས་སོང་། རྒྱུགས་སྤྲོད་ཀྱི་སྐབས། རྒྱུགས་ཞིབ་དོ་དམ་པ་དགེ་བཤེས་ལྷ་རམས་པ་གསུམ། བྲིས་རྒྱུགས་ལྟ་རྟོག་པ་དགེ་བཤེས་བཅུ། རྩོད་རྒྱུགས་རྒྱུགས་བཞེས་པ་དགེ་བཤེས་ལྷ་རམས་པ་ ༣༠ དང་བྲིས་རྒྱུགས་ཞིབ་འཇུག་པ་དགེ་བཤེས་ལྷ་རམས་པ་༡༨། ཐོག་མར་འགེང་ཤོག་བཀང་ནས་སྙན་ཞུའི་ཐོ་འགོད་བྱེད་མཁན་རྒྱུགས་སྤྲོད་པ་སློབ་གཉེར་བའི་གྲངས་བསྡོམས་ ༨༦༢ བྱུང་ཡོད་པ་ལས། ལྷ་རམས་ལོ་རིམ་གཉིས་པའི་རྒྱུགས་སྤྲོད་པ་གྲངས་༡༡༤དང་། ལྷ་རམས་ལོ་རིམ་དང་པོའི་རྒྱུགས་སྤྲོད་པ་གྲངས་༡༠༨། སློབ་དཔོན་ལོ་རིམ་གཉིས་པའི་རྒྱུགས་སྤྲོད་པ་གྲངས་༡༣༩། སློབ་དཔོན་རིམ་དང་པོའི་རྒྱུགས་སྤྲོད་པ་གྲངས་༡༠༥། བཀའ་རམས་ལོ་རིམ་གཉིས་པའི་རྒྱུགས་སྤྲོད་པ་གྲངས་༡༤༦། བཀའ་རམས་ལོ་རིམ་དང་པོའི་རྒྱུགས་སྤྲོད་པ་གྲངས་༢༥༡། ནད་མནར་གྱི་རྐྱེན་གྱིས་སྔ་ཕྱིར་རྒྱུགས་སྤྲོད་ནས་དགོངས་པ་ཞུས་ནས་ཕྱིར་འཐེན་བྱས་པ་གྲངས་ ༢༣ བྱུང་ཡོད་འདུག
གཞན་གནས་ཚུལ་གསར་པ་ཞིག་ནི་ལོ་ཤས་སྔོན་དུ་དགེ་ལུགས་རྒྱུགས་སྤྲོད་ཀྱི་སློབ་ཚན་རིམ་པའི་ནང་དུ་ཚན་རིག་སློབ་ཚན་ཁ་སྣོན་བྱ་རྒྱུའི་གྲོས་ཆོད་བྱུང་བར་མ་ཟད། གྲྭ་ཚང་སོ་སོས་ཀྱང་ཚན་རིག་འཛིན་གྲྭ་འཚོགས་བཞིན་ཡོད་པ་ལས། ད་ལོ་སྟེ་ ༢༠༡༨ ལོར་དགེ་ལུགས་རྒྱུགས་སྤྲོད་ལ་གསར་དུ་ཞུགས་པ་བཀའ་རམས་ལོ་རིམ་དང་པོ་རྣམས་ལ་ཚན་རིག་སློབ་ཚན་ལས། སྐྱེ་དངོས། དངོས་ཁམས། དབང་རྩའི་ཚན་རིག །ཚན་རིག་ལྟ་གྲུབ་བཅས་དངོས་སུ་རྒྱུགས་སྤྲོད་ཁོངས་སུ་བཏང་ཡོད་འདུག
| ༢༠༡༨ ལོར་དགེ་ལུགས་རྒྱུགས་སྤྲོད་ལ་ཞུགས་པའི་གྲྭ་ཚང་སོ་སོའི་སློབ་གཉེར་བའི་གྲངས་འབོར་གྱི་རེའུ་མིག | |||||||||||
|---|---|---|---|---|---|---|---|---|---|---|---|
| གྲྭ་ཚང་། | བཀའ་རམས། ༡ | བཀའ་རམས། ༢ | སློབ་དཔོན། ༡ | སློབ་དཔོན། ༢ | ལྷ་རམས། ༡ | ལྷ་རམས། ༢ | བསྡོམས། | ||||
| བྱང་རྩེ། | 37 | 26 | 18 | 26 | 17 | 20 | 144 | ||||
| ཤར་རྩེ། | 6 | 14 | 9 | 5 | 8 | 10 | 52 | ||||
| སྒོ་མང་། | 55 | 29 | 14 | 18 | 15 | 15 | 146 | ||||
| བློ་གླིང་། | 60 | 24 | 24 | 26 | 28 | 24 | 186 | ||||
| སེར་སྨད། | 21 | 20 | 21 | 32 | 11 | 17 | 122 | ||||
| སེར་བྱེས། | 65 | 26 | 16 | 25 | 25 | 28 | 185 | ||||
| བཀྲས་ལྷུན། | 2 | 3 | 4 | 2 | 11 | ||||||
| རྭ་སྟོད། | 2 | 1 | 2 | 5 | |||||||
| བསྡོམས། | 248 | 142 | 102 | 137 | 108 | 114 | 851 | ||||
དགེ་ལུགས་རྒྱུགས་སྤྲོད་ཀྱི་སྐོར་རྒྱས་པར་གཟིགས་འདོད་ཡོད་ཚེ་འོག་གི་སྦྲེལ་སྣེ་ལས་གཟིགས་པར་ཞུ།
https://www.gelugpa-university.org/copy-of-2022-%E0%BD%82-%E0%BD%96-%E0%BD%A0%E0%BD%96-%E0%BD%A6-1
སེར་བྱེས་རིག་མཛོད་ཆེན་མོའི་རྩོམ་སྒྲིག་པས། ༢༠༡༨.༠༩.༠༩.ལ།
དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་རྩོམ་ཁུངས་ཁ་གསལ་འགོད་དགོས།
