མཛད་པ་པོ། དཔའ་བོ་གཙུག་ལག་ཕྲེང་བ།
བརྗོད་བྱ། རྒྱ་གར་དང་བོད་དུ་ཆོས་བྱུང་ཚུལ།
རིག་མཛོད་འཕྲུལ་དེབ་ཨང་། SJRB-0497
མ་ཕྱི། མི་རིགས་དཔེ་སྐྲུན་ཁང་གི་དཔེ་ལྟར་བསྒྲིགས།
ཡིག་ཆའི་རྣམ་པ། PDF
ཤོག་གྲངས། 1048 ལྗིད་ཚད། 5.5MB
རྩོམ་སྒྲིག་ཁང་། སེར་བྱེས་རིག་མཛོད་ཆེན་མོ།
༢༠༢༦ ཟླ་བརྒྱད་པར་གསར་དུ་རྩོམ་སྒྲིག་བྱས།
ངོ་སྤྲོད་མདོར་བསྡུས།
གཞུང་འདིའི་མཛད་པ་པོ་དཔའ་བོ་གཙུག་ལག་ཕྲེང་བ་ནི། རབ་བྱུང་བརྒྱད་པའི་ཤིང་བྱི་ཕྱི་ལོ་༡༥༠༤ལ་སྙེ་ཐང་ཕྱོགས་སུ་འཁྲུངས། དགུང་ལོ་ལྔ་པར་དཔའ་བོ་སྐུ་ཕྲེང་དང་པོ་ཆོས་དབང་ལྷུན་གྲུབ་ཀྱི་སྐུ་སྐྱེར་ངོས་འཛིན་ཞུས། བླ་མ་རྟོགས་ལྡན་དགེ་འདུན་རྒྱ་མཚོ་ལས་འབྲི་ཀློག་སོགས་སྦྱངས། དགུང་ལོ་དགུ་པ་ལ་དགེ་བསྙེན་དང་རབ་བྱུང་དགེ་ཚུལ་དུ་བསྒྲུབས། དགུང་ལོ་བཅུ་གཉིས་པར་ནཱ་རོ་ཆོས་དྲུག་སོགས་གསང་སྔགས་གསར་རྙིང་གི་དབང་ཆོས་མང་པོ་དང་ཕྱག་ཆེན་མ་རིག་མུན་སེལ་སོགས་ཀྱི་ཟབ་གནད་བཀའ་ཁྲིད་གསན། ཕྱི་ལོ་༡༥༢༦ལོར་ཞ་ལུ་ལོ་ཆེན་ཆོས་སྐྱོང་བཟང་པོ་ལས་བསྙེན་པར་རྫོགས། དགུང་ལོ་ཉེར་དགུ་པར་རྒྱལ་དབང་ཀརྨ་པ་ཀུན་མཁྱེན་མི་བསྐྱོད་རྡོ་རྗེ་དང་མཇལ་ཞིང་། ནཱ་རོ་ཆོས་དྲུག་དང་། ཕྱག་ཆེན་ལྷན་ཅིག་སྐྱེས་སྦྱོར། དུས་ཀྱི་འཁོར་ལོའི་དབུས་རྒྱུད་སྡེ་བཞིའི་དབང་བཀའ་རྫོགས་པར་གསན་ནས་རྡོ་རྗེ་ཐེག་པའི་བསྟན་པ་རྫོགས་པར་མཇལ། དབུ་ཚད་འདུལ་མངོན་ཕར་ཕྱིན་དང་། ནང་བརྟག་རྒྱུད་གསུམ་སོགས་མདོ་སྔགས་རིག་གནས་དང་བཅས་པའི་ཟབ་ཆོས་མཐའ་དག་གསན་སྦྱང་མཛད་དེ། ཤེས་བྱ་རིག་གནས་ཀུན་ལ་མཁས་པ་ཕུལ་དུ་ཕྱིན་ཏེ་དཔའ་བོ་གཙུག་ལག་ཕྲེང་བ་ཞེས་སྙན་པའི་གྲགས་པ་འབར། ཕྱི་ལོ་༡༥༣༣ལོ་ནས་ལོ་མང་པོར་སྒར་ཆེན་གྱི་ཀློག་པའི་གནས་བརྟན་གྱི་སློབ་དཔོན་གནང་། དགུང་ལོ་སོ་བདུན་ནས་བཟུང་ཙ་རི་སོགས་སུ་ལོ་ངོ་དུ་མར་སྒོམ་སྒྲུབ་མཛད། ཞྭ་དམར་དཀོན་མཆོག་འབངས་དང་། དཔལ་ཁང་ལོ་ཙཱ་བ། ཀརྨ་པ་དབང་ཕྱུག་རྡོ་རྗེ་སོགས་སློབ་མ་མང་དུ་བསྐྱངས། བསྟན་པའི་གཞི་མ་དགེ་འདུན་གྱི་སྡེ་དུ་མ་གསར་འཛུགས་མཛད། རྟེན་རྙིང་ཞིག་གསོ་དང་གསར་བཞེངས་མཛད་པ་སོགས་བསྟན་པ་འཁོར་ལོ་གསུམ་གྱིས་སྐྱོང་བར་མཛད། མཐར་དགུང་ལོ་རེ་གསུམ་ཕྱི་ལོ་༡༥༦༦ལོར་གཟུགས་སྐུའི་བཀོད་པ་བསྡུས། སྤྱོད་འཇུག་འགྲེལ་ཆེན་དང་། རྩིས་ཀྱི་བསྟན་བཅོས། གསོ་བ་རིག་པའི་རྒྱུད་བཞིའི་རྣམ་བཤད། ཆོས་འབྱུང་མཁས་པའི་དགའ་སྟོན་སོགས་གསུང་རྩོམ་པོད་བཞི་བཞུགས།
འཕྲུལ་དེབ་འདིར་ཆོས་འབྱུང་མཁས་པའི་དགའ་སྟོན་གྱི་ཡན་ལག་གསུམ་པ་བོད་ཀྱི་སྐབས་ཀྱི་ལེའུ་བདུན་པ་མན་ཆད་དང་། ཡན་ལག་བཞི་པ་དང་ཡན་ལག་ལྔ་པ་ཆ་ཚང་བར་བཞུགས།