སེར་བྱེས་རིག་མཛོད་ཆེན་མོ།

སེར་བྱེས་རིག་མཛོད་ཆེན་མོ།

དུས་རབས་ཉེར་གཅིག་པ་བརྡ་འཕྲིན་གྱི་དུས་རབས་འདིར་འོད་རླབས་ཀྱི་འགྲོས་དང་འགྲོགས་ཏེ། ཚན་རྩལ་གྱི་ཤེས་རིག་རབ་ཏུ་དར་བས། མི་རྣམས་ཀྱིས་རང་རིགས་ཀྱི་རིག་གཞུང་དང་ཤེས་རིག་དག་ཀྱང་བརྡ་འཕྲིན་གྱི་ལམ་དུ་སྐྱེལ་ཏེ་སྲུང་སྐྱོབ་དང་། འཕེལ་རྒྱས། དར་སྤེལ་ལ་རེམ་བཞིན་པའི་སྐབས་འདིར། རང་རེའི་གངས་ཅན་པའི་ཆོས་དང་རིག་གཞུང་དག །ཟླུམ་གཟུགས་ཀྱི་གོ་ལ་འདིར་ཡུན་རིང་གནས་པ་དང་། འཕྲིན་ལས་ཀྱི་འཇུག་པ་རླབས་རྡུལ་གྱི་འགྲོས་དང་མཉམ་པ་ཡོང་སླད། འདི་ག་སེར་བྱེས་གྲྭ་ཚང་ནས་ཀྱང་འཕྲུལ་དེབ་དང་། སློབ་ཁྲིད་སྐོར་གྱི་སྒྲ་མཛོད། བརྙན་མཛོད་བཅས་ལས་གྲུབ་པའི་རིག་མཛོད་ཀྱི་དྲ་ཚིགས་འདི་སྒོ་འབྱེད་བྱས་པ་ལགས་ན། གངས་ཅན་པའི་ཆོས་དང་རིག་གཞུང་ལ་མོས་པའི་རིས་མེད་སྐྱེ་བོ་རྣམས་ཀྱིས་ཐུགས་འདོད་ལྟར་ལོངས་སྤྱོད་རྒྱུ་དང་། བསམ་ཚུལ་སོགས་གང་ཡོད་འཛེམ་མེད་དུ་གནང་བ་དང་། གསུང་རབ་ཀྱི་གླེགས་བམ་དག་གཙོ་བྱས་པའི་འཕྲུལ་དེབ་གང་མང་རིན་མེད་དུ་འགྲེམས་སྤེལ་བྱེད་ཀྱིན་ཡོད་པ་དག་སྟབས་བདེའི་རང་བཞིན་ཅན་གྱི་གློག་ཀླད་དང་ལག་ཐོག་ཁ་པར་ཆེ་ཆུང་ (laptop, iPad, iPod iPhone & Android) སོགས་ཀྱི་ནང་དུ་ཐུགས་འདོད་ལྟར་ཕབ་ལེན་དང་གཟིགས་ཀློག་གནང་རོགས། 

དྲ་ཚིགས།: www.serajeyrigzodchenmo.org  གློག་འཕྲིན་ཁ་བྱང་། serajeyrigzodchenmo@gmail.com

2023 ལོའི་ཟླ་བ། Sep ཚེས། 23 རེས་གཟའ། Sat

ཆོས་ལུགས་མཐུན་སྒྲིལ།

ཕན་ཚུན་གྱི་གནས་ཚུལ་གསལ་པོ་ཤེས་རྟོགས་ཐུབ་པའི་ཐོག་ནས་བསམ་བློ་གུ་ཡངས་པོ་ཞིག་དང༌། བློ་གཟུ་བོར་གནས་པའི་ཐོག་ནས་བལྟས་ན། དེང་སང་གི་དུས་ཚོད་འདིར་ཆོས་ལུགས་ཀྱི་ལྟ་བ་མི་འདྲ་བ་དང༌། སྤྱོད་པ་མི་འདྲ་བ། སྟོན་པ་མི་འདྲ་བ་ནས་བཤད་པའི་ཆོས་ལུགས་ཕན་ཚུན་ཚང་མ་ནང་ཁུལ་རྩོད་པ་བྱེད་པའི་དུས་ཚོད་མ་ཡིན་པར་ཚང་མ་མཐུན་པོ་བྱེད་དགོས་པའི་དུས་སྐབས་ཡིན། ཆོས་ལུགས་ཐུན་མོང་གི་ཐོག་ནས་འཛམ་བུ་གླིང་སྤྱི་ལ་ཕན་ཐོགས་གང་ཞིག་བྱེད་རྒྱུ་འདུག་གམ། སེམས་ཅན་ཐམས་ཅད་མ་བྱུང་ན་ཡང༌། སྔོན་ལ་ཁ་ཡོད་ལག་ཡོད་ཀྱི་འཛམ་བུ་གླིང་རིལ་པོ་འདིའི་སྒང་ལ་ཡོད་པའི་སེམས་ཅན་སྤྱི་དང༌། ཡང་སྒོས་འགྲོ་བ་མིའི་རིགས་འདི་རྣམས་མི་མཐུན་པ་མཐུན་པ་ཞིག་དང༌། མཐུན་པ་འདི་བཟང་པོའི་ཕྱོགས་སུ་འགྲོ་ཐུབ་རྒྱུར་ཆོས་ལུགས་ཁག་ཚོའི་ཐོག་ནས་གང་ཞིག་ཐུབ་མིན་ལ་དགོངས་བཞེས་ཀྱི་ལག་ལེན་བསྟར་དགོས་པ་གལ་གནད་ཆེན་པོ་ཆགས་ཡོད།
དེང་སང་འཛམ་བུ་གླིང་འདིའི་སྒང་ལ་དངོས་པོ་ཡར་རྒྱས་ཧ་ལས་པ་ཕྱིན་ཡོད་ཀྱང༌། བསམ་བློའི་ཡར་རྒྱས་ལྡེང་གི་མི་འདུག་ཅེས་བརྗོད་པའི་སྐབས་འདིར། ཆོས་ལུགས་རིས་སུ་མ་ཆད་པ་འདི་རྣམས་བསམ་བློ་ཡར་རྒྱས་ལ་ཞབས་འདེགས་སྒྲུབ་མཁན་དང༌། ཆ་རྐྱེན་སྒྲུབ་མཁན་མིང་རྒྱབ་འཁུར་ཡིན་པའི་ཆ་ནས་མིའི་སྤྱི་ཚོགས་ལ་ཞབས་འདེགས་གང་ཞིག་སྒྲུབ་དགོས་ཀྱི་འདུག་གམ། དེ་ལྟའི་དུས་ཚོད་ཀྱི་ཐོག་ལ་ཆོས་ལུགས་ཀྱི་ལྟ་བ་དང་སྤྱོད་པ་མི་འདྲ་བ་ཡོད་པ་ཚང་མ་མཐུན་པོ་བྱེད་དགོས་ཀྱི་འདུག །དེ་ལྟར་མ་བྱས་ན་དངོས་ཡོད་གནས་ཚུལ་གྱི་ཐོག་ཁེ་ཕན་འབྱུང་མི་ཐུབ་པའི་ཁར་རང་གཞན་གཉིས་ཕུང་ལ་འགྲོ་ཉེན་ཡོད། གྲུབ་མཐའ་ཐ་དད་ཡིན་པ་འདི་དག་ཀྱང་ཕན་ཚུན་གཅིག་གིས་གཅིག་ལ་བརྩི་བཀུར་དང་། གཅིག་གིས་གཅིག་ལ་ཕན་ཚུན་ཉམས་མྱོང་བསླབ། ཕན་ཚུན་སྲོལ་རྒྱུན་མི་འདྲ་བ་ཡོད་པ་རྣམས་གཅིག་གིས་གཅིག་ལ་ཤེས་རྟོགས་ཡོང་བ་བྱ་རྒྱུ་བཅས་ནི། ང་ཚོས་བྱེད་ཐུབ་པ་ཡིན་ལ། བྱེད་དགོས་པ་ཞིག་ཀྱང་ཡིན།
ང་ཚོ་སྟོན་པ་གཅིག་གི་རྗེས་སུ་འབྲང་མཁན་མི་རིགས་ནང་ཚགས་འདི་རྣམས་ཕན་ཚུན་གཅིག་གིས་གཅིག་ལ་དད་པ་དག་སྣང་སྦྱངས། ཐུན་མོང་གི་ཐོག་ནས་བོད་སྤྱི་པའི་དོན་དག་དང༌། སངས་རྒྱས་ཀྱི་བསྟན་པ་སྤྱིའི་དོན་དག་ལ་ཚང་མས་ཕྱར་བ་གྲུ་འདེགས་དང༌། ཁུར་མཉམ་ལེན་བྱེད་ཐུབ་པ་ཞིག་ཡོང་དགོས་པར་བརྟེན། དེ་ལྟ་བུའི་ཆ་རྐྱེན་ལ་སྨན་པ་བྱུང་ན་སྙམ་ནས་འཆར་གཞི་བཏིངས་ཏེ་མཐོ་རིམ་སློབ་གཉེར་བསྟི་གནས་འདི་བཙུགས་པ་རེད། ད་ལྟའི་ཆར་ཡང་ཁྱེད་རང་ཚོ་དགེ་སློབ་ཚང་མའི་སེམས་ལ་གནད་དོན་འདི་དག་ངེས་པ་བྱེད་དགོས།

དུས་ཀྱི་སྟོན་པ་ཆེན་པོའི་གསུང་།

ངོ་ཤོག 5 ནས་ 642

༸གོང་ས་མཆོག་གི་སྒྲ་མཛོད།