སེར་བྱེས་མཁན་རབས་དོན་གསུམ་པ་བློ་བཟང་དོན་ཡོད་མཆོག་ནི། ཕྱི་ལོ་༡༩༢༥ ལོར་བོད་གཙང་ལྷ་རྩེ་ཞོལ་དུ་སྐུ་འཁྲུངས། དགུང་ལོ་དགུའི་སྐབས་ལྷ་རྩེ་ཆོས་སྡེར་ཆོས་ཞུགས་དང་། མཁན་ཆེན་བློ་བཟང་རྣམ་རྒྱལ་གྱིས་བདག་གཉེར་གནང་བ་དང་དེའི་དྲུང་ནས་རབ་བྱུང་དང་དགེ་ཚུལ་གྱི་སྡོམ་པ་ཡང་མནོས་ཤིང་། དགུང་ལོ་བཅུ་གཉིས་ཀྱི་བར་ཏེ་ལོ་བཞིའི་རིང་ཡི་གེ་འབྲི་ཀློག་སོགས་དང་དགོན་པའི་ཆོས་སྤྱོད་གྱི་རིམ་པ་བློ་འཛིན་རྒྱུགས་སྤྲོད་དང་། མཚན་ཉིད་པའི་ཁོངས་སུ་ཞུགས་ནས་༧གོང་ས་ལྔ་པའི་ཕར་ཕྱིན་ཆ་ཚང་དང་། དབུ་མ་ཐེག་ཆེན་རྒྱ་མཚོར་འཇུག་པའི་གྲུ་གཟིངས། མཛོད་ཆོས་མངོན་རིན་ཆེན་འདྲེན་པའི་ཤིང་རྟ་བཅས་བློ་འཛིན་དང་རྒྱུགས་འབུལ་ཞུས།
དགུང་ལོ་བཅུ་གསུམ་ནས་ལོ་བདུན་ཙམ་གྱི་རིང་ལ་དགོན་པའི་དགེ་བཤེས་བགྲེས་པ་རྣམས་དང་། ༧པཎ་ཆེན་ཆོས་ཀྱི་ཉི་མའི་མཚན་ཞབས་པ་དགའ་བྱང་དགེ་བཤེས་དམ་ཆོས་བསྟན་འཕེལ་གྱི་མདུན་ནས་བསྡུས་གྲྭ་སོགས་ལ་སྦྱངས། ༡༩༤༣ལོ་སྟེ་དགུང་ལོ་བཅུ་དགུའི་སྐབས་སེར་བྱེས་གྲྭ་ཚང་དུ་ཆོས་ཞུགས་གནང་སྟེ། ཁྲི་ཆེན་ལྷུན་གྲུབ་བརྩོན་འགྲུས་དང་། མཁན་རིན་པོ་ཆེ་ལྷུན་གྲུབ་ཐབས་མཁས། དགེ་བཤེས་ངག་དབང་དགེ་འདུན། དགེ་བཤེས་ངག་དབང་རིག་གསལ་སོགས་བསྟེན་ནས་གཞུང་ཆེན་སློབ་གཉེར་དང་། གཞུང་གསར་འཛིན་གྲྭའི་སྐབས་སྦྱོར་ལམ་སྔ་རྒོལ་གྱི་རིགས་ཆུང་ཚོགས་བཞེངས་གནང་།
༡༩༥༤ ལོར་བཀྲ་ཤིས་ལྷུན་པོར་རྩོད་རྒྱུགས་ཐེངས་དང་པོ་བཞེས་སྐབས། རྡོ་གཅལ་ཆེན་མོར། ཕར་ཕྱིན་སྐབས་བཞི་པའི་ཕྱིར་མི་ལྡོག་པའི་རྟགས་ཀྱི་སྐོར་ནས་རྟགས་གསལ་བགྲོ་གླེང་དང་། དཀྱིལ་ཁང་གྲྭ་ཚང་དུ་དབུ་མའི་སྐོར་ལ་དམ་བཅའ་ཉིན་འཁྱོངས་བཞག །༧ཀུན་གཟིགས་པཎ་ཆེན་རིན་པོ་ཆེའི་དགོངས་གཞི་བཞིན་ ༡༩༥༨ ལོར་བཀྲ་ཤིས་ལྷུན་པོར་ཉི་འོད་སློབ་གྲྭ་ཆེད་འཛུགས་བསྐྱངས་པར་བཅར་ཏེ་ལོ་ཕྱེད་གཉིས་རིང་གཞུང་ཆེན་ཁག་ལ་བསྐྱར་ཞིབ་སློབ་གཉེར་དང་། རྒྱལ་རབས་ཆོས་འབྱུང་། སྙན་སུམ་རིག་གནས་ཀྱི་སྐོར་ལའང་ཐུགས་གཉེར་གནང་།
༡༩༦༡ ལོར་འཕགས་ཡུལ་དུ་ཕེབས་ཏེ་སྦག་སར་སློབ་གཉེར་གྱི་འཕྲོ་བསྐྱངས་ཤིང་ཞོར་དུ་གྲྭ་ཚང་དཔར་ཁང་དུ་དཔེ་ཆར་ཞུས་དག་གནང་། ༡༩༦༧ ལོར་ཝཱ་རཱ་ཎ་སཱིའི་མཐོ་སློབ་ཏུ་ལོ་གསུམ་བཞུགས་ཏེ་ཨ་ཙཱརྱའི་སློབ་ཐོན་ལག་འཁྱེར་བཞེས།
༡༩༧༡ལོར་རང་གཞུང་ཆོས་དོན་ལྷན་ཁང་གི་བཀའ་འབྲེལ་ལྟར། རྒྱུད་སྨད་གྲྭ་ཚང་དུ་སྒྲིག་ཞུགས་གནང་སྟེ་ལོ་བཅུ་ཙམ་རིང་ཆོས་ཐོག་འགྲིམ་པ་དང་། ཡི་དམ་ཁག་གི་ཆོ་ག །དཀྱིལ་འཁོར་བྲི་ཐིག་སོགས་ལ་སྦྱང་བརྩོན་གནང་། གཞན་༧གོང་ས་༧སྐྱབས་མགོན་ཆེན་པོ་མཆོག་དང་ཡོངས་འཛིན་རྣམ་གཉིས། རྒྱུད་གྲྭའི་མཁན་པོ་སོགས་ལས་རྒྱུད་སྡེ་ཁག་གི་དབང་ལུང་མན་ངག་གང་མང་ཞུས།
༡༩༧༦ལོར་ཊཱིཀྐའི་སྐྱོར་དཔོན་གནང་། ལོ་དེར་སྔགས་ཀྱི་དམ་བཅའ་དང་། ༡༩༨༠ལོར་ཁྲིད་ཁང་སྐྱོར་དཔོན་གནང་། ལོ་དེར་དགེ་བཤེས་བཟོད་པ་མཆོག་གིས་སྐུལ་མ་གནང་བ་ལྟར་ཨ་རིར་ཕེབས་ཏེ་ཕྱི་ནང་གི་དོན་གཉེར་ཅན་དག་ལ་ལམ་རིམ་ཆེ་ཆུང་སོགས་ཀྱི་ཆོས་སྦྱིན་གང་མང་གནང་།
༡༩༩༩ ལོར་༧གོང་ས་༧སྐྱབས་མགོན་ཆེན་པོས་སེར་བྱེས་མཁས་སྙན་གྲྭ་ཚང་གི་མཁན་པོའི་ཕྱག་རྟགས་ཕེབས་དོན་ལྟར་ལོ་དེར་གྲྭ་ཚང་གི་མཁན་ཁྲིར་ཕེབས་ཏེ་ལོ་ལྔ་དང་ཕྱེད་ཀྱི་རིང་སློབ་གཉེར་འཕེལ་རྒྱས་སོགས་ལ་དམིགས་ཏེ་དབུ་ཕར་འཛིན་གྲྭའི་སློབ་ཡུན་སྤར་བ་དང་། དཔལ་ཡི་དམ་རྟ་མགྲིན་ཡང་གསང་གི་སྐུ་ཐང་མདུན་དུ་སེར་བྱེས་གྲྭ་ཚང་གི་སྒྲིག་ཁོངས་ཀྱི་བླ་གྲྭ་འདུས་མང་ཡོངས་ལ་རྩོད་གཞི་ཅན་གྱི་དྲེགས་པ་དོལ་རྒྱལ་ནམ་ཡང་བསྟེན་གསོལ་མི་བྱེད་པའི་མནའ་སྐྱེལ་དམ་འཇོག་གནང་དུ་བཅུག་པ་སོགས་ཆོས་སྲིད་གཉིས་ཆ་ནས་དྲིན་གྱིས་བསྐྱངས་ཤིང་། ༢༠༠༩ ལོའི་ཕྱི་ཟླ་༡༡ཚེས་༣ཉིན་དགོངས་པ་ཆོས་དབྱིངས་སུ་ཐིམ་ཚུལ་མཛད། [སེར་བྱེས་ངོ་སྤྲོད་གཏེར་གྱི་ཁ་བྱང་དང་། སེར་བྱེས་ཆོས་འབྱུང་རྟ་བདུན་བདག་པོའི་འོད་ཟེར་གཉིས་ཀྱི་མཁན་གྲངས་བཀོད་སྟངས་མི་མཐུན་པར་འདུག་ན། ང་ཚོས་སྔ་མ་ལྟར་བཀོད་ཡོད།]

༢༠༡༥.༠༨.༠༦ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་]ཞེས་རྩོམ་ཁུངས་ཁ་གསལ་འགོད་དགོས།

སེར་བྱེས་མཁན་རབས་དོན་གཉིས་པ་བྱམས་པ་ཐེག་མཆོག་མཆོག་ནི། ཕྱི་ལོ་༡༩༣༠ ལོར་བོད་འཕན་པོར་འཁྲུངས། དགུང་ལོ་བརྒྱད་ཀྱི་སྟེང་སེར་བྱེས་མཁས་སྙན་གྲྭ་ཚང་དུ་ལྭ་བ་མཁན་པོའི་དྲུང་ནས་རབ་ཏུ་བྱུང་། དགུང་ལོ་བཅུའི་སྟེང་༧རྒྱལ་བའི་ཡོངས་འཛིན་ཕུར་ལྕོག་རིིན་པོ་ཆེའི་ལས་དགེ་ཚུལ་གྱི་སྡོམ་པ་མནོས།
དགུང་ལོ་བཅུ་གཅིག་ཙམ་ནས་བསྡུས་གྲྭ་དང་བློ་རྟགས། ཚད་མ། དབུ་ཕར་སོགས་གཞུང་ཆེན་ཐུགས་གཉེར་གྱི་དབུ་བཙུགས། དགུང་ལོ་ཉེར་བཞིའི་སྐབས་བྲག་རི་རྡོ་རྗེ་འཆང་ལས་དགེ་སློང་གི་སྡོམ་པ་བཞེས།
༡༩༥༩ ལོར་ཞབས་བགྲོད་ཀྱིས་སྒང་ཏོག་ཁུལ་དུ་འབྱོར་ཏེ། འབྲས་ལྗོངས་བློན་ཆེན་བརྒྱུད་སྦག་ས་ཆོས་སྒར་དུ་སློབ་གཉེར་གྱི་མཇུག་སྐྱོང་ཆོག་པའི་སྙན་སེར་ཞུས་དོན་ལྟར་རྒྱ་གར་གཞུང་ནས་བཀའ་འཁྲོལ་ཐོབ་སྟེ་སྦག་ས་ཆོས་སྒར་དུ་ཕེབས་ནས་གཞུང་ཆེན་ཐུགས་གཉེར་ཀྱི་འཕྲོ་བསྐྱངས་ཤིང་། སྐབས་དེའི་སེར་བྱེས་མཁན་པོ་དོན་གྲུབ་སྟོབས་རྒྱལ་གྱིས་ལྷ་རམས་པའི་མཚན་གནས་གནང་བ་ལྟར་ལྷ་རམས་འཛིན་གྲྭར་ལོ་བཞིའི་རིང་ལ་གཞུང་ཆེན་སྤྱི་དང་ལྷག་པར་དུ་འདུལ་མཛོད་གཉིས་ལ་གསན་བསམ་རྒྱ་ཆེར་གནང་།
༧གོང་ས་མཆོག་དང་རྒྱ་གར་ཤེས་རིག་ལས་ཁུངས་སོགས་ཀྱི་བཀའ་དགོངས་ལྟར་སྦག་ས་མཐོ་རིམ་སློབ་གྲྭའི་རྣམ་པར་བསྒྱུར་རྒྱུའི་གཏན་ཁེལ་བྱུང་དོན་ལྟར་མ་སུ་རིར་ཆོས་བརྒྱུད་བཞིའི་མཁས་དབང་རྣམས་བསྡུས་ནས་གཙུག་ལག་སློབ་དཔོན་འཛིན་གྲྭ་གསར་འཛུགས་ཀྱི་སྐབས་སུ་དེར་ཕེབས་ནས་སློབ་གཉེར་གནང་། དེ་གར་སློབ་གཉེར་གྲུབ་རྗེས་སྦག་ས་ཆོས་སྒར་དུ་ལོ་གཅིག་རིང་ལ་གཙུག་ལག་སློབ་དགེ་གནང་།
དེ་རྗེས་ཝཱ་རཱ་ཎ་སཱིའི་མཐོ་སློབ་ཏུ་ལོ་གསུམ་བཞུགས་ཏེ་ཨ་ཙཱརྱའི་སློབ་ཐོན་ལག་འཁྱེར་བཞེས། དེ་ནས་༧གོང་ས་མཆོག་གི་བཀའ་དགོངས་བཞིན་ཝཱ་ཎ་མཐོ་རིམ་སློབ་གྲྭའི་སློབ་དཔོན་ལོ་བདུན་གནང་། དེ་རྗེས་བླ་མ་ཡེ་ཤེས་མཆོག་གི་ཐུགས་རེ་ལྟར་དབྱིན་ཡུལ་དང་ཕ་རན་སི་སོགས་ཕྱིའི་ཡུལ་གྲུ་རྣམས་སུ་ལོ་བཅུའི་རིང་ལ་ཆོས་སྦྱིན་སྤེལ།
༡༩༩༣ ལོར་༧གོང་ས་༧སྐྱབས་མགོན་ཆེན་པོས་སེར་བྱེས་མཁས་སྙན་གྲྭ་ཚང་གི་མཁན་པོའི་ཕྱག་རྟགས་ཕེབས་དོན་ལྟར་ལོ་དེར་སེར་བྱེས་གྲྭ་ཚང་གི་མཁན་ཁྲིར་ཕེབས་ཏེ་ཆོས་སྲིད་གཉིས་ཆ་ནས་དྲིན་གྱིས་བསྐྱངས། ༢༠༡༥ ལོར་དགོངས་པ་ཆོས་དབྱིངས་སུ་ཐིམ་ཚུལ་མཛད། [སེར་བྱེས་ངོ་སྤྲོད་གཏེར་གྱི་ཁ་བྱང་དང་། སེར་བྱེས་ཆོས་འབྱུང་རྟ་བདུན་བདག་པོའི་འོད་ཟེར་གཉིས་ཀྱི་མཁན་གྲངས་བཀོད་སྟངས་མི་མཐུན་པར་འདུག་ན། ང་ཚོས་སྔ་མ་ལྟར་བཀོད་ཡོད།]

༢༠༡༥.༠༨.༠༦ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་]ཞེས་རྩོམ་ཁུངས་ཁ་གསལ་འགོད་དགོས།

སེར་བྱེས་མཁན་རབས་དོན་གཅིག་པ་བློ་བཟང་ཚེ་རིང་མཆོག་ནི། ཕྱི་ལོ་༡༩༢༣ལོར་བོད་དུ་རྗེ་བཙུན་ཏཱ་ར་ནཱ་ཐའི་གདན་ས་གཙང་དགོན་རྟག་བརྟན་ཕུན་ཚོགས་གླིང་གི་ཉེ་འདབས་གནས་གསར་ཞེས་པའི་ཡུལ་དུ་སྐུ་འཁྲུངས།
དགུང་ལོ་ལྔའི་སྟེང་རྟག་བརྟན་ཕུན་ཚོགས་གླིང་དུ་ཆོས་ཞུགས་ཀྱིས་ཆོས་སྤྱོད་རྣམ་གསུམ་སོགས་ཐུགས་འཛིན་དང་སྐྱོར་སྦྱང་གནང་། དགུང་ལོ་བཅུ་གཉིས་ཀྱི་སྐབས་བཀྲ་ཤིས་ལྷུན་པོའི་མཁན་རིན་པོ་ཆེའི་མདུན་ནས་དགེ་ཚུལ་གྱི་སྡོམ་པ་མནོས།
དེ་ནས་དགེ་བཤེས་མཁྱེན་རབ་བག་བྲོ་བསྟེན་ནས་བསྡུས་གྲྭ་དང་བློ་རྟགས་སོགས་ཀྱི་དཔེ་ཁྲིད་ཞུས་ཤིང་ལོ་ལྔ་ཙམ་གྱི་རིང་གཞིས་དགོན་རྟག་བརྟན་ཕུན་ཚོགས་གླིང་དུ་བཞུགས།
དགུང་ལོ་བཅུ་བདུན་སྐབས་སེར་བྱེས་གྲྭ་ཚང་དུ་ཆོས་ཞུགས་དང་ཁྲི་ཟུར་ལྷུན་གྲུབ་བརྩོན་འགྲུས་དང་སེར་བྱེས་མཁན་ཟུར་ལྷུན་གྲུབ་ཐབས་མཁས། བཤེས་གཉེན་ངག་དབང་དགེ་འདུན། དགེ་བཤེས་ངག་དབང་རིག་གསལ་བཅས་བསྟེན་ནས་གཞུང་ཆེན་ཁག་ལ་ཐུགས་གཉེར་གནང་།
གཞུང་གསར་འཛིན་གྲྭའི་སྐབས་གྲྭ་ཚང་དུ་རིགས་ཆུང་ཚོགས་བཞེངས་དང་། གཞུང་རྙིང་འཛིན་གྲྭའི་སྐབས་གཞིས་དགོན་གྱི་ཕྱག་སྲོལ་ལྟར་དེར་ཕེབས་ཏེ་ཉིན་གཉིས་རིང་དམ་འཇོག་དང་དཀའ་ཆེན་གྱི་མཚན་བཏགས་བཞེས། དེ་ནས་སླར་ཡང་དབུས་སུ་ཕེབས་ཏེ་ཟུར་བཀོལ་དང་ཕར་ཕྱིན། དབུ་མ་བཅས་ལ་གསན་བསམ་མཛད། དབུ་རྙིང་འཛིན་གྲྭའི་སྐབས་གཞིས་དགོན་ནས་ལས་ཁྲལ་ལྟར་དེར་ལོ་གཅིག་རིང་དགེ་བསྐོས་དང་ལོ་གསུམ་ལ་དཔེ་ཁྲིད་གནང་སྟེ་བཞུགས།
༡༩༥༤ ལོར་བཀྲ་ཤིས་ལྷུན་པོར་ཕེབས་ཏེ་དེ་གའི་མཁས་པ་རྣམས་དང་བགྲོ་གླེང་གནང་བ་དང་། དེ་ནས་སེ་རར་ཕེབས་ཏེ་འདུལ་བ་དང་མཛོད་སོགས་ལ་གསན་བསམ་མཐར་ཕྱིན་པར་གནང་།
༡༩༥༩ ལོར་རྒྱ་དམར་གྱི་བཙན་གནོན་འོག་ལོ་བདུན་ཙམ་གྱི་རིང་བཙོན་ཁང་དུ་བཞུགས་དགོས་བྱུང་སྟེ་མི་སྤྱོད་ལས་འདས་པའི་མནར་གཅོད་ཡ་ང་བ་བཏང་བ་དང་། དེ་རྗེས་རྒྱ་མིའི་སྲིད་ཇུས་ཅུང་གུ་ཡངས་བྱུང་སྟེ་བཙོན་གྲོལ་ཐོབ་ནས་ཀྱང་འཁྲུངས་ཡུལ་དུ་སྐུ་མཆེད་ཀྱི་སར་ལྟ་རྟོག་གི་འོག་ཏུ་ལོ་གསུམ་ཙམ་རིང་སྐུ་ངལ་ཆེན་པོའི་ངང་བཞུགས་དགོས་བྱུང་།
༡༩༦༩ལོར་ཡང་བསྐྱར་རྒྱ་མིས་བོད་མིར་དྲག་གནོན་དང་ཉེས་མེད་སྲོག་ཐོག་གཏོང་བ་སོགས་ཀྱི་བཙན་དབང་འོག་ཏུ་བཞུགས་བློས་མ་བཟོད་པར། འཁྲུངས་ཡུལ་གཅིག་པའི་མི་གཉིས་དང་བཅས་སྐུ་སྲོག་བློས་གཏོང་གིས་ཉིན་མོར་རི་སུལ་དུ་ཡིབས་ཤིང་མཚན་མོར་འགྲུལ་བཞུད་གནང་སྟེ་འབྲས་ལྗོངས་བརྒྱུད་རྒྱ་གར་དུ་ཕེབས་ཐུབ་པ་བྱུང་ན་ཡང་། ཡུལ་ཁྲིམས་ལྟར་ས་གནས་ཀྱི་བཙོན་ཁང་དུ་ཉིན་བཅུའི་རིང་བཀག་ཉར་དང་འདྲི་ཞིབ་གནང་སྟེ་བཞུགས་དགོས་བྱུང་མོད། ༧ཡོངས་འཛིན་ཁྲི་བྱང་རིན་པོ་ཆེ་དང་སེར་བྱེས་གྲྭ་ཚང་གཉིས་ནས་རྣམ་སྲས་གླིང་སྐུ་ངོ་སོགས་ལ་ཕྱག་བྲིས་གནང་བ་ལས། ༡༩༧༠ ལོར་༧རྒྱལ་བའི་སྐུ་ཚབ་དོན་གཅོད་ཀྱིས་ཐུགས་ཁུར་བསྐྱངས་ཏེ་ཁོང་དང་གཞན་མི་བཅོ་ལྔ་བཅས་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་ཕེབས་ཐུབ་པ་བྱུང་།
དེར་༧ཡོངས་འཛིན་ཁྲིི་བྱང་རིན་པོ་ཆེ་དང་། སེར་བྱེས་མཁན་ཟུར་བློ་བཟང་དབང་ཕྱུག་གཉིས་ཀྱིས་གྲྭ་ཚང་རང་དུ་བཞུགས་ནས་སློབ་གཉེར་བ་རྣམས་ལ་དཔེ་ཁྲིད་གནང་དགོས་གསུངས་པ་ལྟར་གྲྭ་ཚང་དུ་བཞུགས།
༡༩༧༣ལོར་སྐབས་དེའི་གྲྭ་ཚང་གི་མཁན་པོ་དོན་གྲུབ་སྟོབས་རྒྱལ་མཆོག་གིས་ལྷ་རམས་དགེ་བཤེས་ཀྱི་མཚན་རྟགས་གནང་ན་ཡང་། བསྙེན་བཀུར་ཞུ་རྟེན་གང་ཡང་མེད་པར་བརྟེན་དགོངས་ཞུ་གནང་ན་ཡང་དགོངས་འཁྲོལ་མ་གནང་སྟབས། ལོ་དེར་གདན་ས་གསུམ་ལ་དམ་འཇོག་དང་ལྷ་རམས་ཨང་དང་པོའི་མཚན་གནས་བཞེས།
༡༩༧༨ ལོར་ཚོགས་ཆེན་དང་གྲྭ་ཚང་གི་དགེ་བསྐོས་ལོ་གཉིས་གནང་། ༡༩༨༦ ལོར་༧གོང་ས་༧སྐྱབས་མགོན་ཆེན་པོས་སེར་བྱེས་མཁས་སྙན་གྲྭ་ཚང་གི་མཁན་པོའི་ཕྱག་རྟགས་ཕེབས་དོན་ལྟར་ལོ་དེར་སེར་བྱེས་གྲྭ་ཚང་གི་མཁན་ཁྲིར་བཞུགས་ཏེ་ལོ་བདུན་ལྷག་གི་རིང་ཆོས་སྲིད་གཉིས་ནས་ཡར་རྒྱས་དང་གོང་འཕེལ་བཏང་ཞིང་། སྐབས་དེར་༧གོང་ས་༧སྐྱབས་མགོན་ཆེན་པོས་སློབ་གཉེར་བ་རྣམས་ལ་སྨན་སླད་ཧིན་སྒོར་༥༠༠༠༠སྩལ་གནང་བྱུང་བ་མ་དངུལ་བྱས་ཏེ་འཕྲོད་བསྟེན་ཁང་གསར་འཛུགས་དང་། སློབ་གཉེར་བའི་གཟིགས་དཔེ་དང་མཐུན་རྐྱེན་ལ་དམིགས་ཏེ་འཕྲུལ་དཔར་ཁང་དང་རུམ་འཐག་བཟོ་གྲྭ་གསར་འཛུགས་མཛད།
མཁན་པོའི་མཛད་ཡུན་འཁྱོལ་ནས་ཡི་དམ་རྡོ་རྗེ་འཇིགས་བྱེད་ཀྱི་བསྙེན་ཆེན་ལོ་གསུམ་ཙམ་བཞུགས་རིང་ཡང་༧གོང་ས་མཆོག་གིས་བཀའ་གནང་དོན་ལྟར་སློབ་གཉེར་བ་རྣམས་ལ་དཔེ་ཁྲིད་ཆག་མེད་གནང་ཞིང་། ཕྱི་རྒྱལ་ཡུལ་གྲུ་དུ་མ་དང་རྒྱུན་དུ་གདན་ས་རང་དུ་བཞུགས་ཏེ་གྲྭ་ཚང་གཉིས་དང་ཕྱི་ནང་གི་དོན་གཉེར་ཅན་མང་པོར་དཔེ་ཁྲིད་སོགས་གནང་མུས་སུ། ༢༠༡༤ལོའི་ཟླ་༧ཚེས་༡ཉིན་དགོངས་པ་ཆོས་དབྱིངས་སུ་ཐིམ་ཚུལ་མཛད།[སེར་བྱེས་ངོ་སྤྲོད་གཏེར་གྱི་ཁ་བྱང་དང་། སེར་བྱེས་ཆོས་འབྱུང་རྟ་བདུན་བདག་པོའི་འོད་ཟེར་གཉིས་ཀྱི་མཁན་གྲངས་བཀོད་སྟངས་མི་མཐུན་པར་འདུག་ན། ང་ཚོས་སྔ་མ་ལྟར་བཀོད་ཡོད།]

༢༠༡༥.༠༨.༠༦ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་]ཞེས་རྩོམ་ཁུངས་ཁ་གསལ་འགོད་དགོས།

སེར་བྱེས་མཁན་རབས་རེ་དགུ་པ་བཀའ་འགྱུར་བ་བློ་བཟང་ཐུབ་བསྟན་མཆོག་ནི། ཕྱི་ལོ་༡༩༢༤ ལོར་བོད་དུ་དར་རྒྱས་དགོན་གྱི་ནུབ་བྱང་ཕྱོགས་རི་མདའ་གྲོང་དུ་སྐུ་འཁྲུངས། ཆུང་དུས་ནས་ཞང་པོ་སོགས་ལས་ཡི་གེ་འབྲི་ཀློག་རིམ་གྱིས་སྦྱངས།
དགུང་ལོ་བདུན་གྱི་སྐབས་དར་རྒྱས་དགོན་དུ་རབ་ཏུ་བྱུང་། དགུང་ལོ་བཅོ་བརྒྱད་སྟེང་དབུས་སུ་ཕེབས་ཏེ། སེར་བྱེས་གྲྭ་ཚང་དུ་ཆོས་ཞུགས་དང་། ཕུར་ལྕོག་བྱམས་པ་ཚུལ་ཁྲིམས་ལས་དགེ་བསྙེན་དང་རབ་བྱུང་དགེ་ཚུལ་བཅས་ཀྱི་སྡོམ་པ་ཞུས།
དགེ་རྒན་དོན་གྲུབ་སྟོབས་རྒྱལ་དང་དགེ་བཤེས་བློ་བཟང་བྱམས་པ་མཁས་གྲུབ་བསྟེན་ནས་བསྡུས་གྲྭ་ནས་གཞུང་ཆེན་བཀའ་པོད་ལྔའི་དཔེ་ཁྲིད་ཞུས་ཤིང་གཞུང་ཆེན་ཐུགས་གཉེར་གནང་། བསྡུས་ཆེན་འཛིན་གྲྭའི་སྐབས་ཕུར་ལྕོག་རིན་པོ་ཆེ་བྱམས་པ་ཚུལ་ཁྲིམས་ལས་དགེ་སློང་གི་སྡོམ་པ་མནོས།
དགེ་བཤེས་མཐུ་སྟོབས་དང་། དགེ་བའི་བཤེས་གཉེན་ཆེན་པོ་ཨོ་རྒྱན་ཚེ་བརྟན་མཆོག་ལས་ཀྱང་གཞུང་ཆེན་ཁག་གི་དཔེ་ཁྲིད་ཞུས་ཤིང་། ལྷག་པར་དུ་ཕྱི་མའི་མདུན་ནས་དབང་ལུང་མན་ངག་གང་མང་ཞུས། དབུ་གསར་སྐབས་བྲག་རི་རིན་པོ་ཆེ་ལས་རྒྱལ་བའི་བཀའ་འགྱུར་གྱི་ལྗགས་ལུང་ཞུས་པའི་སྐལ་བ་ཐོབ།
༧གོང་ས་མཆོག་སོགས་དམ་པ་མང་པོའི་མདུན་ནས་ཀྱང་དབང་ཁྲིད་ལུང་མན་ངག་སོགས་གང་མང་ཞུས། ཕར་ཕྱིན་ལོ་གཉིས་པའི་སྐབས་ནས་བཟུང་སློབ་བུ་སུམ་ཅུ་སྐོར་ལ་དཔེ་ཁྲིད་ཡང་རྒྱུན་དུ་བསྐྱངས། ༡༩༥༩ ལོར་འཕགས་ཡུལ་དུ་ཕེབས་ཏེ་སྦག་ས་ཆོས་སྒར་དུ་བཞུགས་ཤིང་དེར་སློབ་གཉེར་མཇུག་སྐྱོང་དང་ཞོར་དུ་སློབ་གཉེར་བ་རྣམས་ལ་དཔེ་ཁྲིད་ཀྱང་གནང་། ༧ཡོངས་འཛིན་ཁྲི་བྱང་རིན་པོ་ཆེ་ལས་སུམ་རྟགས་སོགས་ལའང་ཐུགས་བརྩོན་གནང་། དེར་གཞུང་ཆེན་སློབ་གཉེར་དང་འབྲེལ་འདུལ་སྡོམ་རིན་པོ་ཆེའི་ཕྲེང་བ་ལྗགས་རྩོམ་མཛད།
༡༩༦༤ ལོར་སྦག་ས་ཆོས་སྒར་དུ་ལྷ་རམས་དམ་འཇོག་དང་ལྷ་རམས་ཨང་གཉིས་པའི་མཚན་གནས་བཞེས། ༡༩༦༥ ལོར་ཝཱ་རཱ་ཎ་སཱིའི་མཐོ་སློབ་གསར་འཛུགས་སྐབས་སློབ་དཔོན་འོས་སྦྱོང་དུ་ཕེབས། དེ་ནས་སྦག་ས་ཆོས་སྒར་སློབ་གྲྭའི་རྣམ་པར་བསྒྱུར་རྗེས་སློབ་དཔོན་གནང་སྟེ་འཛིན་གྲྭ་མང་པོར་དཔེ་ཁྲིད་གནང་། ༡༩༦༨ལོའི་ཕྱི་ཟླ་༡༢པར་སྦག་ས་ནས་སེ་རའི་དགེ་འདུན་པ་རྣམས་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་སུ་གནས་སྤོ་མཛད་སྐབས་ལྷན་ཕེབས་གནང་སྟེ། སེ་རར་ཡི་དམ་ཁག་གི་བསྙེན་མཚམས་ལ་བཞུགས་གནང་མཛད།
༡༩༧༢ ལོར་སྐུ་སྒེར་ཡིག་ཚང་ནས་བཀའ་རྒྱ་ཕེབས་དོན་ལྟར་ཐེག་ཆེན་ཆོས་གླིང་གཙུག་ལག་ཁང་དུ་བཀའ་འགྱུར་གྱི་ལུང་རྒྱུན་སྤེལ། རང་གཞུང་ནས་བཀའ་འགྱུར་བླ་མ་ཞེས་པའི་མཚན་གནས་ཀྱང་གནང་། དེ་ནས༧གོང་ས་མཆོག་གིས་སེར་བྱེས་གྲྭ་ཚང་གི་དགེ་བསྐོས་སུ་ཕྱག་རྟགས་ཕེབས་དོན་ལྟར་ལོ་གཉིས་ཀྱི་རིང་སེར་བྱེས་གྲྭ་ཚང་གི་དགེ་བསྐོས་གནང་རིང་དེ་སྔའི་ལམ་སྲོལ་གཞུང་གསར་དང་དབུ་གསར་གྱི་མཚན་ཕུད། རིགས་ཆུང་ཚོགས་ལངས། སེར་བྱེས་ལྷ་རམས་འཛིན་གྲྭའི་ཐུན་མོང་མ་ཡིན་པའི་སྒྲིག་ཁྲིམས་རྣམས་བསྐྱར་གསོ་དང་། གྲྭ་ཚང་གི་ལམ་རིམ་དང་མཐུན་པའི་ཚོགས་གཏམ་ཆེན་མོ་དེ་ཉིད་ཡི་གེར་ཕབ་པར་མཛད། དེ་རྗེས་སེར་བྱེས་སློབ་གྲྭ་གསར་འཛུགས་ཀྱི་སྐབས་སུ་དགེ་བཤེས་བཀྲ་ཤིས་འབུམ་དང་ལྷན་དུ་ཐུགས་འགན་བཞེས། གྲྭ་ཚང་གི་སློབ་གཉེར་རྒན་ཡང་ཡུན་རིང་གནང་།
༡༩༨༣ ལོར་༧གོང་ས་༧སྐྱབས་མགོན་ཆེན་པོས་སེར་བྱེས་མཁས་སྙན་གྲྭ་ཚང་གི་མཁན་པོའི་ཕྱག་རྟགས་ཕེབས་དོན་ལྟར་སེར་བྱེས་གྲྭ་ཚང་གི་མཁན་ཁྲིར་ཕེབས། སེར་བྱེས་ལྷ་རམས་འཛིན་གྲྭ་ནས་འཛིན་གྲྭའི་ནང་དུ་མཚོ་ཊཱིཀ་དང་མཛོད་འགྲེལ་མངོན་པའི་རྒྱན་གཉིས་ཀྱི་ཤོག་ལྷེ་གྲངས་བཅད་ཀྱིས་ཉིན་ལྟར་སྐྱོར་ནས་བགྲོ་གླེང་གནང་དགོས་པ་དང་། ལྷ་རམས་མ་ཐོན་བར་སྤྱི་སྒེར་གྱི་ལས་བྱེད་ལ་བསྐོ་མི་ཆོག་པའི་སྒྲིག་གཞི་གཏན་འབེལ་གནང་། ༡༩༨༥ལོར་དད་ལྡན་འགས་ནན་ཞུས་ལ་བརྟེན་ཆོས་ཞུ་བ་ཉིས་བརྒྱ་ལྷག་ལ་རྟ་མགྲིན་ཡང་གསང་གི་དབང་ཆེན་གནང་།
༡༩༨༦ལོར་ཡི་དམ་རྟ་མགྲིན་ཡང་གསང་གི་ཆོས་སྐོར་ཡོངས་ཀྱི་དབང་དང་བཤད་ཁྲིད་མན་ངག་གི་རྒྱུན་གྲྭ་ཚང་རང་དུ་ཡུན་རིང་གནས་སླད་བོད་ནས་ཕེབས་པའི་སེར་བྱེས་སོག་པོའི་དགེ་བཤེས་སེངྒེ་ལགས་གྲྭ་ཚང་དུ་གདན་ཞུ་གནང་སྟེ་འདུས་མང་ལ་གྲྭ་ཚང་གི་གཙུག་ལག་ཁང་དུ་དབང་དང་རྗེས་གནང་སོགས་སྩལ་བ་གསན་གནང་མཛད། ༡༩༨༧ ལོར་མཁན་པོོ་དགོངས་འཁྲོལ་བྱུང་བ་ལྟར་ཟུར་བཞུགས་མཛད་པ་དང་ཀོ་པན་དགོན་དང་ཕྱིའི་ཡུལ་གྲུ་ཁག་ཏུ་ཕེབས་ཏེ་ཕྱི་ནང་གི་དོན་གཉེར་ཅན་རྣམས་ལ་ཆོས་སྦྱིན་གནང་།
༢༠༠༠ ལོར་བོད་དུ་ཕེབས་ཏེ་དད་རྣམས་ལ་དབང་ཁྲིད་ལུང་ཆོས་གང་མང་གནང་ཞིང་། དགེ་ཚུལ་སློང་གི་སྡོམ་པ་ཞུ་མཁན་གང་མང་ཞིག་ལ་འདོད་མོས་བཞིན་སྡོམ་པ་སྩལ། དེ་ནས་ཕྱིར་ཕེབས་ཏེ་གདན་ས་རང་དང་ཕྱིའི་ཡུལ་གྲུ་ཁག་ཏུ་ཕྱི་ནང་གི་དོན་གཉེར་ཅན་རྣམས་ལུང་ཆོས་མན་ངག་སོགས་ཀྱིས་བརྩེ་བར་བསྐྱངས་ཏེ་བཞུགས་མུར། ༢༠༡༤ ལོར་དགོངས་པ་ཆོས་དབྱིངས་སུ་ཐིམ་ཚུལ་མཛད། [སེར་བྱེས་ངོ་སྤྲོད་གཏེར་གྱི་ཁ་བྱང་དང་། སེར་བྱེས་ཆོས་འབྱུང་རྟ་བདུན་བདག་པོའི་འོད་ཟེར་གཉིས་ཀྱི་མཁན་གྲངས་བཀོད་སྟངས་མི་མཐུན་པར་འདུག་ན། ང་ཚོས་སྔ་མ་ལྟར་བཀོད་ཡོད།]

༢༠༡༥.༠༨.༠༦ ལ་སེར་བྱེས་རིག་མཛོད་ཆེན་མོའི་རྩོམ་སྒྲིག་པས་བཏུས་བསྒྲིགས་བྱས།

དྲ་ཚིགས་ཀྱི་ཡིག་ཆ་དག་འདི་ག་རྩོམ་སྒྲིག་ཁང་ལ་དབང་བས་བརྒྱུད་འགོད་བྱ་དགོས་ཚེ་[སེར་བྱེས་རིག་མཛོད་ཆེན་མོ་ལས་དྲངས་]ཞེས་རྩོམ་ཁུངས་ཁ་གསལ་འགོད་དགོས།