ཐོག་མའི་བཟོ་དུས།
Sat, 27/06/2015, 11:08

བྱང་རྩེ་ཆོས་རྗེ་རིན་པོ་ཆེ་རྗེ་བཙུན་བློ་བཟང་བསྟན་འཛིན་མཆོག

དྲ་འཇུག་པ།: 

jangtsechoje lobsang tenzinབྱང་རྩེ་ཆོས་རྗེ་རིན་པོ་ཆེ་རྗེ་བཙུན་བློ་བཟང་བསྟན་འཛིན་མཆོག་ནི། ༡༩༣༥ ལོར་གཙང་སྟོད་ལྷ་རྩེ་ཁུལ་དུ་སྐུ་འཁྲུངས། དགུང་ལོ་བཅུའི་སྐབས་༧གོང་ས་ལྔ་པ་ཆེན་པོས་ཕྱག་བཏབ་པའི་ལྷ་རྩེ་ཆོས་སྡེ་དགོན་དུ་སྒྲིག་ཞུགས་ཀྱིས་མཁན་ཆེན་བསྟན་འཛིན་རྒྱ་མཚོའི་དྲུང་ལས་ཚིགས་སྔ་མ་དགེ་ཚུལ་གྱི་སྡོམ་པ་བཞེས། དེ་ནས་དགོན་པའི་སྒྲིག་སྲོལ་ལྟར་ཆོས་སྤྱོད་རབ་གསལ་དང་རྒྱན་འཇུག་གཉིས་སོགས་ཐུགས་འཛིན་གནང་ནས་ཚོགས་རྒྱུགས་ཕུལ་ཏེ་སློབ་གཉེར་པའི་གྲལ་དུ་ཚུད། དེར་བློ་རྟགས་སོགས་ལ་སྦྱང་བརྩོན་གནང་བར་མ་ཟད། ༧གོང་ས་ལྔ་པ་ཆེན་པོས་མཛད་པའི་ཕར་ཕྱིན་དང་། དབུ་མ། འདུལ་མཛོད་བཅས་ཀྱི་རང་ལུགས་གང་ཡིན་ཐུགས་འཛིན་གནང་སྟེ་འདུས་མང་དབུས་སུ་ཚོགས་རྒྱུགས་ཕུལ། དགུང་ལོ་བཅུ་དྲུག་གི་སྐབས་སེར་བྱེས་གྲྭ་ཚང་དུ་སྒྲིག་ཞུགས་གནང་། སེར་བྱེས་མཁན་ཟུར་ལྷུན་གྲུབ་ཐབས་མཁས་མཆོག་དང་། དགེ་བཤེས་ངག་དབང་དགེ་འདུན། དགེ་བཤེས་ངག་དབང་རིག་གསལ། དགེ་བཤེས་ལྷུན་གྲུབ་བཟོད་པ། དགེ་རྒན་བློ་བཟང་ངག་དབང་སོགས་བསམ་སྦྱོར་གཉིས་ཀྱིས་བསྟེན་ཏེ། གཞུང་ཆེན་གསན་གཟིགས་དང་ཐུགས་གཉེར་གནང་། གཞུང་གསར་འཛིན་གྲྭའི་སྐབས་མཁས་མང་དབུས་སུ་རིགས་ཆུང་སྦྱོར་ལམ་ཕྱིར་རྒོལ་གྱི་ཚོགས་བཞེངས་གནང་བས་ཀུན་གྱིས་བསྟོད་བསྔགས་ཀྱི་མེ་ཏོག་གཏོར། དགུང་ལོ་ཉེར་གསུམ་སྟེང་ལྷ་ལྡན་ནོར་གླིང་གཟིམ་ཆུང་དུ། ༧སྐྱབས་རྗེ་ཁྲི་བྱང་རིན་པོ་ཆེའི་དྲུང་ནས་ཚིགས་ཕྱི་མ་དགེ་སློང་གི་སྡོམ་པ་བཞེས། དགུང་ལོ་ཉེར་ལྔའི་སྐབས་བོད་ཀྱི་ཡ་ང་བའི་སྐྱོ་གར་གྱི་དབང་གིས་ ༡༩༦༠ ལོར་འཕགས་ཡུལ་དུ་ཕེབས་ཏེ་སྦག་ས་ཆོས་སྒར་ཐོས་བསམ་ཐར་འདོད་གླིང་དུ་བཞུགས་ནས། སེར་བྱེས་མཁན་ཟུར་རིན་པོ་ཆེ་བློ་བཟང་དབང་ཕྱུག་མཆོག་དང་། ཟོང་རིན་པོ་ཆེ་རྣམ་གཉིས་ཀྱི་དྲུང་ནས་འདུལ་ཊཱིཀ་ཉི་མའི་འོད་ཟེར་དང་རིན་ཆེན་ཕྲེང་བ། མཆིམས་མཛོད་སོགས་འདུལ་མཛོད་ཀྱི་གཞུང་ཆེན་ལྷག་མ་རྣམས་ལ་སློབ་གཉེར་དང་། སྦག་ས་ཆོས་སྒར་སློབ་གྲྭའི་རྣམ་པར་བསྒྱུར་རྗེས་དཔེ་ཁྲིད་དགེ་རྒན་གནང་། སེ་ར་ཆོས་སྒར་འཕགས་ཡུལ་ལྷོ་ཕྱོགས་སྦེལ་ཀོབ་ས་གནས་སུ་སྤོར་རྗེས། དགེ་ལྡན་ལུགས་བཟང་གཙུག་ལག་སློབ་གཉེར་ཁང་གི་གཏན་འབེབས་བཞིན། སློབ་དཔོན་དང་ལྷ་རམས་པའི་རྒྱུགས་སྤྲོད་རིམ་འབུལ་གྱིས་ ༡༩༧༨ ལོར་དགེ་བཤེས་ལྷ་རམས་པའི་མཚན་རྟགས་བཞེས། དེ་ནས་༧གོང་ས་མཆོག་གི་བཀའ་བཞིན་དཔལ་ལྡན་སྨད་རྒྱུད་གྲྭ་ཚང་དུ་ཞུགས་ཏེ། ད་ལྟའི་དགའ་ལྡན་ཁྲི་རིན་པོ་ཆེ་རི་རྫོང་སྲས་རིན་པོ་ཆེའི་ཞལ་སྔ་ནས། འགྲེལ་པ་བཞི་སྦྲགས་དང་། སྦས་དོན་ཀུན་གསལ། བསྐྱེད་རིམ་དངོས་གྲུབ་རྒྱ་མཚོ། རྫོགས་རིམ་རིམ་ལྔ་གསལ་སྒྲོན་སོགས་གསང་སྔགས་རྡོ་རྗེ་ཐེག་པའི་ཟབ་ཆོས་དུ་མ་གསན། ཕྱི་ལོ་ ༡༩༧༩ ལོར་ཊཱིཀྐའི་སྐྱོར་དཔོན་གནང་ནས་ཊཱིཀྐ་ལེའུ་གཉིས་པ་ནས་བརྒྱད་པའི་མཚམས་སྦྱོར་བར་བརྩི་བཞག་སྐྱོར་རྒྱུས་མཚོན་སྒྲིག་ལམ་གྱི་རིམ་པ་རྣམས་མི་ཉམས་གོང་འཕེལ་གནང་། ཕྱི་ལོ་ ༡༩༨༡ ལོར་༧གོང་ས་མཆོག་གིས་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་སྤྱི་བོར་ཕེབས་པ་དང་། ༧གོང་ས་མཆོག་གི་བཀའ་དགོངས་བཞིན་རྒྱུད་གྲྭ་པ་རྣམས་ཀྱི་ཆེད་དུ་སྔགས་དང་མཚན་ཉིད། རིག་གནས། སྐད་ཡིག་གཞན་སོགས་ཀྱི་སློབ་ཚན་གཏན་འབེབས་དང་། སློབ་གྲྭ་གསར་འཛུགས་གནང་། ཕྱི་ལོ་ ༡༩༨༤ ལོར་དཔལ་ལྡན་སྨད་རྒྱུད་གྲྭ་ཚང་གི་མཁན་ཁྲིར་ཕེབས་ཤིང་། འགྲེལ་པ་བཞི་སྦྲགས་དང་དཔལ་གསང་བ་འདུས་པའི་བསྐྱེད་རིམ། རྗེ་བཙུན་ཤེས་རབ་སེང་གེས་མཛད་པའི་ཊཱིཀྐ་ལེའུ་དང་པོ་ནས་བརྒྱད་པའི་མཚམས་སྦྱོར་བརྩི་བཞག་གནང་། དམ་པ་ཁོང་གིས་༧གོང་ས་མཆོག་གཙོ་བྱས་པའི་དམ་པ་མང་པོ་བསྟེན་ཏེ་དབང་ཁྲིད་མན་ངག་སོགས་གསན་བསམ་ཉམས་བཞེས་མཛད་པར་མ་ཟད། ༢༠༡༠ ལོར་བྱང་རྩེ་ཆོས་རྗེར་ཕེབས་ཤིང་། རྒྱུན་དུ་ཕྱི་ནང་གི་དོན་གཉེར་ཅན་མང་པོར་ལུང་ཆོས་མན་ངག་དང་། སེ་ར་ཐེག་ཆེན་གླིང་དུ་སློབ་གཉེར་པ་རྣམས་ལ་གཞུང་ཆེན་བཀའ་པོད་ལྔ་སྔགས་དང་བཅས་པའི་བཀའ་ཁྲིད་རྒྱུན་ཆད་མེད་པར་གནང་བཞིན་བཞུགས་པ་ལགས་སོ།།

ཤོག་ངོས་འདི་ཐེངས་ 898 བཀླགས་འདུག མཐའ་མའི་བསྐྱར་བཅོས། Mon, 31/08/2015, 11:23
ཚད་གཞི།:
(0 འོས་འཕེན། )
སྤྱི་ཚོགས་འབྲེལ་མཐུད་དྲྭ་གནས་ཁག :
སྡེ་ཚན་འདིའི་ནང་དུ་མང་། « དགའ་ལྡན་ལྔ་མཆོད་ཆེན་མོ་ངོ་སྤྲོད།