མཛད་པ་པོ། སློབ་དཔོན་ཟླ་བ་གྲགས་པ།
བརྗོད་བྱ། གསང་བ་འདུས་པའི་ལམ་གྱི་གནད།
རིག་མཛོད་འཕྲུལ་དེབ་ཨང་། SJRB-0431
ཡིག་ཆའི་རྣམ་པ། PDF མ་ཕྱིའི་པར་རྩ། སྡེ་དགེའི་ཤིང་པར།
ཤོག་གྲངས། 511 ལྗིད་ཚད། 3.3MB
རྩོམ་སྒྲིག་ཁང་། སེར་བྱེས་རིག་མཛོད་ཆེན་མོ།
༢༠༢༤ ཟླ་གསུམ་པར་གསར་དུ་རྩོམ་སྒྲིག་བྱས།
ངོ་སྤྲོད་མདོར་བསྡུས།
འཕྲུལ་དེབ་འདི་ནི་རྒྱུད་ཀྱི་རྒྱལ་པོ་དཔལ་གསང་བ་འདུས་པའི་རྩ་རྒྱུད་དུ་འདུས་པའི་རིམ་གཉིས་ཀྱི་ཟབ་གནད་རྣམས་བསྟན་པ་ཤིན་ཏུ་རྟོགས་དཀའ་བ་མཐའ་དྲུག་དང་ཚུལ་བཞིའི་བཤད་པའི་སྒོ་ནས་གསལ་བར་མཛད་པའི་འགྲེལ་པ་སྒྲོན་མ་གསལ་བའམ་ཡོངས་གྲགས་སུ་འགྲེལ་པ་སྒྲོན་གསལ་ཞེས་གྲགས་པ་དེ་ཉིད་ཡིན། འདིའི་མཛད་པ་པོ་ནི་དཔལ་ལྡན་ཟླ་བ་གྲགས་པ་ཡིན་ལ། ཁོང་རྒྱ་གར་ལྷོ་ཕྱོགས་སུ་འཁྲུངས། ལྷོ་ཕྱོགས་ཀྱི་རྒྱུད་དེ་ཉིད་དུ་རབ་ཏུ་བྱུང་། ཆུང་དུས་ནས་རིག་གནས་མཐའ་དག་ལ་མཁས་པར་སྦྱངས། སློབ་དཔོན་ཀླུ་སྒྲུབ་དང་སློབ་དཔོན་སངས་རྒྱས་བསྐྱངས་སོགས་ལས་མདོ་སྔགས་གཉིས་ཆར་སྦྱངས་པ་མཐར་ཕྱིན་པ་མཛད། ན་ལེནྡྲའི་མཁན་པོ་ཡུན་རིང་དུ་མཛད་དེ་བསྟན་པའི་བྱ་བ་རྒྱ་ཆེན་པོ་མཛད། སློབ་མ་གྲགས་ཆེ་བ་རིགས་པའི་ཁུ་བྱུག་ཆེ་བ་སོགས་མང་དུ་བྱུང་། མདོ་སྔགས་གཉིས་ཀྱི་བསྟན་བཅོས་གང་མང་བརྩམས་ཤིང་། བོད་འགྱུར་ལ། མདོ་ཕྱོགས་སྣར་ཐང་བསྟན་འགྱུར་གྱི་ཀྱི་པོད། [འ] [ཡ] གཉིས་དང་། གསང་སྔགས་ཀྱི་སྐོར། སྣར་ཐང་བསྟན་འགྱུར་གྱི་པོད་[ཤ]པ་རྣམས་སུ་བཞུགས།

མཛད་པ་པོ། གྲུབ་ཆེན་ལཱ་ལི་ཏ་བཛྲ།
བརྗོད་བྱ། རྡོ་རྗེ་འཇིགས་བྱེད་ཀྱི་སྒྲུབ་ཐབས།
རིག་མཛོད་འཕྲུལ་དེབ་ཨང་། SJRB-0430
ཡིག་ཆའི་རྣམ་པ། PDF མ་ཕྱིའི་པར་རྩ། སྡེ་དགེའི་ཤིང་པར།
ཤོག་གྲངས། 33 ལྗིད་ཚད། 899KB
རྩོམ་སྒྲིག་ཁང་། སེར་བྱེས་རིག་མཛོད་ཆེན་མོ།
༢༠༢༤ ཟླ་གཉིས་པར་གསར་དུ་རྩོམ་སྒྲིག་བྱས།
ངོ་སྤྲོད་མདོར་བསྡུས། འཕྲུལ་དེབ་འདིར་དཔལ་ན་ལེནྡྲའི་པཎྜི་ཏ་གྲུབ་ཆེན་ལཱ་ལི་ཏ་བཛྲས་མཛད་པའི་རྡོ་རྗེ་འཇིགས་བྱེད་ཀྱི་སྒྲུབ་ཐབས་ཆེ་ཆུང་གཉིས་གཏོར་མའི་ཆོ་ག་བཅས་བཞུགས་ཡོད་ལ་འདིའི་བྱུང་རིམ་ནི། གྲུབ་ཆེན་ལཱ་ལི་ཏས་འཇམ་དཔལ་མཚན་བརྗོད་ཞལ་འདོན་མཛད་པའི་ཚེ། རྡོ་རྗེ་འཇིགས་བྱེད་འཇིགས་པར་བྱེད། །ཅེས་པ་དང༌། གཤིན་རྗེ་གཤེད་པོ་བགེགས་ཀྱི་རྒྱལ། །ཞེས་པ་རྣམས་ཀྱི་དོན་ལ་བསམས་ནས་རྡོ་རྗེ་འཇིགས་བྱེད་ཆེན་པོའི་རྒྱུད་ཡོད་པར་བསམས་ནས་འཕགས་ཡུལ་དུ་རྩད་གཅོད་མཛད་ཀྱང་སྐབས་དེར་རྡོ་རྗེ་འཇིགས་བྱེད་ཀྱི་རྒྱུད་འཕགས་ཡུལ་དུ་མ་བཞུགས་པས་མ་རྙེད། ཕྱིས་སུ་ཨྱོན་གྱི་ཡུལ་ན་བཞུགས་པར་མཁྱེན་ནས་དཀའ་ཚེགས་ཆེན་པོས་ཨོ་རྒྱན་གྱི་ཡུལ་དུ་བྱོན་ནས་ཡེ་ཤེས་ཀྱི་མཁའ་འགྲོ་མས་རྗེས་སུ་བཟུང་སྟེ་དཔལ་རྡོ་རྗེ་འཇིགས་བྱེད་ཆེན་པོའི་དབང་དང་གཤིན་རྗེའི་གཤེད་དམར་ནག་གཉིས་ཀྱི་དབང་དང་གདམས་པ་རྣམས་གསན། རྒྱུད་ཀྱི་གླེགས་བམ་གནང་དགོས་པར་གསོལ་བ་བཏབ་པ་ན། ཡེ་ཤེས་ཀྱི་མཁའ་འགྲོ་མས་རྡོ་རྗེ་འཇིགས་བྱེད་ཆེན་པོའི་རྩ་བའི་རྒྱུད་རྒྱས་པ་བསྟན་ཏེ་ཞག་བདུན་གྱི་རིང་ལ་འདིའི་ནང་ནས་གང་བློ་ལ་གཟུང་ཐུབ་པ་རྣམས་ཟུངས། དེ་ལས་མི་ཡོང་ཞེས་རྒྱུད་ཐམས་ཅད་མ་གནང་བ་ན། གྲུབ་ཆེན་གྱིས་ཞག་བདུན་གྱི་རིང་ལ་གླེགས་བམ་ཆེན་པོ་འདི་ནས་མང་པོ་ཞིག་འཛིན་མི་ཐུབ་པས་སྨོན་ལམ་གདབ་པ་གལ་ཆེ་དགོངས་ནས་ཞག་བདུན་གྱི་རིང་རྒྱུད་ཀྱི་གླེགས་བམ་རྣམས་ལ་མཆོད་པ་ཕུལ་ཏེ་ཕྱག་དང་བསྐོར་བ་བྱེད་ཅིང་གསོལ་བ་ཤུགས་དྲག་བཏབ་པ་ན། རྟོག་པ་སུམ་བརྒྱའི་ནང་ནས་དངོས་གྲུབ་ཀྱི་རྟོག་པ་ཞེས་བྱ་བ་དཔལ་རྡོ་རྗེ་འཇིགས་བྱེད་ཆེན་པོའི་རྒྱུད་རྟོག་པ་བདུན་པ་སོགས་ཐུགས་ལ་གསལ་བར་ཤར། འདི་ལ་ནོར་འཁྲུལ་དང་ལྷག་ཆད་ཡོད་དམ་མེད་བལྟ་དགོས་དགོངས་པ་ན། དེའི་ཐད་ཀྱི་གླེགས་བམ་རང་ཞལ་ཕྱེ་ནས་ཐུགས་ལ་གང་ཤར་བ་ཇི་བཞིན་བྱུང༌། དེ་ལྟར་འཇིགས་བྱེད་ཀྱི་ཆོས་སྐོར་རྣམས་ཨུ་རྒྱན་ནས་སྤྱན་དྲངས་ཤིང་འཕགས་ཡུལ་དུ་བྱོན་ནས་སྒྲུབ་ཐབས་ཆེ་ཆུང་སོགས་མཛད་ཅིང་རྡོ་རྗེ་འཇིགས་བྱེད་ཀྱི་ཆོས་སྐོར་རྣམས་དར་བར་མཛད།

༄༅། །བོད་རྒྱལ་ལོ་༢༡༥༡ཤིང་ཕོ་འབྲུག་ལོའི་གནམ་ལོ་གསར་ཚེས་ལ་བཀྲ་ཤིས་བདེ་ལེགས་ཞུ། །
ཤེས་རིག་བྱམས་བརྩེས་འཇིག་རྟེན་ཁྱབ་པའི་བཀྲ་ཤིས་ཤོག །
སྐྱེ་བོ་མཐའ་དག་ཞི་བདེས་འཚོ་བའི་བཀྲ་ཤིས་ཤོག །
ས་ཆུ་མེ་རླུང་གཡོ་འཁྲུག་ཞི་བའི་བཀྲ་ཤིས་ཤོག །
ཤིང་ཕོ་འབྲུག་ལོར་ཕུན་ཚོགས་དཔལ་གྱི་བཀྲ་ཤིས་ཤོག །
བོད་རྒྱལ་ལོ་༢༡༥༡རབ་གནས་ཤིང་འབྲུག་ལོའི་གནམ་ལོ་གསར་ཚེས་ཀྱི་བཀྲ་ཤིས་དུས་བཟང་ལ། རིགས་རུས་གདུང་བརྒྱུད་གཅིག་ལས་མཆེད་ཅིང་སྐད་ཡིག་རིག་གནས་གཅིག་གིས་བསྡུས་པའི་སྤུན་ཟླ་ཡོངས་དང་། བོད་མི་རིགས་རིག་གནས་དང་བཅས་པར་དངོས་ཤུགས་བརྒྱུད་གསུམ་ནས་རྒྱབ་སྐྱོར་དང་རོགས་རམས་གནང་མཁན་འཛམ་གླིང་གང་སར་གནས་པའི་གྲོགས་ཕོ་མོ་ཡོངས་ལ་འཚམ་འདྲིའི་བཀྲ་ཤིས་བདེ་ལེགས་གྲངས་མེད་ཞུ། །
སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས། ༢༠༢༤ཟླ་༠༢ཚེས་༡༠ལ།

དེ་ཡང་སེར་བྱེས་མཁས་སྙན་གྲྭ་ཚང་དང་། བསམ་མཁན་ཆེན་རིན་པོ་ཆེ། རྩེ་ཐང་དགེ་བཤེས་བློ་བཟང་འཇམ་དཔལ་ཐུན་མོང་ནས་ཇི་ལྟར་གསོལ་བ་བཏབ་པ་བཞིན། འཇམ་མགོན་རྒྱལ་བའི་གདུང་འཚོབ་དགའ་ལྡན་ཁྲི་ཐོག་བརྒྱ་དང་བཞི་པ་ཁྲི་ཆེན་རྡོ་རྗེ་འཆང་ཆེན་པོ་ྋརྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་ནས། ཤེས་རབ་ཀྱི་ཕ་རོལ་ཏུ་ཕྱིན་པའི་གཞུང་བསྟན་བཅོས་མངོན་པར་རྟོགས་པའི་རྒྱན་དང་། འགྲེལ་བ་དོན་གསལ། ལེགས་བཤད་གསེར་གྱི་ཕྲེང་བ་བཅས་སྔ་ལོའི་འཕྲོས་བདུན་ཕྲག་གཅིག་གི་རིང་གནང་ནས་ལེགས་པར་གྲུབ་པ་དང་། དེ་རིང་སྟེ། ༢༠༢༤ ཕྱི་ཟླ་ ༡ པོའི་ཚེས་ ༣༡ ཉིན། དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་མཆོག་སྐུ་ཚེ་ཞབས་པད་བསྐལ་བརྒྱར་བརྟན་ཅིང་། ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པའི་ཆེད། སེར་བྱེས་མཁས་སྙན་གྲྭ་ཚང་དུ་རྗེ་ཚེ་འཛིན་མའི་ཚེ་དབང་དང་འབྲེལ་བརྟན་བཞུགས་འདེགས་འབུལ་ཞུས་སོང་།
༢༠༢༤།༠༡།༣༡ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་ནས།